Kelele ti Mbeni Sese so Ayeke na Ngia

MBETI-SANGO Time atene: “Oko zo so asala ngangu na ndo amba ti lo ahon tanga ti azo kue, pepe gi na yâ angu saki use so ahon me nga na yâ mbaï kue ti azo, ayeke Jésus ti Nazareth.” Na ngoi so Jésus ade na sese, azo ti bê ti mbilimbili saki mingi aba pepe gi kota ti lo, me nga bingo bê ti lo na ndo ambeni zo. Tongaso, a yeke ye ti dongo bê pepe so ala ye la ni ti sala si lo ga gbia. (Jean 6:10, 14, 15) Ye oko, tongana ti so a fa na yâ ti article so ahon, Jésus ake ti bi tele ti lo na yâ aye ti poroso.

SALANGO ye ti Jésus aluti la ni mbilimbili na ndo aye ota: bango ndo ti Babâ ti lo na ndo lege so azo ayeke fa na gigi ala mveni ye wa ayeke nzoni na ye wa ayeke sioni, na so a ndu nga komandema ti azo; hingango ye ti Jésus na ndo akota ngangu so ahonde tele ti ala na so ayeke sala kusala ti kanga lege même na angangu ti nzoni ahon so zo ayeke sala ti komande; nga ye so Nzapa aleke ti zia na sese mbeni yanga-ti-komande na yayu so ayeke komande na ndo sese kue. Na ngoi so e yeke ba atene ota so nzoni ahon, fade e yeke ba ngbanga ti nyen aye kue so azo asala ti tene sese aga mbeni ndo ti nzoni ahon atï na ngu. E yeke ba nga ande tongana nyen a yeke sala si ye kue aga nzoni.

Azo Alingbi Komande Tele ti Ala Mveni?

Tongana Nzapa aleke azo, lo mu na ala ngangu ti komande na ndo anyama kue. (Genèse 1:26) Me azo ayeke la ni na gbe ti kota yanga-ti-komande ti Nzapa. Fade kozo koli na kozo wali ayeke fa so ala yeda ti mä yanga ti Nzapa na kengo na bê kue ti te lê ti mbeni keke, “keke ti hinga nzoni na ti hinga sioni.” (Genèse 2:17) Mawa ni ayeke so Adam na Ève asala kusala nzoni pepe na ngangu ti ala ti soro ye ala mveni, na ala ke yanga ti Nzapa. Mungo lê ti keke so a gbanzi ni na ala ayeke pepe gi nzi. A yeke biani fä ti kengo kota yanga-ti-komande ti Nzapa. Mbeni kete tene na gbe ni ti Bible de Jérusalem na ndo Genèse 2:17 atene so Adam na Ève ahunda droit ‘ti fa lege na dutingo ti ala kue na tongaso ala fa so ala ke ti ba tele ti ala tongana azo so Nzapa asala ala . . . Kozo siokpari ayeke kengo kota yanga-ti-komande ti Nzapa.’

Ngbanga ti akota tene so alondo na so andu tambela ti zo, Nzapa azia lege na Adam na Ève nga na ahale ti ala ti soro lege ti ala ti tambela, na ala zia na sese andia ti ala mveni na ndo ye ti nzoni na ti sioni. (Psaume 147:19, 20; aRomain 2:14) Mbilimbili, a yeke na la ni so si zo ato nda ti tara ti sala kusala na ngangu ti lo ti soro ye so lo ye teti lo mveni. Salango tongaso aga na ye ti nzoni? Tongana e ba aye so asi na yâ angu saki mingi so ahon awe, e lingbi ti tene oko pepe! Zo-ti-fa-tene 8:9 (NW) atene: “Zo akomande mba ti lo zo ti sala pasi na lo.” Tondo ti vundu na ndo komandema so azo asala ala mveni ayeda na tâ tene ti Jérémie 10:23: “O L’Eternel [“Jéhovah,” NW], mbi hinga lege ti zo ayeke na tïtî lo mveni pepe; na a yeke na bê ti zo so atambela ti fa lege na gere ti lo nga pepe.” Mbaï afa polele so azo ayeke na kode pepe ti komande ala mveni nzoni nde na Wasalango ala.

