Lege ti sala lisoro nzoni ahon ti kozo
A YEKE ngangu ka na mo pëpe ti sala lisoro na azo? Ti azo mingi, gi tënë ti salango lisoro na zo, mbilimbili zo so ala hinga lo pëpe, asala si ala yeke gi bê ti ala. Mara ti azo tongaso alingbi ti duti azo ti kamene. Peut-être ala yeke hunda tele ti ala: ‘Tënë ti nyen la mbi yeke tene ande? Mbi lingbi ti to nda ni tongana nyen? Tongana nyen mbi lingbi ti ngbâ ti sala lisoro ni?’ Ti azo so ayeke ndulu ti sala tënë na azo kue, na so agi bê ti ala mingi pëpe, ala ye peut-être ti sala tënë ahon amba ti ala. Kpale ti ala ayeke ti sala si amba ti ala asala tënë nga ti manda ti mä ye so azo ayeke tene. Tongaso e kue, atâa e yeke zo ti kamene wala pëpe, a lingbi e ngbâ ti maï kode ti salango lisoro.
To nda ni na yanga-da
Ti sala lisoro nzoni ahon ti kozo, ngbanga ti nyen ti to nda ni pëpe na yanga-da? Lisoro so akpengba zo alingbi ti sala biani si ngia aduti na yâ ti sewa.
Kota ye ti zi lege na mara ti lisoro tongaso ayeke ti bi bê mingi na ndo mba (Deut. 6:6, 7; aProv. 4:1-4). Tongana e yeke bi bê na azo, e yeke sala tënë na ala, na e yeke mä ala tongana ala ye ti tene mbeni ye. Mbeni kota ye ni ayeke ti duti na mbeni nzoni ye ti tene. Tongana e yeke na mbeni programme ti dikongo na ti mandango Bible lakue e mveni, fade e yeke duti na aye mingi so e lingbi ti kangbi ni na azo. Salango kusala na ndara na kete brochure Gingo nda ti Tënë ti Nzapa lâ oko oko alingbi ti sala si lisoro abâ gigi. Na yâ ti lango ni, peut-être e yeke na mbeni pendere ye so asi na fango tënë. Wala e diko peut-être mbeni ye so amû asango na zo wala so asala si zo ahe ngia. A lingbi e sala si a ga salango ye ti tele ti e ti kangbi aye tongaso na amba ti e na ngoi ti mbeni nzoni lisoro na sewa. Ye so ayeke mû ande nga maboko na e ti sala lisoro na azo na gigi ti sewa ti e.
Salango lisoro na zo so mo hinga lo pëpe
Azo mingi ayeke gi bê ti ala ti to nda ti lisoro na mbeni zo so ala hinga lo pëpe. Me ndali ti so ala ndoye Jéhovah nga na amba ti ala, aTémoin ti Jéhovah ayeke sala ngangu ti ala kue ti manda tongana nyen ti sala lisoro si ala kangbi tâ tënë ti Bible na ambeni zo. Ye nyen alingbi ti mû maboko na mo ti maï na yâ ye so?
Kpengba-ndia so ayeke na aPhilippien 2:4 ayeke kota ye. A wa e ti gi ye “teti [e] mveni pëpe, me [ti] gi ye teti ambeni zo nga.” Bâ ye so si: tongana mo tingbi lâ oko pëpe na mbeni zo kozo, lo yeke bâ mo tongana mbeni wande. Mo lingbi ti sala nyen si lo gi bê ti lo pëpe? Tongana mo ga ndulu na lo na ngia na yanga nga mo bala lo na wâ, ye so ayeke mû ande maboko. Me bâ ambeni ye nde nga.
Peut-être mo fâ yâ ti gbungo li ti lo. Tongana mo gi ti sala si lo sala lisoro na ndo ye so ayeke na li ti mo na mo bi bê pëpe na ye so ayeke na li ti lo, fade lo yeke yeda? Jésus asala ye wa tongana lo tingbi na mbeni wali na tele ti mbeni dungu na Samarie? Li ti wali ni ayeke lani na ndo ti tongo ngu. Jésus ato nda ti lisoro na lo na ndo ye so, na hio lo sala si a ga mbeni pendere lisoro ti yingo.—Jean 4:7-26.
