Ye ti ngangu bale-oko ni

Moïse atene na Pharaon so ni yeke gi ti ga ti bâ lo encore ape. Me kozoni si Moïse ahon, lo tene na Pharaon, lo tene: ‘Na bê ti bï, akozo molenge kue ti kodro ti Égypte ayeke kui ande, ti londo na kozo molenge ti Pharaon ti si na kozo molenge ti wali so ayeke ngbâa.’

Jéhovah atene na azo ti Israël ti tene ala te mbeni kobe so ayeke nde. Lo tene: ‘Ala fâ koli-taba ti ngu oko wala koli-ngasa, na ala sara mênë ni na terê ti cadre ti porte ti ala. Ala zö nyama ni na ala te ni legeoko na mapa so a sara na levure ape. Ala yü bongo na poro na ala duti nduru ti hon. Na bï so mbi yeke zi ala.’ Tara ti bâ tongana nyen la si terê ti azo ti Israël anzere lani!

Na bê ti bï, ange ti Jéhovah ague na da ti azo ti Égypte kue. Na ada so a sara mênë na terê ti cadre ti porte ni ape, akozo molenge ni akui. Me ange ni ahon na ndö ti ada so a sara mênë na terê ti cadre ti porte ni. Na yâ ti afami oko oko ti azo ti Égypte, atâa a yeke azo ti mosoro wala awayere, azo kue aperdre mbeni molenge oko. Me mbeni molenge oko ti azo ti Israël akui ape.

Même molenge ti Pharaon wani kue akui. Pharaon apeut ti kanga bê na ti so ni so encore ape. Hio, lo tene na Moïse na Aaron, lo tene: ‘Ala londo, ala hon hio. Ala gue ala voro Nzapa ti ala ni. Ala mû anyama ti ala, ala hon!’

Na gbe ti nze so asigi kota, azo ti Israël ayeke tambela ti sigi na yâ ti Égypte, ala hon fami na fami nga mara na mara. Akoli kue ayeke lani 600 000, nga na gbâ ti awali na amolenge na ndö ni. Ambeni zo nde nga kue ague legeoko na ala tongaso si ala nga kue alingbi ti voro Jéhovah. Fadeso, azo ti Israël awara liberté awe!

Ti tene ala dabe ti ala na ye so Jéhovah asara ndali ti ala so, ala yeke te ande mara ti kobe so ayeke nde so ngu oko oko. A yeke ye so a iri ni lani Pâque.