Jéhovah ayeke “zo ti futa ye na ala so agi lo”

“Zo so aga na Nzapa, a yeke ngbanga ti lo ti mä na bê so Nzapa ayeke, na Lo yeke Zo ti futa ye na ala so agi Lo.”​—AHÉBREU 11:6.

MBENI ita-wali so iri ti lo ayeke Barbaraa atene: “A sala fadeso ngu 30 awe la mbi yeke Témoin ti Jéhovah, me mbi bâ tele ti mbi lakue so mbi lingbi na iri ni so pëpe. Atâa so mbi sala kusala ti pionnier teti angu mingi awe fadeso na mbi wara amatabisi mingi na yâ bungbi ti Jéhovah, a changé bibe ti mbi so oko pëpe.” Mbeni ita ni nde so iri ti lo ayeke Keith atene nga mara ti tënë tongaso. Lo tene: “Ngoi na ngoi, mbi bâ tele ti mbi so mbi lingbi oko pëpe, teti awakua ti Jéhovah ayeke ka na anda ti tënë mingi ti duti na ngia, me ti mbi, mbi yeke na ngia pëpe. Ye so asala si mbi bâ so faute ni kue ayeke gi ti mbi, na bibe so akiri asala si mbi nze ahon ndo ni.”

² Awakua ti Jéhovah mingi ti kozo na ti fadeso atiri na mara ti abibe tongaso. A si na mo nga awe ti tiri na abibe tongaso? Peut-être mo yeke bâ so akpale ni ayeke ga gi na ndo ti mo na peko ti tele, me ti tanga ti aita ti mo ti bungbi, ye ni akpa mo bâ mo tene ala yeke ti ala gi na yâ ti ngia, na ala yeke na kpale oko pëpe. Ye so alingbi ti pusu mo ti pensé so Jéhovah aye mo pëpe na mo nga mo kpa ti tene lo bi bê ti lo na ndo ti mo pëpe. Me zia mara ti bibe tongaso aga na li ti mo hio pëpe. Bible adë bê ti e atene: “Bê ti [Jéhovah] anze pëpe tongana Lo bâ vundu ti zo so ayeke na vundu, na Lo ke lo pëpe; Lo honde lê ti Lo na lo nga pëpe; me tongana lo toto na Lo, Lo mä lo.” (Psaume 22:25). Atënë so a fa ge andu Messie, na a mû lege ti hinga so Jéhovah ayeke mä sambela ti awakua ti lo na nga lo yeke hiri deba-nzoni na ndo ti ala.

³ Akpale ti ngoi ti e ayeke sala ngangu na ndo ti azo kue, même na ndo ti awakua ti Jéhovah. E yeke na yâ ti mbeni sese so kota wato ti Jéhovah la akomande ni, so ti tene Satan Zabolo (2 aCorinthien 4:4; 1 Jean 5:19). Satan ayeke gi ti ga na kpale kozoni kue na awakua ti Jéhovah, na Jéhovah ayeke sala mbeni miracle pëpe ti kanga lege si ye oko asi pëpe na azo ti lo (Job 1:7-12; Apocalypse 2:10). Ni la, ti ku na ngoi so Nzapa ayeke zi e biaku na yâ ti aye so, a lingbi ‘bê ti e azia pëpe na yâ ye ti pono’ na ‘e zia ti sambela pëpe’ teti e hinga so Jéhovah ayeke bâ lege ti e (aRomain 12:12). A lingbi e zia lege pëpe na aye so ayeke si na e na yâ sese so ti pusu e ti pensé so Jéhovah Nzapa ti e aye e pëpe.

Atapande ti ambeni wakua ti Nzapa so agbu ngangu giriri

⁴ Awakua ti Jéhovah mingi ti giriri abâ so a yeke ti ala ti gbu ngangu na yâ aye ti pono so asi na ala. Na tapande, Bible atene so “âme ti Anne asui” teti so lo dü lani molenge pëpe, na ti lo a yeke mo bâ mo tene Nzapa agirisa na ndo ti lo (1 Samuel 1:9-11). Na ngoi so Jézabel, sioni wali-gbia ni, ayeke gi peko ti Elie ti fâ lo, Elie asala mbito na lo tene: “A lingbi awe; fadeso, O L’Eternel, Mo kamata fini ti mbi teti mbi yeke nzoni ahon akotara ti mbi pëpe.” (1 aGbia 19:4). Nga, a yeke lani kota vundu so bazengele Paul ayeke na ni teti so lo lingbi pëpe ti sala ye kue mbilimbili la apusu lo ti tene: “Tongana mbi ye ti sala nzoni, sioni ayeke na mbi.” Lo tene nga: “Mbi yeke zo ti vundu mingi!”​—aRomain 7:21-24.

