MBAGE 3
Tongana bê ti e ason—Tongana e yeke na “tënë ti dema”
“Mbeni ita-wali ti yâ ti congrégation ti mbi abi tënë na li ti mbi senge senge, lo tene mbi la mbi nzi nginza ti lo. Ambeni ita so amä tënë ni na yâ ti congrégation nga ayôro yanga ti ala dä. Na nda ni, ita-wali ni atene na mbi so ni mä mbeni tënë so afa so tënë ayeke na li ti mbi ape. Atâa so lo hunda lani pardon, mbi tene na yâ ti bê ti mbi so mbi yeke pardonné lo lâ oko ape ndali ti ye so lo sara so.”—Linda.
MARA ti ye so asi na Linda so asi na mo awe? Bê ti mo ason mingi awe ndali ti aye so mbeni ita asara na mo? A yeke ye ti mawa ti bâ so, sarango ye ti ambeni ita asara vundu na amba ti ala nga asara si ala voro Jéhovah tongana ti kozo ape. Mo kue a si na mo awe?
Mbeni ye alingbi ti “kangbi e na ndoye ti Nzapa”?
Ti tâ tënë ni, a lingbi ti duti ngangu mingi na e ti pardonné mbeni ita so ason bê ti e. Me, a lingbi aChrétien andoye tere na popo ti ala (Jean 13:34, 35). Tongana mbeni ita asara ye na e na lege ni ape, vundu ayeke sara e mingi nga bê ti e ayeke son ngangu.—Psaume 55:13.
Biani, Bible atene so na ambeni ngoi aChrétien ayeke na “tënë ti dema” na tere ti amba ti ala (aColossien 3:13). Atâa so kue, tongana ye tongaso asi na e wani, e lingbi ti bâ so a yeke ngangu mingi ti hon ndo ni. Nyen la alingbi ti mû maboko na e? Zia e bâ ambeni fango ye ti Bible ota:
Babâ ti e ti yayu ahinga ye kue. Jéhovah ayeke bâ ye kue so ayeke passé, même aye so a sara na e na lege ni ape nga na apasi ti pekoni (aHébreu 4:13). Na ndo ni, lo yeke bâ mawa ti e na ngoi so e yeke bâ pasi (Ésaïe 63:9). Lo yeke zia lege lâ oko pëpe na ‘ye ti vundu wala ye ti mawa’ wala mbeni ye nde, wala même mbeni wakua ti lo, “ti kangbi e na ndoye ti Nzapa”. (aRomain 8:35, 38, 39). A lingbi e nga kue e zia pëpe si mbeni ye wala mbeni zo akangbi e na ndoye ti Nzapa.
Ti pardonné zo aye ti tene pëpe ti kanga lê na ndo ti sioni ye so lo sara. Tongana e pardonné aita so ason bê ti e, aye pëpe ti tene so e bâ aye so ala sara na e so tongana senge ye, e yeda na ni, e tene so a sara ye ape nga e kanga lê na ndo ni. Girisa pëpe so Jéhovah ayeda lâ oko pëpe na azo so asara siokpari, me lo pardonné ala tongana lo bâ so mbeni nzoni raison ayeke dä ti sara ni (Psaume 103:12, 13; Habakuk 1:13). Tongana Jéhovah awa e ti pardonné amba ti e, lo ye ti tene e sara ye tongana lo. “Ngonzo ti Lo ayeke teti lakue pëpe.”—Psaume 103:9; Matthieu 6:14.
Tongana e bata ngonzo na bê ape, e yeke sara nzoni na e wani. Na lege wa? Tara ti bâ ye so. Mo yô mbeni tênë na maboko ti mo, peut-être so ane mingi ape. A lingbi ti duti ngangu na mo ape ti yô ni teti kete ngoi. Me nyen la ayeke si tongana mo yô ni aninga? Mo lingbi ti yô ni teti ngoi oke? Gi na yâ ti ambeni minute? L’heure oko? Ahon so? Kite ayeke dä ape so maboko ti mo ayeke fatigué mingi. Biani, nengo ti tênë ni ayeke changé ape. Tongana mo yô ni aninga, a yeke ne mo mingi. Ngonzo nga ayeke tongaso. Tongana e bata ngonzo na bê aninga mingi, même gi kete ngonzo, a yeke sara sioni na e mingi. A yeke senge ape la Jéhovah awa e ti bata ngonzo na bê ape. Biani, tongana e bata ngonzo na bê ape, e yeke sara nzoni na e wani.—aProverbe 11:17.
Tongana e bata ngonzo na bê ape, e yeke sara nzoni na e wani
“A yeke lani mo bâ mo tene Jéhovah wani la ayeke sara tënë na mbi”
Aye wa la amû maboko na Linda ti bata ngonzo na bê ape na ngoi so mbeni ita ason bê ti lo? Mbeni ye so amû maboko na lo ayeke so lo gbu li na ndo ti aversê so awa e ti pardonné amba ti e (Psaume 130:3, 4). Bê ti Linda adö na ngoi so lo hinga so tongana e pardonné amba ti e, Jéhovah kue ayeke pardonné e (aÉphésien 4:32–5:2). Atënë so andu bê ti lo lani mingi, lo tene: “A yeke lani mo bâ mo tene Jéhovah wani la ayeke sara tënë na mbi.”
A si na mbeni ngoi, Linda asara ngonzo na tere ti ita-wali ni encore ape. Lo pardonné ita-wali ni nga fadeso ala ga kamarade. Linda angbâ ti voro Jéhovah. Hinga biani so Jéhovah ayeke mû maboko na mo ti sara nga tongaso.