Mbeni tara so asi na Hoto ti Carmel

Gbâ ti asioni gbia akomande na ndö ti amara bale-oko ti royaume ti Israël. Na popo ti agbia so kue Achab la ayeke lo so ayeke sioni mingi ahon atanga ni kue. Lo sara mariage na mbeni sioni wali so avoro Baal. Iri ti lo ayeke Jézabel. Achab na Jézabel asara si vorongo Baal amû ndo na yâ ti kodro ni nga ala fâ aprophète ti Jéhovah. Nyen la Jéhovah asara? Lo tokua prophète Élie ti tene mbeni tokua na Achab.

Élie atene na Gbia Achab so, ndali ti aye ti sioni so lo sara, ngu ayeke pika na Israël ape. Ahon ngu ota, kobe ti yaka asigi ape na nzara ahon ndö ti azo ni. Na pekoni, Jéhovah atokua Élie ti kiri ti bâ Achab. Gbia ni atene: ‘Mo yeke mbeni zo ti gango na kpale! Faute ni kue ayeke ti mo.’ Élie atene: ‘Mbi la mbi sara pëpe si ngu-nzapa apika ape. A yeke ala la asara ni na vorongo Baal. E yeke sara mbeni ye. Bungbi azo nga na aprophète ni ndo oko na ndö ti Hoto ti Carmel.’

Azo ni abungbi na ndö ti hoto. Élie atene: ‘Ala soro. Tongana Jéhovah la ayeke tâ Nzapa, ala mû peko ti lo. Tongana a yeke Baal, ala mû peko ti lo. Zia e bâ wala zo wa la ayeke tâ Nzapa ni. Zia aprophète ti Baal so ayeke 450 so aleke mbeni ye ti mû na sandaga na ala iri ndo na nzapa ti ala ni, mbi nga mbi yeke leke ti mbi mbeni ye ti mû na sandaga na mbi yeke iri ndo na Jéhovah. Nzapa so ayeke sara si wâ atï na terê ti sandaga ni la ayeke tâ Nzapa.’ Azo ni ayeda.

Aprophète ti Baal aleke ye so ala ye ti mû na sandaga. Na yâ ti lango ni kue ala iri nzapa ti ala: ‘Baal, kiri tënë na e!’ Na ngoi so Baal akiri tënë ape, Élie ahe ala. Lo tene na ala: ‘Ala iri lo ngangu. Peut-être lo yeke lango, na a hunda ti tene mbeni zo azingo lo.’ Juska na lakui, aprophète ti Baal angbâ ti iri ndo. Me zo oko akiri tënë na ala ape.

Élie azia sandaga ti lo na ndö ti gbalaka na lo tuku ngu na ndö ni. Na pekoni lo sambela, lo tene: ‘Jéhovah, pardon zia azo ti mo ahinga so mo yeke tâ Nzapa.’ Hio, Jéhovah atokua wâ so alondo na nduzu agbi sandaga ni. Azo ni adekongo: ‘Jéhovah ayeke tâ Nzapa!’ Élie atene: ‘Ala zia aprophète ti Baal akpe pëpe!’ Na lango ni so, a fâ aprophète ti Baal 450.

Na ngoi so Élie abâ mbeni kete mbinda so ayeke na lê ti nduzu na ndö ti kota ngu, lo tene na Achab: ‘Kota ngu-nzapa ayeke ga. Kanga puse na terê ti ambarata ti mo, na mo gue na yanga-da.’ Lê ti nduzu avuko, pupu asara ngangu, na kota ngu akomanse ti pika. Mo ye ti bâ, buru ni ahunzi. Achab akpe na puse ti mbarata ti lo ni hio hio. Jéhovah amû maboko na Élie, lo mû loro ahon puse ti mbarata ni. Me akpale ti Élie kue ahunzi awe? Zia e bâ ye so asi.