Lekengo akota diskur

YENGA oko oko, mingi ti akongregation ti aTémoin ti Jéhovah ayeke leke mbeni kota diskur na ndo mbeni tënë ti Mbeti ti Nzapa. Tongana mo yeke ancien wala serviteur ti mungo maboko, mo yeke fa polele so mo yeke mbeni nzoni wamungo diskur na gbele azo, mbeni wafango ye? Tongana a yeke tongaso, a lingbi ti hunda na mo ti mû mbeni kota diskur. Ekole ti Kusala ti aChrétien amû maboko na aita-koli saki mingi ti lingbi kue teti matabisi ti kusala so. Tongana mo yeke na kota diskur ti mû, a lingbi mo to nda ni na ndo wa?

Manda plan ni

Kozoni si mo to nda ti gi nda ti ye, diko plan ni na gbu li na ndo ni juska mo mä yâ ni nzoni. Bata na li ti mo kota tënë ni so ayeke li ti tënë ti diskur ni. A lingbi mo fa nyen na azo ni? Ye so mo zia na gbele mo ayeke nyen?

Hinga akete li ti tënë ni nzoni. Gi nda ti angbongboro tënë ni. Kamba wa ayeke na popo ti ala oko oko na kota li ti tënë ni? Na gbe ti kete li ti tënë ni oko oko, a yeke wara ambeni nzene nzene tënë. A kiri a zia na gbe ti anzene nzene tënë so aye so amû ngangu na ni. Bâ tongana nyen mbage oko oko ti plan ni atingbi tele na ti so aga kozo na lo, na a tingbi na ti so aga na peko ti lo. Bâ nga tongana nyen a mû maboko ti si na ye so diskur ni ayeke gi. Tongana mo gbu nda ti kota li ti tënë ni awe, ye so diskur ni ayeke gi nga tongana nyen angbongboro tënë ni amû maboko ti si na ye so, mo lingbi fadeso awe ti to nda ti leke diskur ti mo.

Kozoni kue, mo lingbi ti bâ so a yeke nzoni ti bâ diskur ti mo tongana akete diskur osio wala oku so a bungbi ni ti ga oko, na so oko ayeke na ngbongboro tënë oko. Leke ni oko na oko.

Plan so a mû ayeke gi gbakuru ti lekengo na diskur ni. A mû ni pëpe ti duti mbeti so mo yeke zia na gbele mo ti mû na diskur ti mo. A lingbi ti tene so plan ni ayeke tongana mbeni da so a ngbâ ti leke ni lekengo. A lingbi a leke amur ni, li ni, afenêtre ni, na a zia akungba na yâ ni si a lingbi ti ga da so zo alango dä nzoni.

Salango kusala na aversê

Jésus Christ na adisciple ti lo azia fango ye ti ala lani aluti na ndo Mbeti ti Nzapa (Luc 4:16-21; 24:27; Kus. 17:2, 3). Mo lingbi ti sala legeoko tongaso nga. A lingbi Mbeti ti Nzapa aduti gunda ti diskur ti mo. Ahon ti fa gi nda ti atënë ti plan ni nga tongana nyen ti sala ye alingbi na ni, gi ti hinga tongana nyen Mbeti ti Nzapa ayeda na atënë so, na fa ye ti mo na lege ti Bible.

Na ngoi so mo yeke leke diskur ti mo, gi nda ti aversê oko oko kue so ayeke na yâ plan ni. Bâ ye so angoro ni. A zia ambeni versê na yâ ni gi ti fa na mo ambeni tënë na ndo ni. A hunda pëpe ti diko wala ti sala tënë na ndo ala kue na ngoi ti mungo diskur ni. Soro ala so alingbi nzoni mingi na azo so ayeke mä mo ande. Tongana mo luti gi na ndo aversê so a mû na ndo plan ni, peut-être mo yeke ande na bezoin pëpe ti zia ambeni versê nde na ndo ni.

