Lo zia ngia na bê ti babâ ti lo nga na bê ti Jéhovah

Mo bâ molenge-wali so na lê ti foto so?— Lo yeke molenge ti mbeni koli so iri ti lo ayeke Jephté. Bible afa iri ti molenge-wali ni so ape, me e hinga so lo zia lani ngia na bê ti babâ ti lo nga na bê ti Jéhovah. Zia e manda ambeni ye na ndo ti lo nga na ndo ti babâ ti lo Jephté ni.

Jephté ayeke lani mbeni nzoni zo, nga lo mû ngoi ti lo mingi ti fa tënë ti Jéhovah na molenge ti lo. Lo yeke nga lani mbeni ngangu koli nga mbeni nzoni mokonzi. Ni la si azo ti Israël ahunda na lo ti mû maboko na ala ti gue ti tiri na awato ti ala.

Jephté asambela Nzapa ti mû maboko na lo ti kinda awato ti lo. Lo tene na Jéhovah so tongana lo kinda ala, si lo kiri na yanga-da ti lo, kozo zo so ayeke sigigi na yanga-da ti lo ti yamba lo, lo yeke mû zo ni so na Jéhovah. Zo ni so ayeke sara ande kua gi na yâ ti tabernacle ti Nzapa juska na kuâ ti lo. Tabernacle ayeke lani mbeni ndo so azo ti tango ni kâ ayeke gue dä ti voro Nzapa. Nzapa amä Jephté si lo kinda awato ti lo. Me na ngoi so lo kiri na yanga-da, zo wa la asigigi kozo ti yamba lo?—

Tâ gi molenge ti lo wani! Jephté adü gi lo lo oko. Me fadeso, lo la si Jephté adoit ti tokua lo na tabernacle ni. Ye so asara Jephté nzoni ti kete ape. Me lo tene tënë fade na Jéhovah awe. Ni la si gi na lê ni lê ni, molenge ti lo atene: ‘Papa, tongana ala tene tënë na Jéhovah awe, ala sara gi ni.’

Mawa asara nga molenge ti Jephté ni, ngbanga ti so, na tabernacle ni kâ ande, lo lingbi ti mû koli ape nga ti dü molenge ape. Na bê ti lo, lo ye gi ti sara ye ague oko na tënë so babâ ti lo atene na Jéhovah so. Lo ye nga ti zia ngia na bê ti Jéhovah. So la ayeke kota mingi na lê ti lo ahon ti mû koli wala ti dü molenge. Tongaso, lo zia da ti babâ ti lo, lo gue lo sara na Jéhovah na yâ ti tabernacle ni juska na kuâ ti lo.

Na mo, so lo mä yanga ti babâ ti lo so, a nzere na babâ ti lo ni?— A nzere nga na Jéhovah?— Biani, a zia ngia na bê ti ala. Tongana mo sara ye tongana ti molenge ti Jephté so, mo mä yanga nga mo ye Jéhovah, mo nga kue mo yeke zia ande ngia mingi na bê ti babâ na mama ti mo nga na bê ti Jéhovah.