Akpale ti azo aga ndulu ti hunzi!

“AYE SO a leke ti mû maboko na azo asala ye mingi pëpe tongana mbeni kusala ti poroso, so aye ti zi gunda ti abira, ayeke na popo ni pëpe. Aye so asi afa lege mingi so, aye so a sala ti mû maboko na azo, gi ala oko alingbi ti zi pëpe akpale so angorogbia ni mveni ayeke na gunda ni.”​—Dutingo ti azo so akpe kodoro ti ala na ndo sese mobimba 2000 (Angl.).

Atâa so a sala aye mingi ti mû maboko na azo, akpale ti azo angbâ gi ti gue na li ni. Angorogbia alingbi ti zi akpale ni biaku biaku? A yeke ngangu biani. Ka tongaso, e lingbi ti bi lê ti e na ndo wa? Bazengele Paul afa tongana nyen Nzapa ayeke hunzi ande akpale kue ti azo. E wara atënë so na yâ ambeni kpengba versê na tongo nda ti mbeti so lo sû na aChrétien ti Éphèse. Paul afa nga ye so Nzapa ayeke mû ti sala na ni: mbeni ye so ayeke leke aye so ayeke na gunda ti akpale kue so azia e na yâ ti vundu laso. Zia e bâ ye so Paul atene na aEphésien 1:3-10!

“Ti bungbi ye kue na yâ Christ”

Bazengele Paul atene so ye so Nzapa aleke na bê ti lo ayeke ti sala “kusala [wala, ti bâ lege ti akusala] ti Lo na ngoi so alingbi”. Tënë so aye ti tene nyen? A ye ti tene so Nzapa adiko mbeni ngoi so na yâ ni lo yeke sala kusala ti “bungbi ye kue na yâ Christ, ye ti ayayu, na ye ti sese.” (aEphésien 1:10, e si e sû agere ti mbeti so nde). Biani, Nzapa ato nda ti leke aye si ye kue na yayu nga na sese akiri aga na gbe ti komandema ti lo. A yeke nga nzoni ti bâ so, na ndo tënë ‘ti kiri ti bungbi’, wagingo nda ti Bible J. H. Thayer atene: “Ti kiri ti bungbi teti lo mveni . . . aye kue nga na acréature kue (so siokpari azia kangbi na popo ni) na yâ dutingo so ayeke beoko na yâ Christ.”

Fade bango tongana nyen kangbi abâ gigi ândö giriri na tongo nda ni ayeke fa na e nene ni ti tene Nzapa asala ye so. Gi na tongo nda ti mbaï ti azo, akozo babâ na mama ti e, Adam na Ève, amû peko ti Satan Zabolo na yâ kengo yanga ti Nzapa. Ti bê ti ala, ala ye si ala mveni amû desizion na ndo ye so ayeke nzoni na sioni (Genèse 3:1-5). Me ti sala ye alingbi na fango ngbanga ti mbilimbili ti lo, Nzapa atomba ala na yâ sewa ti lo, nga yâ ti songo ti lo na ala afâ. Ala zia azo na yâ dutingo so ayeke mbilimbili-kue pëpe, so aye ti pekoni so e wara laso ayeke gi sioni.​—aRomain 5:12.

A zia lege na sioni teti kete ngoi

Ambeni zo alingbi ti hunda tele ti ala, ‘Ndani nyen Nzapa azia si ala sala ye so? Ngbanga ti nyen lo mû gi kota ngangu ti lo so pëpe ti pusu ala ti sala ye so lo ye, si a kanga lege na pasi nga na vundu kue so e bâ laso?’ Bê ti mo alingbi ti pusu mo ti pensé tongaso nga. Me salango kusala na mara ti kota ngangu tongaso ayeke fa nyen biani? Mo tene ti mo nyen na ndo zo so, tongana lo mä gi kete tënë ti kengo yanga, lo gi ti hunzi azo ni kue ngbanga ti so lo yeke na ngangu ti sala ni? Fade mo yeda na lo wala mo yeke ye tene ti lo? Oko pëpe.

Azo ti bingo kpale ni so adë kite pëpe na ngangu ti Nzapa. Ala dë kite mingi ni na mbilimbili ti dutingo ti Jéhovah tongana kota Gbia nga na mbilimbili ti lege ti komande ti lo. Ti leke biaku biaku akota tënë so abâ gigi, Jéhovah azia azo so lo leke ala ti komande tele ti ala mveni. Me ti so, lo yeke yôro yanga ti lo dä oko pëpe (Zo-ti-fa-tene 3:1; Luc 21:24). Tongana ngoi ni so ahunzi awe, lo yeke kiri ti komande aye kue na ndo ti sese. Ti si na ngoi ni so, a yeke duti ande polele so lege ti komande ti lo ayeke gi oko lege so aga na siriri, na ngia nga na nzoni dutingo na azo teti lakue lakue. Na pekoni, lo yeke lungula biaku biaku azo kue so asala ye ti ngangu na zo.​—Psaume 72:12-14; Daniel 2:44.

