Fango Lege ti Nzapa na ndo Sorongo Zo Teti Mariage
“Fade Mbi wa mo, na Mbi fa na mo lege so alingbi mo tambela dä; fade Mbi wa mo, na lê ti Mbi angbâ na ndo mo.”—PSAUME 32:8.
1. Aye wa ayeke kota mingi teti mbeni nzoni mariage?
MBENI WANGURU so ayeke sala balançoire na ndo ti wen na nduzu, so ague na devant na akiri na peko, ahulu ngangu na yâ ti pupu, lo ngumba yâ ti tele ti lo, lo ga kete, lo ngoro fani mingi na kode na lê ti nduzu, na guengo na mbage ti mbeni mba ti lo so gere ti lo agbu mbeni wen nde, na li ti lo ayeke na mbage ti sese. Na zingo yâ ti tele ti lo hio, lo gboto yâ ti amaboko ti lo, na mba ti lo ni agbu lo. Mbeni koli na wali ayeke dodo yeke yeke na ndo mbeni lando so a tuku glace dä. Fade fade, koli ni ayö wali ni na lo bi lo na lê ti nduzu. Wali ni aluti droit na nduzu na lo ngoro na ndo lo mveni fani mingi, lo tï yeke na ndo ti gere ti lo oko na tele ti koli ni, na ala ngbâ ti dodo legeoko na ngorongo na ndo lando ni. Zo alingbi peut-être pepe ti sala aye use so tongana lo gi ti sala ngangu kue pepe. Ye oko, zo wa alingbi même ti si na aye so tongana lo sala ni fani mingi pepe, tongana lo yeke pepe na mbeni nzoni zo ti sala kusala na lo, na mbilimbili tongana lo yeke pepe na nzoni mara ti fango lege wala wango-tene? Legeoko nga, a lingbi ti ba so mbeni nzoni mariage ayeke ye so asi gi tongaso. Ye oko, a hunda nga ti duti na mbeni nzoni zo ti sala kusala na lo, salango ngangu maboko na maboko, na mbilimbili nzoni wango. Biani, nzoni fango lege ayeke kota ye mingi.
2. (a) Zo wa aleke gere ti mariage, na ngbanga ti nyen? (b) Tongana nyen a yeke leke ambeni mariage?
2 A yeke na lege ni teti mbeni pendere-koli wala pendere-wali so ayeke kumbamba ti bi bê na mbeni zo ti sala mariage na lo, mbeni zo so lo lingbi ti sala kusala na tele ti lo na yâ fini. Ngbele ye na ngoi so Jéhovah Nzapa aleke gere ni, mungo tele ti mbeni koli na wali na mariage ayeke mbeni ye so azo asala biani na yâ fini. Me kozo koli, Adam, asoro pepe lo mveni wali ti lo. A yeke Jéhovah si na lege ti ndoye amu na lo wali ni. (Genèse 2:18-24) Lo ye fade si kozo koli na wali awu mingi si na nda ni sese asi singo na azo. Na peko ti kozo bungbingo so, mingi ni a yeke ababâ na mama ti koli na wali ni si ayeke leke aye ti mariage ni, nga ngoi na ngoi a yeke sala ni na pekoni so azo so tene ni andu ala ayeda. (Genèse 21:21; 24:2-4, 58; 38:6; Josué 15:16, 17) Atä so amariage so aleke ni kozo awe angbâ lakue ti tambela na yâ ti ambeni kodoro na angobo ti salango ye ti azo, azo mingi laso ayeke soro ala mveni zo ti sala mariage na lo.
3. Tongana nyen a lingbi a soro mbeni zo teti mariage?
3 Tongana nyen a lingbi a soro mbeni zo teti mariage? Ambeni ayeke ba ti ala gi tele ti zo ni, ye so ala ba anzere na ayeke pendere na lê. Ambeni nde ayeke gi anzoye na lege ti mitele, mbeni zo so ayeke bata ande ala nzoni na so ayeke mu ande na ala aye kue so ala yeke na bezoin nga na nzala ni. Me fade mbeni oko ti aye so ayeke gue lo mveni ti si na mbeni songo ti ngia so alingbi? A-Proverbe 31:30 atene: “Gango nzoni na lê ti azo ayeke ye ti wataka, na pendere ti tele ayeke senge senge, me wali so akpe mbito ti L’Eternel, fade azo asepela lo.” Na yâ ti atene so, a yeke wara mbeni kpengba tene: Ba ndo na mbage ti Jéhovah tongana mo yeke soro mbeni zo teti mariage.
