Azo Wa Ayeke Awakua ti Nzapa Laso?

“Ndara ti e alondo na Nzapa. A yeke Lo so asala si e ga azo ti kusala ti fini mbele.”​—2 ACORINTHIEN 3:5, 6.

1, 2. Kungba wa aChrétien kue ti kozo siècle amu mbage dä, me ngbanga ti nyen aye agbian?

NA KOZO siècle ti Ngoi ti E, aChrétien kue amu mbage na yâ mbeni kota kungba: kungba ti fa nzo tene. A sa yingo na ndo ti ala kue na ala kue ayeke la ni awakua ti fini mbele. Ambeni ayeke nga na ambeni kungba na ndo ni, tongana ti fango ye na yâ kongrégation. (1 aCorinthien 12:27-29; aEphésien 4:11) Ababâ na mama ayeke na anene kungba mingi ti yö na yâ sewa. (aColossien 3:18-21) Me ala kue amu mbage na yâ kpengba kusala ti fango tene so ayeke kota ye mingi. Na kozo yanga ti Grec so asû na mbage ti Mbeti ti Nzapa so aChrétien asala, kungba so ayeke la ni mbeni di·a·ko·niʹa: mbeni ye so a sala, wala kusala.​—aColossien 4:17.

² Tongana ngoi ayeke hon, aye agbian. Mbeni bungbi ti azo, so a hinga ni tongana bungbi ti amokonzi ti lege ti vorongo, so abata gi teti ala mveni matabisi ti fango tene, aba gigi. (Kusala 20:30) Amokonzi ti lege ti vorongo ayeke kete wungo ti azo kue so adi iri ti ala mveni aChrétien. A hinga kota tanga ti wungo ti azo so angbâ tongana a-laïc. Na ngoi so a fa na a-laïc so ala yeke na ambeni kungba, so andu mungo matabisi teti nzoni duti ti bungbi ti amokonzi ti lege ti vorongo, mingi ti ala, na ndo tene ti fango tene, aga gi azo so amä ndo senge.

3, 4. (a) Tongana nyen azo ayeke ga awakua na yâ Chrétienté? (b) Zo wa a ba lo tongana wakua na yâ Chrétienté, na ngbanga ti nyen a yeke nde na popo ti aTémoin ti Jéhovah?

³ Amokonzi ti lege ti vorongo atene ala yeke awakua (tene ni ayeke kiringo peko ti tene ti ministre so alondo na tene ti di·aʹko·nos, “wakua,” na yanga ti Latin).a Ti ga azo ti kusala, ala wara kota mbeti na yâ mbeni da senda-gi wala ada-mbeti so afa aye ti lege ti vorongo na a hiri ala ti sala kusala ni. Mbeni kota bakari (The International Standard Bible Encyclopedia) atene: “Mingi ni, atene ‘hiri na kusala’ na ‘hiringo zo na kusala’ andu mbeni dutingo so ayeke nde, so amu na awakua tongana apasteur wala aprêtre ni na lege ti angobo ti salango ye so a zia gere ni polele na sese, so a luti mingi na ndo ngangu so ala yeke na ni ti fa Tene wala ti sala ambeni kusala ti nzoni-kue, wala ti sala ala use kue.” Zo wa ayeke hiri azo so na kusala? Mbeni kota bakari (The New Encyclopædia Britannica) atene: “Na yâ ti a-église so abata ndo ti kota-bua, wakua so a hiri ambeni na kusala ni ayeke lakue mbeni kota-bua. Na yâ a-église Presbytérienne, a yeke awakua ti presbytère wala kota bungbi ti ala si ayeke hiri zo na kusala.”

⁴ Tongaso, na yâ ti a-église ti Chrétienté, a zia akatikati ngangu mingi na ndo matabisi ti duti zo ti kusala. Ye oko, a yeke tongaso pepe na popo ti aTémoin ti Jéhovah. Ngbanga ti nyen? Ngbanga ti so a yeke la ni tongaso pepe na yâ ti kongrégation ti aChrétien ti kozo siècle.

Azo Wa Ayeke Biani Awakua ti Nzapa?

