Apendere so andoye tâ tënë

A SALA fadeso angu saki mingi awe, mbeni wasungo psaume so ayeke Hébreu ahunda: “Na lege nyen pendere koli alingbi bata lege ti lo mbilimbili?” (Psaume 119:9). A yeke nga na lege ni lakue ti hunda tënë so laso ngbanga ti so apendere ayeke tingbi na akpale ti sese mingi. Salango pitan asala si mingi ti apendere awara kobela ti SIDA, na ndulu na ndambo ti ala so awara kobela so ayeke na popo ti ngu 15 na 24. Nyongo mbangi aga nga na akpale mingi, a sala si ambeni pendere akui hio. Asioni mozoko, alimon nga akasete vidéo na ndo salango ye ti ngangu na ti pitan, nga aye ti porno na ndo ti Internet ayeke sala sioni ngangu mingi na ndo apendere. Tongaso, hundango tënë ti wasungo psaume ayeke biani ye so agbu bê ti ababâ na mama nga na apendere mingi laso.

Wasungo psaume lo mveni akiri tënë na hundango tënë ti lo ni, lo tene: “A lingbi lo [pendere ni a] bata na lege ti tënë ti Mo.” Biani, a yeke wara na yâ Tënë ti Nzapa, Bible, nzoni fango lege teti apendere, na apendere mingi so ayeke bata ni awara ye ti nzoni na yâ fini ti ala (Psaume 119:105). Zia e bâ tapande ti ambeni pendere so andoye Nzapa na atara ti ngbâ lakue ngangu na lege ti yingo na yâ mbeni sese so ayeke tomba peko ti ngia na aye ti mosoro.

Ala yekia fango lege so ababâ na mama ti ala amû

Jacob Emmanuel asala lani kusala tongana pionnier teti angu mingi kozoni si lo to nda ti kusala na filiale ti aTémoin ti Jéhovah ti Mexique. A yeke na yekiango ndo si lo dabe lo na lege so a maï ndoye ti lo teti kusala ti Nzapa; lo tene: “A yeke mbilimbili ababâ na mama ti mbi si asala kota kusala ni, atâa so ambeni ita biazo nde na lege ti yingo, so mbi lë songo na ala, asala nga ye ti nzoni mingi na mbi. Ala kue apusu lani mbi ti ndoye kusala ti fango tënë. Yeke yeke, ala fa na mbi tâ nzoni lege ni; mbi bâ ti mbi lâ oko pëpe so ala yeke sala ngangu na ndo mbi.”

David, so ayeke na yâ kusala ti ngoi kue teti angu mingi awe, adabe lo tongana nyen bê ti lo apika ti bâ ababâ na mama ti lo na mungo kusala ti pionnier spécial na ngoi so lo na ita ti lo ti koli ade lani kete mingi. Tongana babâ ti lo akui, mama ti lo angbâ lakue ti sala kusala ti pionnier spécial. Lo bata ala use kue nzoni, me lo zia pëpe ti fa nzo tënë. David atene: “Ala gbu mbi na ngangu lâ oko pëpe ti ga pionnier, me sewa ti e awara ngia mingi na lege ti kusala ti pionnier, a sala si songo so mbi yeke na ni na mbage ti ala nga dutingo ti sewa ni apusu mbi ti bi tele ti mbi nga na yâ kusala so.” Ti fa nene ti nzoni fango lege na bingo bê so ababâ na mama ti lo amû, David atene: “Na bï oko oko, mama ti mbi ayeke diko na e ambaï so ayeke na yâ buku Du paradis perdu au paradis reconquis.a Lege so lo yeke fa peko ti ambaï ni na e amû lani maboko na e ti wara ngia na yâ mandango aye ti yingo.”

Ala yekia abungbi

Ambeni pendere abâ so a yeke ngangu na ala ti yekia abungbi ti aChrétien. Ala yeke gue na abungbi ngbanga ti so ababâ na mama ti ala ayeke gue na ala. Ye oko, tongana ala ngbâ lakue ti gue na abungbi, a si na mbeni ngoi ande, ala lingbi peut-être ti to nda ti yekia abungbi. Bâ tapande ti Alfredo, so ato nda ti kusala ti pionnier na ngoi so lo yeke gi na ngu 11. Lo yeda so na ngoi so lo de lani na ngu oku tongaso, lo tara ti kpe abungbi ngbanga ti so ala yeke mû lango na lo; ye oko ababâ na mama ti lo ayeke zia lege na lo pëpe ti lango na ngoi ti abungbi ni. Lo tene: “Tongana mbi yeke kono, yeke yeke mbi to nda ti wara ngia mingi ahon na yâ abungbi, mbilimbili na pekoni so mbi manda ti diko na ti sû mbeti, teti a yeke na ngoi ni so si mbi to nda ti mû acommentaire na atënë ti mbi mveni.”

