Apendere, Jéhovah ayeke girisa kusala ti ala pëpe!

“Nzapa ayeke kirikiri pëpe si Lo lingbi girisa kusala ti i, ndoye so i fa giriri teti iri ti Lo, teti i sala kusala teti azo ti be-vulu, na i de ti sala tongaso.”​—AHÉBREU 6:10.

A SI na mo awe ti sala mbeni ye ti nzoni na mbeni kamarade ti mo, me ti bâ na pekoni so lo kiri singila na mo oko pëpe? A lingbi ti duti ye ti songo bê mingi tongana mbeni zo abâ na nene ni pëpe mbeni ye ti nzoni so a sala na lo, wala même ahon so, ti girisa biaku ye so a sala na lo. Ye oko, ye ni ayeke tâ nde mingi tongana e yeke sala kusala na bê ti e kue na Jéhovah! Bible atene: “Nzapa ayeke kirikiri pëpe si Lo lingbi girisa kusala ti i, ndoye so i fa giriri teti iri ti Lo, teti i sala kusala teti azo ti be-vulu, na i de ti sala tongaso.” (aHébreu 6:10). Gbu li kete na ndo ye so tënë so aye ti tene. Na lê ti Jéhovah, ti girisa ye so mo sala, na ye so mo ngbâ ti sala na yâ kusala ti lo ayeke tongana mbeni ye ti kirikiri so lo sala, so ti tene mbeni siokpari. Jéhovah ayeke biani mbeni Nzapa so ayeke bâ kusala ti zo na nene ni.​—Malachie 3:10.

² Mo yeke na mbeni matabisi, so ayeke tâ nde mingi, ti voro na ti sala na Nzapa so ayeke bâ kusala ti zo na nene ni. Teti so a yeke wara gi azo kutu omene tongaso ti aita ti mo na yâ vorongo, tongana a haka ni na azo ngbundangbu omene so ayeke na ndo lê ti sese kue, biani mara ti matabisi ti mo so ayeke mbeni ye so a lingbi ti wara ni kirikiri pëpe. Na ndo ni, tongana mo yeke mä tokua ti nzo tënë na mo yeke sala ye alingbi na ni, ye so ayeke fa so Jéhovah ayeke bi bê ti lo tâ na ndo mo mveni. Teti biani, Jésus atene: “Zo oko alingbi ga na Mbi pëpe, gi tongana Babâ so ato Mbi ahiri lo”. (Jean 6:44). Biani, Jéhovah ayeke mû maboko na zo oko oko ti wara aye ti nzoni so sandaga ti Christ aga na ni.

Bâ na nene ni kota matabisi so mo yeke na ni

³ Tongana ti so article so ahon afa ni, mo yeke na kungba ti zia ngia na bê ti Jéhovah, na a yeke mbeni kungba so mbeni zo nde alingbi pëpe ti sala ni na place ti mo (aProverbe 27:11). A yeke mbeni ye so a lingbi mo bâ ni tongana senge ye lâ oko pëpe. Na yâ mbeni oko ti apsaume so ala sû na gbe ti yingo ti Nzapa, amolenge ti Koré afa bê ti kiri singila ti ala teti matabisi ti salango na Jéhovah. E diko: “Lâ oko na sedu ti Mo ayeke nzoni ahon lâ saki oko na mbeni ndo; mbi ye ti sala sinziri na yanga ti da ti Nzapa ti mbi ahon ti duti na tente ti azo ti sioni.”​—Psaume 84:11.

⁴ Mo yeke bâ nga tongaso matabisi ti mo ti salango na Babâ ti mo ti yayu? Tâ tënë, aye ni alingbi ti duti mo bâ mo tene vorongo Jéhovah ayeke tongana mbeni da ti kanga so agbanzi lege na zo ti sala ye kue so lo ye. A yeke tâ tënë so batango akpengba-ndia ti Bible ahunda na mbage ti mo ti gbanzi ambeni ye na tele. Ye oko, na nda ni, ye kue so Jéhovah ayeke hunda na mo ayeke gi teti nzoni ti mo (Psaume 1:1-3). Na ndo ni, Jéhovah abâ angangu so mo yeke sala, na lo fa so lo bâ be-biani ti mo na nene ni. Biani, Paul asû na mbeti so Jéhovah ayeke “Zo ti futa ye na ala so agi Lo.” (aHébreu 11:6). Jéhovah ayeke gi alege ti sala ye tongaso. Mbeni prophète ti mbilimbili so ayeke na ngoi ti Israël ti giriri atene: “Teti lê ti L’Eternel akpe na ndo nde nde na lê ti sese kue ti fa ngangu ti Lo teti ala so bê ti ala ayeke mbilimbili na Lo.”​—2 Chronique 16:9.