⁵ Biani, e hinga so Anne, Elie na Paul agbu ngangu na gbele atara ti ala na ngoi so lani ala yeke sala na Jéhovah, na Jéhovah ahiri deba-nzoni mingi na ndo ti ala (1 Samuel 1:20; 2:21; 1 aGbia 19:5-18; 2 Timothée 4:8). Ye oko, abibe kirikiri aga lani na li ti ala, aye tongana mawa, vundu na mbito. Tongana ngoi na ngoi, abibe tongaso ayeke ga na li ti e, a lingbi ye so adö bê ti e pëpe. Me nyen la mo lingbi ti sala tongana agingo bê ni atara ti sala si mo yeke hunda tele ti mo wala biani Jéhovah andoye mo? Mbeti ti Nzapa alingbi ti dë bê ti mo. Na tapande, na yâ ti article so ahon, e hasa yâ ti atënë ti Jésus so atene Jéhovah ‘adiko kuä ti li ti e’. (Matthieu 10:30). Atënë so adë bê biani, na a fa so Jéhovah ayeke bi bê ti lo mingi na ndo ti awakua ti lo oko oko. Dabe mo nga na tapande ti anzêrë so Jésus amû. Tongana mbeni oko alingbi ti tï na sese pëpe sân ti tene Jéhovah abâ lo, fade Jéhovah ayeke kanga lê ti lo na gbele akpale so e yeke na ni tongana nyen?

⁶ Teti so a dü e gi na yâ ti siokpari, Jéhovah Nzapa so ayeke na ngangu kue alingbi biani ti bâ e na nene ni na lê ti lo la? Kiringo tënë ni ayeke ên! Aversê mingi ayeke dä na yâ ti Bible so amû lege na e ti tene tongaso. Tongana e bâ tënë ti yâ ti aversê so, a yeke pusu e ti tene oko tënë so mbeni wasungo psaume atene: “Tongana bibe ayeke mingi na bê ti mbi, Tënë ti Mo so alungula vundu amû ngia na âme ti mbi.” (Psaume 94:19). Zia e bâ ambeni oko oko na popo ti aversê so. Fade ala yeke dë bê ti e ti bâ so Nzapa aye e mingi, na fade lo yeke hiri deba nzoni na ndo ti e tongana e ngbâ ti sala ye so bê ti lo aye.

‘Mosoro ti Jéhovah mveni’

⁷ Na popo ti ngu 500 ti kiri na ngu 400 kozoni na ngoi ti e, dutingo ti aJuif amû lani vundu mingi na Nzapa. Mo yeke bâ aprêtre so ayeda na azo ti ga na anyama so mbeni mbage ti tele ti ala abuba ti tene a mû ni na sandaga na ndo balaga ti Jéhovah. Ajuge ni ayeke fâ ngbanga na lege ni pëpe. Likundu, mvene, nzi na lango-sioni ahon ndo ni (Malachie 1:8; 2:9; 3:5). A yeke na azo ti kirikiri ti Israël so la si Malachie afa tënë ti mbeni prophétie so apika bê mingi. Lo tene so ngoi ayeke ga ande so fade Jéhovah ayeke mû lege na awakua ti lo ti kiri ti wara nzoni songo na lo. Prophétie ni atene: “Fade ala yeke ti Mbi, L’Eternel Ti Sabaoth atene, même mosoro ti Mbi mveni na lâ ni so Mbi leke; na fade Mbi sala be-nzoni na ala, legeoko tongana babâ asala be-nzoni na molenge ti lo mveni so asala kusala ti lo.”​—Malachie 3:17.