Na Ndoye, Nzapa Afa Lege
4. Maboko wa Nzapa amu na ndo tene ti sorongo mbeni zo teti mariage?
4 Babâ ti e ti ndoye so ayeke na yayu, Jéhovah, amu Tene ti lo so asû na mbeti ti fa lege na e na yâ aye kue. Lo tene: “Mbi, Jéhovah, mbi yeke Nzapa ti mo, Lo so afa ye na mo ti wara ye ti nzoni teti mo mveni, Lo so asala si mo tambela na lege so a lingbi mo tambela dä.” (Esaïe 48:17, NW) Tongaso, a yeke ye ti dongo bê pepe ti wara na yâ Bible awango-tene so asala kusala nzoni na yâ ti angoi mingi fadeso, na ndo tene ti sorongo mbeni zo teti mariage. Jéhovah aye si amariage ti e aninga na amu ngia. Ni la, lo mu maboko na e ti gbu nda ti awango-tene so, na ti sala ye alingbi na ni. A yeke pepe ye so e yeke ku fade na mbage ti Wasalango e ti ndoye?—Psaume 19:9 (19:8, NW).
5. Ye nyen ayeke kota ye mingi ti wara ngia so aninga na yâ mariage?
5 Na ngoi so Jéhovah aleke gere ti mariage, lo ye la ni si a duti mbeni songo so aninga. (Marc 10:6-12; 1 aCorinthien 7:10, 11) Nda ni la si ‘lo ke surungo mbeti ti mariage,’ na yengo da na ni gi teti “ye ti pitan.” (Malachie 2:13-16; Matthieu 19:9) Tongaso, sorongo mbeni zo teti mariage ayeke mbeni oko ti akpengba kapa ti kota ahon so e lingbi ti sala, na so a lingbi e ba pepe tongana ye senge. A yeke wara pepe adesizion mingi tongaso, so ayeke sala kota ngangu na ndo dutingo na ngia wala na vundu. Na ngoi so nzoni sorongo zo teti mariage alingbi ti sala si fini ti mbeni zo aga nzoni ahon na amu ngia, sorongo ye na lege ti ndara pepe alingbi ti ga na vundu so ayeke hunzi pepe. (aProverbe 21:19; 26:21) Ti tene ngia angbâ lakue, a yeke kota ye mingi ti soro ye na lege ti ndara na ti duti ndulu ti mu tele kue, teti Nzapa aleke gere ti mariage ti duti mbeni songo na popo ti azo so ayeke sala ande kusala legeoko nga na beoko.—Matthieu 19:6.
6. Ngbanga ti nyen a hunda mbilimbili na apendere-koli nga na apendere-wali ti ba ndo nzoni tongana ala yeke soro mbeni zo teti mariage, na tongana nyen ala lingbi ti mu desizion so ayeke na lege ti ndara mingi ahon?
6 A hunda mbilimbili na apendere-koli nga na apendere-wali ti bata nzoni si pendere ti tele na ngangu nzala ti mitele akanga pepe ndo ti nzoni bango ndo ti ala tongana ala yeke soro mbeni zo teti mariage. Biani, mbeni songo so aluti gi na ndo ti aye tongaso alingbi fade fade ti ga na zo ni ti ba mba ti lo tongana mbumbuse zo wala même ti ke lo na bê oko. (2 Samuel 13:15) Na mbeni mbage, e lingbi ti lë ndoye so aninga tongana e gi ti hinga koli wala wali ti e na tongana e gi nga ti hinga e mveni nzoni ahon. A lingbi nga e hinga so ye so ayeke nzoni ahon teti e alingbi lakue pepe ti duti ye so bê ti e aye na tongo nda ni. (Jérémie 17:9) Nda ni la, fango lege ti Nzapa so a wara na yâ Bible ayeke kota ye mingi ahon. A yeke mu maboko na e ti ba tongana nyen e lingbi ti mu adesizion so ndara ayeke dä mingi ahon na yâ fini. Wasungo psaume aduti fä ti Jéhovah tongana lo tene: “Fade Mbi wa mo, na Mbi fa na mo lege so alingbi mo tambela dä; fade Mbi wa mo, na lê ti Mbi angbâ na ndo mo.” (Psaume 32:8; aHébreu 4:12) Atä so mariage alingbi ti kaï nzala so a dü e na ni ti ndoye na ti sala songo na mbeni zo, a yeke ga nga laso na akpale so ahunda ti duti biazo na ti duti na bango nda ti ye.
