Royaume ti Nzapa ayeke mbeni tâ ye laso

Na lege wa si gbâ ti akodoro so ayeke na angobo ti salango ye nde nde, so maïngo ti ala ayeke nde nde alingbi ti mä tele? A tene so gi mbeni bira so alondo na mbeni ndo nde na sese (na tapande na lê ti nze) si alingbi ti pusu ande azo ti amara nde nde kue ti duti beoko.​—The Age, mbeti-sango ti Australie.

MBENI bira so alondo na mbeni ndo nde na sese? Atâa so a lingbi ti sala si azo ti sese kue abungbi oko wala pëpe, aprophétie ti Bible asala biani tënë ti mbeni kota kpale so ayeke sala si amara kue ayeke bungbi tele ti ala oko. Fade a yeke azo ti yingo si ayeke ga na kota kpale so.

David, gbia ti Israël ti giriri, asala tënë ti aye ti sese so na lege ti prophétie. Tongaso, na gbe ti yingo, lo sû na mbeti: “Agbia ti sese aleke tele ti ala, na azo ti komande awa tele ti ala ti ke L’Eternel, na ti ke Lo so A sa mafuta [“a sa ye”, NW ] na li ti Lo. Ala tene, Zia e fâ kamba ti Ala, na e bi kamba ti Ala yongoro!” (Psaume 2:2, 3; Kusala 4:25, 26). Bâ so agbia ti sese abungbi tele ti ala tongana zo oko ti ke Jéhovah, Wasalango ndagigi nga na lo so Lo sa ye na li ti lo Jésus Christ, Gbia ti Lo so Lo soro awe. Ye so ayeke si tongana nyen?

Na lege ti kode ti dikongo ngoi ti yâ ti Bible nga na aprophétie so aga tâ tënë awe, a zia gere ti Royaume ti Nzapa na yayu na ngu 1914, na a zia Jésus Christ tongana Gbia ni.a Na ngoi ni so, amara ti sese abungbi lani bibe ti ala oko. Ahon ti tene ala mä yanga-ti-komande ti fini Royaume ti Nzapa so, ala gbugburu tele ti ala na yâ mbeni Kota bira ti wara komandema, Kozo Bira so Amû Sese Kue.

Tongana nyen si Jéhovah abâ ti lo salango ye ti agbia ti sese? “Lo so aduti na yayu ahe ngia; Seigneur ahe ala. Tongaso Lo sala tënë na ala na ngonzo ti Lo, na Lo zia mbito na bê ti ala na lege ti ngonzo ti Lo ti wâ.” Na pekoni Jéhovah atene na Molenge ti lo, Gbia ti Royaume ti lo so Lo sa ye na ndo lo: “Mo hunda Mbi, na fade Mbi mû na Mo amara ti ga ye ti héritier ti Mo, na nda ti sese kue ti ga ye ti Mo. Fade Mo fâ ala na barre ti wen; Fade Mo fâ ala si ala kala tongana ta ti wasongota.”—Psaume 2:4, 5, 8, 9.

Fade a yeke futi biaku biaku amara so ake Jéhovah na barre ti wen so na Harmaguédon. Ndangba buku ti Bible, Apocalypse, afa ngoi so ye ni ayeke ga tâ sioni mingi tongana “bira ti kota lâ ti Nzapa, Lo Ti Ngangu Ahon Kue”, so ngbanga ni a bungbi “agbia ti sese kue”. (Apocalypse 16:14, 16). Teti ala yeke na gbe ti ngangu ti ayingo sioni, amara ti sese kue ayeke bungbi tele ti ala ti sala mbeni ye oko: ti tiri bira na Nzapa ti Ngangu Ahon Kue.

