YE TI MANDA 6
Beku wa ayeke dä teti azo so akui awe?
1. Nzoni tënë wa ayeke dä teti azo so akui awe?
Na ngoi so lani Jésus asi na Béthanie so ayeke nduru na Jérusalem, kamarade ti lo Lazare akui asara lango osio awe. Jésus na aita ti Lazare, Marthe na Marie, ague na ndo so a lu kuâ ni dä. Hio tongaso, gbâ ti azo abungbi. Tara ti bâ nzerengo tere ti Marthe na Marie na ngoi so Jésus azingo Lazare na kuâ!—Diko Jean 11:21-24, 38-44.
Marthe ahinga kozoni awe nzoni tënë na ndo ti akuâ. Na lege ti Mbeti ti Nzapa, lo hinga so Jéhovah ayeke zingo ande azo so akui awe ti kiri ti duti na fini na ndo ti sese.—Diko Job 14:14, 15.
2. Dutingo ti azo so akui awe ayeke tongana nyen?
Nzapa atene na Adam: “Mo yeke fuku ti sese, na mo yeke kiri ande na fuku ti sese.”—GENÈSE 3:19.
A leke zo na pupu-sese (Genèse 2:7; 3:19). Mbeni âme so ayeke kui pëpe ayeke na yâ ti tere ti e pëpe. E yeke azo ti mitele, tongana e kui mbeni mbage ti tere ti e ayeke ngbâ na fini pëpe. Tongana e kui, mongoli ti e nga kue akui, na e hinga ye oko pëpe. A yeke ndani la na peko ti so a zingo Lazare na kuâ, lo sara tënë oko pëpe na ndo ti ye so asi na lo na ngoi so lo kui ndali ti so akuâ ahinga ye oko pëpe.—Diko Psaume 146:4; Zo-ti-fa-tene 9:5, 6, 10.
Nzapa ayeke sara sana na azo na lê ti wâ na peko ti kuâ ti ala? Teti so Bible afa so akuâ ahinga ye oko pëpe, a yeke polele so tënë ti enfer ti wâ ayeke tënë ti wataka so asara si azo ayeke bi tënë na ndo ti Nzapa gi senge senge. Tënë ti sarango sana na azo na yâ ti wâ ayeke mbeni ye so Nzapa aye ni oko pëpe.—Diko Jérémie 7:31.
Bâ vidéo Azo so akui ayeke na ndo wa?
3. Akuâ alingbi ti sara tënë na e?
Zo so akui alingbi ti sara tënë wala ti mä ndo pëpe (Psaume 115:17). Me ambeni sioni ange ayeke dä so alingbi ti sara tënë na azo ti fa so a yeke azo so akui awe so la ayeke sara tënë so (2 Pierre 2:4). Jéhovah ake na e ti gi ti sara tënë na akuâ.—Diko Deutéronome 18:10, 11.
4. A yeke zingo ande azo wa?
A yeke zingo ande azo kutu mingi mingi so ayeke na yâ ti dû ti kuâ ti wara fini na ndo ti sese. A yeke zingo même azo so lani ahinga Nzapa pëpe si ayeke sara aye ti sioni.—Diko Luc 23:43; Kusala 24:15.
Azo so a yeke zingo ala ande ayeke wara lege ti manda tâ tënë na ndo ti Nzapa nga ti fa so ala mä na bê na Jésus na lege so ala yeke mä yanga ti lo (Apocalypse 20:11-13). Azo so azingo si asara ye ti nzoni ayeke ngbâ ande na fini teti lakue lakue.—Diko Jean 5:28, 29.
5. So Jéhovah ayeke zingo akuâ afa nyen na e na ndo ti lo?
Nzapa atokua Molenge ti lo ti kui ndali ti e si beku ayeke dä teti azo so akui awe. Tongaso, zingongo azo na kuâ afa na e ndoye ti Jéhovah nga na kota nzobe ti lo. Na ngoi ti zingongo ti azo so akui, zo wa la mo yeke ku kungo ti bâ lo?—Diko Jean 3:16; aRomain 6:23.