Sepela Jéhovah Teti Apendere Kusala ti Lo!
“Âme ti mbi asepela Jéhovah . . . Teti Lo Ti Ngangu Ahon Kue asala kota ye na mbi.”—LUC 1:46-49.
1. Teti apendere kusala wa a yeke na lege ni ti tene e sepela Jéhovah?
JÉHOVAH alingbi na sepela teti apendere ye so lo sala. Tongana prophète Moïse afa peko ti zingo mara ti Israël na gbe ti ngba na Égypte, lo tene: “Lê ti i aba kota kusala kue so L’Eternel [“Jéhovah,” NW] asala.” (Deutéronome 11:1-7) Legeoko nga, tongana ange Gabriel afa na Marie, mbeni masia, tene ti dungo Jésus so ayeke ga ande, masia ni atene: “Âme ti mbi asepela Jéhovah . . . Teti Lo Ti Ngangu Ahon Kue asala ye na mbi.” (Luc 1:46-49) Teti e yeke aTémoin ti Jéhovah, e sepela lo teti mara ti apendere kusala tongaso, tongana zingo azo ti Israël na gbe ti ngba ti azo ti Égypte, nga mengo ngo ti dü Molenge ti lo so lo ndoye mingi, so ayeke biani mbeni ye ti kpene.
2. (a) ‘Ye so Nzapa aleke na bê ti lo giriri kozoni’ aye ti tene nyen teti azo so amä yanga? (b) Ye nyen asi na Jean na ndo zoa ti Patmos?
2 Mingi ti apendere ye so Jéhovah asala ague legeoko na “ye so lo leke na bê ti lo giriri kozoni” ti hiri deba nzoni na ndo azo kue so amä yanga na lege ti Messie nga na komandema ti Royaume ti lo. (aEphésien 3:8-13) Ye so Nzapa aleke ti sala aga tâ tene yeke yeke na ngoi so a mu lege na bazengele Jean ti ba suma tongana a zi mbeni yanga-da na yayu. Lo mä mbeni go so atoto tongana trompette atene na lo: “Ma na nduzu na ndo so, na fade Mbi fa na mo ye so alingbi ga na peko ti ye so.” (Apocalypse 4:1) Na ngoi so ngorogbia ti Rome atomba lo na zoa ti Patmos “teti Tene ti Nzapa na teti tene ti témoin ti Jésus,” Jean awara “Apocalypse ti Jésus Christ.” Ye so bazengele ni aba na amä afa ye mingi ahon na ndo ye so Nzapa aleke na bê ti lo giriri kozoni, tongaso a ga mbeni lumière na lege ti yingo nga a mu maboko so asi na tâ ngoi ni teti atâ Chrétien kue.—Apocalypse 1:1, 9, 10.
3. A-ancien 24 so Jean aba na yâ suma ayeke fä ti azo wa?
3 Na lege ti yanga-da so azi na yayu, Jean aba a-ancien 24, na ndo mbata ti gbia, na ala yeke na akpoto ti gbia. Ala tï na gbele Nzapa, na ala tene: “Mo lingbi, Jéhovah, O Nzapa ti e, ti wara gloire na yango-iri na ngangu, teti mo sala ye kue, na teti bê ti mo aye ala yeke na asala ala.” (Apocalypse 4:11, NW) A-ancien so ayeke fä ti aChrétien kue so a sa yingo na ndo ti ala, so ayä ala na popo ti awakinda, na ala duti na kota ndo so Jéhovah amu zendo ni na ala. Bê ti ala apusu ala ti sepela Jéhovah ndali ti apendere ye so lo sala, andu aye so lo leke. E nga bê ti e adö tongana e ba polele ‘ngangu ti Jéhovah ti lakue lakue na dutingo ti lo ti Nzapa.’ (aRomain 1:20) Na tongana e manda ye mingi na ndo Jéhovah, e yeke wara nga anda ti tene mingi ahon ti sepela lo teti apendere ye so lo sala.
