Kpe abango ndo so ayeke na lege ni pëpe!

NA NGOI so Job ayeke na yâ ti vundu, akamarade ti lo ota Eliphaz, Bildad nga na Tsophar ague lani ti bâ lo ti kangbi vundu ni na lo nga ti dë bê ti lo (Job 2:11). Na popo ti ala ota so, Eliphaz si ayeke lo so ala kpe lo na so peut-être ngu ti lo ayeke mingi ahon ti atanga ni. Lo yeke lani kozo zo ti mû tënë nga lo yeke na atënë mingi ti tene. Na yâ ti adiskur ota so lo mû, Eliphaz afa so lo yeke na mara ti bango ndo wa?

Tongana lo dabe ti lo na mbeni ye ti kpene so asi na lo, Eliphaz atene: “Mbeni yingo ahon na gbele mbi; kuä ti tele ti mbi alondo. Yingo ni aluti kpô, me mbi lingbi bâ lo mbilimbili pëpe, ye tongana tele ayeke na gbele mbi; ndo akaï, na mbi mä yanga so atene [tënë].” (Job 4:15, 16). Yingo wa si asala ngangu na ndo bango ndo ti Eliphaz? Asioni tënë so lo tene na pekoni afa so yingo ni so ayeke lani mbeni nzoni ange ti Nzapa pëpe (Job 4:17, 18). A yeke mbeni sioni ange. A yeke biani tongaso ngbanga ti so na pekoni, Jéhovah azingo na Eliphaz nga na akamarade ti lo use ndali ti so ala tene amvene (Job 42:7). Biani, Eliphaz ayeke lani na gbe ti ngangu ti ayingo sioni. Atënë ti lo afa so bango ndo ti lo ayeke nde na ti Nzapa.

Aye wa e lingbi ti bâ na yâ ti atënë ti Eliphaz? Ngbanga ti nyen a yeke kota ye ti kpe abango ndo so ayeke na lege ni pëpe? E lingbi ti sala nyen ti ke ni?

“Lo zia bê ti Lo na aboi ti Lo pëpe”

Na yâ ti adiskur ota kue so lo mû ni, Eliphaz atene so Nzapa ayeke komande na ngangu, na aye so awakua ti lo ayeke sala alingbi na lê ti lo pëpe. Eliphaz atene na Job: “Bâ, Lo zia bê ti Lo na aboi ti Lo pëpe, na Lo wara tënë kirikiri na li ti a-ange ti Lo.” (Job 4:18). Na pekoni, na ndo Nzapa, Eliphaz atene: “Bâ, Nzapa azia bê ti Lo pëpe na azo ti Lo ti be-vulu, biani, na lê ti Lo ayayu avulu kue pëpe.” (Job 15:15). Nga lo hunda tënë so: “Lo Ti Ngangu Ahon Kue awara ngia teti mo yeke mbilimbili?” (Job 22:3). Bildad ayeda lani na bango ndo ti Eliphaz so, teti lo tene: “Même nze asu mingi pëpe, na lê ti [Nzapa] atongoro avulu kue pëpe.”​—Job 25:5.

A lingbi e sala hange si e wara mara ti bango ndo tongaso pëpe. Ngbanga ti so mara bango ndo tongaso alingbi ti gue na e ti bâ so Nzapa ayeke hunda ye mingi na e. Mara bango ndo ni so ayeke sala ye biani na ndo songo ti e na Jéhovah. Nga, tongana e yeda na mara bango ndo tongaso, salango ye ti e ayeke duti ande tongana nyen na ngoi so a suku na e? Ahon ti tene, na bê-ti-molenge, e yeda so a suku na e, ‘bê ti e ayeke so na L’Eternel.’ (aProverbe 19:3). Ye so alingbi biani ti buba songo ti e na Nzapa.

“Nzapa alingbi wara ye na lege ti zo?”

Tënë so a tene Nzapa ayeke komande na ngangu ague biani oko na bibe so a tene Nzapa ayeke bâ azo gi ye senge na lê ti lo. Na yâ ota diskur ti Eliphaz hundango tënë so asigigi dä: “Nzapa alingbi wara ye na lege ti zo? Pëpe, zo ti ndara awara ye teti lo mveni.” (Job 22:2). Ge Eliphaz aye ti tene so na lê ti Nzapa zo ayeke ye oko pëpe. Bildad nga atene tongaso, lo tene: “Na lege nyen a diko zo zo ti mbilimbili na gbele Nzapa? Wala, na lege nyen bê ti zo so wali adü lo alingbi vulu?” (Job 25:4). Ti ala, Job so ayeke gi senge zo, lo lingbi pëpe ti tene so lo yeke mbilimbili na lê ti Nzapa.

