Fini mokonzi nga na ambeni ngangu wali use

Josué akui na ngu 110 na peko ti so lo fa lege na mara ti Jéhovah teti angu mingi. Na ngoi kue so lo yeke lani na fini, azo ti Israël avoro Jéhovah. Me na peko ti so Josué akui, ala komanse ti voro ayanda tongana ti azo ti Canaan. Teti so mara ti Israël amä lo encore ape, Jéhovah azia lege na mbeni gbia ti Canaan so iri ti lo ayeke Jabin ti sara pasi na ala. Azo ti Israël atoto ti tene Jéhovah a-aidé ala. Tongaso, Jéhovah amû na ala mbeni fini mokonzi, so iri ti lo ayeke Barak. Lo yeke aidé ande azo ni ti kiri na Jéhovah.

Déborah, so ayeke mbeni prophète-wali, atokua ndo na Barak. Lo yeke na mbeni tënë ndali ti lo, na tënë ni alondo na Jéhovah. Lo tene: ‘Mû akoli 10 000, na ala gue atingbi na aturugu ti Jabin na ngu ti Kishon. Kâ, ala yeke sö benda ande na ndö ti Siséra, so ayeke mokonzi ti aturugu ti Jabin.’ Barak atene na Déborah: ‘Mbi yeke gue gï tongana mbi na mo la e gue.’ Déborah angbâ atene: ‘Mbi na mo la e yeke gue. Me hinga so a yeke mo la mo yeke fâ ande Siséra ape. Jéhovah atene so a yeke mbeni wali la ayeke fâ ande lo.’

Déborah ague legeoko na Barak na aturugu ti lo na Hoto ti Tabor ti leke terê ti ku na bira ni. Tongana Siséra amä tënë ni, lo bungbi apuse ti bira nga na aturugu ti lo na popo-hoto so ayeke na mbage ti gbe ni. Déborah angbâ atene na Barak: ‘Laso, Jéhovah ayeke sara si mo sö benda.’ Barak na akoli 10 000 so adescend hoto ni ti gue ti tingbi na aturugu ti Siséra.

Jéhovah angbâ asara si ngu ti Kishon asuku. Gere ti apuse ti bira ti Siséra akale na yâ ti popoto. Siséra adescend na yâ ti puse ti bira ti lo ni na lo tï na loro. Barak na aturugu ti lo asö benda na ndö ti aturugu ti Siséra, me Siséra akpe! Lo kpe lo gue lo honde terê ti lo na yâ ti tente ti mbeni wali so iri ti lo ayeke Jaël. Jaël amû na lo lait lo nyon na lo bi couverture na ndö ti lo. Teti so Siséra afatigué, lo tï na lango. Na pekoni Jaël ahara yeke lo gue na terê ti lo na lo pika piquet ti tente na yâ ti li ti lo. Lo kui.

Barak aga ti gi peko ti Siséra. Jaël asigi na yâ ti tente ti lo na lo tene: ‘Ga mo lï. Mbi yeke fa na mo zo so mo yeke gi lo so.’ Barak angbâ alï, na lo bâ kuâ ti Siséra so alango na sese. Barak na Déborah ahe bia ti mû gonda na Jéhovah ndali ti so lo sara si azo ti Israël asö benda na ndö ti awato ti ala. Mara ti Israël aduti na siriri teti ngu 40 na pekoni.