“Kozoni si A leke gere ti sese”

Ngbele ye giriri Jéhovah aleke na bê ti lo ti sala aye so kue. Paul afa so a yeke “kozoni si A leke gere ti sese”. (aEphésien 1:4; e si e sû agere ti mbeti so nde). A yeke pëpe kozoni si a leke sese wala Adam na Ève. Sese so ayeke lani “nzoni mingi,” na azo ade ti ke yanga pëpe (Genèse 1:31). Tongaso, Paul aye ti sala tënë ti “sese” wa? Sese ti amolenge ti Adam na Ève, mbeni sese ti azo so ayeke awasiokpari nga mbilimbili-kue pëpe na so ayeke na beku ti sö kuâ. Kozoni si mbeni molenge abâ gigi, Jéhovah ahinga awe tongana nyen si lo yeke leke aye ni ti zi na amolenge ti Adam so a lingbi a sö ala.​—aRomain 8:20.

A ye biani ti tene pëpe so a lingbi Kota Gbia ti ndagigi kue aleke atënë ni tongana ti so azo ayeke sala. Ti azo, teti so ala hinga so mbeni kpale alingbi ti si na ngoi kue, ala sigigi kozoni na akode nde nde ti hon ndo ni. Biani, ti Nzapa ti ngangu ahon kue, a yeke tongaso pëpe. Lo leke gi ye ni na bê ti lo na lo sala ni. Ye oko, Paul afa lege so Jéhovah asoro ti leke aye so kue ti zi akpale so teti lakue lakue. Aye so lo leke ayeke nyen?

Zo wa si ayeke zi akpale so?

Paul afa so adisciple ti Christ so a sa yingo na ndo ti ala ayeke na kota kusala ti sala na yâ zingo sioni so siokpari ti Adam aga na ni na ndo azo. Lo tene: Jéhovah ‘ahiri e na yâ [Christ] giriri’, ti komande legeoko na Jésus na yâ Royaume ti lo ti yayu. Ti fa nda ni nzoni, Paul atene so Jéhovah “adiko e giriri kozoni ti wara ndo-ti-amolenge na yâ Lo mveni na lege ti Jésus Christ”. (aEphésien 1:4, 5; e si e sû agere ti mbeti so nde). Biani, Jéhovah asoro wala adiko ala oko oko kozoni pëpe. Me lo leke kozoni ti wara mbeni bungbi ti abe-ta-zo so amû tele ti ala kue na lo. Ala yeke sala kusala legeoko na Christ ti zi sioni kue so Satan Zabolo, nga na Adam na Ève, aga na ni na ndo sewa ti azo kue.​—Luc 12:32; aHébreu 2:14-18.

So ye ti dongo bê pëpe! Na ngoi so Satan alondo ti ke yanga-ti-komande ti Nzapa, lo tene na mayele so azo so Nzapa aleke ala, ala yeke na awokongo. Na, ti lo, tongana a sala ngangu kete na ndo ti ala wala a tara bê ti ala kete, ala kue ayeke ke komandema ti Nzapa (Job 1:7-12; 2:2-5). Na yâ fango na gigi “gloire ti grâce ti Lo” na lege so adö bê, Jéhovah Nzapa afa na pekoni so lo zia bê ti lo na azo. Lo mû ambeni zo na popo ti sewa ti Adam so ayeke na siokpari ti ga amolenge ti lo ti yingo. Fade azo ti kete bungbi so ayeke gue na yayu ti sala kua kâ. Kua ti nyen si ala yeke gue ti sala ni?​—aEphésien 1:3-6; Jean 14:2, 3; 1 aThessalonicien 4:15-17; 1 Pierre 1:3, 4.

Bazengele Paul atene so azo so Nzapa ahiri ala ti ga amolenge ti lo aga “afon Christ na yâ ye ti héritier” na yâ Royaume ti lo ti yayu (aRomain 8:14-17). Ala yeke ga agbia na aprêtre, na ala yeke mû mbage ti ala ti zi sewa ti azo na gbe ti vundu nga na pasi so azo ayeke bâ laso (Apocalypse 5:10). Biani, “ye kue ti création abima na gua ate ala juska fadeso.” Me fade, na yâ ngoi kete, azo so Nzapa asoro ala ti ga amolenge ti lo ayeke londo legeoko na Jésus Christ ti sala ye, na ala yeke “zi” azo kue so amä yanga ‘na yâ ye ti futi so asala ala na ngbâa’.​—aRomain 8:18-22.