Laso ambeni zo abâ tele ti ala so ala yeke ye oko pëpe. Aye so ayeke na gunda ti bango ndo ni so ayeke aye tongana sewa so ala kono na yâ ni, agingo bê so gigi aga na ni nga na tënë ti mara. Me mbeni ye ni ayeke so Satan na ayingo sioni ti lo ayeke sala kusala na amara ti bibe so ti sala si zo awoko kue. Tongana ala wara lege ti gue na zo ni ti bâ so ye kue so lo yeke sala alingbi pëpe na lê ti Nzapa ti Ngangu Ahon Kue, a yeke ngangu pëpe ti tene bê ti zo ni awoko kue. Na tongana ngoi ayeke hon, zo ni alingbi ti gue yongoro na Nzapa so ayeke na fini.​—aHébreu 2:1; 3:12.

Gango mbakoro nga na tënë ti kobela ayeke sala si e lingbi pëpe ti sala aye kue so e ye. Peut-être e yeke tene so ye so e yeke sala fadeso na yâ kusala ti Jéhovah ayeke kete mingi tongana e haka ni na ye so e sala lani na ngoi so e ngbâ maseka, so e yeke na nzoni tele nga na ngangu. A yeke kota ye biani ti hinga so Satan na ayingo sioni ti lo aye ti sala si e bâ so ye so e yeke sala alingbi pëpe na lê ti Nzapa. A lingbi e ke mara ti bango ndo so, so ayeke na lege ni pëpe so.

Tongana nyen ti ke mara ti abango ndo tongaso?

Atâa apasi so Satan Zabolo asala lani na Job, Job atene: “Fade mbi zia mbilimbili ti mbi pëpe juska mbi kui.” (Job 27:5). Ndali ti so lo ndoye Nzapa, atâa nyen na nyen la asi, Job aleke lani na bê ti lo ti ngbâ be-ta-zo. Nga lo ye ti zia lege na mbeni ye pëpe ti changé tënë ti bê ti lo so. So ayeke kota ye so alingbi ti mû lege na e ti ke abango ndo so ayeke na lege ni pëpe. A lingbi e hinga kota ti ndoye ti Nzapa na mbage ti e na e bâ ni na nene ni. A lingbi e ngbâ lakue ti ndoye Nzapa mingi ahon ti kozo. A yeke na lege ti mandango Mbeti ti Nzapa lakue nga gbungo li na ndo ni na yâ sambela si e yeke ga ti ndoye Nzapa.

Na tapande, Jean 3:16 atene: “Nzapa andoye sese so tongaso, Lo mû Molenge ti Lo ngengele oko.” Jéhovah andoye azo mingi, na a sala ngoi mingi awe so salango ye ti lo na mbage ti azo afa na gigi so lo yeke na ndoye ni so. Ti gbu li na ndo ti atapande ti ye so lo sala giriri alingbi ti pusu e ti bâ Jéhovah na nene ni nga ti ndoye lo mingi ahon ti kozo. Salango tongaso ayeke mû maboko na e ti ke abango ndo so ayeke na lege ni pëpe.

Bâ lege so Jéhovah asala ye lani na mbage ti Abraham na ngoi so futingo ti Sodome na Gomorrhe aga ndulu. Abraham ahunda lani Jéhovah fani miombe ti bâ tongana nyen Jéhovah ayeke fâ ngbanga ni. Jéhovah asala lani ngonzo wala bê ti lo aso oko pëpe na atënë so Abraham ahunda ni na lo. Nde na so, akiringo tënë ti lo asala si Abraham aduti lani na beku nga bê ti lo adê (Genèse 18:22-33). Na pekoni Nzapa asigigi na sewa ti Lot na Sodome. Nzapa ahunda na lo ti kpe ti gue na yâ ti ahoto. Me Lot ahunda lani na Jéhovah ti zia lo ti gue na mbeni gbata so ayo mingi pëpe na Sodome. Jéhovah atene: “Bâ, mbi yeda na ye so nga, na fade mbi kinda kodoro so pëpe, so mo sala tënë ni.” (Genèse 19:18-22). Lege so Jéhovah asala na ye ge afa so lo yeke mbeni zo so ahunda ye ahon ndo ni? Lo yeke na ndoye pëpe na lo yeke komande na ngangu? Oko pëpe. Salango ye ti lo ge afa so lo yeke komande na ndoye, na nzobe, na be-nzoni nga lo yeke mä azo.