7. Ngbanga ti nyen ambeni zo ayeda pepe na wango ti Bible na ndo sorongo mbeni koli wala wali, me ye so alingbi ti ga na nyen?
7 A yeke lege ti ndara ti mä nzoni ye so Lingu ti mariage ayeke tene na ndo sorongo mbeni zo teti mariage. Ye oko, e lingbi peut-être ti ke mbeni wango so aluti na ndo Bible tongana a londo na ababâ na mama, wala tongana a londo na aChrétien so ayeke a-ancien. E lingbi peut-être ti bi bê so ala gbu nda ti salango ye ti e kue pepe, na angangu nzala ti bibe alingbi ti pusu e ti mu peko ti ye so bê ti e ayeke fa na e. Ye oko, na pekoni, tongana e tingbi na atâ ye ti lango oko oko, e lingbi ti duti na vundu so e sala ye pepe alingbi na wango ti ndara so amu teti nzoni ti e. (aProverbe 23:19; 28:26) E lingbi ti ba so e tï na yâ mbeni mariage so ndoye ayeke dä pepe, na amolenge so a yeke ngangu na e ti bata, na peut-être même na mbeni koli wala wali so amä na bê pepe. So tâ ye ti vundu si a yeke duti ande tongana mbeni ye so alingbi fade ti ga na e kota ngia aga mbeni lingu ti gbâ ti akpale!
Dutingo Ndulu na Nzapa: Mbeni Kpengba Ye
8. Tongana nyen mungo tele kue na Nzapa ayeke mu maboko na mbeni mariage ti ninga na ti mu ngia?
8 Biani, salango nzala ti mba na popo ti koli na wali ayeke mu maboko ti kpengba mbeni mariage. Me ti tene mbeni mariage aninga na amu ngia, a yeke kota ye mingi ahon ti tene ala use kue alë alengo oko. Mungo tele kue na Jéhovah ti koli na wali ni ayeke leke mbeni songo so aninga na ayeke maï salango beoko so mbeni ye nde alingbi pepe ti sala. (Zo-ti-fa-tene 4:12) Tongana mbeni koli na wali Chrétien asala si fini ti ala aluti na ndo tâ vorongo ti Jéhovah, ala yeke duti beoko na lege ti yingo, ti bibe na ti salango ye. Ala yeke manda Tene ti Nzapa legeoko. Ala yeke sambela legeoko, na ye so ayeke mu lege na ala ti sala beoko. Ala yeke gue legeoko na abungbi ti Chrétien na ala yeke sala kusala maboko na maboko na yâ fango tene. Ye so kue ayeke mu lege ti leke mbeni songo ti yingo so asala si ala ga ndulu na mba mingi ahon. Na même mingi ahon, a yeke ga na deba nzoni ti Jéhovah.
9. Ye wa Abraham asala na ndo tene ti sorongo mbeni wali teti Isaac, na ye nyen asi na nda ni?
9 Ngbanga ti so lo mu tele ti lo na Nzapa, babâ ti sewa be-ta-zo Abraham agi ti nzere na lê ti Nzapa tongana ngoi ni asi ti soro mbeni wali teti molenge ti lo Isaac. Abraham atene na wakua ti da ti lo so lo zia bê kue na lo: “A lingbi mo deba na iri ti L’Eternel [“Jéhovah,” NW], Nzapa ti yayu, na Nzapa ti sese, a lingbi mo kamata wali teti molenge ti mbi pepe na popo ti amolenge-wali ti Canaan, ala so mbi duti na popo ti ala. Me a lingbi mo gue na sese ti mbi na asongo ti mbi si mo kamata wali teti molenge ti mbi Isaac. . . . Fade Lo [Jéhovah] to ange ti Lo na gbele mo, na mo kamata wali teti molenge ti mbi na ndo kâ.” Rébecca afa so lo yeke mbeni wali so alingbi, so Isaac andoye la ni mingi.—Genèse 24:3, 4, 7, 14-21, 67.
