Mo Wara Awe “Yingo ti Tâ Tënë”?
‘Babâ ayeke mû na i ande mbeni wamungo maboko ti duti na i lakue lakue, yingo ti tâ tënë.’—JEAN 14:16, 17, NW.
“SEIGNEUR, Mo gue na ndo wa?” So ayeke mbeni oko ti ahundango tënë so abazengele ti Jésus ahunda na lo na andangba ngbonga so lo sala na ala na yâ ti da-nduzu na Jérusalem. (Jean 13:36) Tongana bungbi ni ayeke gue na li ni, Jésus atene na ala so a lingbi lo zia ala fadeso na lo kiri na Babâ ti lo. (Jean 14:28; 16:28) Lo yeke duti mbeni pëpe na ala na lege ti mitele ti fa ye na ala na ti kiri tënë na ahundango tënë ti ala. Ye oko, lo dë bê ti ala, lo tene: “Fade mbi yeke hunda Babâ na fade lo yeke mû na i mbeni wamungo maboko [wala, wadengo bê] ti duti na i lakue lakue.”—Jean 14:16, NW, kete tënë na gbe ni.
2 Jésus afa na gigi wamungo maboko so na lo fa tongana nyen lo yeke mû maboko na adisciple ti lo. Lo tene na ala: “Na Mbi tene ye so na i kozoni pëpe teti Mbi yeke na tele ti i. Me fadeso Mbi gue na Lo so ato Mbi . . . A yeke nzoni teti i tongana Mbi gue; teti tongana Mbi gue pëpe, fade Consolateur [“wamungo maboko,” NW] aga na i pëpe. Me tongana Mbi gue, fade Mbi to Lo na i. . . . Tongana Lo, Yingo ti Tene-biani, asi, fade Lo fa na i lege ti tene-biani kue.”—Jean 16:4, 5, 7, 13.
3 Zendo so aga tâ tënë na Pentecôte ti ngu 33 N.E., tongana ti so bazengele Pierre ayeda na ni: “Jésus so, Nzapa ayä Lo na nduzu; na e kue ayeke atémoin ti tënë so. Teti Nzapa ayä Lo na nduzu na koti ti Lo, na Lo kamata zendo ti Yingo Vulu na tïtî Babâ, tongaso Lo sa ye so i bâ na i mä.” (Kusala 2:32, 33) Tongana ti so e yeke bâ ande, yingo ti nzoni-kue so a sa ni na Pentecôte asala aye mingi teti akozo Chrétien. Me Jésus azê so “yingo ti tâ tënë” ayeke ‘dabe ala na aye kue so lo tene na ala.’ (Jean 14:26, NW) A yeke mû lege na ala ti dabe ala na kusala nga na afango ye ti Jésus, même atënë so lo mveni lo tene, na ti sû ni na mbeti. Ye so amû mbilimbili maboko na bazengele Jean so aga mbakoro awe na hunzingo ti kozo siècle N.E. tongana lo to nda ti sû Évangile ti lo. A wara na yâ mbaï so wango ti ngele ngangu so Jésus amû tongana lo zia na sese Dango Bê na kui ti lo.—Jean, achapitre 13-17.
4 Jésus azê nga na akozo disciple ni so yingo ayeke ‘fa na ala aye kue’ na ‘ayeke fa na ala lege na yâ tâ tënë kue.’ Fade yingo ni ayeke mû maboko na ala ti gbu nda ti akpengba ye ti Mbeti ti Nzapa na ti bata beoko ti ala na lege ti bibe, ti gbungo nda ti ye, na ti ye so ala zia na gbele ala ti sala. (1 aCorinthien 2:10; aEphésien 4:3) Tongaso yingo ti nzoni-kue amû ngangu na akozo Chrétien so ti sala ye tongana mbeni bungbi oko ti “ngbâa ti be-ta-zo na ti ndara” ti mû na aChrétien oko oko so a sa yingo na ndo ti ala ‘kobe ti yingo na tâ ngoi ni.’—Matthieu 24:45, NW.