Tapande ti azo ti Israël ti giriri tongana Aaron, David na Manassé afa so a yeke na lege ni pëpe ti tene so Nzapa ayeke zo so kua ti lo ayeke ti bâ gi sioni ti zo. A fa nga so a yeke na lege ni pëpe ti tene so ye kue so e sala alingbi na lê ti lo pëpe. Aaron asala lani akota siokpari ota. Lo leke lani molenge ti bagara ti lor, lo na Miriam abungbi yanga ti ala ti kasa Moïse, nga na hoto ti Meriba lo sala pëpe si iri ti Nzapa aga nzoni-kue na lo yekia Nzapa pëpe. Ye oko, Jéhovah abâ lani anzoni salango ye ti lo na Jéhovah azia lege na lo ti ngbâ ti sala kusala ti lo ti kota prêtre juska lo kui na yâ ni.​—Exode 32:3, 4; Nombre 12:1, 2; 20:9-13.

Gbia David asala lani akota siokpari na ngoi ti komandema ti lo. Asiokpari ni so ayeke aye tongana lango-sioni, fango mbeni zo so tënë ayeke na li ti lo pëpe nga lo diko wungo ti azo ti kodoro ni kue, ye so Ndia ahunda na lo ti sala ni pëpe. Ye oko, Jéhovah abâ lani so David agbian bê ti lo, na Jéhovah abata mbele so andu tënë ti Royaume ni. Ni la Jéhovah azia lani lege na lo ti sala kusala ti gbia juska lo kui na yanga ni.​—2 Samuel 12:9; 1 Chronique 21:1-7.

Manassé, gbia ti Juda, aleke lani abalaga na Baal. Lo sala si amolenge ti lo ahon na yâ wâ, lo maï salango aye ti yorö nga lo leke na yâ ti gbagba ti temple abalaga na anzapa ti wataka. Ye oko, na peko ti so lo gbian bê ti lo biani, Jéhovah apardone lo, Jéhovah azi lo na ngbâa na lo kiri na lo na ndo mbata ti lo ti gbia (2 Chronique 33:1-13). Tongana zo oko alingbi na lê ti lo pëpe, ka Nzapa alingbi lani ti sala aye so kue? Oko pëpe!

Satan ayeke zo so tënë ni ayeke na li ti lo

Satan atene so Jéhovah ayeke mbeni zo so ahunda ye ahon ndo ni na lo yeke komande na ngangu. Ti tâ tënë ni, a yeke Satan mveni si ayeke sala aye ni so. A lingbi ti bâ salango ye ti Satan so polele na lege so a yeke mû lani amolenge na sandaga na anzapa ti wataka giriri. Azo ti Israël so ake Nzapa ayeke zö lani amolenge ti ala na wâ, mbeni ye so Jéhovah apensé na ni nga oko pëpe.​—Jérémie 7:31.

A yeke Satan si kua ti lo ayeke ti bâ gi sioni ti zo me a yeke Jéhovah pëpe. Apocalypse 12:10 asala tënë ti Satan tongana lo so “aklame aita ti e . . . na gbele Nzapa lâ na bï.” Nde na so, na ndo Jéhovah, wasungo psaume ahe lani bia so: “O L’Eternel, tongana Mo bata tënë ti sioye, O Seigneur, ka zo nyen alingbi ti ngbâ? Me pardon ayeke na Mo.”​—Psaume 130:3, 4.

Ngoi so abango ndo so ayeke na lege ni pëpe ayeke hon biaku

So tâ dengo bê si a-ange awara ni lani na ngoi so a tomba Satan Zabolo nga na ayingo sioni ti lo na yayu! (Apocalypse 12:7-9). Na peko ti so a tomba ala na yayu awe, ayingo sioni so alingbi mbeni pëpe ti sala mbeni ye na ndo bungbi ti a-ange ti Jéhovah so ayeke na yayu.​—Daniel 10:13.

Na yâ ngoi kete, fade azo ti sese kue ayeke duti na ngia. Fade mbeni ange ayeke londo na yayu, ti zu, na clé ti bukulugbu-ti-bingo nga na mbeni kota zingiri na maboko ti lo. Ange ni so ayeke gbu kota ngbo ni legeoko na ayingo sioni ti lo, lo yeke kanga ala na lo yeke bi ala na yâ bukulugbu-ti-bingo (Apocalypse 20:1-3). So tâ dengo bê si e yeke wara ni ande!

Ti ku na ngoi ni so, a lingbi e kpe abango ndo so ayeke na lege ni pëpe. Tongana e bâ so abango ndo so ayeke na lege ni pëpe aga na li ti e, a lingbi e ke ni. Ti sala tongaso, a lingbi e bi bê ti e na ndo ndoye so Jéhovah ayeke na ni na mbage ti e. Tongaso, ‘fade siriri ti Nzapa so ahon bibe kue abata bê ti e na abata bibe ti e’.​—aPhilippien 4:6, 7.

[Foto na lembeti 26]

Job ake lani abango ndo so ayeke na lege ni pëpe

[Foto na lembeti 28]

Lot ahinga so Jéhovah ayeke mbeni Gbia so ayeke mä zo