Atënë so azo ahunda

Ngbanga ti nyen na peko ti so lo londo na popo ti akuâ, Jésus ahunda na Thomas ti ndu lo atâa so lo ke kozo na Marie ti Magdala ti sala tongaso?

Ambeni ngbele Bible akiri peko ti tënë so mo bâ mo tene Jésus atene lani na Marie ti Magdala ti ndu lo pëpe. Na tapande, Bible ti Sango ti Alliance Biblique Universelle 1966 akiri ti lo peko ti atënë ti Jésus so tongaso: “Ndu Mbi pëpe, teti Mbi de Mbi ma na Babâ pëpe.” (Jean 20:17). Ye oko, Tënë ti yanga ti Grec ti giriri so mingi ni a kiri pekoni na “ndu”, aye ti tene “ti gbu ye ngangu, ti hule na tele ti mbeni ye wala zo, ti luti ngangu na tele ti mbeni ye.” Ti tâ tënë ni, a yeke gi senge ndungo zo si Jésus ake lani na Marie ti Magdala ti sala ni pëpe, teti lo zia lege na ambeni wali so ague na dukua ni ti ga ti “gbu gere ti Lo”.​—Matthieu 28:9.

Mingi ti ambeni Bible ti laso tongana Traduction du Monde Nouveau nga na Fini Mbuki amû maboko na e ti hinga tâ nda ti atënë ti Jésus so tongana ala kiri peko ni atene: “Zia ti gbu mbi.” Ngbanga ti nyen Jésus asala mara ti tënë tongaso na Marie ti Magdala so ayeke mbeni zo so ayeke na kota songo na lo?​—Luc 8:1-3.

Peut-être Marie ti Magdala ayeke na mbito so Jésus ayeke ndulu ti zia lo na ti ma na yayu. Na teti lo yeke na kota nzara ti duti na tele ti Seigneur ti lo, lo gbu Jésus ngangu lo zia lege na Lo ti hon pëpe. Ti fa na Marie so lo de lo ga ndulu ti hon pëpe, Jésus atene na Marie ti zia ti gbu lo me ti gue ti tene na adisciple ti lo tënë ti londongo ti lo na popo ti akuâ.​—Jean 20:17.

Ye oko, lisoro so akporo lani na popo ti Jésus na Thomas ayeke ti lo nde. Na ngoi so Jésus asi lani na ambeni disciple, Thomas ayeke ti lo dä pëpe. Na pekoni, Thomas adë kite na ndo londongo ti Jésus na popo ti akuâ, na tenengo so lo lingbi ti mä na bê na ni gi tongana lo bâ kä ti pointe so ayeke na tele ti Jésus na lo yôro maboko ti lo na dû so likongo asala na kate ti lo. Lango miombe na pekoni, Jésus akiri asi na popo ti adisciple. Ti so, Thomas ayeke dä. Tongaso Jésus ahunda na lo ti ndu akä ni.​—Jean 20:24-27.

Tongaso, ti Marie ti Magdala, Jésus aye ti kanga lege na nzara ti bê ti Marie so ayeke na lege ni pëpe ti gbanzi lege na Jésus ti hon; ti Thomas, Jésus ayeke mû lani maboko na lo ti hon ndo ti akite so lo yeke na ni. Na yâ ti aye so use kue, Jésus ayeke tâ na anda ti tënë ti sala ye tongana ti so lo sala.