⁸ Prophétie ti Malachie aga tâ tënë nga na ngoi ti e na ndo ti aChrétien so a sa yingo na ndo ti ala ti ga mbeni mara na lege ti yingo so abungbi azo 144 000. Azo ti mara so ayeke biani mbeni “mosoro” ti Jéhovah, “azo ti Lo mveni”. (1 Pierre 2:9). Prophétie ti Malachie so alingbi nga ti dë bê ti “azo mingi so asi singo” so ayeke “luti na gbele trône, na gbele Molenge ti Ngasangbaga . . . [na] vulu bongo”. (Apocalypse 7:4, 9). Ala na aChrétien so a sa yingo na ndo ti ala abungbi kue ti duti gi kundu oko na gbe ti Berger oko, Jésus Christ.​—Jean 10:16.

⁹ Ti ala so asoro ti sala na Jéhovah, Jéhovah ayeke bâ ala tongana nyen? Malachie 3:17 afa so bango ndo so lo yeke na ni na ndo ti ala ayeke tongana ti mbeni babâ na ndo ti molenge ti lo so lo ye lo mingi. Nga, bâ apendere tënë so lo sala na kusala ti sala tënë ti azo ti lo; lo hiri ala “mosoro ti Mbi mveni”. Ambeni Bible atene so Jéhovah afa ala tongana ‘tâ ye ti lo mveni’, ‘ye ti lo ti ngele ngangu’. Ngbanga ti nyen Jéhovah abâ tongana ye ti mosoro ti lo ala so ayeke sala na lo? Mbeni oko nda ti tënë ni ayeke so lo yeke mbeni Nzapa so ayeke ndulu ti gonda awakua ti lo teti kusala ti ala (aHébreu 6:10). Ala kue so ayeke sala na lo na bê ti ala kue, lo yeke ga ndulu na ala na lo yeke bâ ala tongana ye ti mosoro ti lo.

¹⁰ Tara ti pensé na mbeni ye so ayeke ti mo, so mo bâ ni tongana mbeni ye ti mosoro. Fade mo yeke sala kue ti bata ni nzoni pëpe? Na a yeke ye so Jéhovah ayeke sala nga teti ye ti “mosoro” ti lo. Tâ tënë, lo yeke kanga lege pëpe na akpale kue ti si na azo ti lo (Zo-ti-fa-tene 9:11). Me Jéhovah alingbi ti bata awakua ti lo na gbele aye so agi ti buba songo ti ala na lo, na a yeke ye so lo yeke sala ande. Lo yeke mû na ala ngangu so ala yeke na bezoin ni ti gbu ngangu na gbele atara kue (1 aCorinthien 10:13). Ndani la, Moïse atene tënë so na azo ti Israël giriri: “Mo gbu ngangu, na bê ti mo akpengba dä, . . . L’Eternel Nzapa ti mo, Lo so ayeke gue na mo, fade Lo zia ti sala na mo pëpe, na Lo zia mo pëpe.” (Deutéronome 31:6). Jéhovah ayeke ndulu ti futa aye ti nzoni na awakua ti lo, teti na lê ti lo, ala yeke ye ti “mosoro”.

Jéhovah ayeke “Zo ti futa ye” na azo ti lo

¹¹ Mbeni ye so afa so Jéhovah abâ na nene ni mingi awakua ti lo ayeke so lo yeke futa ala na aye ti nzoni. Lo tene lani tënë so na azo ti Israël: “I ga na dîme kue na yâ da ti batango mosoro, si kobe ayeke na da ti Mbi; i tara Mbi na ye so fadeso, L’Eternel Ti Sabaoth atene, ti bâ tongana Mbi lungula fenêtre ti yayu na i pëpe, na Mbi sa na ndo i ye ti nzoni so ndo alingbi na ni pëpe.” (Malachie 3:10). Na nda ni, fade Jéhovah ayeke mû fini ti lakue lakue na awakua ti lo (Jean 5:24; Apocalypse 21:4). Kota matabisi ti fini ti lakue lakue so afa na gigi tâ kota ti ndoye ti Jéhovah nga na ti bibe ti lo ti duti ndulu ti mû ye na awakua ti lo. A fa nga so lo bâ na nene ni mingi ala so asoro ti sala na lo. Tongana e gi ti bâ Jéhovah tongana Zo so ayeke ndulu ti futa ye na azo ti lo, a yeke mû maboko na e ti zi na yâ li ti e kite kue so e yeke na ni na ndo lege so Nzapa ayeke bâ na e. Biani, Jéhovah awa e ti bâ lo tongana Zo so afuta ye na awakua ti lo. Paul asû na mbeti: “Zo so aga na Nzapa, a yeke ngbanga ti lo ti mä na bê so Nzapa ayeke, na Lo yeke Zo ti futa ye na ala so agi Lo.”​—aHébreu 11:6.

