Jésus asava mbeni zo na lâ ti Sabbat

A-Farizien aye tënë ti Jésus kete ape na ala yeke gi mbeni raison ti gbu lo. Ala tene so a lingbi lo sava azo na lâ ti Sabbat ape. Na ngoi ti mbeni lango ti Sabbat, Jésus awara mbeni koli so lê ti lo abuba na so ayeke iri ye na lege. Lo tene na adisciple ti lo, lo tene: ‘Ala bâ tongana nyen la ngangu ti Nzapa ayeke aidé koli so.’ Jésus amû ngu ti yanga ti lo, lo mélangé ni na fuku ti sese ti sara si aga popoto, na pekoni lo zia na lê ti koli ni. Jésus atene na lo: ‘Gue mo sukula lê ti mo na ngu ti Siloam.’ Koli ni asara ni, na lo komanse ti bâ ndo. A yeke kozoni ti tene lo bâ ndo la.

Li ti azo akpe. Ala tene: ‘Eskê a yeke koli so ayeke duti ka ti iri ye so la ape? wala zo ni akpa lo kpango.’ Koli ni atene: ‘Mbi la!’ Azo ni ahunda lo, atene: ‘A sara tongana nyen la si lê ti mo ni azi so?’ Tongana lo fa na ala ye so apassé, ala gue na lo na devant ti aFarizien.

Koli ni atene na aFarizien ni: ‘Jésus amû popoto lo zia na lê ti mbi na lo tene na mbi ti sukula lê ti mbi. Mbi sara ni, na fadeso mbi yeke bâ ndo.’ A-Farizien ni atene: ‘So Jésus asava mo na lâ ti Sabbat so, a ye ti fa so Nzapa la amû na lo ngangu ni so ape.’ Me ambeni zo atene: ‘Tongana ngangu ti lo ni alondo na Nzapa ape, lo peut fade ti sava zo ape.’

A-Farizien ni airi babâ na mama ti koli ni na ala hunda ala, atene: ‘A sara tongana nyen la si molenge ti ala so akomanse ti bâ ndo so?’ Mbeto asara babâ na mama ni ngbanga ti so aFarizien atene so tongana mbeni zo amä na bê na Jésus, a yeke bi zo ni so na gigi ti synagogue. Tongaso ala tene: ‘E hinga ape. Ala hunda lo wani ma.’ A-Farizien ni ahunda na koli ni gbâ ti ahundango tënë juska koli ni atene na ala, atene: ‘Mbi tene na ala tënë ni kue fade awe. Ala ngbâ ti hunda mbi encore ngbanga ti nyen?’ Ngonzo agbu aFarizien ni ngangu, na ala bi lo na gigi.

Jésus ague awara koli ni, na lo hunda lo, lo tene: ‘Eskê mo mä na bê na Messie?’ Koli ni atene: ‘Mbi yeke mä na bê na lo tongana mbi hinga lo.’ Jésus atene: ‘Mbi la mbi yeke Messie ni.’ Bâ tâ nzoni bê ti Jésus ma! Lo sava koli so me lo mû nga maboko na lo ti duti na mabe.