“A ton e”

Ye so kue aga tä tënë na lege ti mbeni ye so ayeke kota fä ahon kue ti nzobe ti Nzapa na mbage ti sese so ti awasiokpari so alingbi ti ton ala: sandaga ti kota ngele ti Jésus Christ. Paul asû na mbeti: “Na yâ Lo, A ton e na lege ti mênë ti [Jésus Christ], na e wara pardon ti kengo-ndia ti e na lege ti mosoro ti grâce ti Lo”.​—aEphésien 1:7, e si e sû agere ti mbeti so nde.

Zo so ayeke na kota kua ti sala na yâ gango tâ tënë ti ye so Nzapa aleke na bê ti lo ayeke Jésus Christ (aHébreu 2:10). A yeke ndali ti sandaga ti lo si Jéhovah amû ambeni molenge ti Adam ti ga mbage ti sewa ti lo na yayu na ti zi azo na gbe ti asioni ye so siokpari ti Adam aga na ni. Lo sala ye so kue na mbeni lege so abuba pëpe bê so azo azia na yâ andia nga na akpengba-ndia ti Lo (Matthieu 20:28; 1 Timothée 2:6). Lege so Jéhovah asala na ye ayä mbilimbili ti lo na nduzu na ague oko na fango ngbanga ti lo ti mbilimbili.​—aRomain 3:22-26.

‘Ye so Nzapa aleke na hondengo ni’

Teti angu saki mingi, Nzapa afa polele kue pëpe tongana nyen lo yeke sala si aye so lo leke teti sese aga tâ tënë. Na kozo siècle N.E., “Lo fa na [aChrétien] ye so lo leke ândö na bê ti lo na hondengo ni”. (aEphésien 1:9, Buku ti Nzapa Fini Mbuki; e si e sû agere ti mbeti so nde). Paul na afon lo Chrétien so a sa yingo na ndo ti ala ahinga polele pendere kua so a mû na Jésus Christ na yâ gango tâ tënë ti ye so Nzapa aleke na bê ti lo. Ala nga kue ato nda ti gbu nda ti kua so ala yeke sala tongana afon héritier ti Christ na yâ Royaume ti lo ti yayu (aEphésien 3:5, 6, 8-11). Biani, ngorogbia ti Royaume so a zia ni na tïtî Jésus Christ nga na tïtî afon lo gbia ayeke ye so Nzapa ayeke mû ande ti ga na siriri so aninga, gi na yayu pëpe, me na sese nga (Matthieu 6:9, 10). Fade na lege ti ngorogbia so, Jéhovah ayeke kiri ti sala si sese so aduti tongana ti so lo leke na bê ti lo ândö.​—Esaïe 45:18; 65:21-23; Kusala 3:21.

Ngoi so lo diko ti zi aye ti ngangu nga na asioye kue na ndo ti sese apusu ndulu ndulu. Me, na Pentecôte ti ngu 33 N.E., Jéhovah akomanse ti kiri ti leke aye na place ti ala mveni. Lo sala ni tongana nyen? Lo to nda ti bungbi na ngoi ni kâ “aye ti ayayu,” so ti tene azo so ayeke komande legeoko na Christ na yayu, na aChrétien ti Éphèse ayeke na popo ni nga (aEphésien 2:4-7). Ade ti ninga pëpe, Jéhovah ayeke bungbi “ye ti sese” na ngoi ti e (aEphésien 1:10, e si e sû agere ti mbeti so nde). Na lege ti kusala ti fango tënë so ayeke sala na ndo sese mobimba, lo yeke fa na amara kue nzo tënë na ndo ngorogbia ti Royaume ti lo so lo zia na tïtî Jésus Christ. A yeke bungbi ala so ayeda na tënë ni même fadeso na yâ mbeni ndo ti batango tele na ti sava na lege ti yingo (Jean 10:16). Fade na yâ ngoi kete, na ndo sese so a sukula ni awe na so aga paradis, a yeke zi ala biani na gbe ti aye ti kirikiri kue nga na gbe ti pono kue.​—2 Pierre 3:13; Apocalypse 11:18.

A sala “akota ye mingi so adö bê” ti mû maboko na azo so asala ala na pasi (Dutingo ti amolenge na ndo sese mobimba 2000 [Angl.]). Ye oko, kota ye so ayeke dö bê mingi ayeke duti ande gango ti Jésus Christ na afon lo gbia na yâ ngorogbia ti Royaume ti yayu ti leke ye ni. Fade ala yeke lungula biaku aye kue so ayeke na gunda ti abira na ti aye ti sioni kue so angoro e. Biani fade ala yeke zi akpale kue ti azo.​—Apocalypse 21:1-4.

[Afoto na lembeti 4]

Aye so a sala ti mû maboko na azo azi akpale ti ala pëpe

[Foto na lembeti 6]

Kota ngele ti sandaga ti Christ azi azo na gbe ti siokpari ti Adam

[Foto na lembeti 7]

Lege ayeke dä laso ti wara mbeni ndo ti batango tele na ti sava na lege ti yingo

[Afoto na lembeti 7]

Na yâ ngoi kete, Royaume ti Messie ayeke zi akpale kue