5. Na lege ti Bible, a yeke wara azo wa na popo ti ala so asala kusala tongana awakua?

⁵ Na lege ti Bible, awavorongo Jéhovah kue, ala ti yayu nga na ti sese, ayeke azo ti kusala. A-ange asala kusala na Jésus. (Matthieu 4:11; 26:53; Luc 22:43) A-ange ‘asala nga kusala teti azo so fade ayeke ga ahéritier ti salut.’ (aHébreu 1:14; Matthieu 18:10) Jésus ayeke la ni mbeni wakua. Lo tene: “Molenge ti zo aga, ti tene asala na lo pepe, me ti sala na azo.” (Matthieu 20:28, NW; aRomain 15:8) Tongaso, teti a lingbi adisciple ti Jésus ‘atambela mbilimbili na senda ti lo,’ a yeke ye ti dongo bê pepe ti tene so a lingbi ala nga aduti azo ti kusala.​—1 Pierre 2:21, NW.

6. Tongana nyen Jésus afa so a lingbi adisciple ti lo aduti awakua?

⁶ Ngoi kete kozoni na kiringo ti lo na yayu, Jésus atene na adisciple ti lo: “I gue, i sala si azo na popo ti amara kue aga adisciple, i bâtise ala na iri ti Babâ na ti Molenge na ti yingo ti nzoni-kue, i fa na ala ti bata ye kue so mbi komande na i.” (Matthieu 28:19, 20, NW) A lingbi la ni adisciple ti Jésus aduti azo so asala ambeni disciple: awakua. A lingbi afini disciple so ala sala amanda ti bata ye kue so Jésus akomande, so andu nga komandema ti gue na ti sala adisciple. Koli wala wali, biazo wala molenge, tâ disciple ti Jésus Christ ayeke duti mbeni wakua.​—Joël 2:28, 29.

7, 8. (a) Aversê wa ti Bible afa so atâ Chrétien kue ayeke awakua? (b) Ahundango tene wa alondo so andu tene ti hiringo zo na kusala?

⁷ Legeoko na tene so, na lâ ti Pentecôte ti ngu 33 N.E., adisciple kue ti Jésus so ayeke kâ, akoli na awali, amu mbage na yâ fango na azo “tene ti kota kusala ti Nzapa.” (Kusala 2:1-11) Nga, bazengele Paul asû na mbeti: “Teti zo amä na bê ti lo ti ga mbilimbili; na lo sala tene ni na gigi na yanga ti lo ti wara salut.” (aRomain 10:10) Paul asala tene so pepe na mbeni kete bungbi ti amokonzi ti lege ti vorongo, me “na ala kue so ayeke [la ni] na kodoro ti Rome, ala so Nzapa andoye ala mingi.” (aRomain 1:1, 7) Legeoko nga, a lingbi ‘azo ti be-vulu kue so ayeke na Ephèse nga na abe-ta-zo na yâ Christ’ ‘ayü Tene-nzoni ti siriri tongana poro na gere ti ala.’ (aEphésien 1:1; 6:15) Na a lingbi azo kue so amä atene ti mbeti so ato na aHébreu ‘agbu beku so ala fa na gbele azo kue ngangu, ala yengi pepe.’​—aHébreu 10:23, NW.

⁸ Ye oko, na ngoi wa mbeni zo aga wakua? Ti tene ni na mbeni lege nde, lawa si a hiri lo na kusala? Na zo wa ahiri lo na kusala?

Hiringo Zo ti Ga Wakua: Lawa?

9. Lawa si a hiri Jésus na kusala, na zo wa asala ni?

⁹ Ti hinga lawa nga zo wa si ayeke hiri mbeni zo na kusala, ba tapande ti Jésus Christ. A hunda la ni na lo pepe ti wara mbeni kota mbeti ti hiringo zo na kusala wala mbeni kota iri na peko ti so lo manda ye na yâ mbeni ekole so afa aye ti lege ti vorongo dä ti fa so lo yeke wakua, na a yeke pepe mbeni zo si ahiri lo na kusala. Tongaso, ngbanga ti nyen e lingbi ti tene so lo yeke la ni mbeni wakua? Ngbanga ti so atene ti Isaïe so asû na gbe ti yingo aga tâ tene na ndo lo: “Yingo ti Seigneur [“Jéhovah,” NW] ayeke na ndo Mbi, teti Lo sa mafuta na li ti Mbi ti fa Tene-nzoni.” (Luc 4:17-19; Esaïe 61:1) Atene so afa biani so atokua Jésus la ni ti fa nzo tene. Zo wa atokua lo? Teti a yeke yingo ti Jéhovah si aga na ndo lo teti kusala ni, a yeke polele so ayeke Jéhovah Nzapa si ahiri Jésus na kusala. Ye so asi lawa? Yingo ti Jéhovah aga biani na ndo Jésus na ngoi so lo wara batême. (Luc 3:21, 22) Tongaso, a yeke la ni na ngoi ti batême ti lo si a hiri lo na kusala.

