Ye so Nzapa amû ti zi e afa kota ti mbilimbili ti lo
NA PEKO ti so Adam na Eve ake yanga ti Nzapa, Jéhovah asala tënë ti mungo mbeni Hale so fade a yeke mboko ndagere ti lo (Genèse 3:15). Hale ni ge ayeke Jésus Christ. A mboko ndagere ti lo na lâ ni so awato ti Nzapa afâ lo na ndo keke ti pasi (aGalate 3:13, 16). Na lege ti yingo vulu ti lo, Jéhovah Nzapa azia fini ti Jésus na yâ ti mbeni masia. A yeke tongaso si a dü Jésus na siokpari oko pëpe. Ni la, mênë ti lo so lo tuku ni na sese amû lege ti zi e azo, e so e wara siokpari nga na kui na peko ti Adam.—aRomain 5:12, 19.
Ye oko alingbi ti kanga lege pëpe na Jéhovah, Nzapa ti ngangu ahon kue, ti sala ye so lo ye. Ndani la, gi na peko ti so azo ake yanga, na lê ti Jéhovah a yeke mo bâ mo tene lo mû mbeni ye awe ti zi na siokpari ti azo. Na lo lingbi ti lë songo na azo so amä na bê so azendo so lo mû ayeke ga ande tâ tënë. Ye so amû lege na ahale ti Adam, azo ti siokpari tongana Hénoc, Noé na Abraham, ti tambela na Nzapa na même ti sala songo na lo sân ti buba dutingo ti lo ti nzoni-kue.—Genèse 5:24; 6:9; Jacques 2:23.
Ambeni zo so amä na bê na Jéhovah giriri asala akota siokpari. E yeke na tapande ti Gbia David. Me peut-être mo yeke hunda tele ti mo: ‘Tongana nyen si Jéhovah alingbi ti hiri tënë nzoni na ndo ti Gbia David, so asala pitan na Bath-Séba, na lo fâ koli ti lo Urie so?’ Kota ye ni ayeke so David agbian bê ti lo kue nga lo mä na bê na Nzapa (2 Samuel 11:1-17; 12:1-14). Jéhovah ahinga lani so Jésus Christ ayeke mû ande fini ti lo ti zi azo. Ni la, tongana David agbian bê ti lo, Jéhovah alingbi ti pardone lo, me na oko ngoi ni lo ngbâ lakue Nzapa ti mbilimbili (Psaume 32:1, 2). Ye so afa ni ayeke so Bible atene sandaga ti Jésus asala mbeni kota ye mingi, a “fa mbilimbili ti [Nzapa] na gigi, teti . . . Lo fâ ngbanga ti kozo siokpari pëpe” nga na ti “ngoi ti fadeso”.—aRomain 3:25, 26.
Biani, mênë ti Jésus ayeke na ngele mingi, na ye so amû lege na azo ti wara aye ti nzoni mingi. Na lege ti sandaga so, azo ti siokpari so agbian bê ti ala alingbi ti lë kota songo na Nzapa. Nga na lege ti sandaga ti Christ, a yeke zingo ande azo na kuâ ti duti na yâ fini sese ti Nzapa. Na popo ti ala, a yeke wara ande awakua be-ta-zo ti Nzapa so akui kozoni si Jésus amû fini ti lo na sandaga. A yeke zingo même azo mingi mingi so ahinga Nzapa ândö pëpe nga ala voro lo pëpe. Mbeti ti Nzapa atene so e yeke ‘ku londongo ti awakinda kue, azo ti mbilimbili, na azo ti kirikiri.’ (Kusala 24:15). Na ngoi ni kâ ande, na lege ti sandaga so, Jéhovah ayeke mû ande fini ti lakue lakue na azo so amä yanga ti lo (Jean 3:36). Jésus mveni atene: ‘Nzapa andoye sese so tongaso, Lo mû Molenge ti Lo ngengele oko, si zo so amä na bê na Lo alingbi kui pëpe, me lo yeke na fini ti lakue lakue.’ (Jean 3:16). Sandaga ti Jésus si amû lege na azo ti wara aye ti nzoni so kue.
Tâ tënë, sandaga ti Jésus aga na aye ti nzoni mingi na e. Me so la si ayeke kota ye ni pëpe. Kota ye ni ayeke ye so sandaga ni asala ndali ti iri ti Jéhovah. A fa so Jéhovah ayeke Nzapa so ayeke sala ye mbilimbili na yâ ye kue, Nzapa so alingbi ti sala songo na azo ti siokpari sân ti tene lo ga sioni. Tongana fade Nzapa aleke ti mû mbeni ye ti zi azo pëpe, ka zo oko pëpe, atâa Hénoc, Noé wala Abraham, alingbi ti duti kamarade ti Jéhovah pëpe. A yeke ye so wasungo psaume abâ ni, si lo tene: “O L’Eternel, tongana Mo bata tënë ti sioye, O Seigneur, ka zo nyen alingbi ti ngbâ?” (Psaume 130:3). Zia e kiri singila mingi na Jéhovah ndali ti so lo tokua Molenge ti lo so Lo ndoye lo mingi na sese ge, nga na Jésus so ayeda ti mû fini ti lo na sandaga ndali ti e!—Marc 10:45.