Fa Tene ti Aye ti Jéhovah so Alingbi na Gonda!
4, 5. Mu atapande ti fa tongana nyen David asepela Jéhovah la ni.
4 David, mbeni wasungo psaume, asepela Nzapa teti apendere ye so Lo sala. Na tapande, David ahe bia lo tene: “Sala bia ti sepela L’Eternel, Lo so aduti na Sion. Fa kusala ti Lo na popo ti amara. O L’Eternel, Mo sala be-nzoni na mbi, ba vundu ti mbi so mbi wara na tïtî ala so ake mbi; Mo so Mo yä mbi na nduzu, Mo lungula mbi na yanga ti ndo ti kui, si mbi lingbi fa na gigi tene ti sepelango Mo kue na yanga ti kodoro ti molenge-wali ti Sion.” (Psaume 9:11, 13, 14, NW [9:12, 14, 15, Bible ti Sango]). Na peko ti so lo mu na molenge ti lo Salomon a-plan ti lekengo na temple, David adeba nzoni na asepela Nzapa, lo tene: “O L’Eternel, kota ndo, na ngangu, na gloire, na kozo ndo, na yango-iri kue ayeke ti Mo. . . . O L’Eternel, ndo ti komande ayeke ti Mo, Mo yeke Li ti ye kue. . . . Tongaso, O Nzapa ti e, e mu singila na Mo, na e sepela gloire ti iri ti Mo fadeso.”—1 Chronique 29:10-13.
5 Fani mingi, Mbeti ti Nzapa atisa e na même awa e mingi ti sepela Nzapa, tongana ti so David asala giriri. Na yâ buku ti Psaume, a yeke wara atene mingi ti sepela na Nzapa, na ndulu na ndambo ti abia so ayeke ti David. Lo sepela na lo mu singila lakue na Jéhovah. (Psaume 69:31 [69:30, NW]) Nga, hio na yâ ti mbaï, a sala kusala na bungbi ti atene so David nga na ambeni zo asû na gbe ti yingo ti sepela na Jéhovah.
6. Tongana nyen apsaume so a sû na gbe ti yingo ayeke nzoni teti e?
6 Ba tongana nyen ambeti ti Psaume ayeke nzoni teti awavorongo Jéhovah! Tongana e ye ti kiri singila na Nzapa teti apendere ye kue so lo yeke sala teti e, bibe ti e alingbi ti gue biani na mbage ti apendere tene ti sepela so a wara na yâ ti aPsaume. Na tapande, tongana e zingo na ndapelele, bê ti e alingbi ti pusu e ti sala kusala na atene tongaso: “A yeke nzoni ti mu singila na L’Eternel, na ti sala bia ti sepela iri ti Mo, O Mo Ti Nduzu Ahon Kue, ti fa na gigi nzobe ti Mo na ndapelele, na be-biani ti Mo na bï kue. . . . Mo, L’Eternel, Mo mu ngia na mbi na lege ti kusala ti Mo. Fade mbi sala bia na ngia teti kusala ti tïtî Mo.” (Psaume 92:2-5 [92:1-4, NW]) Tongana e hon ndo ti mbeni ye so akanga guengo na li ni ti e na lege ti yingo, e lingbi ti bi bê ti fa na gigi ngia na bê ti kiri singila na yâ ti sambela, legeoko tongana wasungo psaume atene tongana lo he na bia: “O, i ga, zia e dekongo na ngia na Jéhovah! Zia e dekongo ti hongo na ngangu na Tênë ti salut ti e. Zia e ga na gbele Lo na tene ti singila, zia e dekongo na ngia na Lo na lege ti psaume.”—Psaume 95:1, 2, NW.
7. (a) Ye wa a lingbi e hinga na ndo abia mingi so aChrétien ayeke he? (b) Mbeni oko nda ti tene so ngbanga ni a lingbi e ga hio na abungbi na e ngbâ juska na nda ni ayeke nyen?
