Atënë so azo ahunda

Atënë ti Etienne na Kusala 7:59 afa so a lingbi asambela ague tâ gi na Jésus?

Kusala 7:59 atene: “Ala bolo Etienne na tênë tongana lo yeke sambela, lo yeke tene, Seigneur Jésus, kamata yingo ti mbi.” Teti so Bible atene Jéhovah ayeke ‘Lo so amä sambela’, atënë ti Etienne so adü ahundango tënë na li ti ambeni zo (Psaume 65:3). Etienne asambela Jésus biani? Tongana a yeke tongaso, a ye ti fa so Jésus ayeke legeoko na Jéhovah?

Fini Mbuki, 2001 atene so Etienne ‘asambela Nzapa’. Tongaso, e lingbi ti hinga ngbanga ti nyen azo mingi ayeda na tënë ti Matthew Henry, wafango tënë na ndo Bible: “Na ndo so Etienne ayeke sambela Christ, a lingbi e nga e sala tongaso.” Ye oko, bango ndo so ayeke tâ na lege ni pëpe. Ngbanga ti nyen?

Buku Atënë ti Barnes na ndo Testament ti Fini (Angl.) afa tâ tënë so: “Tënë Nzapa ayeke na yâ ti akozo mbeti so a sû ni pëpe, na a lingbi fade ti duti na yâ kiringo na peko ti tënë ni nga pëpe. A wara ni lâ oko pëpe na yâ ti [Mbeti ti Nzapa ti giriri so a sû pekoni na maboko].” Tënë “Nzapa” alï na yâ ti versê so tongana nyen? Wagingo nda ti Bible Abiel Abbot Livermore ahiri ni “mbeni tapande so afa tongana nyen atënë ti mabe ti azo asala ngangu na ndo lege so ala kiri peko ti Bible na ayanga ti kodoro nde nde.” Tongaso, mingi ti aBible ti ngoi ti e azi tënë Nzapa na ndo so teti a yeke na lege ni pëpe ti zia ni ge.

Ye oko, ambeni Bible mingi atene so Etienne “asambela” Jésus. Na yâ Traduction du monde nouveau, kete tënë na gbe ti lembeti ni afa so tënë “hiri ndo” aye nga ti tene “ti hunda mungo maboko; ti sambela”. A ye ti fa so Jésus ayeke Nzapa ti Ngangu Ahon Kue? Oko pëpe. Mbeni bakari (Vine’s Expository Dictionary of Old and New Testament Words) afa so tongana a ndu ye so asi ge, tënë ti Grec, e·pi·ka·leʹo, aye ti tene: “Ti hiri ndo, ti hunda mungo maboko; . . . ti gue na tënë ti mo na gbe ti mbeni zo ti komande.” Paul asala kusala na oko tënë so tongana lo tene: “Mbi ye ti gue na ngbanga ni na gbe ti [César].” (Kusala 25:11, FM 01). Tongaso, a yeke na lege ni so mbeni Bible (The New English Bible) atene Etienne “ahiri ndo” na Jésus.

Ye nyen apusu Etienne ti hiri ndo tongaso? Buku ti Kusala 7:55, 56 atene so “Etienne asi na Yingo Vulu, lê ti lo angbâ ti bâ yayu, lo bâ gloire ti Nzapa, na Jésus ayeke luti na koti ti Nzapa.” Ti tâ tënë ni, Etienne ayeke hiri ndo fade na Jéhovah na iri ti Jésus. Me, na bango Jésus so azingo na kuâ na yâ suma, peut-être Etienne abâ ti lo so mbeni ye akanga lege na lo pëpe ti hiri ndo tâ gi na Jésus mveni, na tenengo: “Seigneur Jésus, kamata yingo ti mbi.” Etienne ahinga so a mû na Jésus ngangu ti zingo akuâ (Jean 5:27-29). Ni la, lo yeke hunda Jésus ti bata yingo wala ngangu ti fini ti lo juska na ngoi so Lo yeke zingo lo ti wara fini so alingbi ti kui pëpe na yayu.

Andulu tënë ti Etienne so ayeke mbeni tapande ti fa so a lingbi ti sambela Jésus? Oko pëpe. Kozoni kue, Etienne azia polele kangbi na popo ti Jésus na Jéhovah, teti tondo ni atene so lo bâ Jésus “ayeke luti na koti ti Nzapa.” Nga, mara ti aye tongaso ayeke si lani lakue pëpe. Mbeni oko tapande ni so na yâ ni a sala tënë tâ gi na Jésus mveni ayeke ti bazengele Jean, so lo nga lo sala tënë gi na Jésus na ngoi so lo bâ Lo na yâ suma.​—Apocalypse 22:16, 20.

Atâa so laso a yeke na lege ni teti aChrétien ti tene asambela ti ala kue gi na Jéhovah Nzapa, ala yeke nga na kpengba mabe so Jésus ayeke ‘Londongo ti awakinda na Fini.’ (Jean 11:25). Tongana ti so Etienne asala lani, mabe na yâ ngangu ti Jésus ti zingo adisciple ti lo na kuâ alingbi ti mû maboko na e na angoi ti tara.