Yingo Asala Tënë ti Témoin
5 Na bï ti lango 14 ti Nisan, ngu 33 N.E., Jésus afa na adisciple ti lo so lo yeke yamba ande ala na ndo ti lo na ala yeke duti na tele ti lo nga na tele ti Babâ ti lo na yayu. Lo tene na ala: “Na yâ da ti Babâ ti Mbi da mingi ayeke; tongana a yeke tongaso pëpe, ka Mbi tene na i giriri; teti Mbi gue ti leke ndo na i. Na tongana Mbi gue na Mbi leke ndo na i, fade Mbi kiri na fade Mbi kamata i ti duti na tele ti Mbi, si na ndo so Mbi yeke dä, i lingbi duti kâ nga.” (Jean 13:36; 14:2, 3) Fade ala yeke komande legeoko na lo na yâ Royaume ti lo. (Luc 22:28-30) Ti tene ala wara beku so ti duti na yayu, a lingbi a ‘dü ala na yingo’ tongana amolenge ti Nzapa ti yingo na a sa yingo na ndo ti ala ti sala kusala tongana agbia na aprêtre legeoko na Christ na yayu.—Jean 3:5-8; 2 aCorinthien 1:21, 22; Tite 3:5-7; 1 Pierre 1:3, 4; Apocalypse 20:6.
6 ‘Hiringo ndo ti yayu’ so ato nda ni na Pentecôte ti ngu 33 N.E. na, mingi ni, a hunzi na popo ti angu 1930. (aHébreu 3:1) Wungo ti ala so a zia sceau ti yingo ti nzoni-kue na ndo ti ala ti duti mbage ti Israël ti yingo ayeke 144 000, so “a vo ala na popo ti azo ti sese.” (Apocalypse 7:4; 14:1-4) A batize ala na yâ tele ti Christ so ayeke ti yingo, na yâ kongregation ti lo, nga na yâ kuâ ti lo. (aRomain 6:3; 1 aCorinthien 12:12, 13, 27; aEphésien 1:22, 23) Na peko ti batême ti ala ti ngu na so a sa yingo ti nzoni-kue na ndo ti ala, ala lï na yâ fini ti sadaka, so ti tene mbeni fini ti dutingo be-biani juska na kui ti ala.—aRomain 6:4, 5.
7 Teti ala yeke azo ti Israël ti yingo, aChrétien so a sa yingo na ndo ti ala alï na yâ fini mbele so Jéhovah ate na “Israël ti Nzapa.” (aGalate 6:16; Jérémie 31:31-34) Fini mbele ni aga tâ ye na lege ti mênë ti Christ. Jésus asala tënë ni tongana lo zia na sese Matanga ti Dango Bê na kui ti lo. Luc afa pekoni: “Lo kamata mapa, lo kiri singila, na lo fâ yâ ni, na lo mû ni na ala, lo tene: ‘So ayeke fä ti tele ti mbi so mbi yeke mû teti i. I ngbâ ti sala ye so ti dabe i na mbi.’ Nga, kopo ni na oko lege ni na peko ti so ala te kobe ti lakui awe, lo tene: ‘Kopo so ayeke fä ti fini mbele na lege ti mênë ti mbi, so fade a yeke sa ni teti i.’ ” (Luc 22:19, 20, NW) Tanga ni, wala tanga ti azo 144 000 so ade na ndo ti sese, ayeke ala so ayeke na droit ti te mapa na ti nyon vin na Matanga ti Dango Bê na kui ti Christ.
8 Tongana nyen ala so a sa yingo na ndo ti ala ahinga so ala wara hiringo ndo ti yayu? Na kite oko pëpe ala wara tënë ti témoin ti yingo ti nzoni-kue. Bazengele Paul asû mbeti na mara ti azo tongaso: “Azo kue so Yingo ti Nzapa afa lege na ala, ala yeke amolenge ti Nzapa . . . Yingo mveni asala tënë ti témoin na yingo ti e, Lo tene e yeke amolenge ti Nzapa. Na tongana e yeke amolenge, e yeke ahéritier, ahéritier ti Nzapa, na afon Christ na yâ ye ti héritier; tongana e hu pono legeoko na Lo, tongaso fade A mû gloire na e legeoko na Lo nga.” (aRomain 8:14-17) Tënë ti témoin ti yingo so ayeke ngangu mingi si azo so adë kite kete na ndo warango hiringo ndo ti yayu so alingbi ti tene tâ na lege ni so ala wara ni pëpe, na tongaso ala yeke zia ande ti te mapa na ti nyon vin na Mémorial.