Cintia, mbeni molenge-wali ti ngu 17 so ayeke pionnier permanent, afa tongana nyen tambelango na anzoni kamarade asala kusala ngangu ti maï na yâ lo ndoye teti kusala ti Nzapa. Lo tene: “Nzoni songo so mbi lë na aita nga guengo lakue na abungbi agbanzi mbi ti wara vundu ngbanga ti so mbi zia lege ti akamarade ti mbi ti gigi nga na akusala ti sese so apendere aye ni mingi, na tapande guengo na ada ti dodo. Mango acommentaire na atapande so a mû na abungbi amaï na yâ mbi nzara ti mû na Jéhovah ye kue so mbi yeke na ni, na mbi bâ so ye ti nzoni ahon so mbi yeke na ni ayeke lâ ti pendere ti mbi. Tongaso, mbi yeda ti mû lâ ti pendere ti mbi so teti kusala ti lo.”

Ye oko, lo tene: “Kozoni si mbi wara batême, a si na mbeni ngoi, mbi bâ so a yeke ngangu pëpe na mbi ti kpe abungbi; mbi yeke mû tongana raison adevoir wala ambeni kusala nde so a mû na mbi na ekole. Mbi manke abungbi mingi, na ye so ato nda ti sala ngangu na ndo mbi na lege ti yingo. Mbi to nda ti sala kamarade na mbeni maseka-koli so amanda Bible pëpe. Me na lege ti mungo maboko ti Jéhovah, mbi wara lege ti leke aye na ngoi ni.”

Desizion so a yeke na zo oko oko ti mû

Tongana a hunda na Pablo, mbeni pendere nde so ayeke na yâ kusala ti ngoi kue, ye wa lo bâ tongana kelele ti maï ndoye teti tâ tënë ti Mbeti ti Nzapa, lo tene: “Mbi pensé so aye ni ayeke use: mandango Bible zo mveni, na dutingo na wâ teti kusala ti fango tënë. Mbi kiri singila na ababâ na mama ti mbi teti so ala fa na mbi tâ tënë na ndo Jéhovah, na mbi bâ so a yeke tâ mosoro ti nzoni ahon atanga ni kue so ala lingbi fade ti mû na mbi. Me, a lingbi mbi mveni mbi hinga ngbanga ti nyen mbi ndoye Jéhovah. Ti sala ye so, a yeke kota ye mingi ti hinga ‘kota ti lê ni nga na lingo ni’ ti tâ tënë ti Bible. A yeke gi na lege so si e yeke lë tâ nzara teti Tënë ti Jéhovah, na ye so ayeke dü na yâ e ‘mbeni wâ so agbi’ so apusu e ti fa ni na ambeni zo. Wâ so e yeke na ni teti kusala ti fango tënë ayeke sala si e yeke ngbâ lakue ti yekia tâ tënë.”​—aEphésien 3:18; Jérémie 20:9.

Jacob Emmanuel, so a sala tënë ti lo kozoni awe, afa nga nene ni teti mbeni zo ti soro lo mveni ti sala na Jéhovah. Lo tene so ababâ na mama ti lo apusu lo na ngangu lâ oko pëpe ti wara batême. Lo tene: “Mbi pensé so a yeke lani nzoni mingi ahon ti sala ye tongaso ngbanga ti so mbi bâ nzoni ye ti pekoni. Na tapande, ambeni pendere so mbi tambela na ala mingi amû desizion ti wara batême legeoko. Atâa so a yeke lani nzoni ye, mbi bâ so ambeni asala ni gi teti nzerengo tele; ngoi kete na pekoni, wâ ti ala teti kusala ti Royaume akiri na peko. Ti mbi, ababâ na mama ti mbi apusu mbi na ngangu pëpe ti mû desizion ti mû tele ti mbi na Jéhovah. Desizion ni alondo lani na mbi mveni.”

Maboko so kongregation amû

Ambeni pendere amanda tâ tënë ti Mbeti ti Nzapa gi ala mveni, na ababâ na mama ti ala amû maboko na ala pëpe. Na yâ aye tongaso, a yeke tâ ngangu mingi ti manda ti sala ye ti nzoni na ti ngbâ ti sala ni.

