Dungo Jésus a si tongana nyen nga ngbanga ti nyen

“SO GI mvene la!” Mingi ti azo so ayeke aChrétien pëpe ayeke kiri tënë tongaso tongana a fa na ala tënë na ndo mbaï ti dungo Jésus. Ala bâ ti ala so ti yeda so mbeni masia wali alingbi ti më ngo na ti dü mbeni molenge sân ti tene lo bungbi na mbeni koli ayeke mbeni ye so ague nde na senda-ye. Mo pensé ti mo nyen na ndo ni?

Na ngu 1984, mbeti-sango The Times ti Londres asigigi na mbeni lettre so a sala tënë na ndo ye so, a tene: “A yeke tâ na lege ni pëpe ti sala kusala na senda-ye ti ke so amiracle alingbi ti si. Ti mä na bê so amiracle alingbi pëpe ti si ayeke gi tënë ti mabe legeoko tongana ti mä na bê so amiracle alingbi ti si.” A yeke lani mbeni lettre so akota wafango-mbeti 14 ti senda-ye na yâ a-Université ti Angleterre asû maboko ti ala na gbe ni. Ala tene: “E yeda na ngia na bê so dungo ti vierge Marie, amiracle ti aÉvangile, nga londongo ti Christ na popo ti akuâ ayeke aye so asi biani na yâ mbaï ti azo.”

Ye oko, a yeke na lege ni tongana mbeni zo aduti na kite na mango ti fani oko ni tënë na ndo mbaï ti dungo Jésus na lege ti mbeni masia. Même mama ti Jésus so ayeke lani masia aduti na kite tongana ange ti Nzapa atene: “Bâ, fade mo më ngo na mo dü Molenge-koli, na fade mo di iri ti Lo Jésus.” Marie akiri tënë tongaso: ‘Fade ye so aga tongana nyen, teti mbi hinga koli pëpe?’ Ange ni afa na lo so Nzapa ayeke sala miracle so na lege ti yingo vulu ti Lo, na lo tene: “Teti ye oko ayeke pëpe so Nzapa alingbi sala pëpe.” (Luc 1:31, 34-37). Biani, Lo so azia na sese aye ti dongo bê so angoro dungo molenge alingbi nga ti sala si mbeni masia amengo ti Jésus na adü lo. Tongana Nzapa aleke ndagigi nga na andia ni so a leke ni nzoni si alingbi hon nde pëpe, lo lingbi nga ti sala kusala na mbeni para na yâ ti Marie ti dü mbeni Molenge so ayeke mbilimbili-kue.

Ngbanga ti nyen a hunda ti sala tongaso?

Joseph, mbeni koli so akpe mbito ti Nzapa, ayeke gue lani na peko ti Marie na ngoi so Marie amë ngo. Na yâ mbeni suma, ange ti Nzapa afa na Joseph mbeni kpengba raison so ndali ni masia so lo yeke gue na peko ti lo amë ngo. Ange ni atene: “Zia mbito ti kamata wali ti mo Marie asala mo pëpe; teti ngo so lo më ayeke ngo so Yingo Vulu amû na lo. Na fade lo dü Molenge-koli; na fade mo di iri ti Lo Jésus, teti fade Lo sö azo ti Lo na siokpari ti ala.” (Matthieu 1:20, 21). Iri Jésus na yanga ti Hébreu aye ti tene: “Jéhovah ayeke salut”. A dabe e so e yeke na bezoin ti tene a zi e na gbe ti siokpari na kui ti wara salut, nga na ye so Jéhovah Nzapa aleke na lege ti Jésus teti salut so.

Teti so kozo koli Adam asala siokpari awe, a dü ahale ti lo kue na yâ siokpari, na ala kue ayeke na bibe ti doro andia ti Nzapa (aRomain 5:12). Tongana nyen a lingbi ti sö ahale ti Adam na gbe ti siokpari si ala wara lege ti duti mbilimbili-kue? A hunda ti tene a mû mbeni fini ti zo so ayeke mbilimbili-kue na so ngele ni alingbi na ti Adam, si kilo ti mbilimbili ni aluti nzoni. A yeke ngbanga ni si Nzapa asala miracle ti tene a dü Jésus mbilimbili-kue, na a yeke nga ngbanga ni si Jésus azia lege na awato ti lo ti fâ lo (Jean 10:17, 18; 1 Timothée 2:5, 6). Na peko ti londongo ti lo na popo ti akuâ, nga na guengo ti lo na yayu, Jésus alingbi na bê kue ti tene: “Mbi kui awe, me mo bâ, Mbi yeke na fini teti lakue lakue, na Mbi yeke na clé ti kui na clé ti ndo-ti-awakinda [dukua ti azo kue].”​—Apocalypse 1:18.