Ngoi so azo ayeke bungbi ande tele ti ala ti ke kota yanga-ti-komande ti Nzapa ayeke ndulu mingi. Nde na ye so ala bi bê ti ala ti wara, “dutingo beoko” ti ala ni ayeke ga na ala ye ti nzoni oko pëpe. Nde na so, fade ye so ala yeke sala ayeke duti ande tongo nda ti ye so ayeke ga na mbeni siriri so azo kue aku ni a ninga awe. Na lege wa? Na hunzingo ti bira ni so, Royaume ti Nzapa ayeke fâ “royaume [ti sese] so kue ndulu ndulu, na a sala si royaume nde nde so kue awe; na fade royaume so angbâ lakue lakue.” (Daniel 2:44). Royaume ti Nzapa, me pëpe mbeni bungbi ti azo, ayeke ngorogbia so ayeke zia ande na ndo sese tâ siriri so azo ayeke gi ni.

Mokonzi so abâ lege ti Royaume ti Nzapa

Royaume ti Nzapa ayeke ngorogbia so azo ti mbilimbili mingi asambela ngbanga ni na tenengo: “E ye royaume ti Mo aga. E ye ala sala na sese ye so bê ti Mo aye legeoko tongana ala sala na yayu.” (Matthieu 6:10). Ahon ti duti mbeni ye so ayeke gi na yâ bê ti zo, Royaume ti Nzapa, so a zia gere ni na yayu ngbele ye na ngu 1914, ayeke mbeni tâ ngorogbia so ato nda ti sala apendere kusala awe. Zia e bâ mbilimbili ambeni kpengba ye so afa polele so Royaume ti Nzapa ayeke tâ ye na so ayeke sala kusala mingi laso.

Kozoni kue, gbia so a zia lo na ndo ti Royaume ni, Jésus Christ, asala si Royaume ni ayeke bâ lege ti nzoni tambela ti aye na ayeke zia na sese andia ti mbilimbili teti azo kue so ayeke na gbe ni. Na ngu 33, Jéhovah Nzapa azia Jésus Christ tongana Beli ti kongregation (aEphésien 1:22). Ngbele ye kâ, Jésus ato nda ti sala kusala na ngangu ti lo ti komande, ye so afa na gigi biani so lo yeke na ngangu ti bâ lege ti aye nzoni mingi. Na tapande, tongana kota nzara atï lani na Judée na ngoi ti abazengele, aChrétien ti kongregation ni asala lani ye hio ti mû maboko na aita. Na Antioche, a leke mbeni kungba na a tokua Paul na Barnabas ti gue na ni na aita.​—Kusala 11:27-30.

Teti so a zia gere ti Royaume ni na sese awe na so lo yeke sala kusala laso, e lingbi ti ku Jésus Christ ti sala ye mingi ahon so. Na ngoi so ye ti ngangu tongana yengingo ti sese, kota nzara, ngu so asuku na amû ndo kue, akota pupu wala ahoto so ayeke sungba asi na afon ala wamabe ti mbeni kodoro nde, kongregation ti aChrétien ti aTémoin ti Jéhovah ayeke ndulu ti sala ye kue ti mû maboko na ala nga na ambeni zo nde. Na tapande, na ngoi so mbeni kota yengingo ti sese asi na Salvador na nze ti janvier nga na février, ngu 2001, a leke na yâ ti kodoro ni kue akusala nde nde ti ga na mungo maboko, nga ambeni Témoin ti Jéhovah ti Canada, ti Guatemala na ti Amerika amû lani maboko. Gi na yâ ti mbeni kete ngoi a kiri a leke aDa ti Royaume ti ala ota nga na ada ti lango 500.

Azo so ayeke na gbe ti Royaume ti Nzapa

Ti londo na ngoi ni so a zia gere ni na ngu 1914, Royaume ti Nzapa ti yayu ato nda ti leke nga ti bungbi azo ti ndo lê sese kue so ayeke duti ande na gbe ni. Ye so ayeke gango tâ tënë ti prophétie so Esaïe asû na mbeti: “Na lâ ti nda ni, fade tënë asi tongaso, fade A sala si hoto ti da ti L’Eternel [tâ vorongo ti lo so a yä na nduzu] aga li ti ahoto, . . . na fade amara kue ague kâ tongana ngu so asua.” Prophétie ni afa so “azo mingi” ayeke gue na ala yeke yeda na afango lege nga na andia ti Jéhovah.—Esaïe 2:2, 3.

