Luti kpô na bâ salut ti Jéhovah!
“I leke tele ti i, i luti kpô ti bâ salut so L’Eternel amû na i.”—2 CHRONIQUE 20:17.
A FA peko ti salango ye ti a-terroriste tongana mbeni bira so ala ga na ni na ndo azo ti sese kue, na même na ndo nzoni duti ti azo mveni. A yeke tâ na lege ni ti tene a gi ti bâ kpale so nzoni. Me mbeni bira nde ayeke dä so azo mingi abi bê ti ala dä pëpe me so kpale ti pekoni ayeke yengi ndo même mingi ahon ti so a-terroriste ayeke sala. A yeke bira wa?
2 A yeke bira so “Gog, zo ti sese ti Magog” ayeke ga na ni. Bible asala tënë ti bira so na yâ chapitre 38 ti Ezéchiel. Tongana a tene kpale ti peko ti bira so ayeke yengi ndo mingi ahon ti so a-terroriste ayeke ga na ni na ndo sese kue, a yeke tâ tënë biani? Biani ye so ayeke tâ tënë ngbanga ti so bira so Gog aga na ni ayeke pëpe gi mbeni bira so a ye ti sala na ayanga-ti-komande ti azo. Bira ni ayeke ti kinda yanga-ti-komande ti Nzapa so ayeke na yayu! Ye oko, nde na azo so alingbi ti wara lege kue pëpe ti hon na ngangu tongana a ga na bira na ndo aye ti ala, Wasalango ye ayeke na ngangu kue ti luti na gbele bira ti sioni ahon kue so Gog ayeke ga na ni.
A sala bira na yanga-ti-komande ti Nzapa
3 Ngbele ye na ngoi so a zia gere ti Royaume ti Nzapa na yayu na ngu 1914, tiri ayeke dä lakue na popo ti Gbia ti Nzapa so ayeke komande fadeso, na sioni bungbi ti aye ti sese ti Satan. Na ngoi ni so lani, a hunda na agbia ti sese ti yeda na Mokonzi so Nzapa asoro. Me ala ke ti yeda na ni tongana ti so a fa ni giriri: “Agbia ti sese aleke tele ti ala, na azo ti komande awa tele ti ala ti ke L’Eternel, na ti ke Lo so A sa mafuta na li ti Lo. Ala tene, Zia e fâ kamba ti Ala, na e bi kamba ti Ala yongoro!” (Psaume 2:1-3). Kengo ndo ti ala na mbage ti komandema ti Royaume ni ayeke ga wâ ande na ngoi so Gog ti Magog ayeke ga ti sala bira ti lo.
4 Peut-être e lingbi ti hunda tele ti e: ‘Tongana nyen si azo alingbi ti tiri na mbeni yanga-ti-komande so lê abâ pëpe na so ayeke na yayu?’ Bible afa so na yâ ti yanga-ti-komande wala ngorogbia so, a yeke wara “azo saki ngbangbo oko na bale-osio na ndo ni saki osio . . . so A vo ala na popo ti azo ti sese,” nga na “Molenge Ti Ngasangbaga,” Christ Jésus (Apocalypse 14:1, 3; Jean 1:29). Teti so a yeke na yayu, a sala tënë ti fini yanga-ti-komande so tongana “ayayu ti fini”; na a hiri azo so ayeke sala kusala na gbe ni na sese ge tongana “sese ti fini”. (Esaïe 65:17; 2 Pierre 3:13). Mingi ti azo 144 000 so a soro ala ti komande legeoko na Christ ahunzi na be-biani awe kusala ti ala ge na sese. Ala fa biani so ala lingbi ti yô afini kungba so a yeke mû na ala na yayu.
5 Ye oko, mbeni kete tanga ti azo 144 000 so angbâ na ndo sese. Na popo ti azo 15 000 000 so aga lani na matanga ti Dango bê na kui ti Seigneur na ngu 2002, gi azo 8 760 si afa na gigi beku so ala yeke na ni so a soro ala teti matabisi ti yayu so. Ni la, zo kue so na bê ti lo alondo ti sala bira na tanga ti azo so ayeke na beku ti duti na yâ Royaume ni me so angbâ na sese ge, biani lo yeke tiri tâ gi na Royaume ti Nzapa mveni.—Apocalypse 12:17.