10. Zo wa asala si mbeni Chrétien aga ti “lingbi kue”?

¹⁰ Ti adisciple ti Jésus ti kozo siècle ayeke tongana nyen? Dutingo ti ala tongana awakua alondo nga na Jéhovah. Paul atene: ‘Ndara ti e alondo na Nzapa. A yeke Lo so asala si e ga azo ti kusala so alingbi kue ti fini mbele.’ (2 aCorinthien 3:5, 6) Tongana nyen Jéhovah asala ti tene awavorongo lo alingbi ti duti awakua? Ba tapande ti Timothée, so Paul adi iri ti lo “zo ti kusala ti Nzapa na yâ kusala ti Tene-nzoni ti Christ.”​—1 aThessalonicien 3:2.

11, 12. Tongana nyen Timothée ague na li ni ti ga mbeni wakua?

¹¹ Atene so aga na gbe ni ge, so a to na Timothée amu maboko na e ti hinga mbilimbili tongana nyen lo ga mbeni wakua: “Me mo, ngbâ lakue na yâ aye so mo manda na so a ga na mo ti mä na bê na ni, na hingango azo so mo manda na mbage ti ala na a to nda ni tongana mo de kete kete molenge mo hinga ambeti ti nzoni-kue, so alingbi ti mu na mo ndara ti wara salut na lege ti mabe so ayeke na yâ Christ Jésus.” (2 Timothée 3:14, 15, NW) Gunda ti mabe ti Timothée, mabe so apusu lo ti sala tene na gbele azo kue, ayeke la ni hingango ye ti Mbeti ti Nzapa. Ti diko ye gi zo oko ayeke ye kue so a hunda la ni ti ga tongaso? Pepe. A lingbi a mu maboko na Timothée ti wara tâ hingango ye nga gbungo nda ti ye ni so lo yeke diko na lege ti yingo. (aColossien 1:9) A yeke tongaso si ‘a ga la ni na Timothée ti mä na bê.’ Teti lo hinga Mbeti ti Nzapa ‘a to nda ni tongana lo de kete kete molenge,’ akozo zo so afa ye na lo alingbi ti duti mama nga na âta ti lo ti wali, teti a ba biani so babâ ti lo ayeke wamabe pepe.​—2 Timothée 1:5.

¹² Ye oko, ti tene Timothée aga mbeni wakua ahunda ye mingi ahon. Kozoni kue, mabe ti lo akpengba na lege ti bungbingo na aChrétien na yâ ti akongrégation so ayeke ndulu na lo. E hinga ni tongana nyen? Teti na kozo ngoi so Paul awara Timothée, ‘aita so ayeke na Lystres na Iconium asala tene nzoni’ ti pendere-koli so. (Kusala 16:2) Na ndo ni, na angoi ni so ambeni ita asû ambeti na akongrégation ti kpengba ala. Na asurveillant ague nga ti sala vizite na ala ti kpengba ala. Mara ti aye so a leke tongaso amu maboko na aChrétien tongana Timothée ti gue na li ni na lege ti yingo.​—Kusala 15:22-32; 1 Pierre 1:1.

13. Lawa a hiri Timothée ti ga wakua, na ngbanga ti nyen mo lingbi ti tene so maïngo ti lo na lege ti yingo aluti pepe gi na ndo so?

