Atënë so azo ahunda

Tongana zo amû azendo na Nzapa, a yeke ti zo ni ti sala ye lakue alingbi na azendo so?

Na yâ Bible, a fa peko ti zendo tongana yanga so zo amû na gbele Nzapa ti sala mbeni ye, ti mû mbeni ye, ti sala mbeni kusala so ayeke nde wala ti yô mbeni kungba so ayeke nde, wala ti ke ti sala ambeni ye so biani ayeke nga sioni pëpe. A yeke wara na yâ Mbeti ti Nzapa atondo ti azendo so zo amû ti sala, gi tongana a sala mbeni ye kozoni si; zo ni amû yanga ti sala mbeni ye gi tongana kozoni kue Nzapa asala mbeni ye. Na tapande, Anne [“Hanna”, NW] mama ti prophète Samuel “[a]mû zendo, lo tene, O L’Eternel Ti Sabaoth, tongana . . . Mo girisa mbi pëpe, na Mo mû molenge ti koli na mbi, tongaso fade mbi mû lo na L’Eternel na lâ ti fini ti lo kue, na fade rasoir andu li ti lo lâ oko pëpe.” (1 Samuel 1:11). Bible afa nga so zendo ayeke mbeni ye so zo ayeke sala na bê kue. Na lege wa a yeke ti zo ti sala ye alingbi na azendo so lo mû na Nzapa?

Gbia Salomon ti mara ti Israël ti giriri atene: “Tongana mo mû zendo na Nzapa, mo ku ti sala ye so pëpe.” Lo kiri lo tene: “Mo sala ye so mo ze ti sala. Tongana mo mû zendo pëpe, so ayeke nzoni ahon zendo so mo ze na mo sala ye ni pëpe.” (Zo-ti-fa-tene 5:3, 4). Ndia so a mû na Israël na lege ti Moïse atene: “Tongana mo mû zendo na L’Eternel Nzapa ti mo, a lingbi mo ku pëpe ti sala ye so mo ze ti sala; teti fade L’Eternel Nzapa ti mo ahunda ye so na tïtî mo biani, na tongana mo sala ye ni pëpe, aga siokpari ti mo.” (Deutéronome 23:21). Ti bâ ni nzoni, mungo zendo na Nzapa ayeke pëpe mbeni ye ti sala na ngia. A lingbi nda ti tënë so apusu zo ti sala ni aduti tâ na lege ni, na a lingbi lo bâ so biani lo yeke na ngangu ti mû ye kue so lo ze ti mû ni na yâ zendo ni. Tongaso pëpe, a yeke nzoni lo mû zendo pëpe. Me tongana zo amû zendo, a yeke ti lo ti sala ye lakue alingbi na ni?

A yeke duti ande tongana nyen tongana lo mû zendo ti sala mbeni ye na lo manda na pekoni so ye ni ague nde na ye so bê ti Nzapa aye? Na tapande, tongana fade a yeke lani mbeni zendo so, na lege ti mbeni ye, atingbi ye ti pitan na tâ vorongo? (Deutéronome 23:18). Biani, mara ti zendo tongaso, a yeke ti zo pëpe ti sala ye alingbi na ni. Na ndo ni, na gbe ti Ndia ti Moïse, tongana mbeni wali amû mbeni zendo, babâ ti lo wala koli ti lo alingbi ti buba yâ ni.​—Nombre 30:3-15.

Tara ti bâ nga tapande ti mbeni zo so amû zendo na Nzapa ti ngbâ gi kumbamba; me fadeso lo bâ so lo yeke na gbele mbeni kpale. Zendo so lo mû lani asala si lo bâ so ti bata ni a lingbi ti ga na lo ndulu ti doro andia ti Nzapa na ndo nzoni tambela. A lingbi lo ngbâ ti sala ngangu ti bata zendo so lo mû? A yeke duti nzoni ahon pëpe teti lo ti kpe pitan na ziango lege ti zendo ti lo ni, nga na pekoni na totongo na Nzapa ti wara be-nzoni ti lo nga na pardon? Gi lo oko si alingbi ti mû desizion na ndo tënë so. Mbeni zo nde alingbi pëpe ti mû desizion na place ti lo.

Ka tongana mbeni zo amû mbeni zendo na lo bâ na pekoni so lo mû ni lani hio me lo gbu li ti lo nzoni dä kozoni pëpe? A yeke ti lo ti gi lakue ti bata zendo ni? A yeke lani ngangu mingi na Jephté ti bata zendo so lo sala na Nzapa, me na bê kue, lo sala ye alingbi na ni (aJuge 11:30-40). Tongana mbeni zo abata pëpe zendo so lo mû na Nzapa, a lingbi ti sala si ‘Nzapa alondo na ngonzo’ na lo futi kusala so zo ni asala (Zo-ti-fa-tene 5:5). Tongana zo amû na nene ni pëpe tënë ti batango azendo, a lingbi ti sala si Nzapa azi maboko ti Lo na ndo lo.

Jésus Christ atene: “Me a lingbi i tene, Oui, oui, wala, Non, non; na tongana mo tene mbeni tënë ahon so, a yeke ti wato sioni.” (Matthieu 5:37, e si e sû agere ti mbeti so nde). A lingbi biani mbeni Chrétien agi bê ti lo gi pëpe ti bata azendo so lo mû na Nzapa, me nga ti duti zo so a lingbi ti zia bê na atënë kue so lo mû, atâa na gbele ti Nzapa wala ti azo. Me a lingbi ti si so lo mä tele na mbeni zo na ndo mbeni ye so na tongo nda ni ayeke nzoni na lê ti lo, me na pekoni so lo gi nda ti ye ni mbilimbili, lo bâ so a yeke tâ na lege ni oko pëpe; fade lo yeke sala tongana nyen? A lingbi lo bâ ni tongana ye senge pëpe. Me teti so ala sala lisoro na ndo ni nzoni awe, zo ni so lo mû zendo na lo alingbi peut-être ti hunda na lo ti zia lege ti zendo ni.​—Psaume 15:4; aProverbe 6:2, 3.

Na ndo tënë ti azendo nga na ambeni ye nde, ye wa a lingbi e zia bê ti e dä mingi ahon? Zia e gi lakue ti bata nzoni songo na Jéhovah Nzapa.

[Afoto na lembeti 30, 31]

Hanna aduti lani ndulu ti sala ye alingbi na zendo so lo mû

[Afoto na lembeti 30, 31]

Jephté abata zendo ti lo, atâa so a yeke lani ngangu ti sala tongaso