¹² Tâ tënë, a yeke ndoye so e yeke na ni teti Jéhovah la apusu e ti sala na lo, me pëpe gi ngbanga ti so lo mû zendo ti mû ye ti nzoni na e. Ye oko, a yeke sioni pëpe ti zia bê ti e kue na ndo ti zendo ti lo ti mû ye ti nzoni na e (aColossien 3:23, 24). Teti so Jéhovah andoye azo so ayeke gi lo na bê kue nga lo bâ ala na ngele mingi na lê ti lo, lo mû li ni ti futa ye na ala.

¹³ Kota ye so amû lege na e ti bâ so azo alingbi ti duti na ngele mingi na lê ti Jéhovah ayeke so Jéhovah amû Molenge ti lo tongana matabisi ti zi na e. Bazengele Jean asû tënë so na mbeti: “Nzapa andoye sese so tongaso, Lo mû Molenge ti Lo ngengele oko, si zo so amä na bê na Lo alingbi kui pëpe, me lo yeke na fini ti lakue lakue.” (Jean 3:16). Fini ti Jésus Christ so a mû ni tongana matabisi ti zi na e afâ tâ polele na gigi so bibe ti tenengo so e yeke ye oko pëpe na lê ti Jéhovah ayeke gi wataka, teti tongana fade Jéhovah andoye e mingi pëpe, ka lo yeke yeda ti futa mara ti kota ngele tongaso teti e?

¹⁴ Na lege ti atënë so e bâ so, tongana a si so asioni bibe aye ti ga na li ti mo ti pusu mo ti pensé so mo yeke ye oko pëpe, gbu li ti mo na ndo ti fini ti Jésus so lo mû ni tongana matabisi ti zi na e. Bâ matabisi so mo bâ mo tene a yeke na mo mveni la si Jéhovah amû ni. A yeke lani ye so bazengele Paul asala giriri. Dabe ti mo so lo tene lani tënë so: “Mbi yeke zo ti vundu mingi!” Me na pekoni, lo tene: “Mbi mû merci na Nzapa, na lege ti Jésus Christ Seigneur ti e” so ‘andoye mbi na Lo mû lo mveni na kui teti mbi.’ (aRomain 7:24, 25; aGalate 2:20). Na tenengo tongaso, Paul agi ti gboto lê ti azo na ndo ti lo pëpe. Lo ye gi ti fa so lo yeke na beku so Jéhovah abâ tâ lo na ngele mingi. Legeoko na Paul, mo nga kue a lingbi mo manda ti bâ matabisi ti sandaga ti Christ tongana mbeni matabisi so Nzapa amû teti mo. Jéhovah ayeke pëpe gi mbeni Sauveur ti ngangu; lo yeke nga Zo so ayeke futa awakua ti lo teti so lo ndoye ala.

Sala hange na “mayele” ti Satan

¹⁵ Me a lingbi ti si so mo ngbâ lakue ti bâ so a yeke ngangu na mo ti yeda so atënë ti dengo bê so a wara ni na yâ Mbeti ti Nzapa andu mo biani. Peut-être mo lingbi ti tene so matabisi ti dutingo na fini ti lakue lakue na yâ fini sese ti Nzapa ayeke mbeni ye so ambeni zo la alingbi ti wara me mo, mo lingbi ti mo na ni oko pëpe. Tongana mara ti bibe tongaso aga na li ti mo, nyen la mo lingbi ti sala?

¹⁶ Peut-être mo hinga nzoni mingi wango ti Paul so na azo ti Ephèse: “I yü ye ti bira ti Nzapa kue, si i lingbi luti ti ke mayele ti zabolo.” (aEphésien 6:11). Tongana e pensé na amayele ti Satan, peut-être akozo ye so aga na li ti e hio ayeke aye tongana gingo ti wara mosoro mingi wala tënë ti pitan. Tâ tënë, aye so ayeke lani ambeni mayele ti Satan so awakua ti Jéhovah mingi ti giriri nga na ti laso atï na yâ ni. Ye oko, mbeni mayele ni nde ayeke nga dä so a lingbi e girisa ni pëpe; a yeke so Satan ayeke sala ngangu ti pusu e ti pensé so Jéhovah Nzapa aye ti lo e oko pëpe.