Gbia ni ague ti hon na ngangu biaku
6 A fa giriri awe tongana nyen Jéhovah ayeke bâ azo so ayeke londo ti ke Royaume ti lo so lo zia: “Lo so aduti na yayu ahe ngia; Seigneur ahe ala. Tongaso Lo sala tënë na ala na ngonzo ti Lo, na Lo zia mbito na bê ti ala na lege ti ngonzo ti Lo ti wâ. Lo tene, Mbi mveni, Mbi zia Gbia ti Mbi na Sion, Hoto ti Mbi ti nzoni-kue.” (Psaume 2:4-6). Ngoi ni asi fadeso awe ti tene Christ, na gbe ti ngangu ti Jéhovah, ‘ague ahon na ngangu biaku’. (Apocalypse 6:2). Tongana nyen Jéhovah ayeke bâ ala so ayeke ga ti sala bira na azo ti lo na ngoi ti ndangba gango ti lo ti hon na ngangu? Lo yeke bâ ala tongana azo so ayeke tiri tâ gi na lo mveni nga na Gbia so lo zia ti komande. Jéhovah atene: “Zo so andu mo, lo ndu lê ti L’Eternel mveni.” (Zacharie 2:8). Nga, Jésus afa biani so lo yeke bâ aye so azo asala wala ake ti sala na aita ti lo so a sa yingo na ndo ti ala, tongana aye so a sala na lo mveni wala ake ti sala na lo.—Matthieu 25:40, 45.
7 Biani, ala so na bê kue amû mbage ti tanga ti ala so a sa yingo na ndo ti ala, fade Gog ayeke zia ngonzo ti lo nga na ndo ala. Azo so, so ayeke na beku ti duti na yâ “sese ti fini” ti Nzapa so, ala yeke “azo mingi so asi singo”, na a hiri ala na popo ti “amara kue, ti akete mara kue, ti azo nde nde kue, na ti yanga nde nde kue”. (Apocalypse 7:9). A sala tënë ti ala tongana azo so “[a]luti na gbele trône, na gbele Molenge Ti Ngasangbaga, ala yü vulu bongo”. Na lege so, a fa so ala luti na gbele Nzapa na Christ Jésus tongana azo so a yeda na ala awe. Na “tikeke ti mburu [so] ayeke na maboko ti ala”, ala yamba Jéhovah tongana Zo so alingbi biani ti duti Kota Gbia ti ndagigi kue, na so ayeke komande na lege ti Gbia ti lo Jésus Christ, ‘Molenge Ti Ngasangbaga ti Nzapa.’—Jean 1:29, 36.
8 Bira so Gog ayeke ga na ni ayeke pusu ande Gbia ti Nzapa ti londo na ti sala bira ti Harmaguédon (Apocalypse 16:14, 16). Ala so ayeke ke ti yeda na kota yanga-ti-komande ti Jéhovah, fade a yeke futi ala. Me ala so a bâ pasi teti so ala bata be-biani ti ala na mbage ti Royaume ti Nzapa, fade ala wara hungo tele teti lakue lakue. Na ndo tënë so, bazengele Paul asû mbeti so: “Ye so ayeke fä ti fango ngbanga mbilimbili ti Nzapa, so asala si i lingbi na royaume ti Nzapa, so i hu pono ngbanga ni. Teti a yeke ye ti mbilimbili na lê ti Nzapa ti kiri pono na ala so asala ye ti pono na i; na i so i yeke hu pono, fade Lo sala si i duti nzoni legeoko na e, na lâ ni so Seigneur Jésus asigigi na yayu na a-ange ti ngangu ti Lo na yâ menga-wa, tongana Lo ga ti futa kula na azo so ahinga Nzapa pëpe, na ala so ake ti mä Tene-nzoni ti Seigneur ti e Jésus.”—2 aThessalonicien 1:5-8.
9 Na ngoi ti kota ye ti vundu so ayeke si ande, na so ayeke hunzi na Harmaguédon, fade Christ ayeke sala bira na ye kue so ayeke sioni. Me fade a yeke hunda na adisciple ti lo pëpe ti sala bira ala mveni, legeoko tongana ti so a hunda lani pëpe na azo ti amara use ti royaume ti Juda ti sala bira, ye so a sala fadeso angu saki mingi awe. Bira ni ayeke lani ti Jéhovah, na lo mû lege na ala ti sö benda. Tondo ni atene: “L’Eternel ato awagino ti sala bira na amolenge ti Ammon, amolenge ti Moab, na azo ti Hoto ti Séir so aga ti sala bira na azo ti Juda, na ala pika ala. Teti amolenge ti Ammon na amolenge ti Moab alondo ti ke azo ti Hoto ti Séir na ala fâ ala kue biani, na tongana ala hunzi azo ti Hoto ti Séir awe, ala sala bira na popo ti ala mveni si ala kue akui. Tongana azo ti Juda asi na tour ti sinziri na yanga ti yando, ala bâ kuâ ti azo mingi mingi so, teti awato ni akui kue, oko akpe pëpe.”—2 Chronique 20:22-24.
