Ye ti Manda 16

Yanga so Mo Mu ti Sala na Nzapa

A lingbi mo sala nyen ti ga ndeko ti Nzapa? (1, 2)

Mo yeke mu tele ti mo kue na Nzapa tongana nyen? (1)

Na ngoi wa a lingbi mo kamata batême? (2)

Tongana nyen mo lingbi ti wara ngangu ti duti be-ta-zo na Nzapa? (3)

1. Ti ga mbeni ndeko ti Nzapa, a lingbi mo wara nzoni hingango ye na ndo tâ tene ti Bible (1 Timothée 2:3, 4), mä na bê na aye so mo manda awe (aHébreu 11:6), gbian bê ti mo teti asiokpari ti mo (Kusala 17:30, 31), na gbian lege ti fini ti mo. (Kusala 3:19) Na a lingbi ndoye ti mo teti Nzapa apusu mo ti mu tele ti mo mveni na lo. So aye ti tene na yâ sambela ti mo mveni, so mbeni zo ayeke na tele ni pepe, mo tene na lo so mo yeke mu tele ti mo mveni na lo ti sala ye so bê ti lo aye.​—Matthieu 16:24; 22:37.

2. Na peko ti so mo mu tele ti mo na Nzapa awe, a lingbi mo kamata batême. (Matthieu 28:19, 20) Batême asala si azo kue ahinga so mo mu tele ti mo mveni na Jéhovah awe. Tongaso, batême ayeke gi ti ala so ahinga ndo si ala lingbi ti mu yanga ti sala na Nzapa. Tongana mbeni zo akamata batême, a lingbi ayôro lo kue na yâ ti ngu teti mbeni kete ngoi.a​—Marc 1:9, 10; Kusala 8:36.

3. Na peko ti so mo mu tele ti mo na Nzapa awe, Jéhovah aku mo ti sala ye alingbi na zendo ti mo. (Psaume 50:14; Zo-ti-fa-tene 5:3, 4 [5:4, 5, NW]) Fade Diable atara ti kanga lege na mo ti sala na Jéhovah. (1 Pierre 5:8) Me ga ndulu na Nzapa na yâ sambela. (aPhilippien 4:6, 7) Manda Tene ti lo lâ oko oko. (Psaume 1:1-3) Duti lakue ndulu na kongrégation. (aHébreu 13:17) Na salango aye so kue, fade mo wara ngangu ti duti be-ta-zo na Nzapa. Tongaso teti lakue lakue mo lingbi ti sala aye so Nzapa ahunda na mo!

[Tene na Gbe Ni]