Jésus asoro abazengele ti lo bale-oko na use

Na peko ti so Jésus asara kua ti fango tënë teti ngu oko na ndambo tongaso, lo yeke na mbeni kota desizion so lo doit ti mû. Azo wa la lo yeke soro ala ti duti na terê ti lo ti sara kua ni so? Azo wa la lo yeke fa ye na ala ti mû li ni na yâ ti congrégation ti aChrétien? Ti mû adesizion ni so, Jésus aye ti wara fango lege ti Jéhovah. Tongaso, lo gue na ndö ti mbeni hoto ti duti gï lo oko, na lo sambela na bï ni kue. Na ndapre ni, Jésus abungbi ambeni disciple ti lo place oko na lo soro abazengele ti lo 12. Iri ti ala so wa la mo hinga ni? Mo yeke wara, Pierre, André, Jacques, Jean, Philippe, Barthélemy, Thomas, Matthieu, Jacques molenge ti Alphée, Thaddée, Simon nga na Judas Iscariote.

Adisciple 12 so ayeke tambela legeoko na lo. Na peko ti so lo fa ye na ala, lo tokua ala ti gue ti fa tënë ala wani. Jéhovah amû na ala ngangu ti tomba asioni yingo nga ti sava akobela ti azo.

Jésus airi adisciple 12 so akamarade ti lo, nga lo sara confiance na ala. A-Farizien apensé so abazengele ni ahinga ndo ape nga ala yeke gï asenge zo. Me Jésus afa ye na ala na ndö ti kua ti ala. Ala yeke lani na terê ti Jésus na yâ ti akota ngoi ti gigi ti lo, so ti tene kozo na kuâ ti lo nga na peko ti so lo zingo na kuâ. Mingi ti adisciple 12 ni ayeke azo ti Galilée tongana Jésus. Ambeni na popo ti ala ayeke na wali.

Abazengele ni ayeke azo so ayeke na siokpari na terê ti ala, ala nga ayeke sara afaute. A si ka so ala yeke tene tënë kozo si ala gbu li ti ala nga ala mû asioni desizion. Na ambeni ngoi ala hinga ti kanga bê ape. Ala yeke papa même na popo ti ala ti hinga zo wa la ayeke kota mingi. Me ala yeke anzoni zo so aye Jéhovah. Ala yeke duti ande gunda ti congrégation ti aChrétien tongana Jésus akiri ande na yayu.