Ye ti Manda 4
Lege so Mo Lingbi ti Manda ti Manda Ye na Ndo Nzapa
Mo lingbi ti manda ye na ndo Jéhovah na dikongo Bible. Ando, Nzapa asoro ambeni zo ti sû abibe ti lo na mbeti. A hiri ambeti so Bible. Laso, e yeke manda ye na ndo Nzapa na dikongo Bible. Teti so a wara tene ti Jéhovah wala tokua ti lo na yâ ti Bible, a hiri ni nga Tene ti Nzapa. E lingbi ti mä na bê na ye so Bible atene teti Jéhovah atene mvene lâ oko pepe. ‘Nzapa alingbi sala mvene pepe.’ (aHébreu 6:18) A wara tâ tene na yâ Tene ti Nzapa.—Jean 17:17.
Bible ayeke mbeni oko ti akota matabisi ti ngele ngangu so Nzapa amu na e. A yeke tongana mbeni mbeti so mbeni babâ ti ndoye atokua na amolenge ti lo. A fa na e ye na ndo zendo so Nzapa amu ti gbian sese ti ga mbeni pendere ndo ti duti dä: paradis. A fa na e ye so lo sala giriri, ye so lo yeke sala fadeso, na ye so lo yeke sala ande kekereke teti amolenge ti lo so ayeke be-ta-zo. A mu nga maboko na e ti leke akpale ti e na ti wara ngia.—2 Timothée 3:16, 17.
A-Témoin ti Jéhovah ayeke andeko ti Nzapa; fade ala yeke mu maboko na mo ti gbu nda ti ye so Bible afa. Tene gi na ala so mo ye ti manda Bible. Ala yeke hunda nginza ndali ni pepe. (Matthieu 10:8) Nga, mo lingbi ti gue na abungbi ti aChrétien. A yeke sala abungbi ni na ando ti vorongo so a hiri ni aDa ti Royaume. Tongana mo gue na abungbi ti aChrétien, fade fade hingango ye ti mo na ndo Nzapa ayeke kono.
Mo lingbi ti manda ye na ndo Nzapa na lege ti aye so lo leke. Na tapande, Bible atene: “Nzapa acréé ayayu na sese.” (Genèse 1:1) Na ngoi so Jéhovah asala “ayayu,” lo leke lâ. Ye so aye ti fa nyen na e na ndo Nzapa? A fa na e so Jéhovah ayeke na kota ngangu. Gi lo oko si alingbi ti leke mbeni ye so ayeke ngangu tongana lâ. A fa nga na e so Jéhovah ayeke na ndara, teti a hunda ndara ti leke lâ, so ayeke tokua ndowa na lumière, na so alingbi ti mingo lâ oko pepe.
Ye so Jéhovah asala afa na gigi so lo ndoye e. Bi bê ti mo na ndo amara ti lê ti keke nde nde kue so ayeke na ndo ti sese. Jéhovah alingbi la ni ti mu na e gi mara ti lê ti keke oko, wala oko pepe. Nde na so, Jéhovah amu na e amara ti lê ti keke mingi so amara ni, konongo ni, nzoroko ni na nzerengo ni ayeke nde nde. Ye so afa so Jéhovah ayeke Nzapa so ayeke pepe gi na ndoye me nga lo mu ye mingi, lo bi bê nga lo yeke na nzobe.—Psaume 104:24.