¹⁷ Zabolo ahinga nzoni mingi ti sala kusala na mara ti abibe tongaso ti gboto azo yongoro na Nzapa. Dabe mo na tënë so Bildad atene na Job: “Na lege nyen a diko zo zo ti mbilimbili na gbele Nzapa? Wala, na lege nyen bê ti zo so wali adü lo alingbi vulu? Bâ, même nze asu mingi pëpe, na lê ti Lo atongoro avulu kue pëpe. Tongaso na lê ti Lo, zo ayeke gi ngusu senge! Na molenge ti zo ayeke gi pambo” wala ver so ahara na sese (Job 25:4-6; Jean 8:44). Biani, mara ti atënë tongaso alingbi gi ti woko bio ti zo. Ni la, zia lege na Satan ti woko mo pëpe. Nga, sala hange na amayele ti Satan si mo duti na mbito pëpe nga na ngangu ti tiri ti sala ye so ayeke mbilimbili (2 aCorinthien 2:11). Âdu ti Job, atâa so Jéhovah azingo na lo teti ambeni bango ndo so lo wara, na nda ni Lo futa lo na mungo na lo lege use ye kue so lo girisa ni kozo. Lo sala tongaso na Job teti so Job agbu ngangu na gbele atara ti lo.​—Job 42:10.

Jéhovah “ayeke kota ahon bê ti e”

¹⁸ Ti tâ tënë ni, tongana asioni bibe tongaso alï ngangu mingi awe na yâ ti li ti e, a lingbi ti duti ngangu mingi ti zi ni. Me yingo vulu ti Jéhovah alingbi ti mû maboko na mo yeke yeke ti kinda mara ti abibe tongaso so ayeke tongana “gbada ti bira” so “ayä ala mveni ti ke tënë ti hingango Nzapa”. (2 aCorinthien 10:4, 5). Tongana asioni bibe aye ti hon ndo ti mo, gbu li na ndo atënë ti bazengele Jean so: “Na lege so e hinga e yeke ti tene-biani, na e sala si bê ti e aduti nzoni na gbele Lo, teti tongana bê ti e afâ ngbanga na li ti e, Nzapa ayeke kota ahon bê ti e, na Lo hinga ye kue.”​—1 Jean 3:19, 20.

¹⁹ Tongana a tene so “Nzapa ayeke kota ahon bê ti e”, a ye ti tene nyen? Ngoi na ngoi, bê ti e alingbi ti fâ ngbanga na ndo ti e, mbilimbili tongana awokongo ti e asala si e bâ tele ti e so e yeke mbeni ye pëpe. Wala peut-être aye so asi na e kozo na yâ fini ti e asala si bê ti e atara ti pusu e ti pensé so e yeke ye oko pëpe mo bâ mo tene Jéhovah alingbi ti yeda pëpe na ye kue so e lingbi ti sala teti lo. Me atënë ti bazengele Jean adë bê ti e: Jéhovah ayeke kota ahon bê ti e. Lo yeke luti pëpe na ndo ti awokongo ti e, me lo yeke bâ ye so e lingbi ti sala biani. Lo hinga nga aye so ayeke na bê ti e, so apusu e ti sala ambeni ye nga lo hinga aye so e ye ti sala. David asû tënë so na mbeti: “Lo hinga tele ti e, Lo dabe Lo na lege so e yeke pupu-sese.” (Psaume 103:14). Biani, Jéhovah ahinga e nzoni mingi ahon e mveni.

“Couronne ti pendere” na “diadème ti gbia”

²⁰ Na lege ti prophète Esaïe, Jéhovah amû lani zendo na azo ti lo so fade ala yeke kiri na sese ti ala. Na ngoi so ala yeke duti na ngbâa na Babylone, zendo so ayeke dë bê ti ala ande alingbi na ni. Tongana lo yeke bâ na li kiringo ti ala ande na sese ti ala, Jéhovah atene: “Fade mo ga couronne ti pendere na tïtî L’Eternel, na diadème ti gbia na tïtî Nzapa ti mo.” (Esaïe 62:3). Na lege ti atënë so, Jéhovah afa so lo ne azo ti lo mingi na lo bâ ala pendere mingi na lê ti lo. A yeke ye so lo sala nga teti Israël ti yingo ti ngoi ti e. A yeke mo bâ mo tene lo yä ala na nduzu si azo kue alingbi ti bâ ala.

