Fango tënë ti Saul aga na kengo ndo

A-JUIF so aduti na Damas agi li ti ala na ye ni gbä. Tongana nyen si mbeni zo so ayeke bata na bê kue atënë so aJuif amä na bê na ni a ninga awe alondo ti bele ni? Zo ni ayeke Saul, mbeni koli so ayeke sala lani sana na azo so ayeke fa iri ti Jésus na Jérusalem. Lo ga na Damas ti sala ngangu na adisciple so ayeke na yâ ti gbata ni. Me, fadeso lo mveni ayeke fa so Jésus ayeke Messie, lo so azo abâ lo lani tongana mbeni zo ti kengo ndia, ala ke lo na ala fâ lo na ndo keke na tenengo so lo zonga Nzapa! Li ti Saul ayeke nzoni pëpe?​—Kusala 9:1, 2, 20-22.

Peut-être mbeni tënë ayeke dä ti fa na ndo ni. Ambeni zo so alondo na Jérusalem legeoko na Saul si ala sala voyage ni alingbi biani ti fa ye so asi na lege. Tongana ala si ndulu na Damas, mo ye ti bâ, mbeni lumière so asu ngangu angoro ala, na ala kue atï na sese. Mbeni go asala tënë nga. Na popo ti ala kue, gi Saul oko si ye ti sioni asi na lo. Lo lango na sese na ndo ti lege ni. Tongana lo londo, amba ti lo azo ti tambela ni agbu maboko ti lo ti gue na lo na Damas teti so lo lingbi ti bâ ndo mbeni pëpe.​—Kusala 9:3-8; 26:13, 14.

Wato ti Jésus agbian

Ye nyen asi na Saul na lege ti Damas? Peut-être yongoro tambela ni wala lâ ti midi so asu ngangu mingi asala si lo nze? Teti so ala ye ti hinga so a yeke gi ambeni senge ye si asi lani, awadengo kite ti ngoi ti e atara ti fa aye so asi na Saul: ala tene so lê ti lo avuko si lo yeke bâ ye kirikiri, yingo-ti-hinga ti lo so agi lo mingi asala si lo wara kobela ti li, kota vundu ahon ndo ti lo wala kobela ti makako ayeke ndulu ti bi lo.

Tâ ye so asi ayeke so Jésus Christ asi na Saul na yâ lumière so avuko lê ti lo ti fa na lo biani so ni yeke Messie. Ambeni dessin so azo asala na ndo ye ni afa Saul so ayeke londo na ndo ti mbeni mbarata ti tï. Atâa ye wa asi biani, Bible atene gi na e so lo “tï na sese”. (Kusala 22:6-11). Atâa tingo ti lo na lege ti mitele ayeke tongana nyen, a yeke tâ kete mingi tongana a haka ni na baba ti kota ndo so lo yeke dä kozo na tingo ti lo ti kamene so. Ti fadeso, a lingbi lo hinga so ye so adisciple ti Jésus afa ayeke tâ tënë. Gi oko ye so Saul alingbi ti sala ayeke ti bungbi legeoko na ala. Lo londo fadeso na yâ dutingo kota wato ti atënë so a fa na ndo ti Jésus ti ga mbeni oko ti azo so ayeke fa ni na wâ mingi. Na peko ti so lê ti lo akiri azi si lo wara batême, “ngangu ti Saul awu lâ na lâ, na lo hon mayele ti aJuif so aduti na Damas na lege ti tënë ti lo, teti lo fa na ala Jésus ayeke Christ biani.”​—Kusala 9:22.

Mango tele na lingo ti fâ Paul alï ngu

Na peko ti so lo gbian lege ti lo Saul, so na pekoni a hiri lo Paul, ague na ndo wa? Tongana lo yeke sû mbeti na azo ti Galatie, lo tene: “Mbi gue na sese ti Arabie; na nda ni, mbi kiri na kodoro ti Damas.” (aGalate 1:17). Tënë “Arabie” alingbi ti ndu tambela so lo sala ni na mbeni mbage ti kodoro ti Arabie. Ambeni wagingo nda ti ye atene so peut-être Saul ague na Yando ti Syrie wala na mbeni ndo na yâ royaume ti Nabatène so Arétas IV akomande na ndo ni. Peut-être, Saul ague lani na mbeni ndo so ayeke kpô ti gbu li ti lo na peko ti batême ti lo, legeoko tongana ti Jésus so ague na yando na peko ti batême ti lo.​—Luc 4:1.

Tongana Saul akiri na Damas, “aJuif awa tele ti ala ti fâ [lo]”. (Kusala 9:23). Gouverneur ti Damas so ayeke sala kua na iri ti Gbia Arétas amû yanga ti tene a bata yanga ti gbagba ti kodoro ni si a wara lege ti gbu Saul (2 aCorinthien 11:32). Me na ngoi so awato ayeke mä tele na lingo ti fâ Saul, adisciple ti Jésus aleke ye si lo kpe.

Na popo ti ala so amû maboko na Saul ti kpe, a wara lani Ananias na adisciple so bazengele ni aduti na popo ti ala fade fade na peko ti so lo ga Chrétien (Kusala 9:17-19).a Peut-être ambeni zo so aga wamabe na peko ti fango tënë ti Saul na Damas amû nga maboko na lo, teti buku ti Kusala 9:25 atene: “Adisciple ti lo akamata lo na bï, ala sala si lo zu na tele ti gbagba na yâ ti sakpa.” Tënë “adisciple ti lo” alingbi ti ndu azo so lo fa ye na ala. Atâa ye ni ayeke tongana nyen, peut-être kusala ti lo ti fango tënë so alë lengo akiri atingo wâ na gbe ti kengo ndo so azo ayeke na ni awe na mbage ti lo.

Ye ti manda ni

Na gingo nda ti aye so angoro gbiango lege ti Saul nga na batême ti lo, e bâ polele so lo gi bê ti lo ahon ndo ni pëpe na ndo lege so azo ayeke bâ na lo; nga lo zia lege ni pëpe ngbanga ti so azo ake lo mingi. Ye so ayeke kota mingi na lê ti Saul ayeke kusala ti fango tënë so lo wara.​—Kusala 22:14, 15.

Mo hinga tâ nene ti fango nzo tënë ade ti ninga pëpe? Tongana a yeke tongaso, mo hinga so a lingbi atâ Chrétien kue aduti awafango tënë ti Royaume. A lingbi bê ti mo adö pëpe tongana ngoi na ngoi kusala ti mo aga na kengo ndo (Matthieu 24:9; Luc 21:12; 1 Pierre 2:20). Ye so Saul asala na gbele kengo ndo ayeke tâ mbeni pendere tapande. A-Chrétien so ayeke gbu ngangu na gbele tara na bê ti ala anze pëpe, Nzapa ayeke yeda na ala ande. Jésus atene lani na adisciple ti lo: “Fade amara kue ake i ngbanga ti iri ti Mbi.” Ye oko, lo mû dengo bê so: “Fade i wara fini ti i na lege ti gbu ngangu.”​—Luc 21:17-19.

[Kete tënë na gbe ni]

[Foto na lembeti 28]

Saul ‘atï na sese’ na ngoi so Jésus asi na lo

[Foto na lembeti 29]

Na Damas, a leke tënë na lingo ti fâ Saul, me lo hon yamba