Na salango kusala na aclé ti kui na ti ndo-ti-awakinda so ayeke aclé na lege ti fä, Jésus azi lege na azo ti siokpari ti kiri ti wara ye so Adam agirisa ni giriri. Jésus afa tënë so: “Mbi yeke Londongo ti awakinda, na Mbi yeke Fini. Zo so amä na bê na Mbi, même tongana lo kui, fade lo yeke na fini. Zo so ayeke na fini na lo mä na bê na Mbi, fade lo kui lâ oko pëpe.” (Jean 11:25, 26). So tâ pendere zendo biani! Me mbeni raison nde, so ahon ti so ayeke nga dä, so ngbanga ni a dü Jésus.

Raison so ahon atanga ni kue

Fini ti Jésus ato nda ni lani pëpe na ngoi so Marie amë ngo ti lo. Jésus atene polele: “Mbi londo na yayu”. (Jean 6:38). Na tongo nda ti création, Jésus ayeke giriri na fini na ndo ti duti ti ayingo na tele ti Babâ ti lo na yayu. Biani, Bible afa lo tongana “Kozo ti ye kue so Nzapa acréé.” (Apocalypse 3:14). A yeke na ngoi so lo de na yayu si Jésus abâ na lê ti lo kengo yanga ti mbeni ange ti sioni so apusu kozo koli na kozo wali ti ke yanga-ti-komande ti Nzapa. Ye so amû na Jésus raison so ahon atanga ni kue ti sala nzara ti tene a dü lo na sese tongana mbeni Molenge ti Nzapa so ayeke mbilimbili-kue. A yeke so wa?

A yeke ti fa so Babâ ti lo ti yayu ayeke na droit ti komande dunia kue. Na dutingo be-ta-zo ato nda ni na ngoi so a dü na lo juska na kui ti lo na sese, Jésus afa na gigi so lo yeke ndulu ti yeda na bê kue na lege so Jéhovah ayeke komande na ndo acréature ti Lo. Kozoni si awato ti Nzapa afâ lo, Jésus afa polele ngbanga ti nyen lo yeke ndulu ti mû fini ti lo na sandaga. Lo tene so a yeke ti tene sese so alingbi hinga lo ndoye Babâ. (Jean 14:31, e si e sû agere ti mbeti so nde). Tongana kozo koli na kozo wali, Adam na Ève, alë fade mara ti ndoye so, ka ala lingbi fade ti ngbâ be-ta-zo na yâ kete tara so a zia lani na gbele ala.​—Genèse 2:15-17.

Be-biani ti Jésus afa nga sioni ange, Satan, tongana mbeni wamvene. Satan adü mvene na li ti Nzapa nga na li ti azo na tenengo na gbele a-ange ti yayu so “fade zo amû ye ti lo kue ti bata fini ti lo.” (Job 2:1, 4). Satan abi tënë ti mvene na li ti azo na tenengo so ala kue ayeke ke yanga ti Nzapa ti bata fini ti ala.

Nda ti akota tënë so, so a fa ni na nduzu ge ayeke lani ti dë kite na mbilimbili ti yanga-ti-komande ti Nzapa. Ti leke ni, Jésus ayeke lani ndulu ti tene a dü lo na sese tongana zo, si lo ngbâ be-ta-zo juska na kui.

Ni la, kota raison ti dungo Jésus na sese ayeke lani, tongana ti so lo mveni lo tene, ti tene lo “sala tënë ti témoin ti tene-biani.” (Jean 18:37). Lo sala lani tongaso na fango na lege ti atënë nga na asalango ye ti lo, so lege so Nzapa ayeke komande na ni ayeke tâ mbilimbili na yâ ye kue, na zo so ayeda na ni ayeke wara ngia so aninga. Jésus atene nga so lo ga na sese ti ‘kä tele ti lo na kuâ, ti zi azo mingi’, na mungo na azo so ayeke awasiokpari lege ti wara fini ti lakue lakue so ayeke mbilimbili-kue (Marc 10:45, Buku ti Nzapa, Fini Mbuki). Ti tene azo agbu nda ti akpengba tënë so, a yeke lani kota ye mingi ti sû mbeni tondo ti dungo Jésus. Na ndo ni, aye so angoro dungo Jésus amû nga ambeni kpengba tënë nde ti manda, tongana ti so e yeke bâ na yâ article ti peko.

[Afoto na lembeti 4]

Tongana nyen a lingbi ti sö ahale ti Adam na gbe ti siokpari?