Noé adabe lo tongana nyen tâ tënë aga na lo ye ti nzoni mingi. Ti londo na ngoi so lo de lani pendere, lo yeke ndulu ti sala ngonzo na ti sala ye na ngangu. Tongana lo to nda ti manda Bible na ngu 14, salango ye ti lo ato nda ti ga nzoni, na ababâ na mama ti lo, so na ngoi ni kâ asala nzara ti manda Bible pëpe, awara ngia mingi ndali ni. Tongana Noé ayeke gue na li ni na lege ti yingo, lo ye lani ti mû kota mbage ti fini ti lo teti kusala ti Nzapa. Lo yeke fadeso na yâ kusala ti ngoi kue.

Legeoko nga, Alejandro ato nda ti sala nzara ti tâ tënë na ngoi so lo de gi kete, atâa so ababâ na mama ti lo asala nzara ni pëpe. Na fango na gigi yekiango ndo ti lo teti tâ tënë, lo tene: “A bata mbi na yâ mbeni da ti aCatholique. Me mbi to nda ti maï nzara teti atënë ti aCommuniste so atene Nzapa ayeke dä pëpe, na mbi sala tongaso ngbanga ti so Église amû na mbi pëpe akiringo tënë na ahundango tënë so agbu bê ti mbi mingi na ngoi so mbi de lani kete. Bungbi ti Jéhovah amû lani maboko na mbi ti wara hingango ye ti Nzapa. Ti bâ nzoni, a bata fini ti mbi, teti tongana fade mbi manda Bible pëpe, ka mbi tï awe na yâ salango pitan, nyongo samba, na mbangi. Peut-être même mbi yeke lï fade na yâ mbeni bungbi ti azo so ake yanga-ti-komande, na aye ti sioni mingi alingbi fade ti si na mbi.”

Tongana nyen mbeni pendere alingbi ti ngbâ lakue ti gi tâ tënë na ti gbu ni ngangu, atâa ababâ na mama ti lo amû maboko pëpe na lo? Ti bâ nzoni, a-ancien na ambeni zo ti kongregation ayeke tâ na kota kusala ti sala. Noé atene: “Mbi bâ tele ti mbi lâ oko pëpe so mbi yeke gi mbi oko, teti Jéhovah ayeke lakue ndulu na mbi mingi. Na nga, mbi wara mungo maboko ti aita ti koli na ti wali mingi so aga ababâ, amama, na aita ti mbi na lege ti yingo.” Lo yeke sala kusala fadeso na Béthel na lo yeke mû ngoi ti lo na yâ kusala ti Nzapa. Legeoko nga, Alejandro adabe lo: “Mbeni ye so mbi yeke kiri singila ndali ni lakue ayeke so mbi yeke na matabisi ti duti lani na yâ mbeni kongregation so a-ancien ni ayeke bi bê tâ na ndo mbi mveni. Mbi kiri tâ singila mingi teti ye so ngbanga ti so tongana mbi to nda ti manda Bible, na ngu 16, gingo bê so asi ka na apendere kue ato nda ti sala ngangu na ndo mbi. Asewa ti kongregation azia mbi lâ oko pëpe. Lakue mbeni zo ayeke dä ti yamba mbi nzoni na ti kangbi na mbi gi pëpe da ti ala na kobe ti ala, me nga tënë ti bê ti ala.” Juska fadeso, Alejandro ayeke na yâ kusala ti ngoi kue teti angu ahon 13.

Ambeni zo apensé so lege ti vorongo ayeke gi teti akangba. Ye oko, apendere mingi amanda tâ tënë ti Bible na ngoi so ala de kete, na ala to nda ti ndoye Jéhovah na ti ngbâ be-ta-zo na lo. Atënë ti David so a wara na Psaume 110:3 alingbi ti sala kusala na ndo ala; versê ni atene: “Azo ti Mo amû ala mveni na nzobe, na lâ ti bira ti Mo, ala yü ye ti pendere ti nzoni-kue; apendere ti Mo ayeke tongana mamio ti ndapelele.”

A hunda na apendere ti sala ngangu mingi ti manda tâ tënë na ti ngbâ dä. A yeke tâ ye ti ngia mingi ti bâ so gbâ ti apendere angbâ lakue ndulu mingi na bungbi ti Jéhovah, ala yeke gue lakue na abungbi, na nga ala yeke manda Bible na bê kue. Na salango tongaso, ala wara lege ti lë tâ ndoye teti Mbeti ti Nzapa na kusala ti lo!​—Psaume 119:15, 16.

[Kete Tene na Gbe Ni]