Use miracle so lo sara na Cana

Na peko ti so lo sara lango use tongaso na Samarie awe, Jésus akiri na kodro ti lo. Atâa so lo fa tënë mingi na Judée, Jésus akiri na Galilée ti wu tere pëpe. Nde na so, lo komanse ti sara kota kua ti fango tënë na ndo so lo kono dä. Lo ku lani pëpe ti tene a yamba lo nzoni, ngbanga ti so lo Jésus ni wani, lo tene: “A yeke ne mbeni prophète na kodro ti lo wani ape.” (Jean 4:44). Ahon ti tene adisciple ti lo angbâ na tere ti lo, ala kiri na yanga-da ti ala na tere ti asewa ti ala nga na angbene kua ti ala.

Tënë wa la Jésus akomanse ti fa ni lani? Lo yeke fa lani tënë, lo tene: “Royaume ti Nzapa aga nduru awe. Ala changé bê ti ala, na ala mä na bê na nzoni tënë.” (Marc 1:15). Azo abâ lani fango ye ti lo ni tongana nyen? Gbâ ti azo ti Galilée ayeda na tënë ti Jésus ni na ala gonda lo. A yeke gi ngbanga ti tënë ni so oko ape. A yeke nga ngbanga ti so mingi ti ambeni zo ti Galilée ni abâ amiracle so Jésus asara lani na ngoi so ala nga kue ague lani na matanga ti Pâque na Jérusalem, na anze so ahon kozoni.—Jean 2:23.

Na mbage wa ti Galilée Jésus akomanse kota kua ti lo ti fango tënë? Na bango ni, a yeke na Cana, place so lani si na ngoi ti mbeni matanga ti mariage lo sara si ngu aga vin. Tongana lo gue kâ lani ti fani use ni, Jésus amä tënë ti mbeni molenge-koli so tere ti lo ason na so lo yeke gue ti kui. Molenge-koli ni ayeke molenge ti mbeni zo ti kua ti Hérode Antipas, Gbia so na pekoni ayeke mû ande yanga ti tene a dë go ti Jean Baptiste. Kota zo so amä so Jésus alondo na Judée ti gue na Cana. Tongaso, koli ni alondo na kodro ti lo na Capernaüm, lo gue ti bâ Jésus na Cana. Lo tene na mawa na Jésus, lo tene: “Seigneur, ga hio si ndali ti kete molenge ti mbi ni akui.”—Jean 4:49.

Jésus akiri tënë na koli ni na mbeni lege so adoit ti sara si li ti lo akpe kue. Jésus atene na lo: “Mo gue, molenge ti mo ti koli ayeke na fini.” (Jean 4:50). Zo ti kua ti Hérode ni amä na bê na tënë ti Jésus, na lo tourné lo kiri na kodro ti lo. Na lege ti kiringo ni, lo wara tere na angbâa ti lo, so tere ti ala ayeke dö dongo ti fa na lo mbeni nzoni sango. Molenge ti lo ni angbâ na fini na tere ti lo akaï awe! Ti tingbi atënë ni, lo hunda ala ti hinga l’heure so tere ti molenge ni akaï na ni.

Ala kiri tënë, a tene: “A yeke biri nduru na ngbonga mbasambala si kobela so asara si tere ti molenge ni amû wâ mingi akaï.”—Jean 4:52.

Zo ti kua ni abâ so ye ni apassé tâ gi na ngoi so Jésus atene na lo atene: “Molenge ti mo ti koli ayeke na fini.” Na pekoni, koli so, so mosoro ti lo asara si lo yeke na gbâ ti angbâa so, lo na azo ti da ti lo kue aga adisciple ti Christ.

A ga lege use awe la Jésus asara amiracle na Cana. Kozo ni, lo sara si ngu aga vin, na use ni lo ngbâ ayo, akilomètre 26 tongaso, me lo sava mbeni molenge-koli. A yeke gi amiracle so lo sara lani kue la ape. Me savango zo ti use ni so ayeke kota mingi ngbanga ti so a fa so na kiringo ti lo na Galilée lo yeke biani mbeni prophète ti Nzapa. Me juska ndo wa la si ‘a yeke ne ande prophète ni so na kodro ti lo wani’?

E yeke hinga ni na ngoi so Jésus ague ande na Nazareth. Me nyen la ayeke ku lo kâ?