Jésus amû kobe na gbâ ti azo

Abazengele alondo na mbeni tambela ti fango tënë ala kiri gï kete kozo si a sara Matanga ti Pâque ti ngu 32. Ala fatigué lani mingi na pekoni, tongaso Jésus na ala amû mbeni ngö ti gue na Bethsaïda, tongaso si ala lingbi ti wu terê ti ala kâ. Me na ngoi so ngö ni aga nduru na yanga ti ngu, Jésus abâ so gbâ ti azo amû peko ti ala juska ge. Atâa so Jésus aye fade ti duti gï lo oko na abazengele ti lo, lo yamba azo ni nzoni. Lo sava azo ti kobela na lo komanse ti fa ye na ala. Na yâ ti lango ni kue, Jésus afa ye na ala na ndö ti Royaume ti Nzapa. Tongana a si na lakui, abazengele ti lo aga na ala tene na lo: ‘Nzara adoit ti sara azo ni. Tene na ala ti kiri, tongaso si ala gue agi mbeni ye ala te.’

Jésus atene: ‘Ala bezoin ti kiri ape. Ala mû na ala mbeni ye ti tengo ni ge.’ Abazengele ni ahunda ndo, atene: ‘Mo ye ti tene e gue e vo mapa e ga na ni na ala?’ Philippe, so ayeke mbeni oko ti abazengele, atene: ‘Même si e yeke fade na gbâ ti nginza, e lingbi pëpe ti vo mapa alingbi na gbâ ti azo so kue.’

Jésus ahunda ala, atene: ‘Nyen la e yeke na ni ti te?’ André atene: ‘E yeke na mapa oku nga na susu use. A lingbi nga e kete ape.’ Jésus atene: ‘Ala ga na mbi mapa nga na susu ni.’ Lo tene na azo ni ti duti na ndö ti pere na groupe, azo bale-oku bale-oku nga na groupe ti azo ngbangbo oko ngbangbo oko. Jésus amû mapa na susu ni, lo bâ ndo na nduzu na lo sambela. Na pekoni, lo mû kobe ni na abazengele na ala mû ni na azo ni. Akoli 5 000 nga na awali na amolenge kue ate ye juska yâ ti ala asi. Na pekoni, abazengele ni aro atanga ti ye so angbâ, tongaso si a buba kobe ape. Tanga ni so angbâ asi sakpa 12! Miracle so ahon gbungo li ti zo, ni la ape?

Ye ni so apika bê ti azo ni mingi juska ala ye ti sara si Jésus aga gbia ti ala. Me Jésus ahinga so ade ngoi so Jéhovah afa na lo ti tene lo ga gbia alingbi ape. Tongaso, lo tene na azo ni ti kiri na lo tene na adisciple ti lo ti gue na mbeni mbage ti Ngu ti Galilée. Ala monté na yâ ti ngö ti ala, na Jésus ague lo oko na ndö ti mbeni hoto. Ngbanga ti nyen? Ngbanga ti so lo ye ti wara ngoi ti sambela Babâ ti lo. Atâa so lo yeke lani na aye mingi ti sarango ni, Jésus agi lakue ti wara ngoi ti sambela.