Nzoni ti diskur ti mo aluti gi pëpe na ndo wungo ti aversê so mo yeke sala na kusala, me na ndo pendere ti fango ye ni. Tongana mo yeke fa aversê, fa nga ngbanga ti nyen mo yeke sala kusala na ni. Mû ngoi ti fa tongana nyen ti sala kua na ni. Na pekoni so mo diko mbeni versê awe, zia Bible ti mo angbâ na zingo ni na ngoi so mo yeke sala tënë na ndo ni. Peut-être azo so ayeke mä mo ayeke sala ande tongaso nga. Tongana nyen mo lingbi ti zingo nzara ti ala teti tënë so mo yeke fa na ti mû maboko na ala ti wara ye ti nzoni kue na lege ti Tënë ti Nzapa? (Néh. 8:8, 12). Mo lingbi ti sala tongaso na fango nda ni, na mungo tapande nga na fango tongana nyen ti sala kua na ni.

Fango nda ni. Tongana mo yeke leke tele ti fa nda ti mbeni versê, hunda tele ti mo: ‘Versê ni aye ti tene nyen? Mbi yeke sala kusala na ni na yâ ti diskur ti mbi ngbanga ti nyen? Azo so ayeke mä mbi ande alingbi ti hunda tele ti ala na ye wa na ndo versê so?’ Mo lingbi ti gi ti bâ atënë so angoro ni, aye so asi na ngoi ni nga na ndo so aye ni asi dä. Gi nga ti bâ ye so atënë ti yâ ni aye peut-être ti tene nga na ye so ayeke na yâ bê ti zo so asû atënë so na gbe ti yingo ti Nzapa. A hunda ti gi nda ti aye. Mo yeke wara ande gbâ ti apendere sango na yâ ambeti so “ngbâa be-ta-zo na ti ndara” asigigi na ni (Mat. 24:45-47, NW ). Kpe ti fa nda ti ye oko oko kue na ndo versê ni, me fa ngbanga ti nyen mo hunda na azo so amä mo ti diko ni legeoko na mo: a yeke ngbanga ti so a lingbi na tënë so a yeke sala lisoro na ndo ni.

Mungo tapande. Nda ti atapande ayeke ti gue na azo so amä mo ti gbu nda ti ye nzoni ahon ti kozo wala ti mû maboko na ala ti dabe ala na mbeni tënë wala kpengba-ndia so mo sala tënë na ndo ni awe. Atapande ayeke mû maboko na azo ti gbu nda ti ye so mo tene na ala na ti tingbi ni na mbeni ye so ala hinga ni awe. A yeke ye so Jésus asala lani na yâ Fango ye ti lo na ndo ti Hoto, mbeni fango ye so azo ahinga ni mingi. Atënë tongana “andeke ti nduzu”, “langa ti ngonda”, mbeni “kete yanga [ti da]”, mbeni ‘da na ndo tênë’ nga na ambeni mara ti tënë tongaso asala si fango ye ti lo ayeke na ngangu, ayeke polele na zo alingbi ti girisa ni pëpe.​—Mat., chap. 5–7.

Fango tongana nyen ti sala kusala na ni. Ti fa nda ti mbeni versê na mungo tapande ndali ni ayeke fa ande ye na zo, me ti fa tongana nyen ti sala kusala na ni ayeke ye so aga na afuta. Tâ tënë, a yeke kungba ti azo so amä diskur ni ti sala ye alingbi na tokua ti Bible, me mo lingbi ti mû maboko na ala ti hinga nzoni ye so a lingbi ala sala. Tongana mo hinga biani so ala gbu nda ti versê ni na ala bâ tongana nyen a tingbi na tënë ni, mû ngoi ti fa na ala ngangu ni na ndo tënë ti mabe nga na ndo tambela ti zo. Gboto lê na ndo nzoni ti kengo abibe so ayeke na lege ni pëpe nga tambela so ague oko pëpe na tâ tënë so mo yeke sala tënë na ndo ni.