7 Fani mingi, e yä go ti e ti sepela Jéhovah na ngoi ti abungbi ti kongregation nga na akota bungbi. A lingbi e hinga so mingi ti abia so aluti na ndo abibe so a sû na gbe ti yingo na yâ buku ti Psaume. Ba tongana nyen e yeke na ngia ti wara na ngoi ti e bungbi ti abia so amu wâ na bê ti sepela na Jéhovah! Ti he bia ti sepela na Nzapa ayeke teti e mbeni tâ nda ti tene so ngbanga ni a lingbi e ga hio na abungbi ti e na ti ngbâ juska na nda ni, ti tene na lege so, e bungbi na afon e awavorongo Jéhovah ti sepela lo na lege ti abia nga na asambela ti e.
“Sepela Yah, I Azo!”
8. Tene wa ahonde na yâ ti tene “Alléluia,” na a kiri peko ni lakue tongana nyen?
8 Tene ti sepelango Jéhovah ahonde na gbe ti tene “Alléluia,” mbeni sungo peko ti tene ti Hébreu so akiri pekoni lakue na “Sepela Yah, I azo.” Na tapande, na Psaume 135:1-3 (NW), e diko ngangu tisango ndo na wâ so: “Sepela Yah, I azo! I sepela iri ti Jéhovah, I sepela Lo, O awakua ti Jéhovah, i so i luti na yâ da ti Jéhovah, na yâ sedu ti da ti Nzapa ti e. I sepela Yah, teti Jéhovah ayeke nzoni. Sala bia ti sepela iri ti lo, teti a yeke nzoni.”
9. Ye nyen apusu e ti sepela Jéhovah?
9 Tongana e ba apendere ye so Nzapa aleke nga na aye kue so lo sala teti e, bê ti e so asi singo na singila apusu e ti sepela lo. Tongana e gbu li ti e na ndo aye ti kpene so Jéhovah asala teti azo ti lo giriri, bê ti e apusu e ti sepela lo. Na tongana e bi bê ti e na ndo zendo ti apendere ye so Jéhovah ayeke sala ande, e yeke gi nga alege ti fa na gigi bê ti kiri singila ti e na lo.
10, 11. Tongana nyen dutingo ti e mveni na fini amu na e nda ti tene ti sepela Nzapa?
10 Dutingo ti e na fini amu na e mbeni nda ti tene so apusu e ti sepela Jah. David ahe bia lo tene: “Mbi mu singila na Mo [Jéhovah], teti lege so Mo sala mbi ayeke ye ti dongo bê na ye ti kpene. Kusala ti Mo ayeke ye ti kpene, na âme ti mbi ahinga ye so biani.” (Psaume 139:14) Biani, ‘lege so a sala na e ayeke ye ti dongo bê’ na e yeke na amatabisi ti ngele ngangu tongana ngangu ti bango ndo, ti mango ndo, na ti gbungo li. Tongaso, a lingbi e duti pepe na fini na mbeni lege so asepela Wasalango e? Paul asala tene tongaso nga tongana lo sû na mbeti: “Tongana i te, wala i nyon, wala i sala mbeni ye, i sala ye kue teti gloire ti Nzapa.”—1 aCorinthien 10:31.
11 Fade e yeke sala ye kue teti gloire ti Jéhovah tongana e ndoye lo biani. Jésus atene so kozo komandema ayeke: “A lingbi mo ndoye Seigneur Nzapa ti mo na bê ti mo kue, na âme ti mo kue, na bibe ti mo kue, na ngangu ti mo kue!” (Marc 12:30; Deutéronome 6:5) A lingbi e ndoye biani Jéhovah na e sepela lo tongana Wasalango e nga tongana Wamungo “matabisi kue ti nzoni na matabisi kue so alingbi kue.” (Jacques 1:17; Esaïe 51:13; Kusala 17:28) Teti biani, ngangu ti e ti fa nda ti ye, ngangu ti e ti bi bê na aye ti yingo, nga na ngangu ti e ti mitele, alengo ti e nga na akode ti e kue, alondo na Jéhovah. Teti lo yeke Wasalango e, a lingbi e ndoye lo na e sepela lo.