Tongana mo hinga ti bâ ndo, mo nga kue mo lingbi ti hinga ye so li ti azo ayeke peut-être na ndo ni. Zo ni akpa zo so ayeke na ngia wala na vundu? Ngu ti lo ayeke mingi na lo lingbi peut-être pëpe ti sigigi na da? Aye afa na mo so amolenge ayeke na yâ ti da ni? Ye afa so zo ni ayeke zo ti mosoro wala lo yeke tiri ngangu ti wara aye so a lingbi lo wara lâ na lâ? Aye ti pendere ti yâ ti da ni wala aye ti baba so zo ni ayu afa so lo sambela mbeni nzapa? Tongana mo zia aye so na yâ akozo tënë ti mo, zo ni alingbi ti bâ so ye so anzere na lo anzere na mo nga.
Tongana mo tingbi na zo ni lê na lê pëpe na peut-être mo yeke mä gi go ti lo na peko ti yanga-da so akanga na clé, a lingbi tënë wa aga na li ti mo? Peut-être zo ni ayeke na yâ ti mbito. Mo lingbi ti mû ye so ti to nda ti lisoro na peko ti porte ni?
Na ambeni ndo, lege ayeke dä ti tene mo yôro zo na yâ ti lisoro na fango na lo ambeni ye na ndo ti mo mveni: ndo so mo londo dä, ngbanga ti nyen mo ga na yanga-da ti lo, ngbanga ti nyen mo mä na bê na Nzapa, ngbanga ti nyen mo to nda ti manda Bible lani na tongana nyen Mbeti ti Nzapa amû maboko na mo (Kus. 26:4-23). Biani, a lingbi mo sala ye so na ndara nga na ziango mbeni mbilimbili ye na gbele mo ti si dä. Ye so alingbi ti sala nga si zo ni atene na mo tënë na ndo lo mveni nga tongana nyen lo bâ aye.
Na ambeni kodoro, ti yamba agene ayeke na yâ mênë ti azo ni. Peut-être a yeke ngangu pëpe na azo ni ti tisa mo ti lï na ti duti. Tongana mo duti awe, zo ti da ni ayeke dengi mê ande na ye so mo yeke tene tongana mo hunda kozoni kue, na yekiango ndo, ye na ndo nzoni duti ti sewa ni nga tongana mo mä kiringo tënë ti lo na bê ti mo kue. Ambeni zo nde ayeke bi bê mingi ahon so na ndo agene. Tongaso, akozo tënë ti lisoro ni alingbi ti ninga. Na ngoi ti tenengo akozo tënë ni, azo ni alingbi ti bâ so aye so anzere na mo anzere na ala nga. Ye so alingbi ti gue ti tï na ndo mbeni nzoni lisoro ti yingo.
Ye ni ayeke duti tongana nyen, tongana azo mingi na ndo so mo yeke dä ayeke tene ayanga ti kodoro so ayeke nde na ti mo? Mo lingbi ti sala lisoro na ala tongana nyen? Tongana mo manda gi asenge tënë ti bala na ala na ayanga ti kodoro so, azo ni ayeke bâ ande so mo bi bê na ala. Ye so alingbi ti zi lege na lisoro.
Lege ti ngbâ ti sala lisoro
Ti ngbâ ti sala lisoro, bi bê na aye so ayeke na yâ ti li ti zo ni. Wa lo ti fa atënë ti bê ti lo tongana lo ye ti sala tongaso. Ahundango tënë so mo soro nzoni alingbi ti mû maboko. Ahundango tënë ti hinga tënë ti bê ti zo ayeke nzoni ahon atanga ni kue, ngbanga ti so mingi ni ala yeke pusu zo ti tene gi pëpe “en” wala “ên-ën”. Na tapande, na pekoni so mo fa mbeni kpale so agbu bê ti azo ti ndo ni, mo lingbi ti hunda: “Ti mo, ye wa ayeke na gunda ti ye so?” wala “Ti mo, yörô ni ayeke nyen?”
Tongana mo hunda mbeni tënë, dengi mê nzoni na kiringo tënë ni. Fa so mo yeke bi bê biani na salango mbeni tënë, na yengingo li ti mo wala na salango mbeni ye tongaso. Fâ tënë na yanga ti zo ni pëpe. Na bibe ti gi ti hinga abango ndo ti zo ni, dengi mê na ye so lo yeke tene. ‘A yeke nzoni zo oko oko azi mê ti lo hio ti mä; me a lingbi lo tene tënë hio pëpe.’ (Jacq. 1:19, Fini Mbuki, 2001 ). Tongana mo yeke kiri tënë, fa so mo yeke mä fade biani ye so lo yeke tene.
