Ti mo, kuâ ayeke nyen?

ATÂA seni ti e wala mosoro ti e ayeke tongana nyen, na ndembe so e yeke sala akusala ti e ti lâ oko oko, kuâ ayeke hara e. A lingbi ti wara e na ndo kue so e yeke dä. Ye ti ngangu so asi na Gbata ti New York nga na Washington, na ngoi so ambeni zo abi kpale kâ na lango 11 ti septembre, ngu 2001, asala si e bâ tâ na lê ti e so “wato ti nda ni,” wala kuâ, amû fini ti azo kue, atâa dutingo ti ala wala ngu ti ala ayeke so wa. Ngoi na ngoi, lo yeke mû azo saki mingi gi na yâ ambeni kete penze-ngbonga.​—1 aCorinthien 15:26.

Même so kue, a bâ so tënë ti kuâ agbu bê ti azo mingi. Tongana a mä atënë ti kuâ, mbilimbili tongana gbâ ti azo akui kuâ ti ngangu, azo ayeke vo ambeti-sango mingi mingi wala azo mingi ayeke pusu ndulu na televizion ti bâ ye so asi. Atâa a yeke kuâ ti bira, ti aye ti ngangu ti ndagigi, ti fango zo, wala ti kobela, a bâ so ye so kue akaï nzala ti ala ti mä tënë ni pëpe. Tënë ti kuâ so agbu bê ti zo mingi asigigi polele tongana mbeni zo so iri ti lo awu mingi akui. Na ndembe ni so, azo ayeke toto wala ayeke dema kuâ ni ahon ndo ni.

Zo alingbi ti ke pëpe aye so kue. Kuâ ti ambeni zo angbâ lakue ti gbu bê ti azo. Me tongana ala tingbi lê na lê na kuâ ti ala mveni, tele ti ala adö. Mingi na popo ti e aye ti gbu li pëpe na ndo tënë ti kuâ ti lo mveni.

Mo gi li ti mo gbä na ndo ti kuâ?

Ti pensé so mbeni lâ e yeke kui asala si e duti nzoni pëpe, amû ngia na bê ti e pëpe, na a yeke duti lakue tongaso. Ngbanga ti nyen? Ngbanga ti so Nzapa azia na bê ti e kota nzala ti ngbâ na fini lakue lakue. Zo-ti-fa-tene 3:11 atene: “Lo zia ye ti lakue lakue na bê ti azo”. Me zo oko alingbi ti kpe kuâ pëpe. A yeke ndali ni si lo yeke tiri lakue ti ngbâ na fini. Tongaso, ti hon ndo ti bira so nzoni na ti kanga ndo ti nzala ti ngbâ lakue na fini, azo asigigi na atënë nde nde, a londo na tënë ti âme so alingbi ti kui pëpe ti si na kiringo ti lo na yâ mbeni tele nde.

Atâa so kue, kuâ ayeke ye so aga na gingo bê, a mû mbito mingi, na a wara mbito so na ndo kue. Tongaso, zia bê ti e adö pëpe ti bâ so azo ayeke bâ kuâ tongana mbeni ye so ayengi bê. Kozoni kue, kuâ afa polele so zo amû fini ti lo kue ti gi ti wara aye ti mitele na ti komande na ndo azo ayeke senge senge.

A gbanzi mo na hôpital?

Ândö, tongana kobela wala kota kä asala si mbeni zo aga ndulu na kui, mingi ni lo yeke kui na yâ da ti lo, ndo so anzere na lo mingi. A duti fani mingi tongaso na ngoi so a sû na Bible, na a ngbâ lakue tongaso na ambeni kodoro (Genèse 49:1, 2, 33). Na ando so, azo ti sewa ni ayeke tingbi tele ti sala lisoro na ndo ni, na a yôro amolenge na yâ lisoro ni nga. A sala si zo oko oko ti sewa ni abâ so lo yeke gi lo oko pëpe na yâ vundu ti lo na so a yeke gi lo oko pëpe si ayô kungba ni wala ayeke na yâ ti mua.

Me ti akodoro so tënë ti kuâ ayeke mbeni ye so azo ni aye ti pika lisoro na ndo ni pëpe, a yeke nde mingi. Ala kanga lege na amolenge ni ti mä lisoro ni na tenengo so “a hon ndo” ti ala. Ti laso, na lege ti aye nde nde, kui ayeke tongana ti kozoni pëpe. Mingi ni, tongana zo akui, mbeni zo ayeke na tele ti lo pëpe. Biani, azo mingi aye ti kui na yanga-da ti ala, so sewa ti ala si abâ lege ti ala na ndoye nga na siriri. Me mawa ni ayeke so, na akodoro so amaï, mingi ti ala, so a zia angangu masini nde nde na tele ti ala, fani mingi ala yeke kui gi ala oko nga na yâ ti pasi mingi na hôpital. Na mbeni mbage nde, azo kutu mingi, so a hinga iri ti ala pëpe, awara kuâ ngbanga ti nzala, ti SIDA, ti bira na yâ ti kodoro, ti kota yere, wala ngbanga ti so a yeke gi ti hunzi mara ti ala.

Mbeni tënë ti gbu li na ndo ni

Bible ake pëpe ti tene e gbu li na ndo ti kuâ. Biani, Zo-ti-fa-tene 7:2 atene na e: “A yeke nzoni ahon ti gue na da ti toto kuâ, ahon ti gue na da ti pumba; teti so ayeke nda ti azo kue”. Tongana e bâ na lê ti e biani ye so kuâ ayeke, e lingbi ti zia akusala ti e yamba na ti gbu li na ndo gigi so ague yongoro pëpe. Ye so alingbi ti mû maboko na e ti duti na mbeni fini so ane ahon ti duti na fini gi tongaso wala ti buba ni.

Ti mo, kuâ ayeke nyen? Mo gi ti bâ awe nda ti atënë ti bê ti mo, atënë ti mabe, abeku, na ambito so mo yeke na ni na ndo kuâ ti mo?

Fini na kui ayeke aye use so akara azo. Oko zo so alingbi ti fa biani ye na ndo ni ayeke Wasalango e. “Lingu so amû fini” ayeke na lo, na “ngangu ti kpe kui” ayeke na lo (Psaume 36:10; 68:21). Même si a kpa mbeni ye ti dongo bê, gingo nda ti ambeni tënë so amû ndo kue na ndo ti kuâ na lege ti ye so Mbeti ti Nzapa afa ayeke dë bê ande. A yeke fa so kuâ ayeke lakue nda ti aye kue pëpe.

[Akete tene na lembeti 4]

Ti hinga so fade e yeke kui ayeke mû maboko na e ti duti na fini so ane