12. Bibe ti mo na ndo apendere ye so Jéhovah asala nga na ndo atene ti Psaume 40:5, NW (40:6, Bible ti Sango) ayeke tongana nyen?
12 Apendere ye so Jéhovah asala amu na e anda ti tene mingi ti ndoye na ti sepela lo! David ahe bia lo tene: “O L’Eternel Nzapa ti mbi, kusala ti kpene ti Mo, na bibe ti Mo teti e awu mingi; zo oko ti lingbi na Mo ayeke pepe; tongana mbi ye ti sala tene ti kusala ti Mo, fade ayeke mingi mingi, zo alingbi diko kue pepe.” (Psaume 40:6 [40:5, NW]) David alingbi la ni pepe ti dabe ti lo na apendere kusala kue ti Jéhovah, na e lingbi ti dabe ti e nga na ni kue pepe. Me zia e sepela lakue Nzapa tongana e bi bê ti e na ndo mbeni oko ti apendere kusala ti lo.
Akusala ti Nzapa Ague Oko na Ye so Lo Leke na Bê ti Lo Giriri Kozoni
13. Tongana nyen beku ti e ague oko na apendere ye so Nzapa asala?
13 Beku ti e teti kekereke ague oko na apendere kusala so alingbi na sepela nga na ye so Nzapa aleke na bê ti lo giriri kozoni. Na peko ti kengo yanga na Éden, Jéhovah amu kozo prophétie so zendo ayeke na yâ ni. Na fango ngbanga na ndo ngbo ni, Nzapa atene: “Fade Mbi zia tene ti ke na popo ti mo na wali so, na popo ti hale ti mo na hale ti lo; fade lo mboko li ti mo, na fade mo mboko ndagere ti lo.” (Genèse 3:15) Beku na yâ Hale so a mu zendo ni, Hale ti wali ni, angbâ na yâ bê ti abe-ta-zo na pekoni so Jéhovah asala pendere ye na batango Noé nga na sewa ti lo na yâ Moa so amu ndo kue, so afuti mbeni sese ti sioni. (2 Pierre 2:5) Azendo ti prophétie so a mu na azo ti mabe tongaso tongana Abraham na David afa aye mingi na ndo ye so Jéhovah ayeke sala na lege ti Hale so.—Genèse 22:15-18; 2 Samuel 7:12.
14. Tapande ti kota ahon ti aye so Jéhovah asala teti azo ayeke so wa?
14 Ye ti kota ahon so Jéhovah asala tongana wasalango apendere ye teti azo, asi na ngoi so lo mu Molenge ti lo ngengele oko, Hale so a mu zendo ni, Jésus Christ, tongana sadaka so ayeke na kota ngele. (Jean 3:16; Kusala 2:29-36) Kota ngele ni aduti kota ye so amu lege ti kiri ti sala songo na Nzapa. (Matthieu 20:28; aRomain 5:11) Jéhovah abungbi akozo zo so aleke songo na lo na yâ kongregation ti aChrétien, so a zia gere ni na Pentecôte ti ngu 33 N.E. Na lege ti yingo ti nzoni-kue, ala fa nzo tene na ndo kue, na fango tongana nyen kui nga na londongo ti Jésus na popo ti awakinda azi lege na azo so amä yanga ti wara deba nzoni ti lakue lakue na gbe ti komandema ti Royaume ti Nzapa so ayeke na yayu.
