Tondo ti awafango tënë ti Royaume
Dutingo na be-nze-pepe nga gbungo ngangu ayeke ga na ngia
JÉSUS CHRIST afa kozoni so na lâ ti nda ni, “fade ndoye ti azo mingi aga dê.” Ni la, na yâ ambage ti sese mingi laso, azo ayeke na nzara ti mä nzo tënë ti Royaume pëpe. Ambeni abâ même lege ti vorongo na nene ni pëpe.—Matthieu 24:12, 14.
Atâa so kue, na mabe nga na be-nze-pepe, awafango tënë ti Royaume awara lege ti hon ndo ti kpale ni tongana ti so ye so asi na République tchèque afa na gigi.
Ambeni ita-wali Témoin ti Jéhovah use asala lani lisoro na mbeni wali. Wali ni asala tënë na peko ti yanga-da, lo zi yanga-da ni pëpe. Kete na pekoni, wali ni azi yanga-da ni kete, na mbeni maboko ague agboto Tour ti Ba Ndo na Réveillez-vous! so aita-wali ni aye ti mû na lo. Wali ni atene “singila”, na lo kanga yanga-da ni. Aita-wali ni ahunda tele ti ala wala “E lingbi ti kiri ti ga?” Mbeni oko na popo ti ala, mbeni pionnier wala wakua ti ngoi kue, atene lo yeke kiri ti gue ti bâ wali ni. Ye oko, mara ti ye ni akiri asi, na a gue juska na yâ ti ngu oko.
Na bango so a lingbi lo gbian salango lisoro ti lo, ita-wali pionnier ni asambela lani na Jéhovah ti wara mungo maboko. Na ngoi ti peko, lo mû apériodique na wali ni, na lo hunda na lo ambeni tënë na lege ti nzobe: “Tongana nyen? Mo bâ ti mo apériodique ni tongana nyen?” Legeoko tongana ti kozo, wali ni azi yanga pëpe. Me na peko ti salango gbâ ti avizite na lo, wali ni ato nda ti mû tele ti lo na lisoro ni kete. Mbeni lâ, lo zi yanga-da ni kota, me lisoro ni aninga pëpe.
Na bango so wali ni aye pëpe ti sala lisoro na yanga-da, pionnier ni aleke ti sû mbeni mbeti na lo ti fa na lo nda ni so lo ga ti bâ lo nga ti hunda so lo ye ti manda Bible na lo. Na nda ni, na peko ti ngu oko na ndambo ti dutingo na be-nze-pepe, ita-wali ni awara lege ti to nda ti manda Bible na wali so. Bê ti lo adö na lo wara ngangu tongana wali ni atene na lo na pekoni: “Mbi mä na bê na Nzapa ngbele ye na ngoi so mo to nda ti ga na mbi apériodique.”
Biani, be-nze-pepe na gbungo ngangu alingbi ti ga na ngia na yâ kusala ti fango tënë ti Royaume na ti salango adisciple.—Matthieu 28:19, 20.