10 A si tâ gi tongana ti so Jéhovah afa tënë ni kozo: “A yeke ngbanga ti i ti tiri bira so pëpe”. (2 Chronique 20:17). Ye so asi giriri aduti tongana tapande ti ye so aChrétien ayeke sala ande tongana Jésus Christ ayeke ga ‘ti hon na ngangu biaku’. Ti ku na ngoi ni so, aChrétien angbâ lakue ti tiri bira na sioye, me ala yeke sala bira ni pëpe na aye ti bira na lege ti mitele, me na aye ti bira na lege ti yingo. Na lege so, ala ‘ngbâ lakue ti hon ndo ti sioni na lege ti ye ti nzoni.’—aRomain 6:13; 12:17-21; 13:12; 2 aCorinthien 10:3-5.
Azo wa si Gog ayeke sala na kusala ti tiri na bira so?
11 A fa Gog ti Magog tongana Satan Zabolo na ngoi so a bi lo na sese ngbele ye ti londo na ngu 1914. Teti so lo yeke mbeni créature ti yingo, lo lingbi pëpe ti sala bira ni lo mveni, me fade lo yeke sala kusala na azo ge na sese ti sala aye ti lo so. Fade azo wa si lo yeke sala kusala na ala? Bible afa atënë kue pëpe na ndo ni; ye oko, lo fa kamême na e ambeni ye so alingbi ti mû maboko na e ti hinga azo so lo yeke sala kusala ande na ala. Me na ngoi so aye so ayeke si na sese angbâ ti si alingbi na aye so aprophétie ti Bible afa, fade yeke yeke e yeke gbu nda ti aye ni nzoni mingi. Azo ti Jéhovah aye pëpe ti mû gi atënë tongaso na li ti ala, me ala ngbâ lakue ti zi lê ti ala na lege ti yingo, na bango ndo nzoni kue na ndo guengo na li ni ti aye na lege ti poroso nga ti vorongo so ague oko na prophétie ti Bible.
12 Prophète Daniel azi nda ti tënë na ndo ndangba bira so Gog ayeke sala na azo ti Nzapa, lo tene: “Na lege ti ngonzo ti wâ, fade lo [gbia ti banga a] gue ti futi na ti fâ azo mingi. Fade lo yä tente ti lo ti gbia na popo ti kota ngu ti ingo . . . ndulu na pendere Hoto ti nzoni-kue”.—Daniel 11:44, 45.
13 Na yâ ngoi ti giriri, tongana ti so a fa ni na yâ Bible, “kota ngu ti ingo” ayeke ngu ti Méditerranée, na “Hoto ti nzoni-kue” ayeke lani Sion, so Jéhovah asala tënë ni tongaso: “Mbi mveni, Mbi zia Gbia ti Mbi na Sion, Hoto ti Mbi ti nzoni-kue.” (Psaume 2:6; Josué 1:4). Ni la, na lege ti yingo, sese so ayeke “na popo ti kota ngu ti ingo . . . ndulu na pendere Hoto ti nzoni-kue” ayeke fä ti nzoni maïngo ni na lege ti yingo ti ndo ti kusala ti aChrétien so a sa yingo na ndo ti ala. A ngbâ ti bâ ala mbeni pëpe tongana azo so ayeke na popo ti kota ngu ti ingo so aduti fä ti azo so ague yongoro na Nzapa; na ala yeke ku kungo ti komande na tele ti Christ Jésus na yâ Royaume ti yayu. A yeke polele so na ngoi ni so lo yeke ga ti sala sioni bira ti lo so prophétie ti Daniel asala tënë ni, fade gbia ti banga ayeke zia lê ti lo mbilimbili na tele ti awakua ti Nzapa so a sa yingo na ndo ti ala, nga na ala so asi singo so aduti be-biani na ala.—Esaïe 57:20; aHébreu 12:22; Apocalypse 14:1.
Awakua ti Nzapa ayeke sala ande tongana nyen?
