Ye ti Manda 12

Ye Nyen Asi Tongana Zo Akui?

Kui ayeke ye so ague nde na fini. Kui ayeke tongana mbeni kota lango. (Jean 11:11-14) Awakinda alingbi ti mä ndo pepe, ti ba ndo pepe, ti sala tene pepe, wala ti bi bê na ndo ti mbeni ye oko pepe. (Zo-ti-fa-tene 9:5, 10) Lege ti vorongo ti wataka afa so awakinda ague na mbeni ndo ti yingo ti duti na tele ti akotara ti ala. A yeke pepe ye so Bible afa.

Azo so akui awe alingbi pepe ti mu maboko na e, na ala lingbi nga pepe ti sala sioni na e. Na ndo kue, azo amä na bê so salango ye teti akuâ nga na asadaka ayeke nzere ande na azo so akui awe. Ye so anzere na Nzapa pepe ngbanga ti so a luti na ndo ti mbeni oko ti amvene ti Satan. A lingbi nga ti nzere na awakinda pepe, teti ala yeke na fini pepe. A lingbi e sala mbito ti awakinda wala e voro ala pepe. A lingbi e voro gi Nzapa lo oko.—Matthieu 4:10.

Awakinda ayeke kiri ande na fini. Jéhovah ayeke zingo ande awakinda ti duti na fini na ndo ti sese so aga paradis. Ngoi so angbâ ti ga. (Jean 5:28, 29; Kusala 24:15) Nzapa alingbi ti zingo azo so akui awe legeoko tongana mo lingbi biani ti zingo mbeni zo na lango.—Marc 5:22, 23, 41, 42.

Bibe so atene e kui pepe ayeke mbeni mvene so Satan Diable asala si amu ndo kue. Satan na ayingo sioni ti lo asala si azo abi bê ti ala so ayingo ti awakinda angbâ na fini na ala si ayeke na gunda ti kobela na ambeni kpale nde. Ngoi na ngoi Satan ayeke handa azo na lege ti abango li na asuma. Jéhovah afâ ngbanga na ndo ti azo so agi lege ti sala tene na awakinda.—Deutéronome 18:10-12.