Atënë so lê ni avulu

TI TENE mo fa atënë so ayeke na li ti mo nzoni, a lingbi mo sala tënë polele. Ye so mo ye ti tene ayeke ye so anzere peut-être, même mbeni kota ye, me kota mbage ni ayeke hon senge senge tongana azo agbu nda ti tënë ti mo ni nzoni pëpe.

Tongana azo agbu biani nda ti mbeni tënë pëpe, a yeke pusu ala pëpe ti sala ye. Atâa tongana mbeni zo ayeke na go so atoto ngangu na a yeke ngangu pëpe na ambeni zo ti mä lo, me tongana atënë ti lo asigigi polele pëpe, a yeke pusu ande ala pëpe ti sala ye. A yeke mo bâ mo tene lo yeke sala tënë na mbeni yanga ti kodoro nde, so azo so ayeke mä lo agbu nda ni pëpe (Jér. 5:15). Bible adabe ti e: “Tongana trompette atoto mbilimbili pëpe, fade zo nyen aleke tele ti lo teti bira? Tongaso i nga, tongana yanga ti i asala tënë mbilimbili pëpe, fade zo ahinga tënë ni tongana nyen? Fade i sala tënë na pupu senge.”​—1 aCor. 14:8, 9.

Ye wa la ayeke sala si tënë ti zo ayeke polele pëpe? Peut-être zo ni azi yanga ti lo nzoni pëpe. Anyama ti bio ti ngbangba so yâ ni akpengba mingi, nga aporo ti yanga so ayeke sala kua hio pëpe, alingbi ti duti na gunda ni.

Salango tënë na loro mingi alingbi nga ti sala si a yeke ngangu ti gbu nda ti tënë ti zo. A yeke tongana pikango kasete ti diskur so loro ni ahon tâ loro ni mveni. Atënë ni la mo yeke mä so, me kota mbage ni ahon senge senge.

Na yâ ti ambeni ye, zo ayeke sala tënë polele pëpe ndali ti so aye ti tele ti lo so amû lege na lo ti sala tënë atambela na lege ni pëpe. Me, même azo so ayeke na mara ti kpale tongaso alingbi ti sala ye mingi ti maï na lege so na mungo peko ti awango so ayeke na yâ ye ti manda so.

Ye oko, mingi ni lê ti tënë ti zo avulu nzoni pëpe ndali ti so lo tene peko ti tënë ni nzoni pëpe, lo bungbi atënë mingi ti tene ni oko. Ye so asala si a yeke ngangu ti gbu nda ni. Kpale ni alingbi ti ndu hulungo ndo ti ambeni mbage ti lê ti tënë oko oko wala ambeni mbage ti tënë so ayeke kota ye mingi. Tongana mbeni zo abungbi senge senge gbâ ti atënë ti tene ni oko, azo so ayeke mä lo alingbi ti gbu nda ti ambeni bibe so lo yeke fa, me a lingbi ala tara tarango ti hinga nda ti atanga ni. Salango tongaso alingbi ti buba yâ ti nzoni ti fango ye ti mbeni zo.

Lege ti sala tënë polele. Mbeni oko ti aye so amû lege ti sala tënë polele ayeke ti hinga tongana nyen a leke yâ ti atënë na yanga ti kodoro ti mo. Na yâ mingi ti ayanga ti kodoro, lê ti tënë oko ayeke na ambage nde nde, na tapande “to-nga-na”. A yeke diko nde nde ambage ti lê ti tënë oko oko. Na yâ mara ti ayanga ti kodoro tongaso, mingi ni mbage oko oko ti lê ti tënë oko oko ayeke toto na ngoi so mo yeke sala tënë, atâa so totongo ni ayeke nde nde. Tongana mo ye si lê ti tënë ti mo avulu ahon ti kozo, sala tënë yeke na sala ngangu ti tene mbage oko oko ti lê ti tënë oko oko. Na tongo nda ni, mo lingbi ti bâ so mo sala ye tâ na lege ni ahon ndo ni, me tongana mo tara pekoni fani mingi, yeke yeke atënë ti mo ayeke sua ande gi na bê ti ala. Ti tene atënë ti mo asua nzoni, mo lingbi peut-être ti sala si atënë ti mo aga hio na peko ti tele, me a lingbi mo kpe ye so tongana a ye ti vuko lê ti atënë ni.

Hange: ti sala tënë polele nzoni ahon ti kozo, mo lingbi peut-être ti tara peko ti salango tënë nga dikongo ye gi tâ na lege ni ahon ndo ni. Me zia pëpe si a ga kode ti mo ti salango tënë lâ na lâ. A lingbi ti kpa mbeni ye so ayeke tâ salango ye ti mo mveni pëpe, me ti ambeni zo nde.

