Mbeni zo ayeke dä ti zia bê kue na lo?

NA PEKO ti tingo ti mur ti Berlin na ngu 1989, azo asigigi polele na atënë ti lingo so abata ni lani nzoni. Na tapande, Lydiaa abâ so na ngoi ti komandema ti aSocialiste ti Tö ti Zamani, Stasi wala Ndokua so abâ tënë ti nzoni duti ti kodoro ni, aleke mbeni mbeti na ndo ye kue so lo sala so andu fini ti lo mveni. Atâa so bê ti lo adö ti mä tënë ti mbeti ni, vundu asala lo lani mingi ti hinga so a yeke tâ gi koli ti lo si amû asango ni kue na Stasi. A yeke mbeni zo so lo zia bê ti lo kue na lo si akä lo.

Mbeni mbeti-sango ti Londres atene so Robert ayeke lani mbeni mbakoro-koli so abâ docteur ti lo na “nene ni mingi na lo zia bê ti lo kue na lo”. A tene lani so docteur ni ayeke na “mbeni nzoni kode ti salango ye”. Na pekoni, mo ye ti bâ, gi hio tongaso Robert akui. A yeke lani bê ti lo si aluti wala kobela ti tension si abi lo? Oko pëpe. Azo ti komande ti kodoro ni atene na nda ni so docteur ni ague abâ Robert. Lo na sewa ti lo ahinga pëpe me docteur ni akpo Robert na mbeni sioni yorö si lo kui. A lingbi ti tene so a yeke mbeni zo so Robert azia bê ti lo kue na lo si afâ lo.

Kpale ti ziango bê kue na zo so yâ ni abuba na mbeni lege so adö bê, nga asioni ye ti pekoni asi na Lydia nga na Robert. Na yâ ti ambeni ye, aye ti pekoni ayeke ngangu mingi pëpe. Ye oko, ti duti na vundu na mbage ti mbeni zo so e zia bê kue na lo ayeke mbeni ye so ayeke si ka lakue. Mbeni tondo so kota ndokua ti hundango tënë na azo ti kodoro ti Zamani Allensbacher Jahrbuch der Demoskopie 1998-2002, asigigi na ni, afa so na yâ mbeni gingo nda ti ye, azo 86 na popo ti azo 100 so akiri tënë na ahundango tënë atene so mbeni zo so ala zia bê kue na lo azia vundu na bê ti ala. Peut-être mo yeke na mara ti kpale tongaso. Ni la, bê ti e alingbi ti dö pëpe teti so mbeti-sango ti Suisse Neue Zürcher Zeitung ti ngu 2002 atene so “na yâ akodoro ti Poto so ague na li ni, ziango bê kue na popo ti azo akiri na gbe ni a sala angu mingi awe”.

A maï yeke yeke, a futi hio

Ti zia bê kue na mbeni zo aye ti tene nyen? Aye ti tene ti yeda so zo ni ayeke sala ye na lege ni, na bê kue. Nga lo yeke sala ande mbeni ye na mbana pëpe ti so bê ti mo. A lingbi ti maï ziango bê kue na zo yeke yeke, me a lingbi nga ti futi hio. Teti so azo mingi abâ so azo ayeke sala ye ahon ndo ni na ndo bê kue so zo azia na mbage ti ala, a yeke ye ti dongo bê tongana azo ayeke ndulu pëpe ti zia bê kue na ambeni zo? Na lege ti mbeni gingo nda ti ye so asigigi na kodoro ti Zamani na ngu 2002, “a yeke ngangu ti wara même maseka 1 na popo ti amaseka 3 so ayeke zia tâ bê kue na ambeni zo”.

E lingbi peut-être ti hunda tele ti e mveni: ‘E lingbi ti zia bê kue na mbeni zo? A yeke kota ye ti zia bê kue na mbeni zo même tongana lege ayeke dä ti tene zo ni azia vundu na bê ti e?’

[Akete tënë na gbe ni]

[Kete tënë na lembeti 3]

Mbeni tondo afa so azo 86 na popo ti azo 100 so akiri tënë na ahundango tënë atene so mbeni zo so ala zia bê kue na lo azia vundu na bê ti ala