Salango tënë tongana lisoro

MINGI ni, tele ti azo ayeke yapu tongana ala yeke sala lisoro na akamarade. Atënë ti ala ayeke ga gi na bê ti ala mveni. Ambeni zo ayeke sala tënë gi na wâ; ambeni nde ayeke ti ala gi kpô. Ye oko, mara ti tâ salango tënë ti zo tongaso ayeke nzere na zo.

Me, tongana mo yeke ga ndulu na mbeni wande, a yeke na lege ni pëpe ti sala tënë na lo mo bâ mo tene mo hinga lo kozo wala tongana mbeni kamarade ti mo. Biani, na yâ ti ambeni kodoro, alisoro kue so azo ayeke sala na awande ayeke to nda ni na mbeni lege so a leke ni lekengo. A yeke gi na pekoni so azo ni asala tënë na yekiango mba awe si na ndara ala yeke sala tënë tongana ti so a yeke sala na lisoro.

Tongana mo yeke na ndo ti estrade, a lingbi mo sala nga hange na salango tënë ti mo. Salango tënë so a leke ni lekengo oko pëpe azi nengo tele so alingbi na mbeni bungbi ti aChrétien nga nene ti ye so a yeke tene. Na yâ ti ambeni yanga ti kodoro, a hunda ti sala kusala na ambeni tënë ti sala tënë na mbeni kangba, mbeni wafango ye, mbeni kota zo ti kodoro wala mbeni babâ wala mama. (Bâ atënë so a sala na kua na Kusala 7:2 nga 13:16.) Zo ayeke sala kusala na ambeni tënë nde ti sala tënë na koli wala wali ti lo wala na mbeni kota kamarade ti lo. A lingbi mo leke atënë so mo yeke tene na ndo ti estrade ahon ndo ni pëpe, me a lingbi a ne zo.

Ye oko, ambeni ye alingbi ti sala si yâ ti salango tënë ti mbeni zo akpa ti zo so afa atënë ti bê ti lo pëpe wala akpa mbeni ye so a leke ni lekengo. Mbeni oko ti aye so ayeke lekengo yâ ti atënë ni. Kpale ayeke londo tongana mbeni zo so ayeke na devoir ayeke gi ti tene tâ gi peko ti atënë so ayeke na yâ ti mbeti. Tënë so a sû ni na mbeti ayeke nde kete na ti so a tene ni tenengo. Tâ tënë, zo ayeke gue ka na yâ ti ambeti si lo yeke gi nda ti aye ndali ti devoir ti lo. Atënë ti mbeni diskur alingbi ti londo na yâ ti mbeni plan so ayeke na ndo ti mbeti. Me tongana mo fa akota tënë ni gi tongana ti so ala yeke na lê ti mbeti, wala mo diko ni dikongo na yâ ti mbeni plan na ngoi ti devoir ti mo, a yeke ngangu ti tene salango tënë ti mo aduti tongana lisoro. Ti sala tënë tongana lisoro, fa akota tënë na lege ti atënë ti mo mveni na kpe asalango tënë so yâ ni akpengba mingi.

Mbeni ye ni ayeke gbiango ti loro ti salango tënë ni. Mingi ni, tongana zo aluti lakue na mbeni mbilimbili ngoi na yâ salango tënë ti lo, na loro ni ayeke gi oko, ye so ayeke sala si salango tënë ti lo afa atënë ti bê ti lo na gigi pëpe na a leke ni lekengo. Na yâ lisoro so zo ayeke sala ka, lo yeke gbian loro ti salango tënë ti lo, nga, ngoi na ngoi, lo yeke luti a ninga wala kete.

Biani, tongana mo yeke sala tënë na gbâ ti azo, a lingbi mo sala tënë tongana lisoro nga mo kono totongo ti go ti mo. Sala nga tënë na ngangu nga na wâ ti tene azo adengi mê ti ala ti mä mo nzoni.

Ti sala tënë tongana lisoro na fango tënë, a lingbi salango tënë nzoni lâ oko oko aga ye ti tele ti mo. So aye ti tene pëpe so a lingbi mo manda mbeti a yo mingi si. Me a yeke nzoni ti gi kode ti salango tënë so ayeke sala ande si azo amä ye so mo yeke tene na yekiango ni. Na ye so na li, bâ wala a lingbi mo sala kusala na ndo aye so na yâ lisoro ti lâ oko oko.

1. Kpe atënë so ague nde mingi na andia ti yanga ti kodoro ni, wala so ayeke fa so mo yeke ti ambeni zo so tambela ti ala ague nde mingi na andia ti Nzapa. Ti sala ye alingbi na wango so ayeke na aColossien 3:8, kpe sioni yanga. Ye oko, a yeke sioni pëpe ti tene tënë tongana ti so azo ayeke tene ka lâ na lâ. Zo ayeke leke lekengo pëpe atënë so lo yeke tene ka lâ na lâ. Ye oko, atënë ti lo ayeke mû peko ti andia ti nzoni salango tënë.

2. Kpe ti mû gi a-oko tënë lakue ti fa na atënë nde nde kue so alingbi ti duti na yâ ti li ti mo. Manda ti sala kusala na atënë so afa polele ye so mo ye ti tene.

3. Leke polele na yâ ti li ti mo ye so mo ye ti tene si mo kpe ti kiri senge senge na ndo ti atënë ti mo. Na pekoni, to nda ti sala tënë.

4. e ti kanga ndo ti anzoni tënë so ayeke na yâ ti li ti mo na salango gbâ ti atënë. Tara tele ti mo ti tene polele, nga na mbeni lege so akpengba pëpe, tënë so mo ye ti tene azo adabe ti ala na ni.

5. Sala tënë na mbeni lege so afa so mo ne zo.