Yingo na Ambeni Ngasangbaga
9 Na bingo bê na kete wungo ti aChrétien so a hiri ala ti ga Israël ti yingo, Jésus asala tënë ti ala tongana “kete kundu.” A zi lege na ala ti lï na “yangbo” ti fini mbele, nde na gbâ ti “ambeni ngasangbaga,” so Jésus atene a lingbi lo bungbi ala nga. (Luc 12:32; Jean 10:16) Fade ala ti ambeni ngasangbaga so a bungbi ala na lâ ti nda ni ayeke ga “azo mingi so asi singo” so ayeke sö kuâ ande na “kota ye ti vundu,” na beku ti duti na fini teti lakue lakue na ndo sese so ayeke ga paradis. A yeke nzoni ti bâ so suma so Jean awara na hunzingo ti kozo siècle N.E. azia kangbi na popo ti azo mingi so asi singo so na azo 144 000 ti Israël ti yingo. (Apocalypse 7:4, 9, 14, NW) Ambeni ngasangbaga awara nga yingo ti nzoni-kue? Na tongana a yeke tongaso, tongana nyen a sala kua na yâ fini ti ala?
10 Yingo ti nzoni-kue asala biani kota kua na yâ fini ti ambeni ngasangbaga. Ala fa na gigi mungo tele ti ala na Jéhovah na warango batême “na iri ti Babâ na ti Molenge na ti yingo ti nzoni-kue.” (Matthieu 28:19, NW) Ala yeda na kota yanga-ti-komande ti Jéhovah, ala mä yanga ti Christ tongana Gbia na Watongo ala, ala yeda ti tene yingo ti Nzapa, wala ngangu ti sala na kusala, asala kua na yâ fini ti ala. Lâ na lâ, ala gi lege kue ti lë na yâ fini ti ala “lengo ti Yingo,” mbilimbili “ndoye, tâ ngia, siriri, be-nze-pepe, nzobe, bê ti sala nzoye, be-biani [mabe, NW], tâ be-ti-molenge, na ngangu ti kanga nzala ti tele.”—aGalate 5:22, 23.
11 A lingbi ambeni ngasangbaga amû nga lege na Tënë ti Nzapa nga na yingo ti lo ti sala si ala duti na sioni oko pëpe wala nzoni-kue. Na mbeni lege so ayeke nde mingi, a sukula awe ala so a sa yingo na ndo ti ala, na hiringo ala azo ti mbilimbili nga nzoni-kue tongana fini-wali ti Christ. (Jean 17:17; 1 aCorinthien 6:11; aEphésien 5:23-27) Prophète Daniel asala tënë ti ala tongana “azo ti be-vulu ti Lo Ti Nduzu Ahon Kue,” so “Molenge Ti Zo,” Christ Jésus, amû Royaume ni na ala. (Daniel 7:13, 14, 18, 27) Giriri, na lege ti Moïse na Aaron, Jéhovah atene na mara ti Israël: “Mbi yeke L’Eternel [“Jéhovah, NW] Nzapa ti i! tongaso i bata tele ti i mveni nde teti Mbi, i ga nzoni-kue, teti Mbi yeke nzoni-kue.”—Lévitique 11:44.
