Ngbâ ti wara hingango ye laso nga lakue

ULRICH STRUNZ, mbeni wanganga ti Zamani, asû mbeni molongo ti abuku so iri ni ayeke Lakue maseka (na yanga ti Zamani). Na yâ ti abuku so, lo tene so tarango tele, nzoni kobe na anzoni salango ye alingbi ti sala nzoni mingi na seni nga alingbi ti sala si fini ti zo aninga. Ye oko, lo tene pëpe na awadikongo abuku ti lo so fade ala yeke ngbâ lakue na fini na salango ye alingbi na awango ti lo.

Me, mbeni hingango ye ayeke dä so aga biani na fini ti lakue lakue. Na bango ni na mbeni lege nde, tongana mo yeke fade na fini ti lakue lakue, mo lingbi ti wara nzoni hingango ye teti lakue lakue. Jésus asambela Nzapa, lo tene: “Na so ayeke fini ti lakue lakue: ti hinga Mo, Mo so gi Mo oko ayeke tâ Nzapa, na ti hinga Jésus Christ, Lo so Mo to Lo awe.” (Jean 17:3). Kozoni, zia e fa nda ti tënë “fini ti lakue lakue”, na pekoni e yeke bâ ye wa hingango ye so andu ni nga tongana nyen mo lingbi ti wara ni.

Na lege ti Bible, na yâ ti kete ngoi fade Wasalango ye ayeke gbian sese so ti ga tâ paradis, so ayeke mû lege na zo ti wara ye kue ti duti na fini a ninga. Ti tene Paradis so aga, a hunda ande ti sala mbeni kpengba kusala, tongana ti moa ti lâ ti Noé. Na Matthieu chapitre 24, versê 37 ti si na 39, Jésus ahaka ngoi ti e na ‘lâ ti Noé,’ so azo ni ‘ahinga pëpe tënë’ ti kpale so ala yeke na yâ ni. Ala dengi nga mê ti ala pëpe na tokua ti Noé. Na pekoni, ‘lâ ni so Noé alï na yâ arche’ asi, na moa afuti azo kue so ake ti hinga ye so. Noé na azo kue so ayeke na lo na yâ arche asö kuâ.

Jésus atene so mbeni mara ti ‘lango’ tongaso ayeke ga na ngoi ti e. Ala so ahinga ye so na asala ye alingbi na ni ayeke gi pëpe na beku ti sö kuâ ande, me nga ti ngbâ na fini lakue lakue. Na ndo ni, azo kue so akui si Nzapa angbâ ti dabe lo na ala, fade lo yeke zingo ala na beku ti kui mbeni pëpe (Jean 5:28, 29). Bâ fadeso lege so Jésus afa na atënë use so. Lo tene na Marthe na ndo londongo ti akuâ: “Zo so amä na bê na Mbi, même tongana lo kui, fade lo yeke na fini. Zo so ayeke na fini na lo mä na bê na Mbi, fade lo kui lâ oko pëpe.” Ye kue afa polele so “lâ” ni so ayeke tâ ndulu, so ti tene mo lingbi ti “kui lâ oko pëpe.”​—Jean 11:25-27.

Na pekoni, Jésus ahunda Marthe: “Mo mä [na bê na, NW ] tënë so?” Marthe atene na lo: “Biani, Seigneur.” Tongana fade Jésus ahunda mo oko tënë so, mo yeke tene nyen? Peut-être mo bâ so a yeke ngangu ti mä na bê na mbeni fini so alingbi ti hunzi lâ oko pëpe. Me atâa tënë wa mo tene, kite ayeke pëpe so mo ye ti mä na bê na ni. Tara ti bâ gbâ ti aye so mo lingbi ti manda tongana fade mo “kui lâ oko pëpe”! Tara ti bâ tele ti mo na salango aye so mo ye ti manda na ti sala laso me so ngoi atia mo. Na bâ kete so mo yeke na tele ti afami ti mo so kuâ anzi ândö ala na tïtî mo! Hingango ye wa alingbi ti sala si aye tongaso aga tâ tënë, na tongana nyen si mo lingbi ti wara ni?

E yeke na ngangu ti wara hingango ye so amû fini

Ti wara hingango ye ti Nzapa na ti Christ ahon ngangu ti e? Oko pëpe. Tâ tënë, hingango ye ti Wasalango ye kue ayeke na nda ni pëpe. Ye oko, Jésus ayeke sala lani pëpe tënë ti senda-ye na ndo atongoro wala mbeni ye tongaso tongana lo tingbi ‘hingango ye’ na “fini ti lakue lakue”. A-Proverbe chapitre 2, versê 1 na 5 afa so “tënë” na “komandema” so ayeke na yâ ti Bible ayeke akota ye ti “hinga [na] Nzapa.” Nga, na ndo Jésus, Jean 20:30, 31 atene so aye so a sû na yâ ti Bible alingbi ti mû lege na zo ti “wara fini”.