¹³ Na lege ti komandema ti Jésus so asû pekoni na Matthieu 28:19, 20, e lingbi ti hinga biani so na mbeni ngoi, mabe ti Timothée apusu lo ti mu tapande ti Jésus na ti wara batême. (Matthieu 3:15-17; aHébreu 10:5-9) So ayeke la ni fä so na âme ti lo kue Timothée amu tele ti lo na Nzapa. Na ngoi ti batême ti lo, Timothée aga mbeni wakua. A to nda ni na ngoi ni so ti gue na ni, fini ti lo, ngangu ti lo, na aye kue so lo yeke na ni ayeke ti Nzapa. So ayeke la ni mbeni kota mbage ti vorongo ti lo, “kusala ti nzoni-kue.” Ye oko, Timothée aluti gi na ndo so senge pepe. Lo ngbâ ti maï na lege ti yingo, ti ga mbeni wakua Chrétien biazo. Ye ni aga tongaso ngbanga ti so Timothée aduti ndulu mingi na aChrétien biazo tongana Paul, nga ngbanga ti mandango ye lo mveni, na teti wâ ti lo na yâ kusala ti fango tene.​—1 Timothée 4:14; 2 Timothée 2:2; aHébreu 6:1.

14. Laso, tongana nyen mbeni zo so ‘bê ti lo alingbi na ye so ahunda teti fini ti lakue lakue’ ayeke gue na li ni ti ga wakua?

¹⁴ Laso, hiringo zo teti kusala ti Chrétien ayeke legeoko tongaso. A yeke mu maboko na zo ‘so bê ti lo alingbi na ye so ahunda teti fini ti lakue lakue’ ti manda ye na ndo Nzapa nga na ndo aye so Lo leke ti sala, na lege ti mandango Bible. (Kusala 13:48, NW) Zo ni ayeke manda ti sala ye alingbi na akpengba-ndia ti Bible na yâ fini ti lo na ti tene na Nzapa asambela so nda ni ayeke dä. (Psaume 1:1-3; aProverbe 2:1-9; 1 aThessalonicien 5:17, 18) Lo bungbi na ambeni wamabe na lo wara aye ti nzoni na lege ti aye so “ngba ti be-ta-zo na ti ndara” aleke. (Matthieu 24:45-47, NW; aProverbe 13:20; aHébreu 10:23-25) Na lege so, lo gue na li ni na yâ mbeni fango ye so a leke ni nzoni.

15. Ye nyen asi tongana mbeni zo awara batême? (Ba nga kete tene so ayeke na gbe ti lembeti.)

¹⁵ Na nda ni, tongana wamandango Bible ni amaï awe ndoye teti Jéhovah Nzapa nga kpengba mabe na yâ sadaka ti kota ngele, lo lingbi ti hunda ti mu tele ti lo kue na Babâ ti lo ti yayu. (Jean 14:1) Lo yeke mu tele ni na yâ mbeni sambela so lo mveni asala, nga na pekoni lo wara batême na gbele azo kue tongana fä ti ye so lo sala gi lo oko. Batême ti lo ayeke matanga ti hiringo lo na kusala teti a yeke na ngoi so si a hinga lo tongana mbeni wakua so amu tele kue na Nzapa, mbeni di·aʹko·nos. A lingbi lo ngbâ ti duti nde na sese so. (Jean 17:16; Jacques 4:4) Lo mu tele ti lo kue na “sadaka so ayeke na fini, ye ti nzoni-kue, ye so alingbi na lê ti Nzapa,” lo gbanzi mbeni ye oko pepe wala lo hunda pepe mbeni ye ndali ni. (aRomain 12:1, NW)b Lo yeke wakua ti Nzapa, na mungo tapande ti Christ.

Kusala ti Chrétien Ayeke so Wa?

16. Ambeni kusala ti Timothée tongana wakua ayeke la ni so wa?

¹⁶ Kusala ti Timothée andu la ni ye wa? Lo yeke na ambeni kungba nde tongana mbeni zo ti tambela ti Paul. Na tongana lo ga ancien awe, Timothée asala kusala ngangu ti fa ye na ti kpengba afon lo Chrétien. Me kota mbage ti kusala ti lo, tongana ti Jésus na Paul, ayeke la ni fango nzo tene nga salango adisciple. (Matthieu 4:23; 1 aCorinthien 3:5) Paul atene na Timothée: “Me mo duti na donzi na yâ ye kue, hu pono ti ye ti ngangu, sala kusala ti évangéliste, na mo sala kusala ti mo kue.”​—2 Timothée 4:5, e si e sû gere ti ambeti so nde.

17, 18. (a) A-Chrétien abi tele na yâ kusala wa? (b) Kota ti kusala ti fango tene ayeke so wa teti mbeni wakua Chrétien?