Jésus ayeda na tene so na bê kue. Lo ba tongana ye ti sioni mingi dutingo nde na Nzapa. Lo tene: “Mbi sala ye oko na bê ti Mbi pepe. . . . Mbi sala ye so amu ngia na Lo lakue.” (Jean 4:34; 8:28, 29) Tongaso, teti so Nzapa amu yanga na lo oko pepe ti zia azo ti sala si lo ga gbia, Jésus abi bê même pepe na lege ti yeda na ni. Ye oko, ye so aye ti tene pepe so lo yeke ndulu pepe ti mu maboko na amba ti lo zo. Nde na so, lo sala ye kue so lo yeke na ngangu ti sala ti mu maboko na azo ti wara ngia ti kota ahon na lâ ni kâ nga na kekereke ti ala. Lo mu même fini ti lo teti azo. (Matthieu 5:3-11; 7:24-27; Jean 3:16) Me Jésus ahinga so “teti ye kue, mbeni ngoi so adiko awe ayeke dä,” so andu nga ngoi teti Nzapa ti ga polele na komandema ti lo na ndo azo. (Zo-ti-fa-tene 3:1, NW; Matthieu 24:14, 21, 22, 36-39) Ye oko, dabe mo so na Éden, akozo babâ na mama ti e ayeda ti sala ye alingbi na ye ti bê ti mbeni sioni créature ti yingo so asala tene na lege ti mbeni ngbo so lê aba. Ye so ague na e na use nda ti tene so apusu Jésus ti duti nde na aye ti poroso.

Mokonzi so Akomande Sese na Gbe-mingo

Bible afa na e so Satan aye ti mu na Jésus “aroyaume kue ti sese na gloire ti ala” tongana Jésus ayeda ti voro lo gi fani oko. (Matthieu 4:8-10) Ti ba biani, a ye ti mu na Jésus komandema ti sese kue, me tongana ti so Diable aye. Jésus atï na yâ ti tara so pepe. Me ye so ayeke la ni mbeni tara biani? Satan alingbi fade ti mu na lo mara ti kota ye tongaso? Biani lo lingbi, teti Jésus lo mveni ahiri Diable “mokonzi ti sese,” na bazengele Paul afa lo tongana “nzapa ti sese so.”​—Jean 14:30; 2 aCorinthien 4:4; aEphésien 6:12.

Biani, Jésus ahinga so Diable abi bê oko pepe na aye so ayeke teti nzoni ti azo. Lo fa Satan tongana “wafango zo” na “babâ ti mvene na ti ye kue so ayeke wataka.” (Jean 8:44, The Amplified Bible) A yeke polele so mbeni sese so ayeke “na gbe ti ngangu” ti mbeni sioni yingo tongaso alingbi lâ oko pepe ti duti na tâ ngia. (1 Jean 5:19, NW) Me Diable ayeke ngbâ na ngangu ti komande so lakue lakue pepe. Na yâ ngoi kete, Jésus so ayeke fadeso mbeni ngangu créature ti yingo ayeke lungula ande Satan, na lo yeke lungula biaku ngangu so lo yeke sala na ndo sese.​—aHébreu 2:14; Apocalypse 20:1-3.

Satan mveni ahinga so alâ ti lo tongana mokonzi ti sese ayeke gue na loro ti hunzi. Tongaso, lo yeke sala ngangu kue, atä beku ayeke dä pepe, ti sala si azo aga sioni na mbeni lege so a lingbi gbian ni pepe, legeoko tongana ti so lo sala giriri kozoni na Kota Moa ti ngoi ti Noé. (Genèse 6:1-5; Jude 6) Apocalypse 12:12 (NW) atene: “Vundu teti sese nga teti ngu-ingo, ngbanga ti so Diable azu na mbage ti i, na kota ngonzo, na hingango so lo yeke na ngoi mingi pepe.” Aprophétie ti Bible nga na aye so asi na sese afa so e yeke ndulu na hunzingo ti “ngoi mingi pepe” so. (2 Timothée 3:1-5) Ngoi ti hungo tele ayeke ndulu ti si.

Mbeni Yanga-ti-komande so Aga na Ngia

Ota nda ti tene so apusu Jésus ti duti nde na aye ti poroso ayeke so lo hinga, na yâ ti mbeni ngoi so a diko awe teti kekereke, fade Nzapa ayeke leke gere ti mbeni yanga-ti-komande na yayu ti komande na ndo sese. Bible ahiri yanga-ti-komande so Royaume ti Nzapa, na a yeke la ni kota li ti tene ti fango ye ti Jésus. (Luc 4:43; Apocalypse 11:15) Jésus afa na adisciple ti lo ti sambela teti gango ti Royaume so, teti a yeke gi na gbe ti komandema ni si ‘a yeke sala ande na sese ye so bê ti Nzapa aye legeoko tongana a sala ni na yayu.’ (Matthieu 6:9, 10) Mo lingbi peut-être ti hunda tele ti mo: ‘Tongana Royaume so aga ti komande na ndo sese kue, ye nyen ayeke si ande na ayanga-ti-komande ti azo?’