⁵ Mbeni oko ti alege ti nzoni ahon tanga ni kue so na yâ ni mo lingbi ti fa so bê ti mo ayeke mbilimbili wala alingbi kue na mbage ti Jéhovah, ayeke ti sala tënë ti lo na ambeni zo. Mo wara lege awe ti sala tënë ti mabe ti mo na ambeni kamarade ti mo ti ekole? Na tongo nda ni, peut-être mo lingbi ti bâ ni tongana mbeni ye so ayeke ngangu ti sala, na gi tënë ni alingbi ti mû mbito kete na mo. Mo lingbi peut-être ti hunda tele ti mo: ‘Ka tongana mbi sala ni si ala he mbi? Ka tongana ala tene so ala hinga li ti ala pëpe na mara ti nzapa so mbi yeke sala?’ Jésus ayeda so a yeke azo kue pëpe si ayeke mä ande tokua ti Royaume ni (Jean 15:20). Ye oko, ye so aye ti tene pëpe so fade azo ayeke he gi mo na ala yeke ke gi mo na yâ fini ti mo kue. Nde na so, amaseka Témoin mingi awara lege ti tingbi na azo so amä tënë, na même akamarade ti ala ayekia ala ngangu mingi teti so ala luti na ndo atënë ti mabe ti ala.

“Fade Jéhovah ayeke mû maboko na mo”

⁶ Me tongana nyen mo lingbi ti tomba mbito yongoro ti fa tënë ti mabe ti mo na gigi? Ngbanga ti nyen pëpe ti leke na bê ti mo ti sala tënë polele tongana azo ahunda na mo tënë na ndo vorongo ti mo? Bâ ye so asi na mbeni maseka-wali ti ngu 17 so iri ti lo ayeke Jennifer, lo tene: “Mbi yeke na ekole na a yeke ngoi ti tengo ye ti midi. Amolenge-wali so ayeke na table oko na mbi ayeke sala lisoro na ndo alege ti vorongo; mbeni oko ahunda na mbi nzapa wa mbi yeke sala.” Tele ti Jennifer adö ti kiri tënë? Lo tene na bê kue: “Biani, tele ti mbi adö ngbanga ti so mbi hinga lani mbilimbili tënë so ala yeke tene ande na pekoni pëpe.” Tongaso, ye nyen Jennifer asala? Lo tene: “Mbi tene na amolenge-wali ni so mbi yeke Témoin ti Jéhovah. Na tongo nda ni, mbi bâ so bê ti ala adö. Ti bâ ni nzoni, ti ala aTémoin ti Jéhovah ayeke gi ambeni zo tongaso, so zo ahinga li ti lo na ala pëpe. Ye so apusu ala ti hunda na mbi atënë mingi, na mbi wara lege ti fa polele na ala ambeni ye so ala gbu nda ni fade nzoni pëpe. Même na peko ti lango so, ambeni molenge-wali ni angbâ ti ga ndulu na mbi ngoi na ngoi ti hunda tënë.”

⁷ Jennifer agi bê ti lo teti so lo gbu ngoi so ti fa tënë ti mabe ti lo? Oko pëpe! Lo tene: “Tele ti mbi anzere mingi na pekoni tongana ngoi ti tengo kobe ni ahunzi. Fadeso, amolenge-wali so ahinga nzoni mingi ahon ti kozo aTémoin ti Jéhovah.” Wango so Jennifer amû laso akpengba pëpe: “Tongana mo bâ so a yeke ngangu na mo ti fa tënë na akamarade ti mo ti klase wala na awafango mbeti ti mo, tene mbeni sambela hio. Fade Jéhovah ayeke mû maboko na mo. Mo yeke wara ande ngia teti so mo sala kusala nzoni na ngoi ti mo so ti fa tënë.”​—1 Pierre 3:15.