¹⁷ A yeke legeoko tongaso teti awakua Chrétien laso. Ala bi tele na yâ mbeni kusala teti azo kue, kusala ti fango nzo tene, na gbotongo lê ti azo na mbage ti salut na ndo gere ti sadaka ti Jésus nga na fango na azo ti be-ti-molenge ti di iri ti Jéhovah. (Kusala 2:21; 4:10-12; aRomain 10:13) Na lege ti Bible ala fa so Royaume ayeke gi oko beku teti azo so ayeke ba pasi na ala fa nga so, atä na ngoi so e yeke dä, aye ayeke duti nzoni ahon tongana e mu peko ti akpengba-ndia ti Nzapa. (Psaume 15:1-5; Marc 13:10) Me mbeni wakua Chrétien ayeke fa pepe so a lingbi aleke akota kpale ti azo na lege ti akpengba-ndia ti Bible. Nde na so, lo fa so ‘batango tene ti Nzapa ayeke na zendo ti fini ti laso nga, na ti fini so ayeke ga.’​—1 Timothée 4:8, NW.

¹⁸ Biani, awakua mingi ayeke na ambeni lege nde ti sala kusala, so alingbi ti duti nde mingi na ti ambeni Chrétien. Mingi ayeke na akungba ti sewa. (aEphésien 5:21–6:4) A-ancien na aserviteur ti mungo maboko ayeke na akungba na yâ ti kongrégation. (1 Timothée 3:1, 12, 13; Tite 1:5; aHébreu 13:7) A-Chrétien mingi ayeke mu maboko ti leke aDa ti Royaume. Ambeni ayeke na pendere matabisi ti mu tele ti ala ti sala kusala na mbeni oko ti ada ti Béthel ti Société Watch Tower. Ye oko, awakua Chrétien kue ayeke mu mbage na fango nzo tene. A zia mbeni zo oko nde na kusala so pepe. A yeke mungo mbage na kusala so si amu lege ti hinga mbeni zo polele tongana tâ wakua Chrétien.

Bango Ndo ti Wakua Chrétien

19, 20. A lingbi awakua Chrétien agi ti wara bango ndo wa?

¹⁹ Mingi ti awakua ti Chrétienté ayeke ku ti tene a mu na ala mbeni yekiango ndo so ayeke nde, na ala mu akota iri tongana “révérend” na “père.” Ye oko, wakua Chrétien ahinga so gi Jéhovah oko si alingbi na yekiango ndo. (1 Timothée 2:9, 10) Wakua Chrétien oko pepe ahunda mara ti kota yekiango ndo tongaso wala agi pepe ti wara akota iri so ayeke nde. (Matthieu 23:8-12) Lo hinga so kota nda ti di·a·ko·niʹa ayeke “kusala.” Na ambeni ngoi, a sala kusala na tene so ague legeoko na ni na yâ Bible ti sala tene ti akusala so asala teti zo mveni, tongana gango na kobe na ndo table. (Luc 4:39; 17:8; Jean 2:5) Atä so salango kusala na tene ni teti kusala ti aChrétien andu aye so ayeke na nduzu mingi ahon, mbeni di·aʹko·nos angbâ lakue gi mbeni wakua.

²⁰ Tongaso, mbeni wakua Chrétien oko pepe ayeke na mbeni nda ti tene ti ba tele ti lo kota ahon. Atâ wakua Chrétien, même ala so ayeke na ambeni kungba nde na yâ ti kongrégation, ayeke angba so ayeke na be-ti-molenge. Jésus atene: “Zo kue so aye ti ga kota na popo ti i, a lingbi lo duti wakua ti i, na zo kue so aye ti duti na kozo ndo na popo ti i, a lingbi lo duti ngba ti i.” (Matthieu 20:26, 27, NW) Na ngoi so lo yeke fa na adisciple ti lo nzoni bango ndo so a lingbi ala gi ti maï ni, Jésus asukula gere ti ala, na salango kusala ti mbeni ngba so dutingo ti lo ayeke na gbe ni mingi ahon. (Jean 13:1-15) So tâ mbeni kusala ti be-ti-molenge! Tongaso, na be-ti-molenge, awakua Chrétien asala na Jéhovah Nzapa nga na Jésus Christ. (2 aCorinthien 6:4; 11:23) Ala fa bibe ti be-kota-pepe na salango kusala na popo ti ala. Na tongana ala yeke fa nzo tene, na kion pepe ala sala kusala teti azo so ayeke ndulu na ala so amä na bê pepe.​—aRomain 1:14, 15; aEphésien 3:1-7.

