Atënë so azo ahunda

Mbeti ti Nzapa atene nyen na ndo fango lege na amolenge, tongana oko ti ababâ na mama ni ayeke Témoin ti Jéhovah pëpe?

Akpengba-ndia ti Bible use ayeke dä so andu fango lege na amolenge tongana mbeni oko ti ababâ na mama ni ayeke Témoin, na mbeni ayeke Témoin pëpe. Oko kpengba-ndia ni atene: “A yeke ngbanga ti e ti mä Nzapa ahon ti mä azo.” (Kusala 5:29). Na use kpengba-ndia ni atene: “Koli ayeke li ti wali, legeoko tongana Christ ayeke Li ti Église”. (aEphésien 5:23). Ndangba kpengba-ndia so andu gi pëpe awali so koli ti ala ayeke aTémoin, me a ndu nga awali so akoli ti ala ayeke aTémoin ti Jéhovah pëpe (1 Pierre 3:1). Tongana nyen mbeni koli wala wali Témoin alingbi ti sala kusala na lege ni na akpengba-ndia so tongana lo yeke fa ye na amolenge ti lo?

Tongana koli ni ayeke Témoin ti Jéhovah, lo yeke na kungba ti bata sewa ti lo na lege ti yingo nga na ti mitele (1 Timothée 5:8). Atâa so a yeke peut-être mama ni si aduti na tele ti amolenge ni mingi ahon, babâ ni so ayeke Témoin ayeke na kungba ti fa na amolenge ti lo tënë ti Nzapa na ngoi so lo yeke na yanga-da, nga ti gue na ala na abungbi ti aChrétien so ala yeke wara dä fango lege so andu nzoni tambela nga na anzoni kamarade.

Ka tongana wali ni so ayeke Témoin ti Jéhovah pëpe aye gi ti gue na amolenge ni na bungbi ti vorongo ti lo wala ti fa na ala atënë ti mabe ti lo? Peut-être ndia ti kodoro ni alingbi ti mû lege na lo ti sala tongaso. Mingi ni, a yeke kode so babâ ni ayeke fa na aye ti yingo na amolenge ni si ayeke mû lege na ala ti zia pëpe si akusala ti ando ti vorongo tongaso asala ngangu na ndo ala. Tongana amolenge ni ayeke kono, a lingbi fango lege so babâ ni ayeke mû na ala na so aluti na ndo Bible asala si ala yeda na tâ tënë ti Mbeti ti Nzapa. Fade babâ ni so ayeke Témoin ti Jéhovah ayeke duti na ngia mingi tongana amolenge ti lo asoro ti sala na Jéhovah!

Tongana ayeke mama ni si ayeke Témoin ti Jéhovah, a lingbi lo yekia kpengba-ndia so ahunda na koli ti mû li ni; me na mbage nga, a lingbi lo bi bê na nzoni duti ti lakue lakue ti amolenge ti lo (1 aCorinthien 11:3). Na yâ aye mingi, koli ni so ayeke pëpe Témoin ayeke ke na lo pëpe ti mû fango lege na ndo tambela nga na aye ti yingo na amolenge ti ala, na a yeke na abungbi ti awakua ti Jéhovah si a lingbi ti wara mungo maboko teti fango lege tongaso. Mama ni alingbi ti mû maboko na koli ti lo so ayeke Témoin pëpe ti bâ anzoni ye ti peko ti fango lege so amolenge ni ayeke wara na lege ti bungbi ti Jéhovah. Wali ni alingbi ti gboto lê na ndara na ndo nene ti fa na amolenge ti ala akpengba-ndia ti Bible na ndo nzoni tambela, teti so amolenge ni ayeke tingbi na akpale ti sese so tambela ti azo ni ayeke buba gi bubango.

