Dabe ti mo na wali ti Lot

Lot asara kodro ndo oko na Abraham, so ayeke ita ti babâ ti lo na kodro ti Canaan. Abraham na Lot ayeke na gbâ ti anyama na ndo ayeke mingi ndali ti ala kue ape. Abraham atene na Lot: ‘E lingbi pëpe ti duti aninga place oko. Pardon, soro ndo so mo ye ti gue dä, na mbi yeke gue na mbeni mbage ni.’ Abraham asara ye na kion ape, ni la ape?

Lot abâ mbeni pendere ndo so ayeke nduru na mbeni gbata so a iri ni Sodome. Ngu na apere ayeke kâ mingi. Tongaso, lo soro ndo ni so na lo na sewa ti lo ague kâ.

Azo ti gbata ti Sodome nga na ti Gomorrhe so ayeke nduru na ni ayeke sioni mingi. Ala yeke tâ sioni mingi, a sara si Jéhovah amû desizion ti futi azo ti agbata ni. Me Nzapa aye ti sö Lot na sewa ti lo, tongaso lo tokua a-ange use ti tene na ala: ‘Ala londo, ala zia gbata so ala hon, Jéhovah aye ti futi gbata ni so.’

Lot ahon hio ape. Lo ngbâ ti sara gï ye yeke yeke. Tongaso, a-ange ni agbu maboko ti Lot, ti wali ti lo nga na ti amolenge ti lo ti wali use, ala sigi na ala hio na gigi ti gbata ni, ala tene: ‘Kpe si ala bata fini ti ala! Ala bâ ndo na peko ape. Tongana ala bâ ndo na peko, ala yeke kui.’

Na ngoi so ala si na yâ ti gbata so a iri ni Zoar, Jéhovah asara si soufre na wâ so alondo na yayu atï na ndö ti gbata ti Sodome na ti Gomorrhe. A futi agbata use so kue kue kue. Wali ti Lot ake yanga ti Jéhovah na lo bâ ndo na peko, na lo ga statue ti ingo. Me, ye ti sioni asi na Lot na amolenge ti lo ti wali ape ndali ti so ala mä yanga ti Jéhovah. Ala doit lani ti sara vundu mingi ndali ti so lo ke yanga so. Me, ala yeke na ngia so ala sara ye alingbi na andia ti Jéhovah.