⁸ Bâ so Jennifer amû wango ti “tene mbeni sambela hio” na Jéhovah tongana ngoi ni azi na mo ti fa tënë ti mabe ti mo. A yeke mbilimbili ye so Néhémie, wakua ti mû ye ti nyon na gbia ti Perse Artaxerxès, asala giriri tongana mbeni ye so lo ku tele ti lo na ni pëpe asi. A lingbi ti bâ so Néhémie ayeke na vundu ngbanga ti so a tene na lo so dutingo ti aJuif kâ asava oko pëpe, na lo mä so gbagba ti Jérusalem nga na ayanga-da ni abuba kue. Gbia ni abâ so Néhémie ayeke na ngia pëpe, na tongaso lo hunda lo ye nyen a sala si lo yeke na vundu. Kozoni ti kiri tënë, Néhémie asambela ti wara fango lege ti Nzapa. Na pekoni, na mbito pëpe lo hunda ti tene a zi lege na lo ti kiri na Jérusalem na ti mû maboko na lekengo gbata ni so atï. Artaxerxès ayeda ti tene Néhémie ague (Néhémie 2:1-8). Ye nyen mo manda dä? Tongana tele ti mo ayeke dö na ngoi so mbeni lege azi na mo ti fa tënë ti mabe ti mo, bâ tongana ye senge pëpe ngoi so azi na mo ti sambela na yâ bê ti mo. Pierre asû na mbeti: “Mo zia kungba ti mo na ndo L’Eternel, na fade Lo bata mo.”​—1 Pierre 5:7; Psaume 55:23.

‘Duti ndulu ti kiri tënë’

⁹ Bâ mbeni tapande ni nde. Leah so ayeke na ngu 13 ayeke diko buku Les jeunes s’interrogent​—Réponses pratiquesa na ngoi ti hungo tele ti midi na ekole. Lo tene: “Ambeni zo ayeke bâ mbi, na kete na pekoni, gbâ ti azo abungbi na li ti mbi. Ala to nda ti hunda ti hinga tënë wa ayeke na yâ buku ni.” Na hunzingo ti ekole ni, amolenge-wali osio ahunda na Leah ti ga na ala ambeni buku Les jeunes s’interrogent. Ngoi kete na pekoni, amolenge-wali ni asala tënë ti buku ni na ambeni mba ti ala, na tongaso ala nga kue ahunda ti wara ni. Teti ayenga so aga na pekoni, Leah azia buku Les jeunes s’interrogent 23 na a-élève ti klase ti lo nga na akamarade ti ala. A yeke lani kete ye teti Leah ti fa tënë na tongo nda ni so ambeni zo ahunda na lo tënë na ndo buku so lo yeke diko? Oko pëpe! Lo tene: “Na tongo nda ni, tele ti mbi adö. Me mbi sambela, na mbi hinga lani so Jéhovah ayeke na mbi.”

¹⁰ Ye so asi na Leah alingbi peut-être ti dabe mo na mara ti ye so asi giriri na mbeni kete molenge-wali ti Israël so a gue na lo na ngbâa na Syrie. Naaman, mbeni mokonzi ti aturugu ti Syrie, ayeke na kobela ti buruma. A lingbi ti duti fade wali ti lo si azi li ti lisoro so apusu kete molenge-wali so ti fa na mbito pëpe tënë ti mabe ti lo. Lo tene: “O, tongana seigneur ti mbi ayeke na prophète so ayeke na Samarie! fade lo lungula kobela ti ngiba ti lo!”​—2 aGbia 5:1-3.

¹¹ Teti so kete molenge-wali so asala ye na mbito pëpe, Naaman awara lege ti hinga so “tâ Nzapa ayeke na mbeni sese nde pëpe, gi na sese ti Israël”. Lo tene même so fade lo ‘mû offrande so a-zo-na-wa wala sandaga na mbeni nzapa pëpe, me gi na Jéhovah.’ (2 aGbia 5:15, 17). Biani, Jéhovah ahiri deba nzoni na ndo salango ye ti kete molenge-wali so na mbito pëpe. Lo lingbi ti sala tongaso nga teti amaseka ti laso, na fade lo yeke sala ni. A yeke ye so Leah abâ gango tâ tënë ni. Tongana ngoi ayeke hon, ambeni élève ti klase ti lo aga ndulu na lo na ala tene so buku Les jeunes s’interrogent ayeke mû maboko na ala ti duti na nzoni tambela. Leah atene: “Tele ti mbi anzere ngbanga ti so mbi hinga lani so mbi yeke mû maboko na amba ti mbi ti manda tënë mingi na ndo Jéhovah, na ti gbian fini ti ala.”