Me hinga so a yeke azo kue pëpe si ayeke kiri ande tënë na ahundango tënë ti mo. Ti ambeni zo, oko ye so ala lingbi ti sala ayeke gi ti sala lê ti ala wala ti he ngia kete awe. Ti ambeni nde, ala lingbi gi ti tene “en” wala “ên-ën”. Zia ye so aso bê ti mo pëpe. Kanga bê. Gi pëpe ti gbu zo ni na ngangu ti sala tënë. Tongana zo ni aye ti mä mo, sala kusala na lege so azi ti tene mo na lo akangbi ambeni tënë ti Bible. Zo ni alingbi ti bâ mo ande tongana mbeni kamarade. Tongaso, lo yeke duti ande peut-être ndulu ti fa atënë so ayeke na li ti lo na bê ti lo mveni.
Tongana mo yeke sala tënë na azo, leke ye ti kiri ti bâ ala teti peko. Tongana mbeni zo ahunda atënë mingi, kiri tënë na ambeni, me bata mbeni oko wala use teti ngoi ti peko. Tene na lo so mo yeke gue ti gi nda ti aye, na pekoni kangbi na lo aye so mo wara. Tongana lo mveni lo hunda tënë pëpe, mo lingbi ti hunzi tënë ti mo na mbeni hundango tënë so mo bâ so a yeke nzere ande na lo. Hunda na lo ti sala lisoro na ndo ni na ngoi ti peko. Mo lingbi ti wara gbâ ti atënë na yâ buku Comment raisonner à partir des Écritures, brochure Ye Wa Nzapa Ahunda na E? nga na andangba Tour ti Ba Ndo na Réveillez-vous!
Na amba ti e wamabe
Tongana a yeke kozoni ti mo la ti tingbi na mbeni Témoin ti Jéhovah, mo yeke mû li ni ti hinga lo? Wala mo yeke duti gi kpô? A lingbi ndoye so e yeke na ni na mbage ti aita ti e apusu e ti gi ti hinga ala (Jean 13:35). Mo lingbi ti to nda ni tongana nyen? Mo lingbi gi ti fa iri ti mo na ti hunda ti lo nga. Mingi ni, ti hunda na lo tongana nyen lo hinga tâ tënë ayeke zi lege na mbeni pendere lisoro na ayeke mû ande lege na ala ti hinga mba. Même tongana mo bâ so atënë ni ayeke sigigi hio na yanga ti mo pëpe, ngangu so mo sala ayeke fa na zo ni so mo yeke bi bê na lo, na ye so ayeke kota ye mingi.
Ye wa alingbi ti sala si mo wara mbeni pendere lisoro na mbeni zo ti kongregation ti mo? Fa so mo bi bê biani na lo nga na sewa ti lo. Bungbi ahunzi ade ti ninga pëpe? Sala tënë na ndo ti ambeni ye so mo bâ ayeke mû maboko na zo. Ye so alingbi ti ga na nzoni na ala use kue. Mo lingbi ti sala tënë ti mbeni pendere ye so mo wara na yâ andangba Tour ti Ba Ndo wala Réveillez-vous! A lingbi mo sala ye so pëpe gi ti pika bê ti azo wala ti tara hingango ye ti ala. Sala ni ti kangbi mbeni ye so mo bâ ayeke nzoni mingi. Mo lingbi ti sala tënë na ndo devoir so mbeni ayeke na ni peut-être na Ekole ti Kusala ti aChrétien, nga ti gi ti kangbi na popo ti ala atënë na ndo tongana nyen ti sala ni. Mo na azo alingbi ti kangbi nga aye so asi na fango tënë.
Biani, bingo bê ti e na azo ayeke gue mingi ni na e ti sala tënë na ndo azo, aye so ala tene na ala sala. Tënë ti ngia alingbi ti duti na yâ salango tënë ti e. Me a yeke kpengba ande zo? Tongana e bâ na nene ni wango ti Tënë ti Nzapa nga tongana a yeke ndoye ti Nzapa si apusu e ti sala ye, tënë ti yanga ti e ayeke kpengba ande biani azo.—aProv. 16:27, 28; aEph. 4:25, 29; 5:3, 4; Jacq. 1:26.
Kozoni si e gue na fango tënë, e yeke leke tele ti e. Ngbanga ti nyen ti leke pëpe mbeni pendere tënë ti lisoro ti kangbi ni na akamarade ti e? Tongana mo diko wala mo mä ambeni pendere tënë, bata na li ala so mo ye ti kangbi ni na azo. Tongana ngoi ayeke hon, mo yeke wara ande gbâ ti aye ti soro tënë na popo ni. Salango tongaso ayeke mû ande lege na mo ti tene pëpe gi atënë ti aye so ayeke si lâ na lâ. Ahon ye kue, zia salango tënë ti mo afa na gigi so mo bâ Tënë ti Nzapa na nene ni mingi!—Ps. 139:17.