Mbeni molenge amû maboko na babâ ti lo

JAMES, mbeni zo ti Angleterre, ayeke na ngu 32. Lo yeke na mbeni ngangu kobela ti li na lo sala ye tongana wabuburu. Atâa so kue, teti angu mingi lo ngbâ ti gue na abungbi ti aTémoin ti Jéhovah, legeoko na mama ti lo nga na yaya ti lo ti wali. Ye oko, babâ ti lo asala nzala ti tâ tënë ni mingi pëpe. Mbeni lâ, na peko ti mbeni bungbi ti lakui so afa na lege ti mbeni démonstration tongana nyen ti tisa mbeni zo ti ga na Mémorial wala Matanga ti Dango Bê na kui ti Jésus, James akiri na kodoro, na lo kpe loro lo li na chambre ti lo. Mama ti lo awara gingo bê kete, tongaso lo mû peko ti lo na lo wara lo na hasango yâ ti angbele Tour ti Ba Ndo na Réveillez-vous! James asoro mbeni ngbele périodique so afa na ndangba lembeti ni mbeni tisango ndo na Matanga ti Mémorial, na lo mû loro na mbage ti babâ ti lo. Kozoni lo fa foto ti périodique ni, na pekoni, lo fa babâ ti lo, na lo tene: “Mo!” Bê ti mama ti lo na babâ ti lo adö, ala bâ ndo na lê ti mba teti ala bâ so James ayeke tisa babâ ti lo ti gue na Matanga ti Mémorial. Babâ ti lo atene so peut-être ni yeke gue ande.

Na lakui ti Mémorial ni, James ague na place so babâ ti lo ayeke zia abongo ti lo dä, na lo soro mbeni pantalon; lo gue na ni na babâ ti lo, na lo sala ageste ti tene na babâ ti lo so a lingbi lo yü ni. Babâ ni atene so lo yeke gue ande na bungbi ni pëpe. Tongaso, James na mama ti lo ague na Da ti Royaume gi ala oko.

Ye oko, ngoi kete na pekoni, tongana mama ti James ahunda na lo ti leke tele ti gue na abungbi, lo ke ti gue, lo tene so ni ye gi ti ngbâ na yanga-da na tele ti babâ ti ni. Na pekoni, mbeni dimanche na ndapelele, tongana mama ti lo agi ti leke lo ti gue na bungbi, James akiri ake ti gue. Me tongana mbeni ye so mama ni aku tele ti lo na ni pëpe, babâ ti James atene na lo: “James, tongana mbi gue laso na bungbi, fade mo kue mo yeke gue?” Lê ti James asi na ngia. Lo bi amaboko ti lo na tele ti babâ ti lo, na lo tene: “Fade mbi yeke gue!” Na nda ni, ala ota kue ague na Da ti Royaume.

A to nda ni na lango ni so, babâ ti James angbâ lakue ti gue na abungbi kue ti dimanche. Ngoi kete na pekoni, lo tene so tongana lo ye ti gue na li ni, a lingbi lo gue nga na tanga ti abungbi ni kue (aHébreu 10:24, 25). A yeke ye so lo sala; nze use na pekoni, lo to nda ti manda Bible lakue. Lo gue na li ni hio, lo gbian aye na yâ fini ti lo tongana ti so a hunda, na ngoi kete na pekoni, lo to nda ti fa tënë. Ngu oko na peko ti so lo to nda ti manda Bible, lo mû fini ti lo na Jéhovah na lo fa ni na gigi na lege ti batême. Lo yeke sala kusala fadeso tongana serviteur ti mungo maboko na yâ kongregation so lo yeke dä, na azo kue ti sewa ni ayeke sala na Jéhovah na beoko.