14 Ye nyen a yeke ku na mbage ti awakua ti Nzapa ti tene ala sala ni na ngoi so a yeke ga ti sala bira na ala? Salango ye ti azo ti Nzapa na ngoi ti Josaphat akiri amû mbeni tapande ti ye so a yeke ku na mbage ti ala ti sala. Bâ so a hunda lani na azo ti mara ni ti sala aye ota: (1) ti leke tele ti ala, (2) ti luti kpô, na (3) ti bâ salut ti Jéhovah. Tongana nyen azo ti Nzapa laso ayeke sala ye ande alingbi na atënë so?—2 Chronique 20:17.
15 Ti leke tele ti ala: Ahon ti gue kirikiri, azo ti Nzapa ayeke ngbâ lakue ti leke tele ti ala wala ti bata ndo ti ala so ayeke ti mû mbage ti Royaume ti Nzapa na wâ. Ala yeke ngbâ lakue ti bata ndo so ala yeke dä na dutingo lakue nde na sese so tongana aChrétien. Fade ala yeke “luti ngangu, ye ayengi ala pëpe” na yâ kusala so ala yeke sala na be-biani na Jéhovah, na fade ala yeke ngbâ lakue ti sepela Jéhovah na gbele azo teti nzobe so lo fa (1 aCorinthien 15:58; Psaume 118:28, 29). Mbeni ye oko pëpe ti ngangu atâa a yeke ti laso wala ti kekereke alingbi pëpe ti yengi ala si ala zia dutingo ti ala so Nzapa ayeda na ni.
16 Ti luti kpô: Fade awakua ti Jéhovah ayeke tara pëpe ti sö fini ti ala mveni, me fade ala zia bê ti ala kue na Jéhovah. Gi lo oko si ayeke na ngangu ti sö awakua ti lo na yâ aye ti ngangu ti sese so, na lo mû zendo ti sala tongaso (Esaïe 43:10, 11; 54:15; Toto ti Jérémie 3:26). Ti zia bê kue na Jéhovah aye ti tene nga ti zia bê kue na bungbi ti lo so lê abâ ti ngoi ti laso, so Lo yeke sala na kusala teti angu mingi fadeso awe ti fa aye so lo leke ti sala. A yeke tâ mbilimbili na ngoi ni so si a yeke hunda ande mingi na atâ Chrétien ti zia bê ti ala kue na aita ti ala na yâ vorongo so Jéhovah na Gbia ti lo amû ngangu na ala ti mû li ni. Fade azo ti be-biani so ayeke fa lege na azo ti Nzapa. Tongana mbeni zo ake ti mä fango lege so azo so ayeke mû, a lingbi ti ga na lo kpale.—Matthieu 24:45-47; aHébreu 13:7, 17.
17 Ti bâ salut ti Jéhovah: Salut ayeke duti ande futa so a leke ti mû na ala so angbâ be-ta-zo lakue tongana aChrétien na so azia bê ti ala kue na Jéhovah ti tene lo zi ala. Juska ti si na ndangba ngoi ni, na tongana ti so a lingbi na ngangu ti ala, fade ala yeke fa tënë ti singo ti lâ ti ngbanga ti Jéhovah. A lingbi azo kue ahinga so gi Jéhovah oko si ayeke tâ Nzapa, na lo yeke na awakua be-ta-zo ge na sese. Fade a yeke kiri ti hunda mbeni pëpe ti mû ngoi ngbii ti leke tënë so andu mbilimbili ti kota yanga-ti-komande ti Jéhovah.—Ezéchiel 33:33; 36:23.
18 Teti so ala kiri awara ngangu awe, fade azo ti Nzapa ayeke lï na yâ fini sese, ala yeke duti ndulu ti he bia ti sepela hongo na ngangu ti ala, legeoko tongana ti so azo ti Israël ti giriri ahe ni na pekoni so a sö ala na yâ Ngu Bengba. Teti so ala yeke duti lakue na bê ti kiri singila na Jéhovah ngbanga ti so lo bata ala, fade ala oko oko kue nga bungbi ti ala ni kue ayeke mû peko ti bia so a he ni giriri: “Fade mbi sala bia na L’Eternel teti Lo hon na ngangu na yâ gloire ti Lo; . . . L’Eternel ayeke Zo Ti Bira, L’Eternel ayeke iri ti Lo. . . . Koti ti Mo, O L’Eternel, a fâ wato ndulu ndulu. Na lege ti gloire ti Mo ti kota mingi ahon, Mo bi na sese ala kue so alondo ti ke Mo. Mo to ngonzo ti Mo ti wâ, a gbi ala tongana mbesu. . . . Na yâ nzobe ti Mo, Mo fa lege na azo so Mo ton ala awe; na lege ti ngangu ti Mo, Mo fa na ala lege ti si na ndo ti duti ti Mo ti nzoni-kue. . . . Fade Mo sala si ala si na hoto ti ye ti héritier ti Mo na ala duti nzoni kâ, ndo ti duti so Mo sala teti Mo mveni, O L’Eternel, ndo ti Nzoni-kue, O Seigneur, so tïtî Mo aleke awe. Fade L’Eternel akomande tongana gbia lakue lakue.”—Exode 15:1-19.
