Atene so Azo Ahunda

Tongana nyen mbeni wali Chrétien alingbi ti zia na ndo so alingbi, dutingo be-ta-zo na Nzapa nga mango yanga ti koli ti lo so amä na bê pepe, tongana koli ni ayeke mu mbage na akusala so andu amatanga ti lege ti vorongo?

Salango ye ti wali ni na lege so ayeke hunda ande ndara na kode. Me lo yeke sala nzoni ye tongana lo sala ngangu ti zia akungba ti lo ni use kue na ndo so alingbi. Jésus amu wango na ndo mbeni ye nde so ague oko na ni: “I mu na César ye so ayeke ti César, na i mu na Nzapa ye so ayeke ti Nzapa.” (Matthieu 22:21) Tâ tene, lo yeke sala tene ti akungba ti zo na mbage ti angorogbia, so na pekoni a hunda na aChrétien ti mä yanga ti ala. (aRomain 13:1) Ye oko, a lingbi nga ti tingbi wango ti lo na salango ye ti mbeni wali so azia na ndo so alingbi akungba ti lo na mbage ti Nzapa nga akungba ti lo so Mbeti ti Nzapa amu na lo ti mä yanga ti koli ti lo, atä koli ni amä na bê pepe.

Zo kue so ahinga Bible nzoni ayeke bele pepe so Bible agboto lê so kozo kungba ti mbeni Chrétien ague na Nzapa ti Ngangu Ahon Kue, ti duti be-ta-zo na lo na yâ ye kue. (Kusala 5:29) Ye oko, na yâ aye mingi so asi, mbeni tâ wavorongo alingbi ti sala ye alingbi na ahundango ye wala amungo yanga ti mbeni koli wala wali so amä na bê pepe, nga na oko ngoi ni, ti doro pepe andia ti Nzapa so ayeke na nduzu.

E wara mbeni tapande ti manda ye dä na ndo aHébreu ota so a fa ni na Daniel chapitre 3. Kota zo ti ala na yâ ngangu ti komande, Neboukadnetsar, amu yanga ti tene ala, nga na ambeni zo nde, aduti dä na be-nyama ti Doura. Na bango so a zia na yâ kapa ni vorongo ti wataka, peut-être aHébreu ota so ayeke duti fade na nzala ti kpe ti duti dä. Peut-être Daniel alingbi la ni ti wara mbeni nda ti tene so amu lege na lo ti ga pepe, me aHébreu ota so alingbi la ni pepe ti sala tongaso.a Tongaso, ala yeda kamême ti gue, me fade ala yeke yeda oko pepe ti mu mbage na yâ sio kusala oko pepe, na ala mu mbage dä la ni pepe.​—Daniel 3:1-18.

Legeoko nga, ndulu na angoi ti matanga, mbeni koli so amä na bê pepe alingbi ti hunda, na même ti mu yanga, ti tene wali ti lo so ayeke Chrétien asala mbeni ye so wali ni alingbi ande ti ke ti sala. Ba ambeni tapande ni: Lo hunda na lo ti tö mbeni kobe na lango so koli ni na ambeni zo nde ayeke sala ande mbeni matanga. Wala lo mu yanga ti tene sewa ni (so wali ti lo ayeke nga dä) asala vizite na asewa ti lo tâ na lango ni so, ti te mbeni kobe wala ti ba gi ala senge. Wala même kozo na matanga ni, lo lingbi ti tene na wali ti lo so na ngoi so lo yeke sigigi ti vo ye, a lingbi lo vo ambeni ye teti lo: akobe so ayeke gi teti matanga ni, aye ti mu na matabisi, wala akugbe ti kangango na ye nga na a-carte teti aye so lo ye ti mu na matabisi.