A wara kiringo tene ni na Daniel 2:44: “Na lâ ti agbia so [akomande na hunzingo ti bungbi ti aye ti fadeso], fade Nzapa ti yayu ayä royaume so afuti lâ oko pepe, na Lo zia royaume ni na tïtî ambeni zo nde pepe; me fade royaume so afâ ambeni royaume so [azo asala] kue ndulu ndulu, na a sala si royaume nde nde so kue awe; na fade royaume so angbâ lakue lakue.” Ngbanga ti nyen a lingbi Royaume ti Nzapa “afâ ndulu ndulu” ayanga-ti-komande ti sese? Ngbanga ti so ala sala si bibe ti sorongo ye ti nzoni na ti sioni nde na Nzapa angbâ ti gue na li ni, bibe so Satan amaï ni ngbele ye na yaka ti Éden. Nde na so ala sala ye pepe teti nzoni ti azo, azo so atiri ti maï mara ti bibe tongaso afa tele ti ala tongana awato so ague ti tingbi ngangu na Wasalango ye. (Psaume 2:6-12; Apocalypse 16:14, 16) Tongaso, a lingbi e hunda tele ti e: ‘E yeda na komandema ti Nzapa wala e ke ni?’

Mo Yeke Soro Ande Kota Yanga-ti-Komande ti Zo Wa?

Ti mu maboko na azo ti mu mbeni desizion so aluti na ndo tâ hingango ye na ndo tene ti komandema, Jésus amu na adisciple ti lo kungba ti fa “nzo tene ti royaume . . . na sese kue so azo ayeke dä, tongana tene ti témoin na amara kue” kozoni si a hunzi bungbi ti aye ti fadeso. (Matthieu 24:14, NW) Azo wa laso a hinga ala na ndo sese kue teti so ala yeke fa tene ti Royaume ti Nzapa? A yeke aTémoin ti Jéhovah. Biani, a yeke teti angoi mingi fadeso awe si a yeke ba na li ti kozo lembeti ti périodique so atene so: “Afa Tene ti Royaume ti Jéhovah.” Laso, aTémoin ahon kutu omene na yâ akodoro ahon 230 ayeke mu maboko na azo ti wara tâ hingango ye na ndo Royaume so.a

ADeba Nzoni teti Azo so Aduti na Gbe ti Royaume Ni

Jésus asala lakue aye so ague oko na lege so Nzapa afa. Tongaso, ahon ti soro mbeni lege so ague nde na ti Nzapa na ti tara ti mu maboko na bungbi ti aye ti fadeso wala ti sala si a ga nzoni ahon na salango kusala na aye ti poroso, lo sala kusala ngangu ti maï aye ti Royaume ti Nzapa, oko yorö ti akpale ti azo. Ndali ti be-biani ti lo, a futa lo na matabisi ti wara mbeni trône ti gloire na yayu tongana tâ Gbia ti Royaume so. So tâ pendere matabisi si lo wara teti so lo mä yanga ti Nzapa!​—Daniel 7:13, 14.

Azo kutu mingi so laso amu tapande ti Jésus na ziango Royaume ti Nzapa na kozo ndo nga na salango ye alingbi na ye so bê ti Nzapa aye ayeke wara ande nga mbeni pendere matabisi: matabisi ti duti azo so asala kusala na sese na gbe ti Royaume ti Nzapa. (Matthieu 6:33) Na gbe ti komandema ti ndoye so, fade a yeke gue na ala ti ga mbilimbili-kue na beku ti duti na fini teti lakue lakue. (Apocalypse 21:3, 4) Mbeti oko ti Jean 2:17 (NW) atene: “Sese ni ayeke hon, na nzala ni nga, me zo so asala ye so bê ti Nzapa aye, lo ngbâ lakue lakue.” Teti so Satan na azo ti lo ahon awe, na sese kue aga mbeni paradis so kangbi ti tene ti mara, abungbi ti dengo buze so afuti, nga lege ti vorongo ti wataka ayeke dä mbeni pepe, fade a yeke duti ande tâ ye ti ngia ti ngbâ na fini na ndo ni teti lakue lakue!​—Psaume 37:29; 72:16.

Biani, Royaume ti Nzapa ayeke tâ kelele ti mbeni sese so kota ngia ayeke duti dä, na a yeke na lege ni ti ba tokua so a yeke fa ni tongana nzo tene. Tongana mo de ti sala tongaso pepe, ti peko so mbeni Témoin ti Jéhovah ayeke si na yanga-da ti mo, ngbanga ti nyen ti yamba pepe nzo tene so lo yeke ga na ni na mo?

[Kete Tene na Gbe Ni]

[Foto na lembeti 5]

Mbaï afa so azo alingbi pepe ti komande nzoni nde na Nzapa

[Foto na lembeti 5]

Teti so lo komande “bungbi ti aye” ti fadeso, Satan alingbi ti mu na Jésus “aroyaume kue ti sese”

[Foto na lembeti 7]

Jésus afa so na gbe ti ye so Nzapa aleke na lege ti Royaume, fade sese ayeke duti mbeni pendere ndo