Ye oko, a lingbi ti si so koli ni so ayeke Témoin pëpe aye ti tene amolenge ni amû gi lege ti vorongo ti lo; lo lingbi ti gue na ala na ndo ti vorongo ti lo, na ti fa ye na ala alingbi na atënë ti mabe ti lo. Wala peut-être babâ ni ake alege ti vorongo kue, na lo ye pëpe si amolenge ti lo awara mbeni fango ye so aluti na ndo lege ti vorongo. Teti so lo yeke beli ti sewa ni, a yeke kozoni kue lo si ayeke na kungba teti desizion so lo mû.a

Atâa so lo yeke yekia kungba ti koli ti lo ti mû li ni, mbeni wali Chrétien so amû tele ti lo na Nzapa awe ayeke dabe ti lo ande na tënë ti abazengele Pierre na Jean, so atene: “Me e, e lingbi tene mbeni ye pëpe, gi ye so e bâ na e mä awe.” (Kusala 4:19, 20). Teti lo ye nzoni duti ti amolenge ti lo na lege ti yingo, mbeni mama so ayeke Témoin ayeke gi alege ti fa ye na ala na ndo nzoni tambela. Lo yeke na kungba na gbele Jéhovah ti fa ye na ambeni zo na ndo ye so lo bâ tongana tâ tënë, na a lingbi lo sala tongaso nga na mbage ti amolenge ti lo (aProverbe 1:8; Matthieu 28:19, 20). Tongana nyen mbeni mama so ayeke Témoin alingbi ti hon ndo ti kpale so?

Zia e mû na tapande tënë ti mabe na Nzapa. Peut-être mbeni wali so ayeke Témoin alingbi pëpe ti leke mbeni ngoi ti manda Bible na amolenge ti lo ngbanga ti so babâ ni aye pëpe. Ndali ti tënë so, fade lo yeke kpe ti zi yanga na amolenge ti lo na ndo Jéhovah? Oko pëpe. Atënë ti lo na asalango ye ti lo ayeke fa ande na gigi mabe ti lo na mbage ti Wasalango ye. Kite ayeke pëpe so amolenge ti lo ayeke duti na ahundango tënë na ndo ni. Teti so lo yeke na liberté ti fa atënë ti mabe ti lo, a lingbi lo gbanzi tele ti lo pëpe ti fa atënë ti mabe ti lo na ndo Wasalango ye na azo kue, so andu nga amolenge ti lo. Atâa so lo lingbi pëpe ti mû mbeni ngoi ti manda Bible na amolenge ti lo wala ti gue na ala na abungbi lakue, lo lingbi ti mû lege na ala ti hinga ye na ndo Jéhovah Nzapa.​—Deutéronome 6:7.

Na ndo songo so a bungbi mbeni Témoin na koli wala na wali ti lo so ayeke Témoin pëpe, bazengele Paul atene: “Koli so amä na bê pëpe, a zia lo nde na lege ti wali ti lo; na wali so amä na bê pëpe, a zia lo nde na lege ti koli ti lo; tongana a yeke tongaso pëpe, fade amolenge ti i ayeke sioni, me fadeso ala yeke nzoni-kue.” (1 aCorinthien 7:14). Jéhovah abâ songo ti mariage ni tongana nzoni-kue ndali ti koli ni wala wali ni so ayeke Témoin, na Lo bâ nga amolenge ni tongana nzoni-kue na lê ti Lo. A lingbi wali so ayeke Témoin asala kue ti mû maboko na amolenge ti lo ti gbu nda ti tâ tënë, na lo zia tanga ti aye ni na tïtî Jéhovah.

Tongana amolenge ni ayeke kono, a yeke na ala ti mû desizion ti lege ti vorongo wa ala yeke soro, alingbi na fango ye so ababâ na mama ti ala amû na ala. Ala lingbi ti mû desizion ti sala ye alingbi na atënë ti Jésus so: “Lo so andoye babâ wala mama ahon Mbi, lo lingbi na Mbi pëpe”. (Matthieu 10:37). A mû yanga so nga na ala: “Amolenge, i mä tënë ti ababâ na amama ti i na yâ Seigneur”. (aEphésien 6:1). Mingi ti apendere asoro ti “mä Nzapa” ahon ti mä mbeni babâ wala mama so ayeke Témoin pëpe, atâa so babâ wala mama ni so ayeke Témoin pëpe alingbi ti sala na ala pasi. So tâ ngia si babâ wala mama ni so ayeke Témoin ayeke wara ande tongana amolenge ni asoro ti sala na Jéhovah atâa kpale wa so alingbi ti si!

[Kete Tene na Gbe Ni]