12 Tënë “gango nzoni-kue” aye mbilimbili ti tene “salango si ye aga nzoni-kue, ti kangbi, wala ti zia nde teti kusala ti Jéhovah Nzapa; dutingo nzoni-kue wala na sioni oko pëpe.” Gi na tongo nda ti ngu 1938, Tour ti Ba Ndo atene so a lingbi aJonadab, wala ambeni ngasangbaga, “amanda so a hunda na ala oko oko kue so ayeke ga mbeni oko ti azo mingi so asi singo na so ayeke duti na ndo ti sese ti mû tele na Nzapa na ti ga nzoni-kue.” Na yâ suma ti azo mingi so asi singo, so a fa pekoni na yâ buku ti Apocalypse, a sala tënë ti ala tongana azo so ‘asukula bongo ti ala awe, na ala sala si bongo ti ala avulu na lege ti mênë ti Molenge Ti Ngasangbaga’ na ala sala na Jéhovah “kusala ti nzoni-kue lâ na bï na yâ temple ti lo.” (Apocalypse 7:9, 14, 15) Na ngangu ti yingo ti nzoni-kue, ambeni ngasangbaga asala kue ti lingbi na aye so Jéhovah ahunda ti duti nzoni-kue.—2 aCorinthien 7:1.
Salango Nzoni na Aita ti Christ
13 Jésus agboto lê na ndo kota kamba so atingbi ambeni ngasangbaga nga na kete kundu ni na yâ toli ti lo ti angasangbaga na ti angasa, so lo yôro ni na yâ prophétie ti lo ti “hunzingo ti aye ti sese so.” Na yâ toli so, Christ afa polele so salut ti ambeni ngasangbaga aluti mingi na ndo tambela ti ala na mbage ti azo so a sa yingo na ndo ti ala, so lo hiri ala “aita ti mbi.” Lo tene: “Na lâ ni kâ, fade gbia atene na ala so ayeke na mbage ti lo ti koli: ‘I ga, i so Babâ ti mbi ahiri nzoni tënë na ndo i, i kamata royaume so a leke ni teti i giriri na lâ ni so a sala gere ti sese ni. . . . Biani, mbi tene na i, so i sala ye ni na oko ti aita ti mbi ti kete ahon, i sala ni na mbi.’”—Matthieu 24:3; 25:31-34, 40, NW.
14 Bungbi ti tënë “so i sala ye ni” andu akusala ti mungo maboko ti ndoye so a sala na aita ti Christ so a dü ala na lege ti yingo, so sese ti Satan abâ ala tongana awande, na même a bi ambeni ti ala na da ti kanga. Nzala asala ala, bongo atia ala, na kobela asala ala. (Matthieu 25:35, 36, kete tënë na gbe ni) Na lâ ti nda ni so, ngbele ye na ngu 1914, azo mingi so a sa yingo na ndo ti ala aduti na yâ aye so. Mbaï ti aTémoin ti Jéhovah ti ngoi ti e afa biani so yingo apusu afon ala be-ta-zo, ambeni ngasangbaga, ti mû maboko na ala.
15 Aita ti Christ so a sa yingo na ndo ti ala, so ade na ndo ti sese na lâ ti nda ni so, awara mbilimbili tâ mungo maboko ti ambeni ngasangbaga na yâ salango kusala so Nzapa amû na ala ti “fa nzo tënë ti royaume so na sese kue so azo ayeke dä, tongana tënë ti témoin na amara kue.” (Matthieu 24:14, NW; Jean 14:12) Na ngoi so wungo ti azo so a sa yingo na ndo ti ala, so ade na ndo sese, ayeke kiri na gbe ni tongana angu ayeke hon, wungo ti ambeni ngasangbaga ague na li ni ti si biani na azo kutu mingi. Azo saki mingi na popo ti ala asala kusala tongana awafango tënë ti ngoi kue, apionnier na amissionnaire, ti kangbi nzo tënë ti Royaume “juska na nda ti sese kue.” (Kusala 1:8) Ambeni amû mbage ti ala na yâ fango tënë ni tongana ti so ala lingbi ti sala nga, na ngia, ala mû nginza teti kota kusala so.
