Atënë so azo ahunda

Giriri, Jéhovah azia lege na awakua ti lo, azo ti Israël, ti mû awali mingi; me ti laso ayeke tongaso pëpe. Ye so aye ti tene so ndia ti lo ayeke gbian?

Jéhovah agbian bango ndo ti lo pëpe na ndo mungo awali mingi (Psaume 19:8; Malachie 3:6). Na tongo nda ti gigi, a yeke lani pëpe na yâ aye so lo leke teti azo, na laso nga, a yeke tongaso pëpe. Tongana lo leke lani Ève ti ga wali ti Adam, Jéhovah afa so ndia ti lo ayeke: wali oko teti koli oko. “Teti tënë so, fade zo azia babâ ti lo na mama ti lo, na lo duti na wali ti lo; fade ala ga mitele oko.”​—Genèse 2:24.

Tongana Jésus Christ ayeke lani na sese, lo kiri lo fa so ndia so agbian pëpe; a yeke na ngoi so lo yeke kiri tënë na ala so a hunda tënë na ndo fango yâ ti mariage nga na salango mbeni fini ni. Jésus atene: “I diko na Mbeti pëpe? Lo so asala ala giriri kozoni, Lo sala ala koli na wali, na Lo tene, Teti tënë so, fade zo azia babâ na mama ti lo, na lo duti na wali ti lo; fade ala use aga mitele oko. Tongaso ala yeke use mbeni pëpe, me ala yeke mitele oko.” Jésus atene na ndo ni: “Zo so azia wali ti lo, tongana a yeke tënë ti ye ti pitan pëpe, na lo kamata mbeni wali, lo sala lango-sioni.” (Matthieu 19:4-6, 9). Na lege ti tënë so, e lingbi ti bâ polele so ti mû awali use wala ahon so ayeke nga lango-sioni.

Tongaso, ngbanga ti nyen a zia lege na azo ti mû gbâ ti awali na ngoi ti giriri? Zia na li ti mo so a yeke Jéhovah pëpe si ayeke na lingu ti salango ye so. Kozo zo so Bible atene lo mû awali ahon oko ayeke Lémec (Lamek), mbeni hale ti Caïn (Genèse 4:19-24). Tongana Jéhovah aga giriri na Kota Moa na ngoi ti Noé, Noé na amolenge ti lo ti koli ota kue ayeke lani gi na wali oko oko. Azo so kue amû lani awali mingi, a futi ala na yâ Kota Moa.

Angu mingi na pekoni, tongana Jéhovah asoro azo ti Israël ti ga mara ti lo, ambeni zo ni ayeke ti ala lani na awali mingi awe, atâa so na bango ni, mingi ti akoli ni amû gi wali oko. Nzapa ahunda lani pëpe na asewa so wungo ti awali ti da ni ahon oko ti kangbi. Nde na so, lo mû ambeni ndia so lo luti na ndo ni ngangu ti tene afa lege na salango ye so.​—Exode 21:10, 11; Deutéronome 21:15-17.

A yeke lani gi teti mbeni ngoi si a zia lege na azo ti mû awali mingi; e lingbi ti hinga ni gi pëpe na lege ti ye so Jésus atene na ndo ndia ti Jéhovah giriri so andu mariage, me nga na lege ti ye so bazengele Paul asû lani na mbeti na gbe ti yingo vulu ti Nzapa. Bazengele ni atene: ‘A yeke nzoni koli oko oko ayeke na wali ti lo si wali oko oko ayeke na koli ti lo.’ (1 aCorinthien 7:2, Fini Mbuki, 2001). Paul akiri asû na mbeti so a lingbi zo kue so a tisa lo na kusala ti surveillant wala serviteur ti mungo maboko na yâ kongregation ti aChrétien aduti “koli ti wali oko”.​—1 Timothée 3:2, 12; Tite 1:6.

Tongaso, Jéhovah ake ti zia lege na akoli ti mû gbâ ti awali na ngoi so lo zia na sese kongregation ti aChrétien a sala fadeso angu 2 000 tongaso awe. A si na ngoi so lani, ndia na ndo mariage akiri tongana ti so a yeke giriri na tongo nda ni so Nzapa aleke koli na wali: wali oko teti koli oko. A yeke ndia so laso azo ti Nzapa angbâ ti bata ni na ndo lê sese kue.​—Marc 10:11, 12; 1 aCorinthien 6:9, 10.