Tongaso, hingango ye ti Jéhovah na ti Jésus so ayeke na yâ ti Bible alingbi kue ti fa na mo lege ti wara na fini ti lakue lakue. Bible ayeke mbeni buku so ayeke tâ nde. Wasalango ye amû yingo ti lo na azo ti sala ni na mbeni lege so même azo so ahinga mbeti pëpe alingbi ti wara kamême hingango ye so a hunda ti wara na fini ti lakue lakue. Legeoko nga, mbeni zo so ayeke manda ye hio hio na so ayeke na ngoi nga na aye mingi na maboko ti lo alingbi lakue ti manda mbeni fini ye so alondo na yâ Mbeti ti Nzapa. So mo yeke diko mbeti so na maboko ti mo na ndembe so, a fa so mo yeke na ngangu ti manda ye. Me tongana nyen a lingbi mo sala ye na ngangu so?

Na ndo sese kue, aye so asi kozoni afa so tâ nzoni lege ti wara na hingango ye so ayeke ti manda Bible na lege ti mbeni zo so agbu nda ti atënë ni kozo. Legeoko tongana ti so Noé asala ngangu ti fa hingango ye so na azo ti ngoi ti lo, aTémoin ti Jéhovah aye ti ga na da ti mo ti sala lisoro na mo na ndo Bible. Ala lingbi ti mû brochure Ye Wa Nzapa Ahunda na E? wala buku Hingango Ye So Ague na Fini ti Lakue Lakue.a Même tongana mo bâ so a yeke ngangu na mo ti mä na bê na tënë so atene fade abe-ta-zo ‘akui lâ oko pëpe’ na yâ paradis na ndo sese, mo lingbi ti manda ti duti na beku na yâ zendo so na lege ti alisoro na ndo atënë ti Bible so. Ni la, tongana mo ye ti duti na fini ti lakue lakue wala mo ye ti bâ wala a yeke na lege ni ti yeda na ye so mo manda, a lingbi mo sala nyen? A lingbi mo yeda na lege so azi na mo ti manda Bible.

Mandango ye ni ayeke mû ande ngoi oke? Brochure ti alembeti 32 so e fa fade na nduzu ayeke na ayanga ti akodoro ngbangbo mingi, na aye ti manda 16 si ayeke na yâ ni. Tongana mo mû gi ngbonga oko na yâ ti yenga, a yeke mû ande anze mingi pëpe ti manda angbongboro tënë ti Bible so ayeke na yâ ti buku Hingango Ye So Ague na Fini ti Lakue Lakue. Ambeti so amû maboko na gbâ ti azo ti hinga ye mingi na ti kono ndoye ti ala teti Nzapa. Wasalango ye ayeke futa ande ala so andoye lo biani, na mungo na ala fini ti lakue lakue.

Warango hingango ye so amû fini alingbi biani na ngangu ti e, na a yeke ngangu pëpe ti wara ni. A kiri na peko ti Bible kue wala mbage ni na ayanga ti kodoro ahon 2 000. A-Témoin ti Jéhovah na yâ ti akodoro 235 ayeke na ngia ti mû maboko na mo nga ti mû na mo ambeti ti Nzapa ti tene mo kono hingango ye ti mo mingi.

Sala ngangu ti manda Bible

Songo ti mo na Nzapa ayeke mbeni ye so abâ gi mo na Wasalango mo. Gi mo oko si mo lingbi ti bata ni na ti kpengba ni, na gi lo oko si lo lingbi ti mû na mo fini ti lakue lakue. Ni la, a lingbi mo ngbâ ti manda Tënë ti lo. Na warango mbeni zo ti ga na ndo ti mo lakue lakue, a yeke ngangu ande na mo pëpe ti mû mbeni ngoi ti manda ye.

Teti Bible na ambeti kue ti mandango ye so andu ni ayeke mû na e lege ti “hinga Nzapa”, a yeke nzoni mingi ti bata ni nzoni (aProverbe 2:5). Ye so ayeke mû lege na mo ti bata ala teti angu mingi. Tongana mo yeke na yâ mbeni kodoro so ade amaï mingi pëpe, peut-être abuku ayeke mingi pëpe ti tene mo manda ni na ekole, na mandango ye ti mo angbâ gi na ndo aye so mo yeke mä na mo yeke bâ. Na tapande, a yeke tene na Bénin ayanga ti kodoro ahon 50. A yeke ye ti dongo bê pëpe ti bâ azo atene ayanga ti kodoro osio wala oku nzoni, atâa so ala ade ti wara pëpe mbeni buku so a sala na ayanga ti kodoro so. Ngangu ti mo ti manda ye na lege ti mango ndo, bango ndo nga na gbungo li ayeke mbeni matabisi. Ye oko, mo yeke bâ ande so ambeti ayeke mû maboko mingi na yâ mandango ye ti mo.