Kusala so asala si mbeni bungbi ti azo so a leke tele ti ala nzoni ti sala ye abâ gigi, bungbi ti aita-koli na aita-wali Chrétien ti ndo lê sese kue so wungo ti ala ahon 6 000 000 na so ala yeke na yâ ti akodoro ahon 230. Na ngoi ti akota bungbi ti aTémoin ti Jéhovah so amû ndo lê sese kue, bê ti azo mingi apika ti bâ ndoye, siriri nga na dutingo beoko so ayeke na popo ti azo mingi mingi so ahon ndo ti atënë ti mara, ti ngobo ti salango ye nga na ti ayanga ti kodoro (Kusala 10:34, 35). Mo yeda pëpe so, ti tene mbeni ngorogbia aga na azo ti akete mara ngbangbo mingi ti duti na siriri nga na beoko, a lingbi biani lo sala anzoni ye nga gere ti lo aluti ngangu?

Royaume ti Nzapa nga fango ye na azo

Ngorogbia oko oko kue ayeke na salango ye so alingbi azo ti kodoro ni abata ni. Zo oko oko kue so aye ti duti na gbe ti yanga-ti-komande ti ngorogbia so, a hunda na lo ti sala ye alingbi na aye so. Legeoko nga, Royaume ti Nzapa ayeke nga na asalango ye so a hunda na azo kue so aye ti duti na gbe ni ti bata ni. Ye oko, ti mû lege na azo mingi mingi so alondo na ando nde nde ti yeda na ti mû peko ti a-oko salango ye so, a yeke biani mbeni kota kusala. Ge nga ayeke mbeni ye so afa polele so Royaume ti Nzapa ayeke tâ ye: Nzoni kapa ti lo ti fango ye so asi na azo mingi, fango ye so agbian gi bibe ti azo ni pëpe me nga bê ti ala.

Tongana nyen si Royaume ti Nzapa asala mara ti kota kusala so? A yeke na mungo peko ti kode ti fango ye ti abazengele so ayeke sala lani kusala ti fango tënë “na yâ da ti azo,” wala da na da, nga na mandango Tënë ti Nzapa na zo oko oko so ayeda (Kusala 5:42; 20:20). Kode ti fango ye so ayeke lë lengo mingi? Jacques Johnson, mbeni prêtre Catholique, asû mbeti na mbeni mbeti-sango ti Canada so ayeke sigigi yenga oko oko, na lo fa tënë ti ngangu so lo sala ti kanga lege na mbeni wali ti manda Mbeti ti Nzapa na aTémoin ti Jéhovah. Lo tene: “Li ti mbi aga kirikiri na mbi hinga so mbi yôro tele ti mbi na yâ ti mbeni tiri so mbi lingbi pëpe ti sö benda dä. Mbi to nda ti hinga so a sala anze mingi awe so awali Témoin ti Jéhovah alë mbeni kpengba songo na mama ti sewa so, so ade maseka na so ayeke na ngangu pëpe ti londo na da ti lo ti sigigi. Ala lë songo na lo na lege ti maboko so ala yeke mû na lo, tâ songo ti kamarade so aluti na ndo ti ndoye. Kete na pekoni, lo ga mbeni membre ti église ti ala na mbi lingbi pëpe ti kanga lege na ye ni ti tene asi tongaso.” Biani, legeoko tongana ti so tokua ti Tënë ti Nzapa so aTémoin ti Jéhovah ayeke fa nga na nzoni lege ti tambela ti ala apika bê ti ngbele Catholique so, a yeke pika nga bê ti azo kutu mingi na ndo lê sese mobimba.