¹² Mara ti ye so asi na Jennifer na Leah alingbi nga ti si na mo. Sala ye alingbi na wango ti Pierre so asû na mbeti so tongana mo yeke Chrétien, a lingbi mo duti lakue ndulu ‘ti kiri tënë lakue na azo kue so ahunda nda ti tënë ti beku so ayeke na yâ mo, me ti kiri tënë na tâ be-ti-molenge na kota kpengo mbito’. (1 Pierre 3:15). Mo lingbi ti sala ni tongana nyen? Mû tapande ti akozo Chrétien so asambela na Jéhovah ti mû maboko na ala ti fa tënë “na mbito pëpe”. (Kusala 4:29). Na pekoni, sala mbito pëpe ti fa tënë ti mabe ti mo na amba ti mo. Ye ti pekoni alingbi peut-être ti dö bê ti mo. Na ndo ni, mo yeke zia ngia ande na bê ti Jéhovah.

Akasete vidéo na ambeni pialo

¹³ Apendere mingi asala kusala na akasete vidéo ti fa tënë ti mabe ti ala na akamarade ti ala ti ekole wala na awafango mbeti na ala. Na ambeni ngoi, a-exposé so a yeke mû ti salango ni na ekole amû lege na apendere ti gonda Jéhovah. Na tapande, tongana a yeke fa mbeti na ala na ndo mbaï ti aye na sese, a mû na ambeni molenge-koli use ti ngu 15 so ayeke aTémoin ti Jéhovah mbeni devoir ti sala; a hunda na ala ti sû mbeni tondo na ndo mbeni lege ti vorongo oko ti sese. Amolenge-koli use so abungbi oko ti sû tondo ti ala na ndo aTémoin ti Jéhovah na salango kusala na buku Les Témoins de Jéhovah​—Prédicateurs du Royaume de Dieu.b A hunda na ala ti fa nga pekoni teti apenze-ngbonga oku. Na peko ti ye so, wafango mbeti nga na a-élève ni ahunda atënë mingi, a sala si amolenge-koli ni angbâ na nduzu teti apenze-ngbonga 20 na ndo ti angbonga so a mû fade na ala ti sala tënë. Teti ayenga mingi na pekoni, a-élève ti klase ti ala angbâ ti hunda atënë na ndo aTémoin ti Jéhovah!

¹⁴ Tongana ti so atapande so a mû na yâ paragraphe so ahon afa ni, mo lingbi ti wara aye ti nzoni mingi tongana mo fa tënë ti mabe ti mo ti Témoin ti Jéhovah. Zia pëpe si mbito ti zo agbanzi mo na gonda nga na ngia so mo lingbi ti wara na mungo maboko na ambeni zo ti hinga Jéhovah. Bible atene: “Son ayeke na lege ti kpengo mbito ti zo, me zo so azia bê ti lo na L’Eternel, fade a bata lo.”​—aProverbe 29:25.

¹⁵ Dabe mo so tongana mo yeke mbeni maseka Chrétien, mo yeke na mbeni ye so akamarade ti mo ayeke tâ na nzara ti wara biani, so ti tene nzoni fini laso na zendo ti fini ti lakue lakue teti kekereke (1 Timothée 4:8). A yeke nzoni ti bâ so na kodoro ti Amerika, so mo lingbi ti pensé so azo ni mingi ayeke na nzara ti tënë ti Nzapa pëpe wala azia bê ti ala gi na aye ti sese so, mbeni tondo afa so kamême ndambo ti apendere ayeke bâ tënë ti vorongo Nzapa tâ na nene ni mingi, na tongana a mû azo ota, oko na popo ni ayeke tene so mabe na Nzapa ayeke “ye so ayeke sala ngangu mingi ahon tanga ti aye kue” na ndo fini ti ala. A yeke tongaso nga peut-être na yâ akodoro mingi ti sese. Peut-être akamarade ti mo ti ekole ayeke duti na ngia ti mä ye so mo ye ti fa na ndo Bible.

Gbu ngoi ti pendere ti mo ti ga ndulu na Jéhovah

¹⁶ Biani, ti zia ngia na bê ti Jéhovah ahunda ye mingi ahon gi senge salango tënë ti lo na ambeni zo. A hunda nga ti sala si tambela ti mo ague oko na akpengba-ndia ti lo. Bazengele Jean asû na mbeti: “So ayeke ndoye ti Nzapa: e bata komandema ti Lo. Na komandema ti Lo ayeke tongana nengo ye pëpe”. (1 Jean 5:3). Fade mo yeke bâ gango tâ tënë ti tënë so tongana mo ga ndulu na Jéhovah. Tongana nyen mo lingbi ti sala ye so?