19 Fadeso, teti so beku ti ala ti wara fini ti lakue lakue aga polele mingi ahon ti kozo, a yeke tâ pendere ngoi ni la teti awakua ti Nzapa ti fa na gigi so ala mû tele ti ala na Jéhovah, na ala ye na bê ti ala kue ti sala na lo tongana Gbia ti ala ti lakue lakue!—1 Chronique 29:11-13.
Mo lingbi ti fa pekoni?
• Ngbanga ti nyen Gog ayeke ga ande na bira ti lo mbilimbili na ndo ala so a sa yingo na ndo ti ala nga na ambeni ngasangbaga?
• Tongana nyen azo ti Nzapa ayeke leke tele ti ala ande?
• Ti luti kpô aye ti tene nyen?
• Tongana nyen azo ti Nzapa ayeke bâ ande salut ti Jéhovah?
[Ahundango tënë ti manda na ye]
1, 2. Ngbanga ti nyen ye so ayeke si na peko ti bira so “Gog, zo ti sese ti Magog” ayeke ga ande na ni ayeke yengi ndo mingi ahon ti so a-terroriste ayeke sala na ndo sese kue laso?
3. Tisango ndo wa a mû na agbia ti sese ngbele ye ti londo na ngu 1914? Me ala tene ti ala nyen?
4, 5. Tongana nyen azo na sese ge alingbi ti sala bira na yanga-ti-komande ti Nzapa so lê abâ pëpe na so ayeke na yayu?
6. Tongana nyen Jéhovah na Christ ayeke bâ ala so ayeke gi ti tiri na azo ti Nzapa?
7. Fa ngbanga ti nyen Gog ayeke zia ngonzo ti lo nga na ndo ala so ayeke ti “azo mingi so asi singo” so a sala tënë ti ala na Apocalypse 7:9.
8. Fade bira so Gog aga na ni ayeke pusu Christ ti sala nyen? Na ye nyen ayeke si na pekoni?
9, 10. (a) Tongana nyen Jéhovah amû giriri lege na Juda ti sö benda na ndo mbeni kota wato ti lo? (b) Ye nyen a lingbi aChrétien ti laso angbâ lakue ti sala?
11. (a) Fade Gog ayeke sala kusala na azo wa ti ga na bira ti lo so? (b) Ti zi lê na lege ti yingo andu ye wa?
12, 13. Tongana nyen prophète Daniel afa kozoni kue awe mbeni ndangba bira so a yeke sala na azo ti Nzapa?
14. Aye ota wa azo ti Nzapa ayeke sala ande tongana a ga na bira na ndo ti ala?
15. Ti azo ti Jéhovah, ti leke tele ti ala aye ti tene nyen?
16. Na yâ lege wa fade awakua ti Jéhovah ayeke luti kpô?
17. Ngbanga ti nyen awakua be-ta-zo ti Nzapa ayeke bâ ande salut ti Jéhovah?
18, 19. (a) Na lege wa bia ti hongo na ngangu so a he ni na Exode chapitre 15 afa na gigi abibe ti ala so ayeke sö kuâ ande na ngoi ti bira ti Gog? (b) Ye nyen a yeke tâ na lege ni teti azo ti Nzapa ti sala fadeso?
[Foto na lembeti 18]
Jéhovah amû lege na Josaphat na azo ti lo ti hon na ngangu na a hunda ala oko pëpe ti sala bira
[Foto na lembeti 20]
Ala so a sa yingo na ndo ti ala nga na ambeni ngasangbaga angbâ lakue ti mû mbage ti kota yanga-ti-komande ti Jéhovah
[Foto na lembeti 22]
Legeoko na azo ti Israël ti giriri, fade azo ti Nzapa ayeke he ande mbeni bia ti hongo na ngangu