Tondo So Alondo na Awafango Tënë ti Royaume

“Mbi Ye Lani ti Sala na Nzapa”

“AZO ti mbi, i sigigi na kodoro so.” Bazengele Jean amä lani hiringo ndo so ti mbeni ange na kozo siècle ti N.E. Na ngoi ti e, azo ti bê ti mbilimbili kutu mingi ayeda na tisango ndo so, na ala sigigi na yâ ti ‘Babylone ti Kota,’ bungbi ti alege ti vorongo ti wataka ti sese kue. (Apocalypse 18:1-4) Na popo ti ala, a yeke wara Wilner so alondo na Haïti; lo fa ye so asi na lo.

“A dü mbi na ngu 1956 na yâ mbeni kete gbata ti St. Marc, na Haïti, na yâ mbeni sewa so azo ni amû tele ti ala kue na lege ti vorongo ti aCatholique. Bi bê kete na ngia so sewa ti mbi awara lani tongana a soro mbi na tele ti ambeni zo use ti gbata ti e, ti gue na mbeni da-mbeti ti aCatholique na St. Michel de l’Atalaye, ti Haïti. Na pekoni, na ngu 1980, a tokua e na Stavelot, na Belgique, ti wara mbeni fango lege na ndo ni. Kâ, e gue nga na mbeni da senda-gi ti aCatholique.

“Kozoni kue, mbi yeke lani na kota ngia ti ga prêtre. Mbeni lâ, na yâ da ti tengo kobe ni, prêtre so ayeke bâ lege ti kete bungbi so mbi yeke na yâ ni ahunda na mbi ti ngbâ teti kete penze-ngbonga ngbanga ti so lo yeke na mbeni tënë so lo ye ti tene na mbi. Bi bê kete na lege so bê ti mbi aso tongana lo tene na mbi na kamela oko pëpe so lo sala nzala ti mbi! Mbi ke ti yeda na aye so lo hunda, me ye so asi asala si mbi nze kue. Mbi sû mbeti na sewa ti mbi ti fa na ala ye so asi, na a sala anze kete na pekoni, mbi zia lege ti mandango ye ni, atâa so a nzere na ala pëpe. Mbi wara ndo ti lango na yâ mbeni kete kodoro, na mbi ngbâ ti manda ye me teti mbeni kusala nde.

“Tongana mbi kiri na St. Marc, mbi lingbi ti zia bê ti mbi kue na Église Catholique mbeni pëpe. Ye oko, mbi ye lani ti sala na Nzapa, me mbi hinga pëpe ye so mbi lingbi ti sala. Mbi gue na Église Adventiste, église ti Ébenézer, na église ti aMormon. Mbi glisa lani lege biani na lege ti yingo.

“Na pekoni, mbi dabe mbi so tongana mbi yeke gue na da-mbeti ti aCatholique na Belgique, mbi yeke diko ka Bible ti Crampon lakue. Na yâ ni, mbi bâ so Nzapa ayeke na mbeni iri. Tongaso, na salango kusala na iri ti lo, mbi sambela na bê kue na Nzapa ti mû maboko na mbi ti wara tâ lege ti vorongo.

“Ngoi kete na pekoni, aTémoin ti Jéhovah use aga alango na yâ vaka so mbi yeke dä. Ala yeke lani kpô, ala yekia azo kue, na ala yeke na nengo tele. Salango ye ti ala na yâ fini apika bê ti mbi. Mbeni lâ, mbeni oko ti aTémoin use so atisa mbi ti ga na Matanga ti Dango Bê na Kui ti Christ, so a yeke sala ni ngu oko oko. Bungbi ni anzere na mbi mingi, na mbi yeda ti manda Bible na aTémoin. Ndulu na anze omene na pekoni, mbi hinga na bê ti mbi so mbi wara tâ lege ti sala na Nzapa. Mbi mû fini ti mbi na Jéhovah, na mbi wara batême na lango 20 ti nze ti novembre, ngu 1988.”

Na pekoni, Wilner amû kusala ti ngoi kue. Laso, lo yeke ancien na yâ mbeni kongregation. Lo na wali ti lo, nga na amolenge ti ala use, ayeke sala kusala na ngia na yâ kongregation ni.

[Foto na lembeti 9]

Na lege ti dikongo Bible, Wilner abâ so iri ti Nzapa ayeke Jéhovah