“A yeke ngbanga ti e ti mä Nzapa ahon ti mä azo”

A zi e na ‘mênë so ngere ni ayeke ngangu’

KOTA fä ti ndoye ti Jéhovah so ahon atanga ni kue ayeke so lo tokua Molenge ti lo ngengele oko ti mû fini ti lo so ayeke mbilimbili-kue tongana sandaga ti zi e. Teti so e yeke awasiokpari, na so mbeni zo so ayeke wasiokpari “alingbi ton ita ti lo pëpe, wala a mû ye na Nzapa ti ton ita ti lo pëpe . . . si lo lingbi ti ngbâ na fini lakue,” e yeke biani na bezoin ti mbeni ye so alingbi ti zi e na yâ ti siokpari ni (Psaume 49:7-10). E yeke biani na ngia ti bâ so Nzapa amû “Molenge ti Lo ngengele oko, si zo so amä na bê na Lo alingbi kui pëpe, me lo yeke na fini ti lakue lakue.”​—Jean 3:16.

Sandaga ti Jésus azi e tongana nyen? Zia e bâ aye osio so a zi e na yâ ni na lege ti sandaga ti Jésus so ayeke tâ kota fä ti ndoye ti Jéhovah na mbage ti e?

A zi e na lege ti sandaga ti Jésus

Kozoni, sandaga ti Jésus alingbi ti zi e na gbe ti siokpari so a dü e na ni. A dü e kue awasiokpari. Biani, même kozo si e doro andia ti Jéhovah, e yeke awasiokpari awe. Tongana nyen? Mbeti ti aRomain 5:12 atene: “Siokpari aga na sese so na lege ti zo oko [Adam], na kui aga na lege ti siokpari.” Ndali ti so e yeke amolenge ti wasiokpari Adam, e kue e ga awasiokpari. Ye oko, fini ti Jésus so lo mû na sandaga amû lege ti zi e na gbe ti ngbâa ti siokpari so (aRomain 5:16). Jésus ‘atara kui teti azo kue’, lo yô asioni ye ti peko ti siokpari ti amolenge ti Adam kue na ndo ti lo.​—aHébreu 2:9; 2 aCorinthien 5:21; 1 Pierre 2:24.

Use ni, sandaga ti Jésus alingbi ti zi e na gbe ti asioni ye so aga na peko ti siokpari. “Futa ti siokpari ayeke kui.” (aRomain 6:23). Na lege ti fini ti lo so lo mû na sandaga, Molenge ti Nzapa asara si azo so amä yanga ti Nzapa alingbi ti wara fini ti lakue lakue. Biani, “zo so amä na bê na Molenge ni pëpe, fade lo bâ fini pëpe”.​—Jean 3:36.

Bâ so e lingbi ti sigigi na gbe ti asioni ye so aga na peko ti siokpari ni gi tongana e fa na gigi mabe na Molenge ti Nzapa. So ahunda ti tene e gbian ambeni ye na yâ gigi ti e na e sara ye alingbi na ye so bê ti Nzapa aye. A lingbi e ke asioni ye kue so peut-être e yeke sara ni na e sara gi ye so amû ngia na bê ti Nzapa. Bazengele Pierre afa so a lingbi ‘e changé bê ti e, e changé lege ti e, si Nzapa alingbi ti mbô siokpari ti e’.​—Kusala 3:19.

Ota ni, sandaga ti Jésus asara si e duti pëpe na mbeni sioni yingo-ti-hinga. Azo kue so amû tere ti ala na Jéhovah na aga adisciple ti Molenge ti lo awara dengo bê (Matthieu 11:28-30). Atâa so e yeke awasiokpari, e yeke na ngia mingi ndali ti so e yeke sara na Nzapa na mbeni yingo-ti-hinga so sioni ayeke dä oko pëpe (1 Timothée 3:9; 1 Pierre 3:21). Tongana e fa asiokpari ti e na gigi na e dö lege ni e zia, Nzapa ayeke sara be-nzoni na e na e yeke duti pëpe na mbeni yingo-ti-hinga so ayeke fâ ngbanga na ndo ti e.​—aProverbe 28:13.

Ti osio ni, tongana e fa na gigi mabe na yâ sandaga ti Jésus, e yeke na mbeto pëpe na ndo tënë ti dutingo ti e na gbele Nzapa. Bazengele Jean atene: “Tongana mbeni zo asara siokpari, e yeke na Avocat na tere ti Babâ, Jésus Christ.” (1 Jean 2:1). Na ndo ti kusala ti Jésus tongana avocat, bazengele Paul atene: “Lo lingbi sö ala biani so aga nduru na Nzapa na lege ti Lo, teti Lo ngbâ na fini ti lakue lakue ti sambela teti ala.” (aHébreu 7:25). Tongana siokpari angbâ même gi kete na yâ tere ti e, e yeke duti ande lakue na bezoin ti Kota Prêtre Jésus Christ ti mû maboko na e ti duti mbilimbili na gbele Nzapa. Tongana nyen Jésus asara lani kusala tongana kota prêtre teti e?

Na ngu 33, lango 40 na peko ti so lo zingo na kuâ, Jésus akiri na yayu. Na yayu kâ, lo fa na Nzapa nene ti ‘mênë ti lo so ngere ni ayeke ngangu.’ Ye ti pekoni ayeke so na yâ ti kete ngoi Jésus ayeke zi ande na gbe ti siokpari nga na kui azo so amä yanga ti Nzapaa (1 Pierre 1:18, 19). Tongaso, Jésus alingbi biani ti tene e ndoye lo nga e mä yanga ti lo, ni la pëpe?

Na ndo ni, a lingbi e ndoye Jéhovah Nzapa na e mä yanga ti lo. A yeke na lege ti ndoye si lo sara si Jésus aga lani “ye ti ton e”. (1 aCorinthien 1:30). A yeke ndali ti lo si laso e yeke gi na fini pëpe me nga e yeke na beku ti wara fini ti lakue lakue. Tongaso, e yeke na anda ti tënë mingi ti “mä Nzapa ahon ti mä azo.”​—Kusala 5:29.

[Kete tënë na gbe ni]

[Encadré/Foto na lembeti 9]

MO HINGA AYE SO?

• Jésus ama na yayu na ndo ti Hoto ti Oliviers.​—Kusala 1:9, 12.

• Gi abazengele be-ta-zo ti Jésus si abâ lani guengo ti lo na yayu.​—Kusala 1:2, 11-13.