¹⁷ Mû ngoi ti diko Bible nga na ambeti so aluti na ndo ni. Tongana mo ngbâ ti manda ye na ndo Jéhovah, fade a yeke duti ngangu pëpe na mo ti mä yanga ti lo na ti sala tënë ti lo na ambeni zo. Jésus atene: “Zo ti nzoni alungula nzoye ti nzo mosoro ti bê ti lo, lo zia na gigi, . . . teti yanga ti zo asala tënë ti ye so asi bê ti lo.” (Luc 6:45). Ni la, zia si bê ti mo asi na aye ti nzoni. Ngbanga ti nyen pëpe ti zia na gbele mo ambeni ye ti salango ni? Peut-être mo lingbi ti maï kode ti mo ti lekengo abungbi ti kongregation na yenga so ayeke ga. Ye so mo lingbi ti zia na gbele mo na pekoni ti sala ayeke ti mû mbage ti mo na lege ti mbeni kiringo tënë so ayeke ndulu me so alondo na bê ti mo. Biani, a yeke kota ye mingi ti tene mo sala nga ye alingbi na aye so mo manda.​—aPhilippien 4:9.

¹⁸ Aye ti nzoni so aga na lege ti salango na Jéhovah ayeke ninga biani teti lakue lakue. Tâ tënë, na ambeni ngoi, a lingbi ti kanga lege wala ti he mo kete ngbanga ti so mo yeke mbeni Témoin ti Jéhovah. Me dabe mo na tapande ti Moïse. Bible atene so “lo zia bê ti lo na futa so ayeke ga.” (aHébreu 11:24-26). Mo nga kue mo lingbi ti duti biani na beku so fade Jéhovah ayeke futa mo teti angangu so mo mû ti manda ye na ndo lo na ti sala tënë ti lo na ambeni zo. Biani, fade lo yeke ‘girisa lâ oko pëpe kusala ti mo na ndoye so mo fa teti iri ti Lo.’​—aHébreu 6:10.

[Akete tënë na gbe ni]

Mo dabe mo na ni?

• Ngbanga ti nyen mo lingbi ti hinga biani na bê ti mo so Jéhovah ayeke bâ kusala ti mo na nene ni?

• Akode ti fango tënë wa na ekole ambeni pendere abâ so a ga na ye ti nzoni?

• Mo lingbi ti wara ngangu tongana nyen ti fa tënë na azo ti klase ti mo?

• Tongana nyen mo lingbi ti ga ndulu na Jéhovah?

[Ahundango tënë ti manda na ye]

1. Tongana nyen buku ti aHébreu na ti Malachie afa so Jéhovah ayeke bâ kusala ti mo na nene ni?

2. Ye nyen asala si matabisi ti salango na Jéhovah aduti mbeni ye so ayeke wara ni kirikiri pëpe?

3. Tongana nyen amolenge ti Koré afa bê ti kiri singila ti ala teti matabisi ti salango na Jéhovah?

4. (a) Ye nyen alingbi peut-être ti pusu ambeni zo ti bâ vorongo Jéhovah tongana mbeni da ti kanga teti ala? (b) Na yâ lege wa Jéhovah afa so lo yeke ndulu ti bi lê na ndo awakua ti lo na nga ti futa ala?

5. (a) Fa mbeni oko ti alege ti nzoni ahon tanga ni kue so na yâ ni mo lingbi ti fa so bê ti mo ayeke mbilimbili na mbage ti Jéhovah. (b) Ngbanga ti nyen a lingbi ti duti ngangu teti mo ti fa tënë ti mabe ti mo na ambeni zo?

6, 7. (a) Mbeni molenge-wali ti ngu 17 awara lege tongana nyen ti fa tënë na azo ti klase ti lo? (b) Ye nyen mo manda na ndo tapande ti Jennifer?

8. (a) Tongana nyen sambela amû maboko na Néhémie na ngoi so mbeni ye so lo ku tele ti lo na ni pëpe asi? (b) Fa ambeni ye so alingbi ti si na ekole so a lingbi ti hunda na mo ti sambela hio na yâ bê ti mo.

9. Tongana nyen Leah, mbeni molenge-wali ti ngu 13, awara lege ti zia abuku 23 ti Les jeunes s’interrogent?

10, 11. Tongana nyen mbeni kete molenge-wali ti Israël awara lege ti mû maboko na mbeni mokonzi turugu ti Syrie ti hinga tënë na ndo Jéhovah? Na ye wa lo gbian fade fade na pekoni na yâ fini ti lo?