Tongana go ti mo atoto mo bâ mo tene mbeni ye la akanga ndo ni, manda ti zia li ti mo na nduzu nga pusu gbe ti ngbangba ti mo yongoro na kate ti mo. Tongana mo yeke diko Bible, zia ni na nduzu mingi, si a hunda na mo pëpe ti ba li ti mo mingi na ngoi so mo yeke zi lê ti mo na ndo ti azo so ayeke mä mo ti ga na ni na ndo ti Bible ti mo. Ye so ayeke sala ande si atënë ti mo ayeke sigigi polele.

Mandango ti gi bê mingi pëpe alingbi nga ti maï salango tënë ti mo. Azo ahinga nzoni mingi so ngangu so gingo bê ayeke sala na yâ mi ti lê ti zo, wala na ndo ala so ayeke fa lege na hungo pupu ti zo, alingbi ti buba yâ ti nzoni tambela ti aye kue so ayeke sala si zo ayeke sala tënë. A lingbi ti sala si mango tele ayeke pëpe na popo ti bibe ti mo, aye ti tele ti mo so amû lege na mo ti sala tënë nga na hungo pupu ti mo. (A lingbi aye so atambela na popo ti ala nzoni nga na bê ti ala mveni.)

A lingbi yâ ti anyama ti bio ti ngbangba ti mo ayapu si ala lingbi ti yeda na fango lege ti li ti mo. A lingbi yâ ti aporo ti yanga ti mo nga ayapu. A lingbi ala duti ndulu ti sala kua hio si mo lingbi ti fa na gigi totongo ti atënë mingi so ayeke londo na yanga nga na lege ti go ti mo. Tongana gingo bê asala ngangu na ndo bio ti ngbangba nga na ndo aporo ti yanga, yanga ayeke zi nzoni pëpe, nga totongo ti atënë ni ayeke hon gi na popo ti apembe. Ye so ayeke sala ande si salango tënë ti mo ayeke kpengba kpengbango, ayeke toto mo bâ mo tene mbeni ye akanga ndo ni nga zo alingbi ti mä yâ ni pëpe. Ye oko, ti yapu yâ ti anyama ti bio ti ngbangba ti mo nga ti aporo ti yanga ti mo, a ye ti tene pëpe so a lingbi mo sala hange pëpe na lege so mo yeke sala na tënë. A lingbi mo zia ye so ague oko na kode ti salango si atënë atoto nzoni, ti tene lê ni avulu.

Na gingo ti hinga dutingo ti mo, mo lingbi ti bâ so a yeke nzoni ti diko ye na kota go. Bâ nzoni tongana nyen mo yeke sala kusala na apendere ye ti tele ti mo so amû lege na mo ti sala tënë. Mo yeke zi yanga ti mo nzoni mingi si atënë ayeke sigigi polele? A lingbi mo girisa pëpe so menga ti mo ayeke pëpe gi oko ye so amû lege na mo ti sala tënë, atâa so lo yeke mbeni oko ti aye so mo yeke sala kusala na ni mingi. Go, bio ti ngbangba ti gbe ni, aporo ti yanga, ami ti lê nga na ala ti go ayeke sala kota kusala. Tongana mo yeke sala tënë, a bâ so ami ti lê ti mo ayeke sala kua pëpe? Tongana a yeke tongaso, lege ayeke dä biani ti tene lê ti tënë ti mo avulu pëpe.

Tongana masini ti mungo na go ayeke dä, zia go ti mo na ndo ti kasete na ngoi so mo yeke sala tënë tongana ti so mo yeke sala ka na mbeni zo na fango tënë. Zia na ndo kasete ni teti ambeni penze-ngbonga atënë so mo tene tongana lisoro. Mango kasete ni alingbi ti mû maboko na mo ti hinga akpale kue so mo lingbi ti wara ti sala si ambeni tënë atoto polele. Na tapande, gi ti bâ wala mo yeke tene peko ti atënë ni nzoni, wala mo yeke sala si a toto mo bâ mo tene mbeni ye akanga ndo ni. Na pekoni, gi ti hinga nda ni. Mingi ni, mo lingbi ti hon ndo ti awokongo so na salango ye alingbi na awango so a mû na nduzu ge.

Mo yeke na mbeni kpale ti salango tënë? Tara ti zi yanga ti mo kota ahon ti kozo, na gi ti tene peko ti atënë ni nzoni mingi ahon ti kozo. Zia pupu na yâ ti fufu ti mo nga na pekoni sala tënë yeke. Salango tongaso amû lege awe na azo mingi so ayeke na akpale ti salango tënë ti sala tënë polele ahon ti kozo. Tongana mo yeke tene Zésus na place ti Jésus, pusu menga ti mo yongoro na pembe ti mo tongana mo tene peko ti s na z. Atâa so kpale ti mo alingbi ti hon kue pëpe, zia bê ti mo aduti kpô. Dabe mo so Jéhovah asoro Moïse, mbeni koli so ayeke lani peut-être na mbeni kpale ti salango tënë, ti fa akpengba tokua na azo ti Israël nga na Pharaon ti Egypte (Ex. 4:10-12). Tongana a yeke ye so mo ye la, lo yeke sala ande kusala na mo nga lo yeke zia deba nzoni na ndo ti kusala ti mo.