16 Biani, aita ti Christ so a sa yingo na ndo ti ala akiri singila mingi teti maboko so afon ala ambeni ngasangbaga amû na be-biani! A fa lani polele bibe ti ala na yâ buku Sécurité universelle sous le Règne du “Prince de paix,” so bungbi ti ngbâa ni amû na ngu 1986. A tene: “Ngbele ye na Use Bira so Amû Sese Kue, prophétie ti Jésus na ndo ‘hunzingo ti aye ti sese so’ aga tâ tënë biani na lege ti kusala so ‘azo mingi so asi singo’ ti ‘ambeni ngasangbaga’ asala. . . . Biani, kota singila na ‘azo mingi so asi singo’ ti ayanga ti kodoro na ti amara nde nde kue teti so ala mû mbage ti ala mingi na salango si prophétie ti [Jésus] so ayeke na Matthieu 24:14 aga tâ tënë!”
“Ala Ga Mbilimbili-kue Pëpe Nde na E”
17 Na salango tënë tongana mbeni oko ti azo so a sa yingo na ndo ti ala nga na bingo bê na akoli nga na awali be-ta-zo so aduti na fini kozoni na Christ, bazengele Paul asû na mbeti: “Ye oko azo so kue, atâa a sala tënë ti témoin ti ala ndali ti mabe ti ala, abâ pëpe [gango tâ tënë] ti zendo ni, teti Nzapa aleke na e mbeni ye ti nzoni ahon, si ala ga mbilimbili-kue pëpe nde na e.” (aHébreu 11:35, 39, 40, NW) Na ngoi ti Komandema ti Ngu Saki Oko, Christ na aita ti lo 144 000 so a sa yingo na ndo ti ala na yayu ayeke sala ande kusala tongana agbia na aprêtre, na ala yeke mû na ndo sese aye ti nzoni so sadaka ti kota ngele ti Christ aga na ni. Na pekoni, fade ambeni ngasangbaga ayeke “ga mbilimbili-kue” na yâ mitele nga na yâ bibe.—Apocalypse 22:1, 2.
18 A lingbi ambeni ngasangbaga agbu nda ti ye so kue so afa ngbanga ti nyen mbage ti Mbeti ti Nzapa so aChrétien asû na yanga ti Grec agboto lê mingi ahon na ndo Christ nga na aita ti lo so a sa yingo na ndo ti ala, nga na kota kusala ti ala na yâ gango tâ tënë ti ye so Jéhovah aleke ti sala. Tongaso, ambeni ngasangbaga abâ tongana mbeni kota matabisi ti mû maboko na lege kue so azi na bungbi ti ngbâa ni so a sa yingo na ndo ti lo na ngoi so a yeke ku ti bâ “singo ti amolenge ti Nzapa” na Har–Maguédôn nga na ngoi ti Komandema ti Ngu Saki Oko. Ala lingbi ti ku kungo ti tene a ‘zi ala na yâ ye ti futi so asala ala na ngbâa, na a zia ala na yâ liberté ti gloire ti amolenge ti Nzapa.’—aRomain 8:19-21.
Beoko na yâ Yingo na Mémorial
19 Na yâ sambela ti nda ni so lo sala na bï ti lango 14 ti Nisan, ngu 33 N.E., Jésus atene: “Mbi sambela . . . si ala kue alingbi duti oko, legeoko tongana mo, Babâ, mo yeke oko na mbi nga mbi yeke oko na mo, si ala nga aduti oko na e, ti tene sese amä na bê so mo to mbi.” (Jean 17:20, 21, NW) Na ndoye, Nzapa ato Molenge ti lo ti mû fini ti lo teti salut ti azo so a sa yingo na ndo ti ala nga teti bungbi ti azo so amä yanga. (1 Jean 2:2) “Yingo ti tâ tënë” abungbi aita ti Christ na afon ala oko. Na lakui ti lango 28 ti mars, na peko ti lindango ti lâ, abungbi use so ayeke tingbi tele ti sala matanga ti kui ti Christ na ti dabe ala na ye kue so Jéhovah asala teti ala na lege ti sadaka ti Molenge ti Lo so Lo ndoye lo mingi, Christ Jésus. Zia si gango ti ala na kota matanga so akpengba dutingo ti ala beoko na a kiri amû ngangu na desizion so ala mû ti ngbâ ti sala ye so bê ti Nzapa aye, na lege so ala fa polele so ala yeke na ngia ti duti na popo ti azo so Jéhovah andoye ala.