15. Tongana nyen Jéhovah asala ye, na lege ti dongo bê, na ngoi ti e?
15 Na ngoi ti e, Jéhovah, na lege ti ye so adö bê, abungbi tanga ti aChrétien kue so a sa yingo na ndo ti ala. A kanga lege na apupu ti futingo ye ti mu lege ti zia sceau na ndo tanga ti azo 144 000, so ayeke komande ande na tele ti Christ na yayu. (Apocalypse 7:1-4; 20:6) Nzapa asala kue si a zi aChrétien so a sa yingo na ndo ti ala na gbe ti ngba ti “Babylone ti Kota,” bungbi ti alege ti vorongo ti wataka ti sese kue. (Apocalypse 17:1-5) Zingo ala na ngu 1919 nga na batango ndo ti Nzapa ngbele ye na ngoi ni so amu lege na tanga ni so a sa yingo na ndo ti ala ti sala nyen? Ti za lumière ti ala na yâ fango tene ti nda ni kozoni si Jéhovah afuti sioni bungbi ti aye ti Satan na lege ti “kota ye ti vundu” so ayeke ga na kota loro.—Matthieu 24:21; Daniel 12:3; Apocalypse 7:14.
16. Ye nyen ayeke si laso na peko ti kusala ti fango tene ti Royaume na ndo sese kue?
16 Na wâ aTémoin ti Jéhovah so a sa yingo na ndo ti ala amu li ni na yâ kusala ti fango tene ti Royaume na ndo sese kue. Tongana ye ti pekoni, mbeni kota wungo, so angbâ ti gue na li ni, ti “ambeni ngasangbaga” aga fadeso awavorongo Jéhovah. (Jean 10:16) E yeke na ngia so a ngbâ ti tisa azo ti be-ti-molenge kue ti sese ti bungbi legeoko na e ti sepela Jéhovah. Ala so ayeda na tisango ndo “ga” ayeke na beku ti sö kuâ na kota ye ti vundu, na ti sepela Jéhovah teti lakue lakue.—Apocalypse 22:17.
Azo Saki Mingi Ayeke Ga na yâ Tâ Vorongo
17. (a) Tongana nyen Jéhovah ayeke sala apendere ye so andu kusala ti e ti fango tene? (b) Tongana nyen Zacharie 8:23 ayeke ga tâ tene?
17 Jéhovah ayeke sala fadeso apendere ye so alingbi na sepela so andu kusala ti e ti fango tene. (Marc 13:10) Na yâ ti angu so ahon ade ti ninga pepe, lo ‘zi kota ayanga-da ti kusala.’ (1 aCorinthien 16:9) Ye so amu lege si a fa nzo tene na akota ndo so awato ti tâ tene akanga la ni lege na ni. Azo mingi so aduti la ni na yâ bingo ti yingo ayeda fadeso na tisango ndo ti voro Jéhovah. Ala sala ye alingbi na atene ti prophétie so: “L’Eternel Ti Sabaoth atene tongaso, Na lâ ni kâ, fade azo bale oko ti yanga nde nde kue ti amara, ala gbu yanga ti bongo ti zo so ayeke Juif, ala tene, Fade e gue na mo, teti e mä so Nzapa ayeke na i.” (Zacharie 8:23) “Ala so ‘azo bale oko’ asala tene na ala” ayeke fä ti aJuif ti yingo, tanga ti aChrétien so a sa yingo na ndo ti ala ti ngoi ti e. Teti so wungo bale oko alingbi ti duti fä ti ye so alingbi kue na lê ti azo, “azo bale oko” ni ayeke fä ti “azo mingi so asi singo,” so a bungbi ala na “Israël ti Nzapa,” na so kue aga gi “kundu oko.” (Apocalypse 7:9, 10, NW; aGalate 6:16) So tâ ye ti mungo ngia ti ba azo mingi mingi so ayeke sala fadeso kusala ti nzoni-kue maboko na maboko tongana awavorongo Jéhovah Nzapa!
18, 19. Ye nyen afa polele so Jéhovah ayeke deba nzoni kusala ti fango tene?
18 Bê ti e adö ti ba so azo saki mingi mingi ayeke yeda na tâ vorongo na yâ ti akodoro so vorongo ti wataka asala ngangu dä mingi, so na yâ ni a ba la ni atene azo ni ayeke yeda lâ oko pepe na nzo tene. Mu Annuaire des Témoins de Jéhovah ti ngu so e yeke dä na diko wungo ti akodoro so fadeso wungo ti awafango tene ti Royaume alondo na 100 000 ti si ndulu na 1 000 000. Ye so ayeke kpengba fä so Jéhovah ayeke deba nzoni kusala ti fango nzo tene ti Royaume.—aProverbe 10:22.