10. Akungba wa Mbeti ti Nzapa ahunda na akoli nga na awali ti ala ti yö?
10 Tongana e yeke aChrétien so ade ti sala mariage pepe, dutingo ndulu na Nzapa ayeke mu ande maboko na e ti lë alengo so ayeke mu lege na e ti sala ye alingbi na aye so Mbeti ti Nzapa ahunda na ndo tene ti mariage. Na popo ti aye so ahunda na akoli nga na awali ti ala, a yeke wara atene so bazengele Paul atene: “Zia awali amä yanga ti akoli ti ala legeoko tongana ala mä Seigneur. . . . Akoli, i ngbâ ti ndoye awali ti i, legeoko tongana Christ andoye nga kongregation na lo mu lo mveni teti lo . . . A lingbi akoli andoye awali ti ala legeoko tongana tele ti ala mveni. . . . I oko oko kue, i ndoye awali ti i legeoko tongana tele ti i mveni; na a lingbi wali ayekia koli ti lo.” (aÉphésien 5:22-33, NW) Tongana ti so e lingbi ti ba, atene ti Paul so asû na gbe ti yingo agboto lê mingi na ndo nene ti ndoye na yekiango ndo. Salango ye alingbi na wango so ahunda ti duti na kpengo mbito ti Jéhovah so afa yekiango ndo. A hunda mbeni mungo tele kue so alondo na bê na yâ ngoi ti nzoni nga na ti sioni. A lingbi aChrétien so abi bê ti sala mariage aduti na ngangu ti yö kungba so.
Sorongo ngoi ti Sala Mariage
11. (a) Wango wa na ndo ngoi ti sala mariage a wara ni na yâ Mbeti ti Nzapa? (b) Tapande wa afa na gigi ndara ti sala ye alingbi na wango ti Bible so asû na 1 aCorinthien 7:36?
11 Ti hinga lawa si e yeke ndulu ti sala mariage ayeke kota ye mingi. Teti so bango ndo ti zo oko oko na ndo ni ayeke nde nde, Mbeti ti Nzapa afa pepe mbeni ngu. Ye oko, lo fa so a yeke nzoni ahon ti ku juska e hon “ngu ti machia,” ngoi so ngangu ti nzala ti mitele alingbi ti buba nzoni ngangu ti bango nda ti ye ti e. (1 aCorinthien 7:36) Michèle atene: “Tongana mbi ba akamarade ti mbi na lekengo tele teti mariage nga na salango mariage, so mingi ti ala asala na ngoi so ala de pendere, ngoi na ngoi mbi ba so ayeke ngangu ti bata wango so. Me mbi ba so wango ni alondo na Jéhovah, na lo yeke fa na e gi ye so ayeke teti nzoni ti e. Tongana mbi ku kete kozoni ti sala mariage, mbi wara lege ti bata lê na ndo songo ti mbi na Jéhovah nga ti wara ambeni ye ti nzoni na yâ fini, so zo alingbi peut-être pepe ti wara na ngoi so lo de pendere. Angu mingi na pekoni, mbi leke tele ti mbi nzoni ahon ti yö akungba nga ti leke akpale so ayeke ga na lege ti mariage.”
12. Ngbanga ti nyen a yeke lege ti ndara pepe ti dö tele hio ti sala mariage tongana e de pendere?
12 Ala so adö tele ti sala mariage na ngoi so ala de pendere fani mingi ayeke ba so abezoin na anzala ti ala ayeke gbian na ngoi so ala yeke maï ti ga biazo. Na pekoni, ala ba so aye so anzere na lê ti ala kozoni ayeke na nene ni mingi pepe fadeso. Mbeni maseka-wali Chrétien aleke na bê ti lo kue ti sala mariage na ngoi so lo yeke na ngu 16. Âta ti lo ti wali asala mariage na ngoi so lo yeke na ngu 16, na mama ti lo nga. Tongana mbeni maseka-koli so lo sala nzala ti lo ake ti mu lo na mariage na ngoi ni so, lo soro mbeni zo nde so ayeda ti sala ni. Ye oko, ngoi mingi na pekoni, lo dema mingi teti desizion so lo mu hio mingi na gbungo li pepe.