²¹ Atâa so gango tâ tënë ti prophétie so andu kozoni kue ala so a sa yingo na ndo ti ala, a fa nga lege so Jéhovah ayeke ne na ala kue so asala na lo. Ni la, tongana mo yeke na kite na ndo ti mo mveni mingi, dabe mo so atâa so mo yeke sala ye kue mbilimbili pëpe, Jéhovah alingbi ti bâ mo na ngele mingi tongana “couronne ti pendere” nga na “diadème ti gbia”. Tongaso, ngbâ ti zia ngia na bê ti lo na salango ye kue so lo hunda na mo ti sala (aProverbe 27:11). Na salango tongaso, mo lingbi ti duti na beku so biani Jéhovah ayeke futa mo teti so mo gbu ngangu.

[Kete tënë na gbe ni]

Mo dabe ti mo?

• Na lege wa e yeke mbeni “mosoro” na lê ti Jéhovah?

• Ngbanga ti nyen a yeke kota ye mingi ti bâ Jéhovah tongana Zo ti futa ye na azo ti lo?

• A lingbi e sala hange na “mayele” wa ti Satan?

• Nzapa ayeke “kota ahon bê ti e” na lege wa?

[Ahundango tënë ti manda na ye]

1, 2. Ngbanga ti nyen ambeni wakua ti Jéhovah ayeke bâ tele ti ala so ala lingbi pëpe?

3. Ngbanga ti nyen akpale ti fadeso ayeke si nga na e?

4. Mû tapande ti ambeni wakua ti Jéhovah ti giriri so agbu ngangu na yâ pono so asi na ala.

5. (a) Anne, Elie na Paul awara futa ti nzoni wa? (b) Tongana e yeke na ambeni bibe so ayeke sala si e duti nzoni pëpe, Mbeti ti Nzapa alingbi ti dë bê ti e tongana nyen?

6. Tongana nyen Bible alingbi ti dë bê ti ala so abâ atene Jéhovah aye ala pëpe?

7. Kpengba prophétie wa Jéhovah apusu lani Malachie ti tene ni na azo ti mara ti lo so ague yongoro na lo?

8. Ngbanga ti nyen Malachie 3:17 andu nga “azo mingi so asi singo”?

9. Ngbanga ti nyen Jéhovah abâ azo ti lo tongana “mosoro” ti lo?

10. Jéhovah ayeke bata azo ti lo na gbele akpale wa?

11, 12. Tongana e gi ti gbu li ti e na ndo ti kusala ti Jéhovah tongana Zo ti futa ye na awakua ti lo, a yeke mû maboko na e tongana nyen ti hon ndo ti asioni bibe ti kite so e yeke na ni?

13. Ngbanga ti nyen fini ti Molenge ti Nzapa so a mû ni tongana matabisi ti zi na e ayeke tâ kota fä kue ti ndoye so Jéhovah ayeke na ni teti e?

14. Fa tongana nyen Paul abâ lani sandaga ti Jésus.

15-17. (a) Tongana e bâ tele ti e so e yeke ye oko pëpe, Zabolo ayeke sala kusala na ni tongana nyen? (b) Ye ti nzoni wa e lingbi ti wara na lege ti ye so asi na Job?

18, 19. Na lege wa Nzapa ayeke “kota ahon bê ti e”? Lo “hinga ye kue” ni tongana nyen?

20. Prophétie ti Esaïe afa so Jéhovah ayeke bâ awakua ti lo tongana nyen?

21. Nyen la alingbi ti mû maboko na mo ti duti na beku so biani Jéhovah ayeke futa mo teti so mo gbu ngangu?

[Foto na lembeti 26]

Paul

[Foto na lembeti 26]

Elie

[Foto na lembeti 26]

Anne

[Foto na lembeti 28]

Na yâ Bible, a yeke wara gbâ ti atënë so adë bê