19 Teti e yeke mara ti Jéhovah, e sepela na e kiri singila na Babâ ti e ti yayu teti lo sala si nda ti fini ti e ayeke dä biani, teti futa so e yeke wara na yâ kusala ti lo, nga teti pendere beku ti kekereke. E duti na fini na kota nzala ti ba gango tâ tene ti azendo kue so Nzapa amu, na e leke na bê ti e ti ‘bata tele ti e na yâ ndoye ti Nzapa, teti fini ti lakue lakue.’ (Jude 20, 21) Ba tongana nyen e yeke na ngia ti ba so wungo ti azo so asi singo so asepela Nzapa ayeke fadeso ndulu na azo 6 000 000! Na lege ti deba nzoni ti Jéhovah so ayeke polele, tanga ti azo so a sa yingo na ndo ti ala nga na afon ala ambeni ngasangbaga abungbi na yâ ti akongregation 91 000 na yâ ti akodoro 235. E kue e wara nzoni kobe ti yingo ngbanga ti angangu so “ngba ti be-ta-zo na ti ndara” ayeke sala lakue. (Matthieu 24:45, NW) Mbeni bungbi ti théocratie, so ayeke gue lakue na li ni, na so aba ndo na ndo ti aye na lege ti ndoye, ayeke ba lege ti tambelango ti kusala ti Royaume na yâ ti a-filiale 110 ti aTémoin ti Jéhovah. E kiri singila so Jéhovah apusu bê ti azo ti lo ti ‘yekia lo na aye ti ngele ngangu.’ (aProverbe 3:9, 10, NW) Tongaso, kusala ti e ti fango tene na ndo sese kue angbâ ti gue na li ni, na lekengo ada ti petengo ambeti, ada teti azo ti Béthel na ti amissionnaire, aDa ti Royaume nga na aDa ti Assemblée, alingbi na aye so ahunda.
20. A lingbi gbungo li na ndo ti apendere ye so Jéhovah asala, so alingbi na sepela, andu e tongana nyen?
20 E lingbi pepe ti fa apendere ye kue so alingbi na sepela ti Babâ ti e ti yayu. Me mbeni zo ti be-ti-mbilimbili alingbi ti gbanzi tele ti lo ti bungbi na azo so asepela Jéhovah na ngia? Oko pepe! Tongaso, zia azo kue so andoye Nzapa adekongo na ngia: “I sepela L’Eternel! Kâ na ayayu, i sepela L’Eternel! I sepela Lo, i so i yeke na nduzu! I sepela Lo, i a-ange ti Lo kue! . . . , apendere-koli na amasia, ambakoro-koli na amolenge—Zia ala sepela iri ti L’Eternel, teti gi iri ti Lo oko alingbi na yango-iri. Gloire ti Lo ahon sese na ayayu.” (Psaume 148:1, 2, 12, 13) Tâ tene, zia e ngbâ lakue ti sepela Jéhovah teti apendere ye so lo sala, fadeso nga teti lakue lakue.
Mo Yeke Kiri Tene Tongana Nyen?
• Ambeni ye so Jéhovah asala so alingbi na sepela ayeke so wa?
• Ngbanga ti nyen bê ti mo apusu mo ti sepela Jéhovah?
• Tongana nyen beku ti e ague oko na apendere ye so Nzapa asala?
• Na ndo ye so andu kusala ti fango tene ti Royaume, tongana nyen Jéhovah ayeke sala aye so alingbi na sepela?
[Foto na lembeti 8]
Mo bungbi lego ti mo na bê kue ti he abia ti sepela Jéhovah?
[Afoto na lembeti 11]
E yeke na ngia teti so lege angbâ ti zi na azo ti be-ti-molenge ti bungbi legeoko na e ti sepela Jéhovah