Atâa place ayeke mingi pëpe na yâ da ti mo, tara ti leke mbeni nzoni place teti Bible na ambeti so andu ni. Bata ni kue na mbeni ndo so mo lingbi ti mû ni hio, nga na mbeni ndo so ambeti ni alingbi ti buba pëpe.

Mandango ye na sewa ti mo

Tongana mo yeke babâ wala mama ti sewa, bê ti mo alingbi ti nzere ti mû maboko na amolenge ti mo ti wara nga oko hingango ye so mo wara. Na yâ akodoro so ade ti maï mingi pëpe, lakue ababâ na mama ayeke fa na amolenge ti ala akode so alingbi ti mû lege na ala ti bata na tele ti ala. A lingbi ti duti aye tongana tongo kobe, gingo keke ti wâ, tongo ngu, fango yaka na salango ngele na gala. So ayeke biani mbeni fango ye so ayeke bata fini ti zo. Me, mingi ti ababâ na mama ayôro pëpe na yâ ti afango ye so hingango ye so ague na zo na fini ti lakue lakue.

Atâa dutingo ti mo ayeke tongana nyen, peut-être mo bâ so mo yeke na ngoi mingi pëpe. Wasalango e ahinga ye so nga. Na ndo tënë ti fango na amolenge alege ti lo, bâ ye so lo tene ândö: “Fade mo fa tënë ni na amolenge ti mo biani, na mo sala tënë ti komandema so, tongana mo yeke duti na da ti mo, tongana mo yeke tambela na lege, tongana mo gue ti lango, na tongana mo londo.” (Deutéronome 6:7). Na bingo bê na ndo atënë so, ngbanga ti nyen mo tara pëpe ti leke mbeni kapa ti fango ye ti mo mveni na tapande ti so ge:

1. “Tongana mo yeke duti na da ti mo”: Sala lisoro lakue na ndo Bible, peut-être yenga oko oko na amolenge ti mo na da, gi tongana ti so peut-être a sala na mo kozo. A-Témoin ti Jéhovah ayeke na ambeti so alingbi teti fango ye na amolenge ti ngu kue.

2. “Tongana mo yeke tambela na lege”: Sala tënë ti Jéhovah na amolenge ti mo na yâ asenge lisoro ti mo na ala, tongana ti so mo yeke sala ti fa na ala ye ti sala na yâ gigi ti ala wala tongana mo yeke mû wango na ala na alege kue so azi na mo.

3. “Tongana mo gue ti lango”: Sambela na amolenge ti mo lakue na bï.

4. “Tongana mo londo”: Asewa mingi awara nzoni na peko ti mandango versê oko ti Bible lakue na ndapelele. A-Témoin ti Jéhovah ayeke mû brochure Gingo nda ti Tënë ti Nzapa lâ oko okob ti sala na ni.

Na yâ akodoro so ade amaï mingi pëpe, mingi ti ababâ na mama ayeke sala ngangu ti tene mbeni oko na popo ti amolenge ti ala ahinga mbeti nzoni. Tongaso, molenge ni alingbi ti bata ande ababâ na mama ni na lâ ti mbakoro ti ala. Ye oko, tongana mo manda Bible na mo mû maboko na amolenge ti mo kue ti sala legeoko nga, fade mo wara hingango ye so ayeke mû lege na mo nga na sewa ti mo kue ti duti na fini ti lakue lakue.

Mbeni lâ ayeke ga ande so fade e hinga ye kue? Ên-ën. Teti so sese ti e angbâ ti sala voyage ti lo na lê ti nduzu, e yeke ngbâ ande gi ti manda ye. Biani, Zo-ti-fa-tene 3:11 atene: “Nzapa asala si ye kue aga pendere na ngoi ti lo. Lo zia ye ti lakue lakue na bê ti azo, me zo alingbi hinga pëpe nda ti kusala so Nzapa asala, a komanse na lâ ti kozoni juska na lâ ti nda ni.” Warango hingango ye ayeke mbeni pendere ye so ayeke hunzi ande lâ oko pëpe.

[Akete tënë na gbe ni]

[Kete tënë na lembeti 5]

“Na so ayeke fini ti lakue lakue: ti hinga [ye]”

[Afoto na lembeti 7]

Mû maboko na sewa ti mo ti ngbâ ti wara hingango ye laso nga lakue