Na ndo so nga, a lingbi wali Chrétien ni aleke ti mu mbage pepe na aye ti vorongo ti wataka; ye oko, ti amara ti ahundango ye so ayeke tongana nyen? Koli ni ayeke mokonzi ti sewa, na Mbeti ti Nzapa atene: “I awali, i duti na gbe ti akoli ti i, tongana ti so a lingbi na yâ Seigneur.” (aColossien 3:18, NW) Na yâ atapande so, wali ni alingbi ti mä yanga ti koli ti lo, nga na oko ngoi ni, ti kpe mbito ti Nzapa? A lingbi lo mu desizion ti ba tongana nyen ti zia na ndo so alingbi, mango yanga ti koli ti lo na mango yanga ti Jéhovah so ahon ye kue.

Na ambeni ngoi nde ti matanga, koli ti lo alingbi peut-être ti hunda na lo ti tö mbeni kobe ngbanga ti so ayeke ye so lo ye mingi, wala ngbanga ti so lo yeke te ka kobe so lakue na mbeni mbilimbili ngoi. Lo yeke sala nzala ande ti fa ndoye ti lo teti koli ni, na ti yeda na kungba ti lo ti mungo li ni. Fade lo lingbi ti sala tongaso même tongana koli ni ahunda ye ni na ngoi ti mbeni matanga? Ambeni wali Chrétien alingbi ti sala tongaso na nzoni yingo-ti-hinga, na bango ni gi tongana mbeni kusala ti tongo kobe ti lâ oko oko. Biani, Chrétien be-ta-zo oko pepe ayeke ba lango ni tongana mbeni lango ti matanga, atä koli ti lo asala tongaso. Legeoko nga, koli ni alingbi ti hunda na lo ti duti na tele ti lo tongana lo yeke sala vizite na asewa ti lo na angoi nde nde ti nze oko oko wala ngu oko oko. Lo lingbi ande ti sala tongaso tongana a yeke lango ti mbeni matanga? Wala fade lo yeke yeda ti vo aye so koli ni ahunda na lo, na gingo pepe ti hinga ye so koli ni aye ti sala na aye so lo vo teti lo na ngoi so lo yeke vo aye ti lo?

Tâ tene, a lingbi mbeni wali Chrétien abi bê na ambeni zo nde, ti ba tongana nyen ye so ayeke sala ngangu na ndo ala. (aPhilippien 2:4) Fade lo yeke kpe ti sala si ambeni zo nde aduti na bibe so lo yeke mu mbage na matanga so, legeoko tongana ti so aHébreu ota so aye fade peut-être ti tene ambeni zo nde aba ala pepe na guengo na be-nyama ti Doura. Tongaso, lo lingbi na lege ti kode ti tara ti sala lisoro na koli ti lo ti ba wala na bingo bê na ndo abibe ti lo, koli ni alingbi ti sala ambeni ye so andu matanga ni gi lo mveni, ti sala ye alingbi na bibe ti wali ti lo so andoye na ayekia lo. Lo lingbi ti ba so a yeke lege ti ndara ti sala ye pepe si ala use kue ayôro tele ti ala na yâ mbeni ye so alingbi ti ga na kpale tongana wali ni aba so a lingbi lo ke ti mu tele ti lo na aye so andu vorongo ti wataka. Biani, salango lisoro kpö kozoni alingbi ti mu lege ti leke ye na yâ siriri.​—aProverbe 22:3.

Na nda ni, a lingbi Chrétien be-ta-zo ni agbu li nzoni na ndo aye so kue, na pekoni lo mu desizion ti ba ye so a lingbi lo sala. A lingbi mango yanga ti Nzapa aga kozo, tongana ti so a ga kozo na yâ fini ti aHébreu ota so. (1 aCorinthien 10:31) Me na batango ye so na li, a yeke ti Chrétien wali (wala koli) oko oko ti mu desizion ti aye wa, so apusu lo pepe ti bele mabe ti lo, a lingbi ti sala alingbi na hundango ndo ti mbeni zo so ayeke na ngangu ti komande na yâ sewa wala na yâ bungbi ti azo.

[Kete Tene na Gbe Ni]