Na Lege ti Dango Bê
• Lawa si a to “yingo ti tâ tënë” na akozo Chrétien, na tongana nyen a ‘mû maboko’?
• Tongana nyen ala so a sa yingo na ndo ti ala ahinga so ala wara hiringo ndo ti yayu?
• Tongana nyen yingo ti Nzapa asala kusala na ndo ambeni ngasangbaga?
• Tongana nyen ambeni ngasangbaga asala nzoni na aita ti Christ, na ngbanga ti nyen fade ala “ga mbilimbili-kue pëpe nde na” ala so a sa yingo na ndo ti ala?
[Ahundango Tene ti Manda na Ye]
1. Kota sango wa Jésus amû na adisciple ti lo na andangba ngbonga so lo sala na ala na yâ da-nduzu?
2. Ye nyen Jésus azê ti to na adisciple ti lo na peko ti hongo ti lo?
3. (a) Lawa si a tokua “yingo ti tâ tënë” na akozo Chrétien? (b) Na yâ kota lege wa yingo aduti mbeni “wamungo maboko” na ala?
4. Tongana nyen “yingo ti tâ tënë” amû maboko na akozo Chrétien so a sa yingo na ndo ti ala?
5. (a) Fini ye wa Jésus afa na adisciple ti lo na bï ti lango 14 ti Nisan ti ngu 33 N.E.? (b) Fade kusala so yingo ti nzoni-kue ayeke sala na yâ gango tâ tënë ti zendo ti Jésus ayeke duti so wa?
6. (a) Hiringo ndo ti yayu ato nda ni lawa, na azo oke awara hiringo ndo so? (b) Ala so a hiri ala awara batême na yâ ye wa?
7. Ngbanga ti nyen gi aChrétien so a sa yingo na ndo ti ala si ayeke na droit ti te mapa na ti nyon vin na Mémorial?
8. Tongana nyen ala so a sa yingo na ndo ti ala ahinga so ala wara hiringo ndo ti yayu?
9. A-Évangile nga na buku ti Apocalypse asala tënë ti abungbi use wa?
10. Tongana nyen ambeni ngasangbaga awara batême “na iri ti Babâ na ti Molenge na ti yingo ti nzoni-kue”?
11, 12. (a) Tongana nyen na lege so ayeke nde mingi ala so a sa yingo na ndo ti ala aga nzoni-kue? (b) Na lege wa ambeni ngasangbaga aga nzoni-kue?
13, 14. (a) Na lege ti toli ti Jésus na ndo ti angasangbaga nga na angasa, salut ti angasangbaga aluti na ndo nyen? (b) Na lâ ti nda ni so, tongana nyen ambeni ngasangbaga asala nzoni na aita ti Christ?
15, 16. (a) Na yâ kusala wa ambeni ngasangbaga amû mbilimbili maboko na aita ti Christ so a sa yingo na ndo ti ala, so ade na ndo ti sese? (b) Tongana nyen ala so a sa yingo na ndo ti ala afa bê ti kiri singila ti ala na mbage ti ambeni ngasangbaga?
17. Na lege wa abe-ta-zo ti giriri so ayeke londo ande na popo ti awakinda na ndo ti sese ‘ayeke ga mbilimbili-kue pëpe nde’ na ala so a sa yingo na ndo ti ala?
18. (a) A lingbi aye so Bible afa amû maboko na ambeni ngasangbaga ti gbu nda ti ye wa? (b) Na yâ beku wa ambeni ngasangbaga aku ti bâ “singo ti amolenge ti Nzapa”?
19. Ye wa “yingo ti tâ tënë” asala na ala so a sa yingo na ndo ti ala nga na afon ala, na tongana nyen ala yeke duti ande mbilimbili beoko na lakui ti lango 28 ti mars?
[Foto na lembeti 21]
A sa “yingo ti tâ tënë” na ndo adisciple na Pentecôte ti ngu 33 N.E.
[Afoto na lembeti 23]
Ambeni ngasangbaga asala nzoni na aita ti Christ na mungo maboko na ala ti sala kusala so Nzapa amû, so ayeke ti fa tënë