Jéhovah asara tënë na Samuel

Kota prêtre Éli ayeke na amolenge ti koli use so ayeke sara kua tongana aprêtre na yâ ti tabernacle. Iri ti ala ayeke Hophni na Phinéhas. Ala kpe andia ti Jéhovah ape, na ala yeke sara ye na azo na lege ni oko ape. Tongana azo ti Israël ague na asacrifice na Jéhovah, Hophni na Phinéhas ayeke mû anzoni morceau ti nyama ni ndali ti ala wani. Éli amä tënë ti ye so amolenge ti lo ayeke sara so, me lo zi yanga dä oko ape. Jéhovah ayeke zia ande si ye ni so angbâ gï ti gue tongaso?

Atâa so Hophni na Phinéhas ayeke kota zo mingi na Samuel, Samuel amû sioni tapande ti ala ape. Sarango ye ti Samuel anzere na Jéhovah. Na mbeni bï, na ngoi so Samuel ayeke lango, lo mä mbeni go so airi lo na iri ti lo. Lo londo, lo mû loro lo gue na mbage ti Éli na lo tene: ‘Mbi la!’ Me Éli atene: ‘Mbi iri mo ape. Kiri mo lango.’ Samuel akiri ague alango. Na pekoni, mara ti ye ni so asi encore. Na ngoi so Samuel amä go ni ti fani ota ni, Éli aga ti hinga so a yeke Jéhovah la ayeke iri Samuel so. Lo tene na Samuel lo tene tongana lo mä go ni so encore, a lingbi lo tene: ‘Jéhovah, sara tënë. Wakua ti mo ayeke mä mo.’

Samuel akiri ague alango. Mo ye ti bâ, lo mä mbeni go airi lo: ‘Samuel! Samuel!’ Lo kiri tënë, lo tene: ‘Sara tënë, mbi wakua ti mo mbi yeke mä mo.’ Jéhovah atene na lo, atene: ‘Tene na Éli so mbi yeke punir lo na sewa ti lo. Lo hinga bien so amolenge ti lo ti koli ayeke sara ye so ayeke na lege ni ape na yâ ti tabernacle ti mbi, me lo zi yanga na ndö ni ape.’ Na ndade ni, Samuel azi ayanga-da ti tabernacle ni tongana ti so lo yeke sara ka. Mbeto asara lo ti tene na kota prêtre ye so Jéhovah atene na lo so. Me Éli airi lo na lo hunda lo: ‘Molenge ti mbi, tënë ti nyen la Jéhovah atene na mo? Tene ni kue na mbi.’ Tongaso Samuel atene tënë ni kue na lo.

Tongana Samuel ayeke kono, Jéhovah angbâ ti fa lege na lo. Azo kue na yâ ti kodro ti Israël ahinga so Jéhovah asoro Samuel ti duti mbeni prophète nga juge.