Jéhovah amû ngangu na Élie

Jézabel amä tënë ti ye so asi na aprophète ti Baal so, na ngonzo ahon ndö ti lo. Lo tokua zo na Élie, lo tene: ‘Kekereke, mo yeke kui tongana ti aprophète ti Baal so.’ Mbeto ahon ndö ti Élie na lo kpe lo gue na yâ ti benyama. Lo sambela Jéhovah, lo tene: ‘Jéhovah, ye ni ahon ndö ti mbi awe! Zia mbi kui.’ So Élie afatigué mingi, lo tï na lango na gbe ti mbeni keke.

Mbeni ange azingo lo na lango yeke, lo tene na lo: “Londo mo te ye.” Élie abâ mbeni mapa so ayeke ronde ronde so ayeke na ndö ti atênë so achauffé mingi nga na mbeni ta ti ngu. Lo te ni na lo nyon ngu, na lo kiri lo lango. Ange ni akiri azingo lo na lo tene na lo: ‘Te ye, mo yeke na bezoin ti wara ngangu ndali ti lege so angbâ ti yo na mo.’ Tongaso, Élie ate mbeni ye ni encore. Na pekoni, lo tambela lâ 40 na bï 40 juska lo si na Hoto ti Horeb. Kâ, Élie alinda na yâ ti mbeni dû ti tênë ti tene lo lango. Me Jéhovah ahunda lo, atene: “Élie, mo yeke sara nyen ge?” Élie atene na lo: ‘Azo ti Israël afâ yâ ti mbele ti mo. Ala futi agbalaka ti mo na ala fâ aprophète ti mo. Ti fadeso, ala yeke gi ti fâ mbi nga.’

Jéhovah atene na lo: ‘Gue mo luti na ndö ti hoto.’ Kozoni, mbeni kota pupu aya na terê ti dû ti tênë ni. Na pekoni, sese ayengi nga wâ aza. Mo ye ti bâ, Élie amä mbeni go so atoto yeke na gbe ni. Lo kanga kota mbongo na lê ti lo na lo sigi lo luti na gigi ti dû ti tênë ni. Na pekoni, Jéhovah ahunda lo ngbanga ti nyen la lo kpe lo hon so. Élie atene: “Gï mbi oko la mbi ngbâ.” Me Jéhovah atene na lo: ‘Mo yeke gï mo oko ape. Mbi yeke na ambeni zo 7 000 na Israël so angbâ ti voro mbi. Gue mo soro Élisée ti ga prophète na place ti mo.’ Hio, Élie ague ti sara ye so Jéhovah ahunda na lo ti sara so. Eskê Jéhovah alingbi ti mû ande maboko na mo na ngoi so mo sara mbeni ye so lo hunda na mo ti sara? En. Zia e bâ mbeni ye so asi na ngoi ti kota buru ni.