“I ga ndulu na Nzapa, na fade Lo ga ndulu na i”
Ândö nga laso: Lege so Bible agbian koli so
PIKANGO mozoko ayeke lani fini ti Rolf-Michael. Lo lingbi lani ti zia lege ti nyongo mbangi pëpe. Tongana mbeni maseka ti kodoro ti Zamani, lo yeke nyon lani angangu sämba ahon ndo ni nga angangu mbangi tongana ti so bê ti lo aye, tongana LSD, cocaïne, haschisch, nga na ambeni mbangi so ayeke buba ngangu ti gbungo nda ti ye ti zo.
Na ngoi so lo tara ti linda na ambangi na hondengo ni na yâ mbeni kodoro ti Afrika, a gbu lo na a bi lo na da ti kanga teti anze 13. Na da ti kanga ni, lo wara ngoi ti gbu li ti lo na ndo tâ nda ti fini.
Rolf-Michael na wali ti lo Ursula agi gbä ye so ala lingbi ti sala na yâ fini ti ala na ti gi tâ tënë. Atâa aye ti ziango vundu na bê so ala wara na lege ti a-église so atene ala yeke aChrétien, ala yeke na mbeni kota nzara ti gi ti hinga Nzapa. Ala yeke na ahundango tënë, me akiringo tënë ti abungbi ti vorongo nde nde agbu bê ti ala pëpe. Na ndo ni, alege ti vorongo ni amû na ala pëpe mbeni ngangu nda ti tënë ti pusu ala ti gbian fini ti ala.
Na nda ni Rolf-Michael na Ursula atingbi na aTémoin ti Jéhovah. Na peko ti so lo to nda ti manda Bible, wango so apika bê ti Rolf-Michael mingi: “I ga ndulu na Nzapa, na fade Lo ga ndulu na i.” (Jacques 4:8). Lo leke lani na bê ti lo ti ‘zia lege ti lo ti giriri, zo-ti-giriri na ti kiri ti yü zo-ti-fini so A créé na lege ti Nzapa na yâ mbilimbili na nzoni-kue ti tene-biani.’—aEphésien 4:22-24.
Tongana nyen Rolf-Michael alingbi ti yü zo-ti-fini? A fa na lo lani na yâ Bible so ‘na lege ti tâ hingango ye’, lengo so mbeni zo ayeke na ni alingbi ti “ga fini na lege ti image ti Lo so acrée lo”, so ti tene Jéhovah Nzapa.—aColossien 3:9-11.
Na ngoi so lo yeke wara lani tâ hingango ye, Rolf-Michael agi ti sala si fini ti lo ague legeoko na akpengba-ndia ti Tënë ti Nzapa (Jean 17:3). A yeke lani ngangu mingi na lo ti zia ti nyon ambangi. Ye oko, Rolf-Michael ahinga nene ti ga ndulu na Jéhovah na lege ti sambela na lo wara mungo maboko ti lo (1 Jean 5:14, 15). Na ndo ni, lo wara nga mungo maboko na mbage ti ala so aga aTémoin ti Jéhovah awe, na salango kue ti sala ye so Nzapa aye.
Hingango so sese ayeke hon, nga ala so asala ye so Nzapa aye ayeke ngbâ ande teti lakue lakue, amû nga lani maboko na Rolf-Michael. Ye so amû lege na lo ti soro, pëpe ndoye so aninga pëpe teti sese so, me deba nzoni ti lakue lakue so aga na lege ti mbeni nzoni songo na Jéhovah, Nzapa ti ndoye (1 Jean 2:15-17). Atënë ti aProverbe 27:11 andu lani bê ti Rolf-Michael mingi: “Molenge ti mbi, mo duti na ndara na mo mû ngia na bê ti mbi, si mbi lingbi kiri tënë na zo so azonga mbi.” Na bê ti kiri singila, lo tene: “Versê so afa na gigi ndoye ti Jéhovah so alï mingi, teti so lo mû lege na azo ti zia ngia na bê ti lo.”
Legeoko tongana Rolf-Michael, wali ti lo, na amolenge ti lo ota, azo saki ngbangbo mingi awara aye ti nzoni na mungo peko ti akpengba-ndia ti Bible. A yeke wara mara ti azo tongaso na yâ ti akongregation ti aTémoin ti Jéhovah na ndo sese mobimba. Ye ti vundu ni ayeke so, na yâ ti ambeni kodoro mingi, a bi atënë ti wataka na li ti aTémoin, a tene so ala yeke mbeni sioni secte so ayeke buba yâ ti asewa. Ye oko, ye so asi na Rolf-Michael afa ni nde.—aHébreu 4:12.
Rolf-Michael atene so Matthieu 6:33, so awa e ti zia na kozo ndo aye ti yingo, ayeke ye ti fango tâ nzoni lege na sewa ti lo. Lo na sewa ti lo ayeke na bê ti kiri singila mingi na Jéhovah teti fini ti ala so ayeke na ngia, so ala wara tongana ala ga aChrétien. Ala yeda na bibe ti wasungo psaume so ahe na bia: “Fade mbi mû nyen na L’Eternel teti ye kue ti nzoni so Lo sala na mbi?”—Psaume 116:12.
[Kete tënë na lembeti 9]
Nzapa amû lege na azo ti zia ngia na bê ti lo
[Encadré na lembeti 9]
Ngangu ti akpengba-ndia ti Bible ▸
Na popo ti akpengba-ndia ti Bible so apusu azo mingi ti zia lege ti dutingo ngbâa ti ambeni ye so alingbi ti sala sioni na tele ti azo, a yeke wara ambeni so ge:
“O i so i ndoye L’Eternel, i ke sioye!” (Psaume 97:10). Na peko ti so lo hinga na bê ti lo biani so sioni salango ye alingbi ti gue na zo na kui nga ti ke tâ ni na bê ti lo kue, mbeni zo alingbi ti bâ so a yeke ngangu pëpe ti sala ye so anzere na Nzapa.
“Zo so atambela na awandara, fade lo ga wandara, me zo so aga ndeko ti awabuba, fade lo wara vundu dä.” (aProverbe 13:20). Ti ke ambangi nga ti ga pëpe ngbâa ti ambeni ye so alingbi ti sala sioni na tele ti zo, a yeke nzoni mbeni zo asoro akamarade ti lo nzoni. Ti lë songo na aChrétien so ayeke mû ande maboko na lo ti ke asioni ye so, ayeke duti biani tâ ye ti nzoni.
“I gi bê ti i na ye oko pëpe; me na yâ ye kue i fa na Nzapa ye so i ye, na lege ti sambela na ti hunda mingi na tënë ti merci. Na fade siriri ti Nzapa so ahon bibe kue abata bê ti i na abata bibe ti i na yâ Christ Jésus.” (aPhilippien 4:6, 7). Mara ti siriri ti bê na ti bibe tongaso alingbi ti ga pëpe na lege ti mbeni ye nde. Nga ziango bê kue na yâ sambela na Nzapa ayeke mû maboko na mbeni zo ti hon ndo ti akpale ti fini sân ti mû ambeni mbangi.