13. Fani mingi, aye wa atia ala so adö tele ti sala mariage?
13 Tongana zo ayeke gbu li na ndo mariage, a yeke kota ye mingi ti hinga nzoni tongana biazo aye kue so andu tene ti mariage. Salango mariage hio alingbi ti ga na molongo ti akpale so maseka-koli na wali ti lo aleke tele peut-être nzoni pepe ti hon ndo ni. Peut-être kode nga na dutingo biazo so a hunda ti hon ndo ti akpale ti mariage na ti bata amolenge atia ala. A lingbi e bi tele na yâ mariage gi tongana e leke tele ti e awe na lege ti mitele, ti bibe na ti yingo ti to nda ti mbeni salango songo so aninga.
14. A hunda ye nyen ti leke angangu kpale na yâ mariage?
14 Paul asû na mbeti so ala so asala mariage ayeke wara “ye ti ngangu na yâ mitele.” (1 aCorinthien 7:28) Fade akpale ayeke londo teti so ala yeke azo so salango ye ti ala ayeke nde nde, na abango ndo ti ala ayeke gue ande nde nde. Teti so e yeke mbilimbili-kue pepe, a lingbi ti duti ngangu ti sala ye alingbi na kungba ti e na lege ti Bible na yâ mariage. (1 aCorinthien 11:3; aColossien 3:18, 19; Tite 2:4, 5; 1 Pierre 3:1, 2, 7) A hunda ti duti biazo na ti luti ngangu na lege ti yingo ti gi na ti mu peko ti fango lege ti Nzapa ti wara lege ti leke na ndoye angangu kpale.
15. Kusala wa ababâ na mama alingbi ti sala ti leke amolenge ti ala teti mariage? Mu mbeni tapande.
15 Ababâ na mama alingbi ti leke amolenge ti ala teti mariage na mungo maboko na ala ti ba na nene ni mungo peko ti fango lege ti Nzapa. Na salango kusala na kode na Bible nga na ambeti ti aChrétien, ababâ na mama alingbi ti mu maboko na amolenge ti ala ti hinga wala amolenge ni mveni wala zo so ala ye ti mu na mariage ayeke ndulu ti sala ye alingbi na mungo tele ti ala na yâ mariage.a Na ngoi so lo yeke na ngu 18, Blossom abi bê so lo ndoye mbeni maseka-koli na yâ kongregation ti lo. Maseka-koli so ayeke la ni mbeni wakua ti ngoi kue, na ala ye ti sala mariage. Me ababâ na mama ti ita-wali ni ahunda na lo ti ku ngu oko, teti ala ba so lo de maseka mingi. Na pekoni, Blossom asû na mbeti: “Mbi kiri singila mingi teti so mbi mä wango ti ndara so. Gi na yâ ngu ni, mbi ga biazo kete na mbi to nda ti ba so maseka-koli so ayeke pepe na alengo so alingbi ti sala si lo duti nzoni koli ti mu na mariage. Na nda ni, lo zia bungbi, na mbi sigigi na yâ ye so alingbi fade ti duti kota kpale ti fini ti mbi. So tâ pendere ye ti wara ababâ na mama ti ndara so alingbi ti zia bê kue na bango ndo ti ala!”
‘Sala Mariage Gi na Yâ Seigneur’
16. (a) Tongana nyen aChrétien alingbi peut-être ti wara tara na ndo salango mariage “na yâ Seigneur”? (b) Tongana bê ti ala apusu ala ti sala mariage na mbeni zo so amä na bê pepe, a lingbi aChrétien agbu li na ndo ye wa?
16 Fango lege ti Jéhovah teti aChrétien ayeke polele biani: ‘Sala mariage gi na yâ Seigneur.’ (1 aCorinthien 7:39) Ababâ na mama Chrétien na amolenge ti ala alingbi ti wara tara na ndo tene so. Na lege wa? Apendere ayeke peut-être na nzala ti sala mariage, me ala wara lege pepe ti wara mbeni zo so alingbi na yâ kongregation. Kamême a ba a tene ye ni ayeke biani tongaso. Na ambeni ndo, wungo ti awali so ayeke dä ahon wungo ti akoli, wala na ndo ni so, a lingbi peut-être pepe ti wara mbeni zo so alingbi. Mbeni maseka-koli so amu tele ti lo na Nzapa pepe na yâ ti kongregation alingbi peut-être ti sala nzala ti mbeni maseka-wali Chrétien (wala a yeke mbeni maseka-wali ti gigi si asala nzala ti mbeni maseka-koli so ayeke Chrétien), na bê ti maseka Chrétien ni nga na ti ababâ na mama ti lo alingbi peut-être ti pusu ala ti bele akpengba ndia so Jéhovah azia. Na yâ mara ti aye tongaso, a yeke duti nzoni ande ti gbu li na ndo tapande ti Abraham. Mbeni oko lege so na yâ ni lo bata nzoni songo ti lo na Nzapa ayeke na lekengo nzoni si molenge ti lo ti koli Isaac asala mariage na mbeni tâ wavorongo Jéhovah. Isaac asala legeoko nga teti Jacob molenge ti lo ti koli. Ye so ahunda la ni na azo kue so tene ni andu ala ti sala ngangu, me a nzere na Nzapa na aga na deba nzoni ti lo na pekoni.—Genèse 28:1-4.