Mara ti fango ye tongaso (fango ye na ndo ti Royaume) aluti mbilimbili na ndo ti Bible na afa na zo ti bâ na nene ni akpengba-ndia ti Bible na ndo nzoni tambela. A yeke fa na azo ti ndoye nga ti yekia amba ti ala atâa ala londo na ando nde nde (Jean 13:34, 35). A yeke mû nga maboko na azo ti sala ye alingbi na gbotongo mê so: “I tambela na lege ti sese so pëpe, me i changé lege ti i na lege ti bibe ti fini, si i lingbi hinga ye so Nzapa aye, ye so ayeke nzoni, ye so alingbi na lê ti Lo, na ye so alingbi kue.” (aRomain 12:2). Na kengo angbele lege ti tambela ti ala na yengo dä na ngia ti sala ye alingbi na andia nga na akpengba-ndia ti Royaume ti Nzapa, azo kutu mingi awara laso siriri, tâ ngia nga na beku teti kekereke.—aColossien 3:9-11.

Mbeti-sango so, Tour ti Ba Ndo, ayeke mbeni kota ye so amû maboko na dutingo beoko ti azo ti sese mobimba. Nzoni kode so a zia na sese ti tene a kiri na peko ti mbeti-sango so na yanga ti ambeni kodoro nde nde, nga na agbakuru so a leke ni ti pete na mbeti-sango so, asala si a sigigi na akpengba article ti Tour ti Ba Ndo legeoko na ayanga ti kodoro 135; na azo 95 na popo ti azo 100 na ndo lê sese kue alingbi ti manda a-article so na yanga ti kodoro ti ala mveni na oko ngoi.

Mbeni wasungo buku ti aMormon asû na mbeti molongo ti anzoni kusala so amissionnaire so ayeke ti église ti lo pëpe ayeke sala ni. Lo sû nga na yâ ti molongo ni Tour ti Ba ndo na Réveillez-vous!, so aTémoin ti Jéhovah asala ni, tongana mbeni pendere mbeti-sango so a gue na ni ti fa nzo tënë, lo tene: “Mbeni zo alingbi pëpe ti bi tënë na li ti Tour ti Ba Ndo nga na Réveillez-vous! na tenengo so ala yeke maï oko pëpe bingo bê na ndo ti aye so ayeke si. Nde na so, ala yeke wa azo ti duti na donzi, mbeni ye so mbi de mbi wara ni lâ oko pëpe na yâ ambeni mbeti so ambeni église nde asû ni. Tour ti Ba ndo na Réveillez-vous! ayeke dë bê ti zo na atënë so aluti biani na ndo ti aye so ayeke tâ tënë, so a gi nda ni nzoni, nga so alingbi biani na aye so ayeke si laso.”

Aye ayeke dä mingi so afa polele so Royaume ti Nzapa ayeke tâ ye na so ayeke sala ngangu kusala laso. A-Témoin ti Jéhovah, na ngia nga na ngangu ti ala kue, ayeke kangbi “Tene-nzoni so ti royaume” na azo so ayeke ndulu na ala na tisango ala ti ga azo so ayeke duti ande na gbe ti Royaume ni (Matthieu 24:14). Beku tongaso anzere na mo? Mo lingbi ti wara adeba nzoni so ayeke ga tongana mo bungbi legeoko na azo so a fa ye na ala nzoni, so ayeke sala ngangu ti duti na fini alingbi na andia ti Royaume ni. Mbeni nzoni ye ni ayeke so mo lingbi ti wara beku ti duti na gbe ti yanga-ti-komande ti Royaume ni na yâ ti fini sese so a mû zendo ni, sese so “mbilimbili ayeke duti na yâ ni.”—2 Pierre 3:13.

[Kete tënë na gbe ni]

[Foto na lembeti 4, 5]

Na 1914, amara abi tele ti ala na yâ mbeni bira so amû sese kue

[Afoto na lembeti 6]

Mungo maboko na amba ti ala so ayeke na yâ ti kpale ayeke fä ti ndoye ti aChrétien

[Foto na lembeti 7]

A-Témoin ti Jéhovah na ndo lê sese kue ayeke wara nzoni na lege ti oko kapa ti fango ye