Jésus akiri na yayu

Na Galilée, Jésus awara terê na azo so ayeke mû ka peko ti lo. Lo mû na ala mbeni kota commandement, lo tene: ‘Ala gue ala sara si azo aga adisciple na popo ti azo ti akodro kue. Ala fa na ala aye so mbi fa na ala, na ala batize ala.’ Na pekoni lo mû zendo so: ‘Ala girisa ape, mbi yeke lakue na terê ti ala.’

Na yâ ti alango 40 so aga na peko ti zingongo ti Jésus na kuâ, lo si na adisciple ti lo ngbangbo mingi na Galilée nga na Jérusalem. Lo fa na ala ambeni kpengba tënë nga lo sara gbâ ti amiracle. Na pekoni, Jésus awara terê na abazengele ti lo ti tanga ni na Hoto ti akeke ti olive. Lo tene: ‘Ala sigi na Jérusalem ape. Ala ngbâ ti ku ye so Babâ ti mbi amû zendo ni.’

Abazengele amä yâ ti tënë so lo ye ti tene so ape. Ala hunda lo, atene: ‘Mo yeke ga Gbia ti Israël ni fafadeso?’ Jésus atene: ‘Ngoi so Jéhovah aye ti tene mbi ga Gbia ade ti lingbi ape. Na yâ ti ngoi kete ala yeke wara yingo vulu, na ala yeke duti ande atémoin ti mbi. Ala gue ala fa tënë na Jérusalem, Judée, Samarie nga na ambage ti sese so ayeke tâ yongoro.’

Na pekoni, a mû Jésus a gue na lo na nduzu na mbeni mbinda aga ahonde lo. Adisciple ti lo angbâ gï ti bâ ndo na lê ti nduzu na peko ti lo, me lo hon ti lo awe.

Adisciple ni adescend na ndö ti Hoto ti akeke ti olive ni na ala gue na Jérusalem. Lakue ala yeke bungbi na yâ ti mbeni da na nduzu na ala yeke sambela. Ala yeke ku ti tene Jésus amû na ala ambeni fango ye encore.