17. Ngbanga ti nyen a ba so salango mariage na mbeni zo so amä na bê pepe ayeke ga gi na kota kpale, na kota nda ti tene so ngbanga ni a lingbi ‘asala mariage gi na yâ Seigneur’ ayeke so wa?
17 Na yâ ti ambeni tapande mingi pepe, zo ni so amä na bê pepe aga Chrétien na nda ni. Ye oko, fani mingi amariage so a sala na azo so amä na bê pepe aga na kpale. Ala so abungbi na gbe ti joug so alingbi pepe ayeke kangbi pepe atene ti mabe, akpengba ndia, na aye so ala zia na gbele ala ti sala, so ague kue legeoko. (2 aCorinthien 6:14) Ye so alingbi ti sala sioni ngangu na ndo lisoro nga na ngia ti sewa. Na tapande, mbeni wali Chrétien adema teti so na peko ti mbeni bungbi ti Chrétien so akpengba zo, lo lingbi pepe ti gue na kodoro ti sala lisoro ti aye ti yingo so na koli ti lo so amä na bê pepe. Biani, ye so ayeke kota mingi ahon ayeke so ‘salango mariage na yâ Seigneur’ ayeke mbeni fä ti dutingo be-ta-zo na Jéhovah. Tongana e yeke sala ye alingbi na Tene ti Nzapa, bê ti e ayeke fâ ngbanga pepe na ndo ti e, teti e yeke sala ye so “ayeke nzoni na lê ti Lo.”—1 Jean 3:21, 22.
18. Tongana zo ayeke gbu li na ndo mariage, a lingbi lo bi bê na ndo akpengba tene wa, na ngbanga ti nyen?
18 Tongana a yeke gbu li na ndo mariage, a lingbi nzoye na dutingo na lege ti yingo ti zo so lo leke ti mu na mariage aduti kozo ye so a bi bê dä. Salango ye ti mbeni Chrétien, nde na ndoye teti Nzapa nga na mungo tele kue na lo, ayeke ye ti kota mingi ahon pendere ti tele. Ala so ayekia na asala ye alingbi na kungba ti ala ti koli na ti wali so akpengba na lege ti yingo ayeke na yengo da ti Nzapa. Na ngangu ti kota ahon so mbeni koli na wali alingbi ti wara alondo na mungo tele use kue na Wasalango ye nga na yengo da kue na fango lege ti lo. Na lege so, Jéhovah ayeke wara gonda, na mariage ni ato nda ni na ndo mbeni dutingo ti yingo so akpengba, so fade amu lege ti duti beoko aninga.
[Kete Tene na Gbe Ni]
a Ba La Tour de Garde ti 15 février 1999, alembeti 4-8.
Fade Mo Kiri Tene Tongana Nyen?
• Ngbanga ti nyen a hunda ti wara fango lege ti Nzapa na yâ sorongo mbeni nzoni zo teti mariage?
• Tongana nyen mungo tele na Nzapa ayeke mu maboko ti kpengba songo na yâ mariage?
• Tongana nyen ababâ na mama alingbi ti leke amolenge ti ala teti mariage?
• Ngbanga ti nyen a yeke kota ye mingi ti ‘sala mariage gi na yâ Seigneur’?
[Afoto na lembeti 13]
Salango ye alingbi na wango ti Nzapa na yâ sorongo zo ti sala mariage na lo alingbi ti ga na ngia mingi
[Afoto na lembeti 16]
Adeba nzoni mingi ayeke ga na lege ti ‘salango mariage gi na yâ Seigneur’