Gbu Ngangu na Yâ Kusala Ni

21. Tongana nyen a futa Paul teti lo gbu ngangu na yâ kusala?

²¹ Ti Paul, dutingo wakua a hunda ti gbu ngangu. Lo tene na azo ti Colosses so lo ba pasi mingi si lo lingbi ti fa nzo tene na ala. (aColossien 1:24, 25) Ye oko, teti so lo gbu ngangu, azo mingi ayeda na nzo tene na ala ga awakua. A dü ala tongana amolenge ti Nzapa na aita ti Jésus Christ, na dutingo na beku ti ga acréature ti yingo na tele ti lo na yayu. So mbeni pendere matabisi teti gbungo ngangu!

22, 23. (a) Ngbanga ti nyen a lingbi awakua Chrétien ti laso agbu ngangu? (b) Pendere lengo wa aga na peko ti gbungo ngangu ti aChrétien?

²² A yeke kota ye mingi teti azo so ayeke biani awakua ti Nzapa ti gbu ngangu laso. Lâ oko oko mingi ayeke tiri na kobela wala asongo tele ti gango kangba. Ababâ na mama, so mingi na popo ti ala ayeke pepe na koli wala wali, ayeke sala kua ngangu ti bata amolenge ti ala. Na mbito pepe, na ekole amolenge aluti ngangu na gbele asioni ngangu so angoro ala. A-Chrétien mingi ayeke hu pono teti akpale ti konomi. Na mingi ayeke ba pasi teti salango ngangu wala ala si na gbele akpale ndali ti “ngoi ti kpale na ti ngangu” ti laso! (2 Timothée 3:1, NW) Tâ tene, awakua ti Jéhovah ndulu na kutu omene laso alingbi ti tene legeoko na bazengele Paul: “Na yâ ye kue, e fa na gigi e yeke azo ti kusala ti Nzapa, na lege ti bê so azia pepe.” (2 aCorinthien 6:4) Awakua Chrétien akiri na peko pepe. Ala lingbi biani na gonda teti gbungo ngangu ti ala.

²³ Na ndo ni, tongana ti so a sala na yâ ye so asi na Paul, gbungo ngangu ayeke ga na apendere lengo. Na gbungo ngangu, e yeke bata kota songo ti e na Jéhovah na e zia ngia na bê ti lo. (aProverbe 27:11) E yeke sala si mabe ti e mveni akpengba na e sala adisciple, na gango na azo mingi ahon na yâ songo ti aita Chrétien. (1 Timothée 4:16) Jéhovah amu maboko na awakua ti lo na lo hiri deba nzoni na ndo kusala ti ala na lâ ti nda ni so. Ye ti pekoni ayeke so, a bungbi awe tanga ti azo 144 000, na azo kutu mingi nga ayeke na tâ beku ti wara fini ti lakue lakue na ndo sese so aga paradis. (Luc 23:43; Apocalypse 14:1) Biani, kusala ti aChrétien ayeke fango na gigi be-nzoni ti Jéhovah. (2 aCorinthien 4:1) Zia e kue e ba ni na nene ni na e duti na bê ti kiri singila teti so lengo ti lo ayeke ninga ande teti lakue lakue.​—1 Jean 2:17.

[Akete Tene na Gbe Ni]

Mo Lingbi ti Fa Nda Ni?

• Kungba wa aChrétien kue ti kozo siècle amu mbage dä?

• Lawa nga zo wa ayeke hiri mbeni wakua Chrétien na kusala?

• A lingbi wakua Chrétien agi ti wara mara ti bango ndo wa?

• Ngbanga ti nyen a lingbi mbeni wakua Chrétien agbu ngangu na gbele akpale?

[Foto na lembeti 15]

Batême aduti fä ti mungo tele na Nzapa na a fa na gigi so a hiri zo ni ti ga wakua

[Afoto na lembeti 16, 17]

A fa la ni na Timothée Tene ti Nzapa ngbele ye na ngoi so lo ngbâ kete molenge. Lo ga wakua so a hiri lo na kusala na ngoi so lo wara batême

[Foto na lembeti 18]

Awakua Chrétien ayeke ndulu ti sala ye