12. Mo lingbi ti sala tongana nyen ti wara ngangu ti fa tënë ti mabe ti mo?

13. Alege wa azi na ambeni pendere ti fa tënë? (Bâ nga atapande so a zia na alembeti 20 na 21).

14, 15. (a) Ngbanga ti nyen mbito ti zo ayeke mbeni son? (b) Ngbanga ti nyen a lingbi mo duti na beku so mo lingbi ti fa tënë ti mabe ti mo na ambeni zo?

16. Ti zia ngia na bê ti Jéhovah, a hon gi ti sala tënë na amba ti e na ndo lo, ye nyen a hunda nga?

17. Tongana nyen mo lingbi ti ga ndulu na Jéhovah?

18. Même tongana a gi ti kanga lege kete na kusala ti mo, mo lingbi ti duti biani na beku wa?

[Kete tënë/Afoto na lembeti 20]

Même akete molenge kue ayeke gonda Jéhovah!

Même akete molenge kue awara lege ti fa tënë pendere mingi na ekole. Bâ gi andulu tapande so.

Amber ayeke mbeni kete molenge-wali ti ngu 10, na lo yeke na da oku; amolenge ti klase ti lo ayeke diko mbeni buku so asala tënë ti bira so aNazi aga na ni na ndo aJuif na ngoi ti Use Bira so Amû Sese Kue. Amber aleke ti ga na kasete vidéo Les triangles violets na maître ti lo. Bê ti maître ni adö ti manda so a sala nga ngangu na aTémoin ti Jéhovah na gbe ti komandema ti aNazi. Maître ni afa kasete vidéo so na a-élève ti klase ni kue.

Tongana lo de na ngu miombe, Alexa asû mbeni mbeti na akete kamarade ti lo ti klase ti fa ngbanga ti nyen lo lingbi pëpe ti sala matanga ti Noël. Bê ti maître ti lo adö mingi na mbeti ni, a sala si lo hunda na Alexa ti diko ni na kota go na amolenge ti klase ti lo kue nga na amolenge ti ambeni klase use nga! Na hunzingo ti lettre ni, Alexa atene: “A fa na mbi ti bâ na nene ni azo so atënë ti mabe ti ala ague nde na ti mbi, na mbi kiri singila mingi na i teti so i bâ na nene ni desizion ti mbi ti sala matanga ti Noël pëpe.”

Ngoi kete na pekoni so a zia lo na kozo da-mbeti, Eric amû buku Mbeti ti atene ti Bible na lo gue na ni na ekole; lo hunda ti tene a mû lege na lo ti fa ni na akamarade ti lo ti klase. Maître ti lo atene: “Mbi yeke na mbeni pendere ye so aga na li ti mbi. Ngbanga ti nyen mo diko pëpe mbeni mbaï oko na akamarade ti mo kue ti klase?” Na a yeke ye so Eric asala. Na pekoni, lo hunda na ala so kue aye ti wara buku ni ti yôro maboko ti ala na nduzu. Azo 18 ayôro maboko ti ala, na maître ni kue ayeke na popo ti azo so! Fadeso, Eric abâ so lo yeke na territoire ti lo mveni.

Whitney ayeke mbeni kete molenge-wali ti ngu gumbaya. Lo kiri singila mingi teti brochure Les Témoins de Jéhovah et l’instruction.c Lo tene: “Ngu oko oko, a yeke mama si ayeke mû brochure so na amaître ti mbi, me ti ngu so, mbi sala ni mbi mveni. Brochure so asala si maître ti mbi amû na mbi matabisi ti ‘élève ti nzoni ahon atanga ni kue’ ti yenga ni.”

[Kete tënë na gbe ni]

[Kete tënë/Afoto na lembeti 21]

Angoi so ambeni pendere agbu ti fa tënë ti mabe ti ala

Tongana a hunda na ala ti leke mbeni devoir wala exposé ti salango ni na ekole, ambeni pendere asoro mbeni li ti tënë so amû lege na ala ti fa tënë

Ambeni pendere ni amû na wafango mbeti ti ala mbeni kasete vidéo wala mbeni mbeti so andu mbeni tënë so ala yeke sala lisoro dä na klase

Ambeni pendere so ayeke diko Bible wala ambeti na ndo Bible na ngoi ti hungo tele na ekole abâ so ambeni pendere nde apusu ndulu na ala na ahunda atënë na ala

[Foto na lembeti 18]

Ala so ayeke biazo alingbi ti mû maboko na apendere ti sala na Jéhovah