Na ngoi so mo yeke bâ tongana nyen ti sala kusala na aversê ni, dabe mo so azo ni alondo na ando nde nde na so dutingo ti ala ayeke nde nde. Na popo ti ala, a yeke wara azo so asala nzara ti tâ tënë ade ti ninga pëpe, amaseka, akangba nga na azo so ayeke tiri na akpale nde nde ti gigi. Sala si diskur ti mo alingbi tâ na aye so ayeke si na yâ fini ti zo. Kpe ti mû awango so aye ti fa so mo yeke bi bê gi na ambeni zo na popo ti ala so ayeke mä mo.

Adesizion ti wamungo diskur ni

Na ndo diskur ti mo, a mû ambeni desizion awe na place ti mo. A fa angbongboro tënë ni polele awe nga wungo ti ngoi so a mû teti ngbongboro tënë oko oko. A yeke na mo ti mû ambeni desizion nde. Mo lingbi ti soro ti mû ngoi mingi na ndo ti ambeni nzene nzene tënë ahon ambeni so ayeke na gbe ti ngbongboro tënë oko. Tene pëpe so a lingbi mo mû oko wungo ti ngoi ti bâ na anzene nzene tënë oko oko kue. Ye so alingbi ti pusu mo ti hon hio na ndo ti ambeni ye na ti mû gbâ ti aye so ahon ndo ti azo so ayeke mä mo. Tongana nyen mo lingbi ti hinga ye so a lingbi mo sala tënë mingi na ndo ni, nga ye so a lingbi mo sala tënë gi ndulu na ndo ni? Hunda tele ti mo: ‘Atënë wa ayeke mû ande maboko na mbi ti fa kota tënë ti yâ ti diskur ti mbi? Ala so wa alingbi biani ti ga na ye ti nzoni mingi na azo so ayeke mä mbi? Zingo mbeni versê wala mbeni tënë so andu ni ayeke buba ande yâ ti tambelango na peko ti tele ti atënë ti mbi?’

Sala kue ti kpe ti sala atënë so gere ni agbu sese nzoni pëpe wala atënë ti bê ti mo mveni. Même Molenge ti Nzapa, Jésus Christ, akpe lani ti sala ‘tënë ti bê ti lo mveni’. (Jean 14:10). Hinga so azo ayeke ga na abungbi ti aTémoin ti Jéhovah ti mä tënë na ndo Bible. Tongana a hinga mo tongana mbeni nzoni wamungo diskur, a yeke peut-être ngbanga ti so mo yeke sala lakue ti gboto lê na ndo mo mveni pëpe, me na ndo Tënë ti Nzapa. A yeke ndali ni si a yekia adiskur ti mo.​—aPhil. 1:10, 11.

Teti so mo mû mbeni senge plan mo sala si a ga mbeni ye so na lege ni mo yeke fa nda ti Mbeti ti Nzapa, fadeso a yeke ngoi ti tara peko ti diskur ti mo. A yeke nzoni ti sala ni na kota go. Kota ye ni ayeke ti hinga biani so atënë ni kue ayeke na li ti mo. Zia bê ti mo na yâ diskur ti mo, mû fini na ni na fa tâ tënë ni na bê kue. Kozoni na mungo diskur ni, hunda tele ti mo: ‘Mbi ye ti sala nyen?’ Na pekoni hunda: ‘Angbongboro tënë ni asigigi polele? Mbi sala biani si Mbeti ti Nzapa ayeke gunda ti diskur ti mbi? Angbongboro tënë ni ayeke mû gi peko ti tele nzoni? Diskur ni asala si zo akiri akono singila ti lo na Jéhovah nga teti aye so Lo mû? Atënë ti nda ni atingbi tâ gi na kota li ti tënë ni, ala fa na azo ni ye so a lingbi ala sala nga atënë ni apusu ala ti sala ni?’ Tongana akiringo tënë ni ayeke en, andâ mo yeke ndulu awe ti ‘fa hingango ye na gigi,’ teti nzoni ti kongregation ni nga teti gloire ti Jéhovah!​—aProv. 15:2.